مريت بلحظة صعبة اوى اوى

[مس عسل]

السلام عليكم ورحمة الله وبركاتة
طبعا جاية عشان افضفض وهوا انا ليا غيركوا مهوا محدش بيسمع ولا يهتم برة
المهم امبارح ماما كانت خارجة مع ابن خالتى عشان حيشوفوا عروسة وكدة
وراحت معاة ولما رجعت سالتها ها احكيلى عملتوا اية
قالتلى العروسة كويسة ودكتورة صديلانية ووالدها مهندس بترول ومامتها مدير عام واخوها دكتور واخوها الصغير مهندس مش عارفة لية لما سمعت كدة اتضايقت اوى وقلت طب وهوا انا لما اتجوز حقولة انا مين وابويا اية وامى اية تقريبا حسيت انى ولا حاجة انا كنت زمان نفسى اخش كلية صيدلة بس حلمى ضاع بسبب اهلى ودلوقتى نفسى اخش سياحة وفنادق بس حاسة انى مش حدخلها بردوا لان تقريبا مفيش مذاكرة كويسة ولا امال ولا طموح وبقى كلة عندى عادى وكبرى دماغك وفكك
لان تقريبا ثقتى فى نفسى بقت -100 تحت الارض
ووصلت لحالة غريبة جدا جدا اول مرة اشوف نفسى فيها انا بقول يمكن من ظروف البيت
اصل بابا وماما متخانقين بقالهم حوالى 3 سنين ومش بيكلموا بعض من ساعتها وماما كانت على علاقة بواحد تانى وبابا ماشى مع ستات الارض كلهم وانا اتخطبت واتسبت مرتين بسبب السمعة الزبالة دى
انا دلوقتى بكرة نفسى وبكرة اى حد يكون احسن منى عشان انا معرفتش ابقى حاجة
وبكرة اى حد بيفرح عشان انا مش بفرح وبكرة اى واحدة بتتخطب وتتجوز عشان انا مش بتجوز ويوم ما بتخطب بتساب بسبب اهلى ومش بحب اروح افراح لانى حاسة انى عمرى ما حعمل فرح وحاسة انى حبقى ولا حاجة ومهما عملت مش حوصل لحاجة انا زمان كانت عيلتى متوقعة انى حخش كلية طب لانى معروفة بتفوقى الدراسى على مرور الاعوام بس من ساعة مدخلت ثانوى والمشاكل فى البيت بدات وانا مكنتش بذاكر خالص وتعبت ودخلت مستشفى نفسى وعدت السنة بس حولت قسم ادبى ويا رتنى حتى واثقة انى حدخل سياحة وفنادق لان مركزها مرموق نفسى ابقى حاجة بجد عشان يوم ما يجيلى عريس اقولة انا كذا واحط صوباعى فى عينة بس شكل دة مش حيحصل لان كل يوم فى البيت خناق وزعيق وانا بتاثر بسرعة وبعيط وساعات بيغمى عليا وهوا مش بيراعوا ان نفسيتى بتتعب انا حاسة انى بقيت معقدة نفسيا جدا
ولازم قبل اما انام افتكر كل حاجة وحشة فى حياتى وانا معيطة كل يوم وكل اما اصحى واجى اضحك الاقى الهموم اللى انا سبتها قبل ما انام رجعت على راسى تانى وبدل ما اضحك اكشر
انا على طول وشى حزين ومكشر ودموعى على عيونى دايما زعلانة
نفسى ولو مرة اقوم من النوم واستقبل يومى وانا فرحانة
الناس كلها ادخلة على عيد وعيد سعيد عليكوا وانا مش فرحانة
الناس اللى بتتخاصم بتتصالح عشان العيد ايام مباركة
واحنا فى البيت بيتخانقوا انا بجد زهقت ولا يوم فى حياتى فرحت

انا اسفة لان كلامى مش مترتب بس انا بفضفض وانا منهارة ومش لاقية حد يسمعنى
لانى تقريبا ولا حاجة ومش بفرق عند اى حد كلوا بيبيع فى الاخر

[yara.yara]

الله يصبرك ياحبيبتى
ان بعد العسر يسر
معلش يا قمر استحملى وادعى ان ربنا يفرج كربك
وسلى وقتك وحاولى يبقى عندك نشاط عشان تشغلى وقتك
والله ياحبيبتى كل حاجه وليها حل بإذن الله
وماتخافيش من بكره لأن ربنا موجود
وربنا يهديلك اهلك يارب
وكل سنة وانتى طيبة
انزلى واخرجى مع اصحابك ولا يهمك حاجه
وان شاء الله اللى ربنا كاتبهولك هاتشوفيه لورايدلك تتجوزى هاتتجوزى
قوليلى بقى جبتى لبس العيد وللا هاتقولى اصل ماليش نفس???????????
مستنيه ردك
ولوعوزتى اى حاجه ولو عوزتى تتكلمى مع حد انا تحت امرك

[ام 3 حلوين]

سلامتك يا حبيبتي من كل الهموم دي وربنا يفرجها عليكي
اسمعيني كويس وانا زي اختك كل الهموم والمشاكل بتروح لو لجانا الي الله ارجعي لربنا وشكيله همك وصلي واستغفري وتوبي الي الله واتمسكي بدينك ودا اهم شئ انتي في اختبار ممكن تخرجي منه انسانه صالحه 100% او ممكن تخرجي منه خسرانه كل شئ حتي دينك
الدنيا مش كلها جواز وكليه وومناصب وفلوس لا يا حبيبتي اهم حاجه انتي ايه عند ربنا انتي ماخده شهاده بانك ايه؟ صوامه قوامه لليل متصدقه صااااااابره وحامده ربنا دا المهم وكل الحاجات الدنيويه بتيجي بعدين
نصيحتي سيبي كل البنات اللي انتي ماشيه معاهم واكيد عندك في المدرسه او في عيلتك بنات ملتزمين بجد ملتزمين لربنا اتعرفي عليهم وخليكي معاهم ولو ملقتيش روحي للمساجد واتعرفي علي البنات الصالحات هناك وخليكي معاهم وانا تحت امرك لو عوزتي اي حاجه وربنا يفرج همك وهم كل مهموم

[noorelhoda]

السلام عليكم ورحمه الله وبركاته
اختى الصغيره مس عسل بدايه كل عام وانتى بالف خير
واحنا هنا كلنا اخوات بنفضفض ونتكلم ونفرح ونحزن وعلى قدر المستطاع
نحاول مساعده بعضنا البعض والحمد لله انك لجأتى لمنتدانا فالصحبه محترمه
والحمد لله
لن اتبع معك يا مس عسل اسلوب المحلل النفسى ولكن كل ماقلتيه وحكيتيه أوجد عندك
حاله من عدم الثقه بسبب الظروف المحيطه بك
قال الله تعالى
بسم الله الرحمن الرحيم
قل يا عبادى الذين اسرفوا على انفسهم لا تقنطوا من رحمه الله
صدق الله العظيم
يا صغيرتى هناك اناس نموا وترعرعوا فى بيئه فاسده ولكنهم لم يستسلموا
ولم يفشلوا بل زادتهم هذه الظروف صلابه وقوه
هذا ليس كلام انشاء بالعكس انا شخصيا رأيت نماذج مرت بظروف صعبه لا يعلمها الا الله
ومع ذلك لم تتوقف حياتهم
لم تتوقف مسيرتهم
انا معك فى ان الظروف تؤثر على حياتنا ولكن هناك من يهيأ تلك الظروف لمصلحته هو
اعرف شقيقان تربوا مع اب وام حياتهم شبه منفصله والام والاب كلا منهم فى واد
والاب حياته فاسده فاسده والام كذلك
فأنظرى للشقيقان الان
واحد منهم دكتور فى علم البيولوجى ويدرس فى اعرق الجامعات
والاخر لم يكمل دراسته وعاطل ويصادق اصحاب السوء ويتردد دائما على اقسام الشرطه
واسمه معروف عندهم
انظرى للأثنان
اليسوا اشقاء؟؟؟؟؟؟؟
الم يتربوا معا فى نفس البيئه والظروف
أتعلمى ان هذا الرجل الصالح دكتور البيولوجى لم يتهرب يوما من ماضيه بالعكس
كلما يتطرق الاخرون لقصته وحياته يفرح ويشعر بالفخر لانه مر بكل هذه الظروف ومع ذلك وقف صلبا متماسكا
حتى وصل لاعلى المراكز العلميه
حاولى يا ميس عسل ان تروضى ظروفك
ضعى امامك هدف معين وهو العلم والدراسه وقبلهم التقرب الى رب العالمين
وتوكلى عليه فمن توكل على الله فهو حسبه
لا تجعلى الشيطان يوهمك بأنك فاشله بأنك لن تلتحقى بالكليه التى تتمنيها
بأنك لن تستطيعى الحياه فى مثل تلك الظروف بأنك لن تتزوجى
لا تجعلى الوسواس الخناس يدخل لك من نقطه ضعفك
قوى تلك النقطه حتى لا تصبح ضعف بل قوه
لا تحتكرى نفسك
لا تتهمى نفسك بالفشل والضياع والغباء
فهذه الالفاظ لها عامل السحر فى تحطيم النفس
خطر خطر خطر ان تقولى ذلك
لأن من زرع بداخله وترسخ بعقله اشياء سلبيه
فلن يكون الا شخص سلبى بكل ما تحمله الكلمه من معنى
حبيبتى ارجوكى ارجوكى لا تنتقصى من نفسك ابدا حتى لو كانت ظروفك اقمع من ذلك
مهما حدث وحصل الجأى لرب العالمين فهو كفيل ان يبدل مافى القلوب
وعندما يراك تتقربى اليه فسيتقرب هو منك انه الرحمن الرحيم بنا
تقربى لله وتوكلى عليه واعلمى ان الله بيده كل شئ
فلا داعى للقلق من الحاضر والمستقبل
واذكرى الله دائما
الا بذكر الله تطمئن القلوب

[zoozaa]

لا حول ولا قوةالابالله
شوفي ياحبيبتي ده برده مش مبرر لازم تكوني كويسة وتبذلي كل جهدك وتثبتي للناس كلها انك احسن واحدة باخلاقك انتي وتعليمك وثقافتك حتي لو كل اللي حواليكي مش كويسين

[مس عسل]

الله يصبرك ياحبيبتى
ان بعد العسر يسر
معلش يا قمر استحملى وادعى ان ربنا يفرج كربك
وسلى وقتك وحاولى يبقى عندك نشاط عشان تشغلى وقتك
والله ياحبيبتى كل حاجه وليها حل بإذن الله
وماتخافيش من بكره لأن ربنا موجود
وربنا يهديلك اهلك يارب
وكل سنة وانتى طيبة
انزلى واخرجى مع اصحابك ولا يهمك حاجه
وان شاء الله اللى ربنا كاتبهولك هاتشوفيه لورايدلك تتجوزى هاتتجوزى
قوليلى بقى جبتى لبس العيد وللا هاتقولى اصل ماليش نفس???????????
مستنيه ردك
ولوعوزتى اى حاجه ولو عوزتى تتكلمى مع حد انا تحت امرك

متشكرة يا يرا على الرد وانتوا هنا كلكوا اخواتى
عاوزة اقولك فعلا انى مجبتش لبس العيد ولا اى لبس بس مش عشان مليش نفس
عشان ابويا مش بيصرف علينا وبخيل جدا ومضضيع فلوسة على الستات اللى برة
ربنا يصبرنا بقى

[high wave]

حبيبتى مس عسل ربنا معاكى وممكن لو عندك اراده انك تغيرى حياتك كلها ياما فى ناس اهلهم منفصلين وعرفوا يرتبوا حياتهم صح ومفيش حاجه اثرت عليهم اهم حاجه الاراده والتصميم انك تغيرى حياتك وتعملى حياه جديده ليكى غيرى اصحابك وغيرى رقم تلفونك وخليكى مع ربنا واتعرفى على صحبه صالحه من الينات الملتزمات صدقينى هتلاقى حياتك اتغيرت وموضوع الجواز دا نصيب لو ليكى نصيب انك تتجوزى هتتجوزى وانتى بتقولى انك مريتى بتجربتين خطوبه ادى لنفسك فرصه وانسى الارتباط لفتره على ما تغيرى حياتك واجتهدى فى المذاكره لسه قدامك فرصه انك تذاكرى وتتجتهدى ولكل مجتهد نصيب خلى عندك ايمان بربنا قوى وربنا معاكى ويقويكى ........

[يسرمن الله]

اختى( مس عسل ) لا احب اسمعك تتكلمى باليأس ده وانتى فى ايام جميلة ايام العشر من ذو الحجة انسى اى سبب يجعلك تحزنى وتخافى من المستقبل وتدمرى نفسك كده ومش عاجبنى لوتسمحى لى انك تفكرى فى مستقبلك بالطريقة دى ( كبرى وفكك) حبيبتى او تضيعى مستقبلك مش هتلومى حد غير نفسك بعد كده ولو الظروف عندك ضدك حاولى انتى تبدائى بنفسك بصى من انهارده ان شاء الله صلى قيام الليل وادعى الله واخلصى له وتضرعى وافتحى قلبك للمذاكرة هى سلاحك صدقينى ذاكرى وحاولى تثقى بنفسك وحبى كل اللى حواليكى بكل عيوبهم عشان تقدرى تعيشى انا ملاحظة انك ناقمة عليهم مهما كان دول اهلك
ادعوا الله ان يفرج همك ويشرح صدرك وويسر لك امرك ويرزقك ان شاء الله بالزوج الصالح اللهم امين

[yara.yara]

طيب بصى انا برضه ماجبتش لبس عيد
لكن عملت ايه بقى
عشان احنا بنلبس عبايات سمراء فطبعا خروجنا كله بالعبايه
روحت اشتريت بيجاما وغسلتها كويس وحطيت لها سائل معطر اللى هوه داونى او كمفورت
وبعدين جبت طرحه كانت عندى فيها الوان البيجاما ولفيتها على بنطلون البيجاما كأنها حزام او كأنى متحزمه والطرحه كان ليها شراشيب وااخدت حمام دافئ وسرحت شعرى بطريقه مختلفه عن العادى ولبست شراب يليق على البيجاما
وبس ادينى قاعده فى البيت بس احساسى نفسه مختلف
مع ان الملابس دى ملبوسه قبل كده يعنى 3 او 4مرات
بس حسيتها مختلفه عشان اللى انا عملته ده فيها
انتى برضه حاولى تحسسى نفسك بالفرحه حتى لو باللبس او اشترى حتى كيس بلالين وعلقيهم فى الغرفه او الريسيبشن
وانا مش عايزاكى تبقى زعلانه ابدا وماتنسيش ان لينا رب اسمه الكريم الوهاب الرزاق الرحمن الرحيم
ورينى بقى هاتعملى ايه فكره جديده للعيد

[مس عسل]

مشكورة اوى اوى اوى بجد على ردودكم دى بجد عيطت من قراءة الردود
وفعلا انا ابتعدت من فترة عن ربنا خالص واقطعت الصلاة والقران والاذكار
رغم انى كنت مواظبة وكنت بختم القران فى الشهر بس اظاهر انة تنبية من ربنا عشان ارجع تانى
واكيد ربنا بينبة العبد اللى بيحبة مش صح بردوا
انا لو عليا عاوزة اقوم دلوقتى بجد استحمى واتوضى واصلى واترمى فى حضن ربنا واعيط
بس ما بأيدى حيلة عليا الدورة الشهرية يعنى حتى يوم عرفات مش حعرف اصومة وصلاة العيد مش حصليها
حاسة ات ربنا بيعاقبنى بس مش مشكلة انا على الاقل حسمع قران على الكمبيوتر واقرا اذاكار بردوا
وفى يوم عرفات ان شاء الله حفطر صايم وحنزل اروح المسجد وحقعد مش حصلى بس اشارك الناس فرحتهم
بجد انا زعلانة من نفسى اوى انى بقيت اكرة الفرح لحد انا كدة انانية مهم اكيد بردوا عاشوا ايام كلها حزن وهم ولما يجى اليوم اللى ربنا يفرحهم فية ابقى زعلانة تصدقوا ان انا وحشة اوى بس انا مش وحشة والله بس هى الظروف للى خلتنى كدة بقالى 4 سنين معرفتش الفرحة انا مشتاقة انى افرح اوى اوى اوى
ادعولى يا رب على نهاية السنة انى اجيب مجموع كويس وادخل كلية سياحة وفنادق اللى انا عاوزاها
ارجوكم كل بنت تعتبرنى اختها وتدعيلى كل ام تعتبرنى بنتها وتدعيلى ربنا يخليكوا انا مليش غيركوا بجد
ادعولى بالهداية والصلاح ادعولى انى مبعدش عن ربنا تانى ادعولى انى اقوى ايمانى
وبجد بجد وانا بوعدكم والوعد ادام ربنا انى شغلى الشاغل الان حيكون دراستى وان شاء الله حاجلكم بعد الامتحانات وافكركم واقولكم انا اهوة انا جلامور ودخلت الكلية اللى انا عاوزاها بفضل ربنا وبفضل دعاؤكم ليا
ومش حفكر فى موضوع الجواز دة تانى انا اغلب الناس اللى يعرفونى ويعرفوا ان خطيبى سابنى بيقولولى هوا الخسران بس طبعا لانهم ميعرفوش السبب الحقيقى بس فعلا عندكم حق اللى عاوز يتجوزنى حيتجوزنى انا طالما انا كويسة ومالهوش دعوة باهلى ولو معلمش كدة يبقى مش راجل ولا يستاهل كلمة رجولة فى بطاقتة اساسا
وبعدين انا كنت النهاردة بدور على حاجة معينة وكنت حموت والاقيها بس ملقتهاش ولما قولت مش مهم مش حدور عليها دلوقتى بعدين لقتها بالصدفة ادام عينى من غير ما ادور وانا حعمل كدة بالظبط فى موضوع العريس دة انا مش حدور على عرسان تانى اللى عاوزنى يجينى انا مبروحش لحد (ههههههههههه حنهزر بقى) وانا دلوقتى دراستى وبس عشان احقق ذاتى ادام نفسى وابقى فخورة بنفسى وانا متاكدة انى كويسة وجميلة واحسن الناس تتمنانى بس انا اهتم بنفسى شوية واعزز نفسى واكيد ربنا حيبعتلى نصيبى
بجد متشكرة ليكوا انتوا غيرتوا حالتى النفسية تماما ربنا ينولكم مرادكم ويحققلكوا امانيكم ويهدلكم العاصى ويقربلكم البعيد قولوا امــــــــــــــــــــــــــــ ــــــــــــــــــــــين
انا حستاذنكم بقى عشان حروح اساعد امى فى فرش البيت اهو نجدد شوية من روتين البيت عشان منزهقش وححاول اجدد شوية من غرفتى كدة عشان ارتاح نفسيا بردوا
ربنا يخليكوا ليا يا رب
بحبكم فى الله

[bichebicha1]

السلام عليكم


أختي الصغيرة مس عسل
أولا كل سنة و أنت طيبة
فعلا الظروف أقصد المشاكل العائلية
تحبط الانسان و تؤثر عليه و لكن هناك من يستسلم لها
و يجعل من نفسه فريسة لهذه المشاكل
و يتخلى عن طموحاته و عم احلامه
و لكن فيه فئة من الناس يخلقون من ضعفهم قوة
بل كلما تدكروا وضعهم السيء يزيد اصرارا على التحدي
و يقول لازم أنشل نفسي من هذا الوضع
على أن أنجح علي أن أحقق ذاتي أن أحقق احلامي
و إذا أردت تحقيقي هذا علي ان أثور على مشاكلي العائلية
علي أن اتحداها و أتبث وجودي .
لا تقولي أن الخطاب سيسمحون فيك نظرا لسمعة أهلك ...
لا يا أختي بل هناك من سيحييك على شجاعتك
أنك استطعت أن تحققي أحلامك و في نفس الوقت لم تتأثري بالوضع
و حافظت على نفسك و كنت مثلا للبنت المتخلقة المتدينة التي تخشى ربها
كما قالت أختي نور الهدى لا تظني كلامي هذا كلام انشاء بل أقوله لك من الواقع .
والله ثم والله ذات يوم قابلت انسانة في عملي أتت للتدريب عندنا
فتاة متخلقة و متدينة و خجولة كل من رآها يحبها .
من اجل التدريب كانت تنتقل من مدينة الى أخرى ذات يوم لم تجد وسيلة نقل للتنقل
فعرضت عليها أن ترافقني لبيتنا و فعلا و في الليل بدات تحكي لي حكايتها لم اصدقها
الى درجة بدات اقول لها هل أنت واثقة ان هذه أمك قالت نعم امي كانت تمنعني من الصلاة
و تضربني من الوراء و أنا منحنية في الصلاة كانت تأتي بصديقاتها الىالمنزل و يسهرن
تمر مع صديقها من وسط الحي أمام بيتنا و لا أحد يقدر أن يناقشها بل أكثر من هذا طمعت في
خطيب أختي..................كثير و الكثير حكته ....
هل تعرفي باجتهادها و كفاحها لقد وصلت إنها مهندسة و تزوجت لأن من تزوج بها اختاراها هي
بغض النظر عن أهلها بل حتى أخواتها تزوجوا .
أي لما ياتي نصيبك لا توجد قوة تمنعه لا وضعك و لا تصرفات أهلك ...
ضعي يقينك في الله و توجهي الى الله أختي
و كافحي من اجل الوصل و اختاري شيء تحبيه و ادرسيه لتحققي النجاح .
الله يوفقك و الله يفرج كربتك

[رشا اوشا]

السلام عليكم مس عسل

انا قريت قصتك وعلى فكره انتى فكرتينى بواحده جارتنا

مش قادره اوصفلك سمعتهم عماله ازاى البنات ومامتهم

طبعا الاب متوفى والام بتاخد معاشه اتقدم لبنتها الكبيره واحد خدته منها وراحت اتجوزته عرفى عشان المعاش ميتقطعش زبااااله يعنى

وطبعا بناتها الله يستر عليهم وسبحان الله بناتها كلهم اتجوزوا احسن جوازات عارفه ليه لان ده مكتوب لهم

بغض النظر عن سمعتهم انهم هيتجوزوا فلان وفى الوقت الفلانى

مش معنى كده انى بقولك انهم كانوا صح لاء طبعاااااااااااا انا قصدى انك متخافيش لو ليكى نصيب فى شىء هتشوفيه بغض النظر عن اى حاجه

وربنا يرزقك بزوج صالح يكون فاهم انك مالكيش ذنب فى اى حاجه بس لازم انتى تحسنى من نفسك عن طريق دراستك

ولازم كل اللى حواليكى يبقوا عارفين انك انسانه محترمه رغم اللى بتعانيه

[my snow white]

اختى الصغيره مس عسل اولا كل عام وانتى بخير وكل الاخوات فى المنتدى بخير
بصى يا جميل اغلب الاخوات جزاهم الله خير حكولك امثله كتير علشان تعرفى فعلا انك مش لوحدك وانا برضه هضيفلك حكايه واحده من اعز صديقاتى كانت تقريبا حالها من حالك وكانت مشاكل البيت فعلا بتوصل لفضايح يعرفها كل الناس .وحتى الفضفضه مع حد على النت او اخذ اراء الناس مكنش موجود كانت بتكتم كل مشاكلها جواها وحولتها لطاقه ايجابيه بدل ما تكتئب وتنعى حظها وانا اتعرفت عليها واحنا طلبه فى الكليه عارفه فى كليه الطب يعنى حققت حلمها وقدرت رغم الظروف تستمر وتنجح واتخرجت واشتغلت واتجوزت من دكتور زميل لها ودلوقتى ماشاء الله لها حياه مختلفه وابناء بتحاول وتجتهد انها تعيشهم زى ما كان نفسها تعيش.ودلوقتى خلص وقت الكلام والنصايح وجه وقت الفعل
اولا زى ما الاكل نصحك اهم شئ رجوعك لدينك ولربك وعجبنى ردك وان شاء الله ربنا يقويكى وترجعى ملتزمه كما كنتى
ثانيا السنه الدراسيه يعنى فى نصفها ربنا يعينك وان شاء الله تقدرى تحققى حلمك وعلى فكره اهم شئ شخصيتك انتى ايه يعنى مش لازم بنت فلان او علان اهم حاجه انتى مين وشهادتك ايه واخلاقك ايه ومتدينه ولا لأ يعنى لازم تحطى هدفك وممكن تكتبى لوحه قدام مكتبك تفكرى نفسك عايزه تبقى ايه وليه وربنا معاكى باذنه ومشيئته ركزى فى دروسك واجتهدى قوى انا طبيبه والله كنت فى الثانويه العامه دى حطيت كل التركيز فى سنتين كاملتين على انى عايزه ابقى ايه يمكن والله نسيت الخروج والدنيا والناس علشان كنت برضه بتحدى نفسى واتحدى بعض اقربائى اللى كانوا شايفين انى مش هقدر والحمد لله على كل حال
ثالثا عرسان ايه يا قمر انتى لسه صغنونه قوى سيبك من الموضوع ده دلوقتى واعرفى ان ربنا معاكى ومش هيسيبك ومقدرلك رزقك بمشئته ورحمته وكمان معلش العريس اللى هيجى لبنوته فى ثانوى هيبقى اقل بكتير قوى من عريس جاى لبنت جامعيه محترمه وعسل زيك كده
رابعا احنا هنا كلنا اخواتك وممكن نفتش عليكى بتذاكرى ولا لأ ويمكن نراجعلك كمان ذاكرتى ايه وربنا يعينك باذن الله
خامسا انا فى ايام الحج ان شاء الله وهدعيلك باذن الله فى رمى الجمرات وربنا يتقبل وارجو من كل اخواتنا الدعاء لاختنا مس عسل وربنا يثبتنا جميعا على الطريق المستقيم

[marwasamy mosta]

حبيبتى انا حاسة بيكى جداااااااااااااااااااااااااااااااااااااااااااااااا واتمنى من الله ان يسترك ويحقق لك كل خير ومعلش ادعى لابوكى ربنا يهدية ولامك كمان
عارفة انا لما اتطلقت من ابو ولادى قعد سنين ما بيصرفش عليهم خالص وبنتى اتعقدت من كل حاجة ومن كل الدنيا وعشت وما زالت وقت كتير صعب بس كل ما اتخيل الاسوء اقول الحمد لله على حالى وبحاول دايما الجا لربنا علشان يرحمنى من الهم والحزن والحمد لله ربنا بيسترها معى ومع ولادى
خليكى دايما قريبة من ربنا وخلى محنتك منحة من ربنا تزودى بيها حسناتك وتقربى من ربنا اكتر وياما ربنا بيسترها مع بنات وبيكرمهم من عندة بالزوج الصالح مهما كان مستوى تعليمها او مستوى اهلها ...........يا نور عينى الزواج دة رزق من ربنا ادعى واستغفرى على طول وسيبيها لله يا ستى لو مش لاقية عندك مؤهلات دنيوية لتنالى زوج كويس خلى عندك مؤهلات دينية افتخرى بدينك احفظى على قد ما تقدرى من القران
والله انا اخى تزوج بنت فضلها على اخرى بسبب انها حافظة القران الكريم لسة فى فالدنيا شباب بيتقوا الله اعملى بس انتى اللى عليكى وسيبى الباقى على ربك ..ومن توكل على الله فهو حسبة
اسفة للاطالة نفسى اقولك واقول للى اتظلم او بيتظلم كتير بس مفيش احلى ولا اجمل من الدعاء الى الله

[ام اسيل وايه]

الله يكون في عونك
تقربي الي الله وان شاء الله اتكوني احسن
والله يهدي والديك