لما يهل هلاله ...............

[omrody2005]

يا حبيبتي يا هند حاسه بيكي وأنتي عارفه ليه

بصراحه أنا ماجربتش الغربه بس عارفه أنا لما بخرج خارج مدينتي خارج حدود المربع السكني اللي أنا عايشه فيه عمري

بحس أني في غربه


الله يهون غربتكم بقولك أيه تأقلمي بقي عشان ما تحسسي زوجك أنه وجوددة معاكي ما له تأثير

وعشان نفسيته ماهو كمان أكيد زعلان بس مستحمل

[***DoDi***]

والله كل سنة من عمرى اللى فات كنت بافرح جدا بقدوم رمضان
واغنية " اهلا رمضان "
كأنى زى العيال
رمضان عندى كان له طقوس مختلفة
ومش عارفة ليه كل ما تيجى سيرة رمضان افتكر حى الحسين
انا رحت الحسين قبل كده بس عمرى ما رحته فى رمضان
مش عارفه ليه مرتبطين عندى ببعض

بس اكيد رمضان السنه دى هايختلف عن كل سنة
لاول مرة هاقضى رمضان لوحدى فى البيت
امى رحمها الله _ توفت 23 رمضان الماضى ــ
ورمضان ده مش متخيلة هاقعد ازاى على السفرة لوحدى عشان اكل
صحيح كل يوم باقعد لوحدى وايام باكون صايمة
بس اكيد فى رمضان هتلاقى كل المعارف والقرايب عاوزين يعزموكى
ياخدوا فيكى ثواب
بس انا باكرة احساس الشفقة

هافطر فى البيت
وافتكر امى وادعى لها
واقرا قران
وبس

ربنا يعدى رمضان على خير

[azmiralda000]

ربنا يغفر لامك و لاموات المسلمين اجمعين

ربنا يهون وحدتك و يكون رمضان خير عليكى يارب

يمكن وحدتك دى تكون ملاذ ليكى مع الصلاة و القران و الدعاء

عارفة الصحابة كانوا بيقولوا انهم فى رمضان بيختارو كذا دعوة و يدعووها كتير كتير و بيقولوا ماكانش بيعدى علينا رمضان اللى بعده غير و الدعوة استجابت

اللهم استجب دعائنا يااااااااااااااارب

[فاطمة الزهراء10]

[اميرة صلاح]

بفتكر جدتى اللة يرحمها وكمان العيد ايام ما كنت صغيرة ومقدرش انام الا لما البس شراب وجزمة العيد حفظكم اللة يعنى حزن على فرح

[ZOZOOO]

رمضان ده بركة وعبادة وطاعة والله يابنات وقته كله بركة مع الصيام أحسن شغل والله وأحسن أكل وأنت صايمة بس أنا مسافرة مش فى مصر الحمد لله البلد جميلة وأغلب عاداتها زينا كنافة وقطايف ولمة وأصحاب كتير مصريين ولكننننننننننننننن تفتكرى لمة العيلة والعياط يشتغل وأتمنى أروح ولو يوم واحد الحمد لله
أختى دينا الله يرحمها ويسكنها الجنة ويصبرك أنا عارفة فراق الأم أصلى مجرباه0

[azmiralda000]

رمضان جانا و فرحنا به بعد غيابه
اهلا رمضان

[azmiralda000]

فينكم يا بنات

تعالوا ونوسونى

[امورة مصر]

انا اول ما بفتكر رمضان
او اشوف فانوس
او يجيبوا فى التلفزيون صورة فانوس و لا حى الحسين و لا الياميش

اى حاجة توحى بشهر رمضان

بتخلى دموعى تنزل على خدى

بفتكر مـــــــــــــــصـــــــــــــــــــــر

بفتكر امى و اختى

اللمة و الفطار الجميل

التراويح و اذان الفجر

آآآآآآآآآآآآآه ه ه ه ه ه

حبيبتي يا ام ياسين ربنا يقربلك البعيد و ينولك كل اللي في بالك يا رب و ميحرمكيش من مامتك و اختك و اهلك كلهم يا رب

[marwasamy mosta]

حبيبتى ام سيسو اول ما بلاقى موضوع ليكى بدخل اشوفة علطول كل سنة وانتى وكل المسلمين بخير ويارب كل واحد اتمنى حاجة تتحقق.اما عن رمضان ففى حاجة غريبة قوى حصلت لى من ساعة ما تزوجت من 14 سنة وهى ان كل ما رمضان يجى او اسمع الاغانى بتاعتة افضل اعيط لية مش عارفة من اية والله ما اعرف ربنا يبلغنا رمضان على خير ونصوم ونقوم الليل ونختم القران ونعيد وننبسط والسنة الجاية تكونى معانا فى مصر ..............قولى امين

[sama_sehab]

اولا كل سنه وانتوا طيبين وبخير وصحه وسعاده

ده ان شاء الله رمضان رقم 6 بعد زواجي ورقمر 5 اقضيه هنا قضيته مره في مصر

طبعا بافتكر كل لحظه في مصر ولمتي انا واخواتي واحنا صغيرين ولمتنا علشان نشوف بوجي

وطمطم وبعدين لما كبرنا شويه النينجا ههههه اد ايه بتوحشني الايام دي

ياااااه اجمل ايام وهنا طبعا ما فيش اي مظاهر للاحتفال بيه حتى الادان ما كنتش باسمعه

كنت باعرف مواعيد الصلاه من ورقه لحد ما نقلت سكن جديد الحمد لله جنب مسجد وان شاء

الله هاسمع الادان في رمضان ودي اكتر حاجه مفرحاني السنه دي

ربنا يهون غربتنا جميعا