جت الحزينه تفرح ملقتلاهاش مطرح

[تردد]

اذيكوا وحشتونى قوى والله بقالى كام يوم مدخلتش المنتدى علشان كنت بشتغل من 9 صباحا :6مساء يادوب كنت باجى على النوم
انا سيبت الشغل امبارح عارفين ليه سبب حبيت اقولهولكوا علشان تشوفوا الناس بقت عامله ازاى
سيبكوا من ان الشغل صعب ادينى كنت بتعلم وكان واضح تطور بس واحده واحده
الى مشانى ايه بقى ياحلوين الست الى هناك الى هيا اوفس بوى من ساعه مارحت وهيه ارشه ملحتى فاكرانى اثرت على شغلها متفهموش غلط انا كنت مساعده مديره المكتب طب ازاى ااثر عليها معرفش اسالوها المهم هيه مش عايزه تحس ابدا انها اوفس بوى اوك مفيش مشاكل متكبرتش عليها لان ده مش طبعى اصلا المهم قاعدين نهزر وهيا مبتعملش قافله اما تفتح متتسدش وفى وسط الهزار قامت قايله ( طب انا الحمد لله ربنا انعم عليا وبقيت ام) اتصدمت هوه الكلام ده ينفع يكون هزار رديت عليها وقلتلها انا ليا فالجنه قعدت تقول ايه ده انتى زعلتى دانا بهزر ومقصدش والكلام ده
انا والله لو متاكده انها قالت كده بنيه هزار كنت عديتها انما هيه قعدت تفكروبعدين قالت الكلمه انا محستش ابدا انه طالع صافى
المهم انى فضلت قاعده ماسكه نفسى ييجى 10دقايق بس والله مقدرتش وقمت عيطت فالحمام او انهرت وبعدين طلعت مشيت هيه عرفت ازاى توجعنى وانا زعلانه عشان مقدرتش امسك نفسى بس والله غصب عنى
انا سيبتلها الشغل خليها تفرح بيه بس كنت عاوزه اوريكوا الناس عاملين ازاى كل واحد محشور عنده كلمه يقولها وبعدين يعمل انه بيهزر
ربنا عالم انا كنت محتاجه الشغل ده اد ايه حسبى الله ونعم الوكيل

[. تيوليب***]

حبيبتى انتى حتسيبى شغلك علشانها ؟؟؟
يبقى نولتيها مرادها
هى جرحتك جرح جامد جداً
بس خلى بالك مش يمكن ربنا ميباركلهاش فى النعمه اللى بتغيظك بيها - آسفه على التعبير -
مش يمكن اولادها اللى بتتباهى بيهم وتضايق وتجرح الناس بالنعمه اللى ربنا عطاها لها
مش يمكن يبقوا عاقين لها؟
والله فكرتنى بالرجل اللى فى سورة الكهف ( صاحب الجنتين ) اللى تباهى على اللى معندهوش اولاد ولا مال
وربنا حرمه من نعمته
لأننا إن مشكرناش ولا تعالينا على الناس بهذه النعمه
أكيد ربنا حيزول النعمه دى
انا لو منك ارجع شغلى فوراً
وخلى اصحاب الشغل معاكى فى الصوره علشان محدش يقول عليكى ان انتى اللى وحشه
ومتخافيش مش حيقولوا انك شكايه من اولها
لأن اللى عملته بصراحه غير آدمى بالمره
ومتخليش اللى نفسيتها وحشه هى اللى تعيش وانتى اللى تهربى
طولى بالك وهدى نفسك واقرى قرآن علشان تهدى
وربنا ينصرك عليها
سامحينى انى طولت عليكى
بس غاظتنى

[::غصون الجنة::]

السلام عليكم

ربي يرزقج الذرية الصالحة

ومن ناحية خرووجج من العمل
ما أنصحج
لانج بهالطريقة راح تحسسينها إنج فعلا زعلتي وفوق هذا بتعتبرج ضعيفة ,, وإنتي أقوى منها

حااولي تاخذين كم يوم اجازة تهدين شوي
وبعدين اتخذي أسلوب حيادي معاها ,, بحيث إنج ما تعطينها فرصة تجرحج

وربي يفرح قلبج إن شاء الله قريب بـ خبر حملج
اللهم آمين

[نور كوكى 87]

انا مش عارفة انتى سبتى الشغل ليه
المفروض انك كنتى تستنى عشان تكبتى على نفسها لانك معملتيش حاجة عشان تسيبى الشغل
انتى كدة اديتيها الفرصة انها تنتصر عليكى
وبإذن الله ربنا يكرمك قريب وتبقى حامل
بس متنسيش تدينى السبوع بتاع البيبى

[همسه عتاب]

انت غلطانه تسيبى شغلك علشانها خليكى قويه ياما حتقابلى نفوس ضعيفه

[تردد]

انا عارفه انكوا هاتقولوا انى لازم ارجع بس انا فعلا ضعيفه فالمرحله دى ومش مستحمله اى كلمه وبحاول ابعد عن اى حاجه تجرحنى مش فى دماغى انى اقعد افكر اغيظها او اعتجنبها او اى حاجه هيه مش فى دماغى ولا اى حاجه فى دماغى غير الموضوع ده وهيه ضربت عالوتر الحساس وكمان الموقف حصل قدام الناس الى فالشركه زمان كنت قويه قوى وكان صعب اعيط قدام حد انما دلوقثى ............................................
المديره بتاعتى كلمتنى وقالتلى يالا تعالى بس انا فعلا مش عايزه فقالتلى هسيبك يومين تريحى وترجعى ربنا يباركلها ويزيح عنى واكون نسيت على يوم السبت الحمد لله على كل شىء

[. تيوليب***]

المديره بتاعتى كلمتنى وقالتلى يالا تعالى بس انا فعلا مش عايزه فقالتلى هسيبك يومين تريحى وترجعى ربنا يباركلها ويزيح عنى واكون نسيت على يوم السبت الحمد لله على كل شىء

أختى
وده اللى بتمناه ومتأكده منه ..
إنك على يوم السبت حتكونى إجتزتى اللى حصل إن شاء الله
مع دعائك بنسيانه وإن ربنا يقوى قلبك
وهى بقى شكلها وحش اوى قدام الكل
وحطى حد لكلامك معاها يعنى هى السلام عليكم : الواجبه على كل مسلم أو رد السلام .. ودمتم
وهى اكيد حتحرّم ما تتكلم معاكى تانى ولو جات تهزر قوليلها سورى احنا هنا جايين نشتغل وبس
وهى حتشوفك بتهزرى مع الباقى يبقى حتندم انها غلطت فى واحده مكانش المفروض تغلط فيها
والتواضع مع الجميع واجب علي كل مسلم
إلا إذا كان مش فى محله
وانتى زى ما بتقولى مش متعالية والحمد لله
لكن متتبسطيش اوى معاها طالما هى مش مقدره شخصيتك البسيطه
وربنا ياااارب يا عاطى ياوهاب يرزقك الحمل الشهر ده ويكونوا توأمين ويبروكى ويكونوا خير خلف
وآآآسفه تانى للإطاله

[تردد]

تيوليب والله مش بتمنالها حاجه وحشه فى عيالها بس حاسه انى كان لازم اخد موقف ووالله انا بقالى فتره بقرأ كل يوم قرأن عشان حياتى تتعدل بس لازم الواحد كل مايهدى يلاقى ضربه تبرجله الحمد لله
غصون فعلا مديرتى فكرت زيك كده وادتنى اجازه النهارده وانا اذاربنا ارادلى ورجعت لسه معرفش هاتجنبها خاااااالص وبجد نعمه مقدرش انكرها ربنا اما حد بيغلط فيا حقيقى والله بينتقملى منه قصاد عينى
نور هوه ييجى بس بالسلامه وانا اوزع السبوع فالسيده زينب واجيلك كمان لحد عندك اديكى السبوع واوريكى البيبى واقوله تانت نور كانت بتدعى لمامتك عشان انت تيجى وعقبال فرحك يارب
همسه انا فعلا ضعيف دلوقتى انا معترفه بكده ربنا يقوينى عالنفوس المريضه دى وهيستفيدوا ايه من جرح الناس بيحسوا بعدها انهم احسن
متتخيلوش مكالمه المديره بتاعتى(اصغر منى) فرقت اد ايه معايا بجد ادتنى شويه عزيمه بس معرفش من هنا ليوم السبت يحلها ربنا

[. تيوليب***]

أختى
عليكى بالمداومه على الاستغفـــــــار
وده جزء من إيميل وصلنى من فتره..

بسم الله الرحمن الرحيم

(( فقلت استغفروا ربكم إنه كان غفاراً () يرسل السماء عليكم مدراراً () ويمددكم بأموال

وبنين ويجعل لكم جنات ويجعل لكم أنهاراً ))سورة نوح

إذا استغفرت الله فأنت قد علمت أن لك رباً يغفر الذنب ويأخذ بالذنب فخفت واستغفرت

وقد وعدك ووعده الحق ، ،،،

فقال : استغفروا ياعبادي ,, وسأغفر لكم

وباستغفاركم ، سأرسل السماء عليكم مدراراً حتى ترتووا وترتوي دوابكم

ومن يحب المال فسأمده بالمال وليس المال فقط ، من يحب البنين فسأمده كذلك بالبنين

وليس بالبنين فقط ، ومن يحب الأراضي والأملاك والمزارع والجنان ، والعقار

فكل ذلك مرتبط بالاستغفار ...

[PARADISE]

فى الخاص ضررورى جدا جدا

[s_houriaaa]

عزيزتى تردد
انا من راى اخواتنا فى المنتدى انك ما تتنازليش عن فرصة شغلك
انتى تروحى الشغل عادى ... واتكلمى معاها فى حدود الشغل وبس
اما اسرارك لا تبوحى بها لاحد الا للمقربين الى قلبك
الدخول لعالم الشغل هايعلمك حاجات كتير يا ريت تيجى على كدة وبس
عشان كدة لازم تكونى قوية وتعلمى نفسك ازاى تكونى قوية....الناس مش كلها حلوة
وياما لسة هاتقابلى كتير

بالتوفيق عزيزتى
حـــــــــــــــوريا

[تردد]

برادايس وحشتينىىىىىىىىىىىىىىىىىىىىىىى جدا جدا جدا والله ياريت ابقى زيك كده وقويه
انا شخصيتى اتغيرت كتيييييير لابقى عندى صبر ولا تفكير سليم ولا ..........................................
هيه فاكره ان عنها اولاد ده فضل منها ولا هيه ليها يد فى ده دول جم غلطه هههههههههه
لا بجد هيه الى خلفت تفرح بنفسها ليه هيه خلفت بذكاء او اجتهاد منها ده كله بتاع ربنا طب ماانا كنت اول الجواز زى الفل بس الدنيا قعدت تشيل وتخبط فيا وبرده ده بتاع ربنا يالله ماعلينا ماهى مبتجيش الا على الغلبان
بس انتى بجد قراياتك فى علم النفس نفعتك كتير انا فعلا زى ماانتى قولتى بالظبط ماتيجى معايا الشغل تاخديلى حقى
انا هقوم اصلى اهو شفتى انا اليفه ازاى ههههههه
انا جوزى لسه مستقرش فى وظيفه عشان كده الشغل ده هيفرق معانا ولو بنسبه بسيطه ربنا يهديه ويهديهولى ويكرمك بكل الى تتمنيه ياجنه

[تردد]

انا كنت بشتغل قبل كده يا حوريا بس مكنش عندى حاجه كاسره عينى فكنت صبوره وبستحمل وبفكر انا يمكن عشان بقالى سنتين مااشتغلتش ومخرجتش للدنيا او يمكن عشان الموضوع اصلا شاغلنى جدا فانا حساسه من ناحيته بس والله الناس الى بتتكلم معايا بنيه صافيه مش بزعل بس فى ناس تانيه حسبى الله ونعم الوكيل فيهم
والحمد لله الحمد لله الحمد لله على كل حال

[تردد]

بارادايس جيت ابعتلك عالخاص قالولى اما اكمل 300 رد يالا ابعتولى ردود كتيييييييييييييير عشان يبقالى الخاص بتاعى هههههههه كنتى هاتكونى اول حد ابعتله عالخاص عشان قبل كده مكنتش بعرف

[احلامنا الحلوة]

انا كنت بشتغل قبل كده يا حوريا بس مكنش عندى حاجه كاسره عينى فكنت صبوره وبستحمل وبفكر انا يمكن عشان بقالى سنتين مااشتغلتش ومخرجتش للدنيا او يمكن عشان الموضوع اصلا شاغلنى جدا فانا حساسه من ناحيته بس والله الناس الى بتتكلم معايا بنيه صافيه مش بزعل بس فى ناس تانيه حسبى الله ونعم الوكيل فيهم
والحمد لله الحمد لله الحمد لله على كل حال

شوفى انا مش هرد عليكى فموضوع الشغل لان البنات كفوا ووفوا
بس هر عليكى فكلمة وحده بس هو ايه الىحاجه كسره عينك
ليه هو انتى عمله عمله ولا مصيبه
وبعدين ايه يعنى لسه مخلفتيش لانتى اول الى مخلفوش ولا اخرهم
ويامه ناس بتقعد بالعشرين سنة كمان وربنا بيرزقهم بعد كده
الى بيبقى مكسور عينه ده الى بيبقى عامل عمله لكن الى انت فيه ده تقسيم واراة ربنا
ده رزق وبيتوزع
ولعلمك بقه هيه الى مكسور عينها لانها نقصه لو انسانه كويسه مكنتش تقلك كده
لكن هيه غيرانه منك واقل منك
انتى اكبسيها وارجعى ولا كان ليها قيمه او وجود اصلا وان سالتك غيبتى ليه قوليلها راحت عليه نومه
واوعى تعرفيها حاجه عن حياتك وتجاهليها
وارفع راسك كده انتى احسن منها
وبعدين ياستى نفسك فدوشة العيال هبقى اعدى عليكى كل يوم اجبلك الواد احمد ابنى المعفن ده يعملك وصلة زن وعياط لحد متشبعى واجى او ابيته عندك ارتاح شويه وانام ههههههههههههههههه
فكك وسيبك من كلالكلام ده ده رزق وربنا مقسممه وارجعى شغلك الظروف بقت وحشه ومعلش يعنى هيه تلاقيها قرفانه من عيالها ومش بعيد يكونوا مش قد كده بس تلاقيها مفهماكى الحياه وردى علشان تغيظك
انتى كبرى دماغك وقولى جواكى انا لسه صغيره ياااه كده احسن ادينى بقعد مع جوزى براحتنا
ياه عالاقل انا لسه حلوة ومتبهدلش شكلى وسيبيها على الله والله صدقينى ربنا هيكرمك اوى اوى وابقى قولى ام احمد قالت
بس انتى عليكى بالدعاء والاستغفار وابقى طمنينا عليكى وقوليلنا عملتى ايه يوم السبت