الفرق بين جوزك و والدك ؟؟؟؟؟

[angel_81]

ازيكم يا أحلي بنات كل سنة وانتم طيبين وعيد سعيد انا لقيت علي النت موضوع حلو قووووي وواقعي جداااااااااااااا والله فعلا هو ده اللي بيحصل مع صحابي فقلت لازم انقولهولكم علشان البنات اللي زيي اللي لسه متجوزوش وعمالين يحلموا بالفارس الهمام اللي هيشلهوم علي الحصان الابيض وان الجواز كله دلع يوجوا يتفرجوا تعالوا نقرا الموضوع سوا:
مع والدك .. دخلتى المطبخ ما دخلتيش .. كله واحد وممكن والدك يساعدك .. انما مع جوزك ..

مش بمزاجك .. ها تدخلى .. هاتدخلى ..

* مع والدك .. فى العيد بيديلك العيديه وفوقيها بوسه .. لكن مع جوزك .. بيقول انت خلاص كبرتى على الحاجات دى

* مع والدك .. بتنامى وتصحى وقت ما انتى عايزه .. مع جوزك .. وقت ماهو عايز .. او مع مواعيد شغله.

* مع والدك .. بتشترى هدومك ومكياجك وكل اللى انتى عايزاه .. ويقولك حلو قوى عليكى .. مع جوزك .. بيشترى لك برضه .. لكن ما قل ودل .. ويقولك .. فلوووووووووووووووووسى

* مع والدك لو حصل وكنتى زعلانه .. بيزعل عشانك .. لكن مع جوزك .. بيزعل منك .. ويلومك ازاى تزعلى اصلا

* والدك .. كلمه حلوه ترضيه .. وجوزك .. طول الليل تحايلى فيه.

* والدك .. وانتى عيانه .. سهران جنبك طول اليوم .. انما جوزك بيروح ينام فى الاوضه التانيه.



* والدك .. لما تكونى فى مشكله .. بيسيب كل اللى وراه ويتفرغ لمشكلتك .. وجوزك .. بيحط مشكلتك اخر بند فى اجندة يومه.

* والدك .. لما تدلعى عليه .. بيفرح بيكى .. انما جوزك .. بيقولك ..اكيد عايزه حاجه .

* والدك .. لما تقولى له .. ده حصل كذا وكذا .. بيهتم ويصدقك .. انما جوزك .. بيقولك .. الموضوع دا وراه ان .. ويشك فى كلامك.

* والدك .. لو شافك بتعيطى ها يمسح دمعتك .. انما جوزك .. ها يقولك يادى النكد .

* مع والدك .. لو حاطه ماكياج فاقع شويه.. ها يقول لك الهادى عليكى احلى .. وانت احلى من غيره خالص ( يا حبيبى يا بابا ) .. لكن جوزك .. ها يقولك شكلك زى عروسة المولد .

* مع والدك .. لو طلبتى دوا من الصيدليه . جرى ها ينزل يجيبه .. لكن جوزك ها يسالك بكام.

* مع والدك .. نفسك تخرجى مع صحباتك .. ها يقترح عليكوا تروحوا فين.. ويجى يوصلك كمان .. لكن جوزك .. ها يقول مالوش لزوم .. والبيت ماله

* والدك .. لو طلب منك كوباية ميه .. بيقولك لو سمحتى عايز ميه .. انما الرخم .. بيقولك قومى هاتى ميه.

* لو والدك نايم .. وانتى صاحيه لسه وعامله شوية دوشه .. ما بينطقش .. لكن جوزك .. صوت زعيقه ها يسمع الشرق الاوسط كله

* والدك .. فى كل الاحوال بيتناقش معاكى .. جوزك مناقشته معاكى قائمه على انه لازم يطلعك غلطانه حتى لو الموضوع مالوش علاقه بالغلط والصح.

* لو بتتفرجى مع والدك على التليفزيون ... ها يسيب لك الحريه تتفرجى على اللى انتى عايزاه .. لكن المحروس .. مافيش قدامك غير يا الاخبار يا الكوره .. يا ميلودى

* والدك لو نازل مشوار .. بيعمل ليكى اعتبار ويديكى خبر .. لكن جوزك .. بيختلس عدم وجودك قدامه عشان ينزل من وراكى.

* والدك دايما شايفك حلوه .. جوزك مش بيشوفك حلوه الا فى الحالات النادره .. او اذا كنتى صاروخ وهو مضطر يعترف وفى الاغلب مش ها يعترف

* لو محتاجه فلوس فى حاله طارئه .. والدك ها يديكى من عينيه .. لكن جوزك .. ها يقولك خدى من والدك

* لو جالك مكالمه غلط على موبايلك.. والدك ها يقولك حصل خير .. لكن جوزك .. ها يتهمك بالخيانه ...

* لو جبتى كحكه اخر السنه وطلعتى بماده .. والدك ها يشجعك ويهدى اعصابك.. لكن جوزك.. ها يقولك .. يا ادى المصاريف اللى مالهاش لازمه

* لو ما فيش فى التلاجه غير ازازة بيبسى واحده .. والدك ها يسيبها لك بنفس راضيه .. لكن جوزك ها يقول معلش انا لازم ابلع او ها يقسمها معاكى

* لو غصب عنك صوتك على على والدك .. هايلومك بذوق .. لكن جوزك ها يسمعك قاموس شتايم

* لو اتزحلقتى على الارض .. والدك ها يجرى يشيلك .. جوزك ها يقعد يضحك ويقولك ما انتى اللى مش منشفه الارض كويس منك لله يا اخى

* لو نفسك تغيرى مكان السجاده .. والدك ها يقوللك عنك دى تقيله عليكى.. لكن جوزك ها يقولك مش ضرورى وجع القلب دا

* لو عامله عزومه لاصحابك فى البيت .. والدك ها ينزل ويقولك خليكوا براحتكوا .. لكن جوزك ها يشترط مين اللى يجى او ها يرفض من اساسه

* والدك .. ممكن يكتبلك حاجه باسمك.. او يحطلك مبلغ فى البنك .. جوزك .. لا لا لا يمكن نفسه تطاوعه على الفعله الشنعاء دى

* لو العربيه عطلت بيكى .. والدك .. ها يقولك اقفليها وتعالى وانا ها اتصرف.. جوزك .. ها يقولك متركبيش العربيه تانى

* لو والدك شافك بتتخانقى فى الشارع مع واحد .. ها ينزل يقطعه .. لكن جوزك .. ها يقولك انتى قليلة الادب

* لو حكيتى لوالدك على واحد عاكسك .. ها يقولك معلش .. وبعدين عنده حق .. انتى جميله انما جوزك .. ها يقولك انتى اللى ماشيه مش محترمه

* لو مقدمه على شغل .. والدك .. ها يوصى عليكى طوب الارض .... لكن جوزك .. مش ها يتعب نفسه ولا يهمه اصلا وها يقولك يعنى انتى ها تشتغلى وزيره

* والدك لو لاحظ انك متخانقه مع اختك .. ها يصالحكوا على بعض .. لكن جوزك .. ها يقول خليهم يولعوا دول عيله عجب

* لو عندك مشوار والبيت ما فيهوش غير عربيه واحده.. والدك .. ها ينزل يروح مشواره بتاكسى ويسيبلك العربيه .. لكن جوزك.. ها يقولك استنى لما اخلص اللى ورايا وارجع انام وابقى خديها بعدين ( يكون الميعاد طبعا طار )

* مهما والدك كان متضايق .. لا يمكن تكلميه وتلاقيه مكشر .. لكن جوزك.. لو متضايق .. مصر كلها هتنكد عليكي

[املي في خالقي]

هههههههههههههههههههههههههههههههههههه
الله يجزيك بالخير يا انجل والله ضحكتيني
والله كلامك أغلبيتو صح بس الحالة مش عامة
والزوج المتدين الصالح مظنش تكون فيه الحجات دي
والله يكرمنا ويرزقنا الازواج الصالحين يا رب انا وانجل وكل بنات منتدى لك يا رب

[ام فريد]

تسلمى يا غالية على التعبير ده 100 بل 100 صح عشان كدة نصيحة للبنات الى لسه متزوجوش انهم يشبعو من بيوتهم مع اهاليهم لان هده الفترات لا تعوض

[رحاب الورد]

انجلوووووووووووووو يا قمر وحشتيني موت ..
وضحكتيني ، اضحك الله سنك ، حطمتي البنات !!
بس حلوه خليهم يعرفوا قبل ما يدبسو ويبطلوا احلام ,,

[الذكرى]

مووووووووووووتيني ضحك ..
موضوع عجييب وخطير ..
الله يسعدك و يوفقك ويرزقنا واياك الرجال الصالحين ..

عشان كدة نصيحة للبنات الى لسه متزوجوش انهم يشبعو من بيوتهم مع اهاليهم لان هده الفترات لا تعوض

صااااااااااااااااااااااااادقة ...
الله يحفظ أمهاتنا وآبائنا ..ويجمعنا بهم في أعالي جنانه ..

[الحياة كلمات]

جميلة اوي يا اجولة الامورة ربنا يبعتلك ابن الحلال اللي يسعدك و يريح بالك و يحنن قلبه عليك و يحنن قلبك عليه

[اسماء ابراهيم]

هههههههههههههههههه

ربنا يبعتلك ابن الحلال

[super lave]

موضوع غريب الاطوال عجيب الافكار بس انتهاكات من قبل الزوج وهذا غير صحيح

[الرابية]

تصحيح للعنوان : الفرق بين زوجك وليس جوزك !!؟؟؟

[أفكار مبعثرة]

لالالالالالالالالالالالالالالالا يعني ما نحلمش بعد كده

[عمرى لزوجى]

السلام عليكم
هههههههههههههههههههههههههههههههههههههههههههههههههه هههههههههههههههههههههههههه
ضحكتينى يا انجولا ومعاكى حق ف حاجات كتيييير
الله يرزقك الزوج الصالح المتيسر الحال الى يسعدك ويحنن قلبه عليكى يارب
وعينى ما تشوف الا انجل بس

[angel_81]

امولة حبيبة قلبي انا مبسوطة قووووووي انك اول واحدة ترد علي موضوعي شوفتي الصدمة يا امولة انا اتعقدت بعد ما قريت الموضوع والمشكلة ان اغلب الحاجات دي ملهاش علاقة بالزوج الصالح لكن ليها علاقة بالايثار يعني بصراحة كدة مين ده اللي هيفضل حد علي نفسه غير باباكي ومامتك هم الوحيدين اللي نفسهم انك تبقي احسن منهم ومستعدين يدوكي عنيهم.
ربنا يا رب يرزقنا بالزوج الصالح ميسور الحال اللي عنده ايثار.
تسلميلي يا قمر

[angel_81]

حبيبتي ام فريد وشهد شاهد من اهلها اديكي متجوزة تعالي بقي احكيلنا الكلام ده بجد يعني حقيقي ولا ايه النظام؟؟ يعني بليز طمنينا يعني بذمتك ممكن جوزك يديكي اخر أزازة بيبسي ويكون بيموت في البيبسي او اخر حته شيكولاته وهو هيموت عليها طيب ممكن تصحي من النوم الصبح وملكيش مزاج تطبخي يقوم هو يقولك عنه ويطبخ هو وينظف البيت بس خدي بالك انا بقول ملكيش مزاج تطبخي مش تكوني تعبانة لان لو بعد الشر تعبانه فمتهيألي ان ده واجب عليه

[angel_81]

ده انا اللي اتحطت يا رحوبتي وانا اللي فاكرة ان الجواز كله فسح ودلع لكن صحابي اللي اتجوزوا قالولي اني بحلم وانهم هم كمان كانوا بييحلموا زيي وان السبب الافلام والتمثليات المصرية هي اللي خليتنا نحلم

[angel_81]

اه شوفتي يا ذكري اخرتنا هتبقي ايه؟؟ يلا بقي ربنا يستر ويرزقنا بولاد الحلال الطيبين قووووي واللي يحطونا في عينيهم