تويت
قررت وهــذا كان قــراري وماراح اتراجــــع عنــه
السلام عليكم ورحمة الله وبركاته
انا هذا اول موضوع لي في هذي الطاوله الجميله
مايخفه عليكم انه في هالزمن النفوس تغيرت وتكبرت ويمكن الناس صارت تزعل على الناس من اقل
شي او اقل تصرف وصرنا مانقدر نتحمل بعض
ولا بكلمه السالفه ومافيها انه من اول ماانوجدت في هذي الدنيا كان في خلافات كبيره بين امي واهل ابوي
على اشياء ماتسوى الصراحه وهذا الي خله فجوه كبيره بينه وبينهم وغير هذا وصلت الي القطيعه
طبعا انا كبرت وعيلت الحمدلله وعرفت في حياتي قيمة الاهل الي تفرق عنهم
دو سبب او غلط مني ولكن لحبي لوالدتي والحرص على ارضائها انقطعت عن اهلي جدتي عماتي عمامي
كله من وره المشاكل الي لمه وصلت حق هالعمر ادركت انه المشاكل تافهه وماتسوى كل هل القطيعه
خصوصا اني علاقتي مع اهل زوجي اكثر من ممتازه والكل يحبني وخالتي الله يرحمها الى اخر رمق وهي تمدح فيني
وتدعيلي وكانت راضيه عني
لكـــــــــــــــــــــــن دايما في حياتي في شي ينقصني على الرغم من الله رزقني حب الناس الي حوالي
الا اني كنت غير راضه عن نفسي ابدا
ودايما اقول لنفسي يابنت انتي قاطعه رحمج متى توصلينه
وهذا غلط كبييير هل ودج باجر عيالج يحرمونج من احفادج
كنت انصرع وابجي اذا فكرت هالتفكير وقررت وكان هذا قراري وماراح اتراجع عنه
وقررت في قرار نفسي اني اكسر الحاجز الي بيني وبين اهلي
واروح ازورهم وتميت على هالحال شهر افكر وادبر
تدرون الموضوع مو سهل بعد قطيعه 10 سنين وايد صعب
ويبيله تفكير 
خفت انه مايتقبلوني او مايقابلوني بالصوره الي ترضيني
خفت من كلام امي معني ماراح اسوي شي غلط ابدا
كل الي راح اسويه اني اووصل اهلي تدرون شنو العذاب الي كنت عايشته كل مااسمع احاديث الوصل واحاديث الرحم
والخوف الي احس فيييه وكل ماتتسكر بويهي الدنيا اقول اي اكيد لاني قاطعه وين الله يوفقني
وبالمقابل خايفه من كلام امي
عن أبي هريرة رضي الله عنه أن رسول الله صلى الله عليه وسلم قال :
(*) من أحب أن يبسط له في رزقه , و ينسأ له في أثره , فليصل رحمه (*)
عن جبير بن مُطعم ـ رضي الله عنه ـ عن رسول الله ـ صلى الله عليه وسلم ـ قال : " لا يدخل الجنة قاطع رحم " .
رواه البخاري ، ومسلم ، وأبو داود ، الترمذي .
والاحاديث كثيره وتخوف
بس احس غلط لازم اروح لازم اكسر الحاجز لازم تستمر الحياه انا مهما صار انا قطعه من لحمهم
وان شاء الله مايردوني لازم عيالي يشوفونهم ويتعرفون عليه وقلت في قلبي ربي ماراح يخيب ظني ابدا
وراح يوفقني ويهون علي ويسخرلي قلوبهم وقلب امي
الله يهديها يارب حطيت في بالي كل الاحتمالات وكل الصدود الي ممكن احسها حطيت في بالي
كل شي الخير والشر الطيبه والغضب عشان ماانصدم
رحت وشريت ماعون كاكاو مكتوب عليه مبارك عليكم الشهر
وقلت احسن وقت اول يوم رمضان عشان مااظعف واهون
وتوكلت على الله وبعد صلاة التراويح رجعت البيت تشورت وبدلت وكلمت اخوي لاني متفقه معاه وانطلقنه
بعد التوكل على الله
وصلنه البيت سبحان الله الله حط سكينه في قلبي غريبه وهدوء وراحه وفرحه كبيره
ودعيت ربي انه يهون عليه الموقف ويقوي قلبي على ردت الفعل
دخلت سلمت اول ماشفت عمتي يالله تغيرت وكبرت بالعمر
والله من زمان ياعمه وسلمت عليها ماتتخيلون شصار حضنتي اي اي والله حضنتني بقوه لولا الفشله حسيت دموعي بتطلع
من مكانها
وبعدها عمتي الثانيه ونفس الشي 
فرحت وانصدمت وارتحت وخفت وكل المشاعر بوقت واحد
وبعدها وصلت جدتي وكنت خايفه لانها شديده شوي مالقيت السلام الي يريح منها بس سلمت علي برود بس انا متوقعه اسوء من جذي فمااهتميت ولا حزنت
وكافي استقبال عماتي
فرحت كثير واستانست وقعدت عندهم وجاوا عماتي قعدوا يمي وقاموا يسولفون معاي ويتكلمون معاي جنه
ماصار شي وجنه امس كنت عندهم وجنه كل يوم اشوفهم فرحت وايد وايد فرحه لاتوصف
وحسيت اني قويه وحسيت اني انتصرت على نفسي شكرت ربي الي قواني وعطاني العزيمه وثبت قلبي
وبعد فتره زمنيه مشيت منهم وسلمت عليهم وعدتها بالزيارات القريبه بس احس خليت قلبي عندهم ومشيت
طول امس ماعرفت انام من الفرحه الفرحه الي ملكت قلبي
ماعرفت انام كنت اقول الي صار حلم مو واقع لاني مااتخيل نفسي بهالقوه
طبعا اكيد تبون تعرفون ردت فعل امي
طبعا تضايقت حسيت من كلامها لانها قالتلي " شعندج رايحه لهم تطور والله " بس ماهمني لاني سويت
الصح والواجب كافي علي فرحت ابوي لمه عرف اني زرت اهله الي عمره ماقاطعهم ولا قصر بحق من حقوقهم
الحمدلله يارب انك هديتني ودليتني طريج الصح والصواب
هذا الي صارلي امس وفرحت كثير وحبيت اوصلكم فرحتي
واقول كلمات بسيطه
ياجماعه الدنيا ماتسوى ليش الزعل والقطيعه خل قلوبنا تجتمع من جديد
ونفرح الدنيا قصيره ليش نقضيها بالعتب والزعل والفرقا
هذي نصيحتي لكم ان شاء الله تستفيدون من تجربتي وشاكره طولة بالكم علي وقرائتكم قصتي
وسامحوني على الاطاله
تعليق