سنه اولى زواج..... اهداء خاص لكل فتاة

[خزامى المدينة]

السلام عليكم ورحمة الله وبركاته

.
.
.

.. و للتنويه الموضوع منقول من موقع صيد الفوائد ..

و هو إهداء خاص لعرايس قطر ( خواتي الحبيبات ) المقبلات على الزواج قريبا .. و عام لكل عرايسنا اللي عاشوا سنتهم

الأولى و اللي عايشينها حالياً ..

حياكم الله جميعاً ..


[[ سنة أولى زواج ]]



في البداية أبارك لكل عرايس 2007 .. و الفال إن شاء الله لكل من تتمنى الزواج و العفاف ..

ثاني شي .. الموضوع هذا راح يكون عبارة عن نقاط على الحروف .. يعني بإذن الله راح يشتمل على فقرات كثيرة

تهم الزوجة و اللي بتفيدها خاصة في سنتها الأولى .. لأني على يقين و من تجربة إن

السنة الأولى من الزواج = تخبطات

خلونا نبدأ موضوعنا على بركة الله ..



[[ سنة أولى زواج ]]



- الله ! شنو هالريحة الطيبة -

تخيلي أختي ان أختج دخلت مرة الغرفة عندج من بعد ماعطرتيها و بخرتيها .. أول تعليق راح تقوله

( الله ! شهالريحة الحلوة !! ) سبحان الله هذا يدلنا على ان حاسة الشم مهمة بالتالي الأنف مهم جدا جدا ..

انتبهي لأنفج .. هو وين مكانه ؟ متربع على عرش الوجه صح .. يعني له مكانة عظيمة .. و بعد هو سلاح ذو حدين ..

يا يودينا للخير و الحب و الأجر .. أو المهالك و الله يجيرنا ..

و سبحان الله كان في إهتمام من زمااان بالأنف و تحديدا حاسة الشم .. خلونا نسترجع حديث الرسول عليه الصلاة و

السلام يوم قال (حبب إلي من دنياكم النساء والطيب) ..

و لما تقرين سيرته عليه الصلاة و السلام بتعرفين انه ما كان يرد الطيب .. بعد وشو اللي ورد في السيرة بهالخصوص .. !!!

السواك .. الإغتسال يوم الجمعة و سنن الفطرة .. و غيرها .. طيب هذا كله ليش ؟ عشان نحافظ على روايحنا طيبة

و محبوبة يتقبلها كل شخص نتعامل معاه و نعيش معاه ..

و العكس نلقى انه نهى اللي ياكل البصل أو الثوم من انه يصلي في جماعة ..

و لا تنسون ان دم الشهيد تكون ريحته يوم القيامة مسك بإذن الله ..

طيب إحنا يا حريم .. معروف عندنا نستخدم المسك عشان نتطهر من الحيض ..

شفتوا شلون ..

الأنف هذا خطير .. في ضحايا من وراه ..

الرجال لما تمر عليه المرة .. يقدر يغض بصره و يلتفت عنها .. لكن للأسف مايقدر يسد أنفه عشان ما يشم عطرها ..

و الرسول حذرنا احنا معشر النساء من التعطر و الخروج من المنزل (أيما امرأة استعطرت فمرت بقوم ليجدوا ريحها

فهي زانية) رواه أحمد ..

زين خلونا ننتقل للجانب الإيجابي ..

قلنا ان الأنف خطير و عرفنا متى يكون خطير .. لكن قلنا في البداية ممكن يودينا لطريق الأجر .. شلون ؟

سهلة .. أنا لما أستخدم الطيب حق كل شي حولي : بيتي / غرفتي / شعري / جسمي ... الخ و حسبته من حسن التبعل

للزوج .. كان لي الأجر بإذن الله ..

لذلك المرأة الذكية .. راح تعرف شلون تستخدم الطيب و وين و شلون .. و أهم شي التغيير بين الأطياب ..

جربي أختي الغالية .. و شوفي شلون هالفعل البسيط راح يقرب قلوب .. و ينعش أرواح



[[ سنة أولى زواج ]]



- يا ربي .. شلون أوصل اللي أبي أقوله لريلي !! -

من كم يوم كنت أتناقش مع خواتي عرايس قطر في موضوع التجهيزات عن هالموضوع .. او كان قريب منه .. بإختصار

كانوا يقولون إحنا نستحي من أزواجنا هم يقصدون نستحي نسولف معاهم نستحي نفتح موضوع ...الخ ..

الحين لقينا لكم طريقة .. إن شاء الله تفيدكم ..

طريقتنا تقول : اكتبي له رسالة خاصة عبري فيها عن اللي ماتقدرين تقولينه له مباشرة ..

- متضايقة منه ؟ اكتبي له رسالة عتاب رقيقة برري فيها لج و له ..

- طيب غلطتي في حقه و تبين تتأسفين ؟ اكتبي له رسالة إعتذار عن تقصيرج بيني فيها انج ندمانة على اللي صار

و اطلبي انه يسامحج ويقبل اعتذارج ..

- تبين تنصحينه ؟ يمكن شفتيه مقصر في صلاته .. أو عبادته .. اكتبي له رسالة انصحيه فيها نصيحة حب و خوف و أمل

انه يكمل هالجانب ..

- ودج تشكرينه ؟ اكتبي له رسالة شكر على أي شي فعله لج .. معروف سواه لج .. حاجة بسيطة قدمها لج ..

قدريه و قدري له هالفعل .. بتلقينه يتشجع يعطيج أكثر و أكثر ..

- على فكرة ممكن ما يكون في سبب صح ؟ طيب ليش ماترسلين له رسالة فيها كلام في داخلج .. مشاعرج عبري عنها

حبج له لا تكتمينه ..

طبعا ما راح تنسين تزيين هالرسالة .. ما راح تنسين تحطينها له على التسريحة

مثلا .. او في جيب الثوب .. أو في شنطة السفر .. أو على المخدة ... او أو أو ..

و مب شرط تكون رسالتج مكتوبة بخط اليد و على ورقة .. عندج الإيميل .. عندج رسايل الجوال



[[ سنة أولى زواج ]]



- لا تحاولين تغيرين زوجج -

في البداية حبي زوجج مثل ما هو .. و بتلقين الحاجة اللي ماحبيتيها فيه تغيرت و صارت

أحسن .. مب معناته انج ما حبيتي شغلة فيه يعني ان الحب ما راج ينوجد .. لا بالعكس الحب ينوجد حتى لو كان ما في

توافق 100% .. حبيه و في نفس الوقت حاولي تغيرينه إذا كان التغيير للأفضل ..

و عشان ماتركزين كثير على هالنقطة و الشي الي تبين تغيرينه .. استقبلي زوجج بإبتسامة صادقة .. و بتشوفين

شلون بيكون مفعولها و شلون راح تمتص هموم الحياة ..


[[ سنة أولى زواج ]]

راح نكمل في وقت ثاني

[الفراشة المضيئة]

رائعة ياشذة اللله يجزيك الخير فعلاً موضوع مميز
جدا جعلها الله في ميزان حسناتك
والله لايحرمني منك يالغلا
مفيييييييييييييييييييييدة الموضوع
الله يرزقك أبن حلال تتمننينة أن شاء الله
اختك:
في الله :
فروشة
احبك في الله شذو

[خزامى المدينة]

احبك الله الذي احببتني فيه
فروووووووووشه لازم مواضيعي تكون حلوة مادام الفراشه تدخلها
تابعيني

[خزامى المدينة]

[[ سنة أولى زواج ]]


- أنا غيوووورة .. و لكن ! -

في بعض الحريم أو البنات غيورات .. مو غيرة على دين أو على زوج .. لا تلقينها تغار و تنقهر لو شافت وحدة

لابسة فستان أحلى من اللي لابسته .. مو حسد لا أبدا هي غيرة بس .. يعني ما تحب تشوف حد أحسن منها ..

بس في بعض الحريم الله يهديهم .. الطبع هذا يخليهم يغارون من خوات الزوج و من امه !! اي صح .. يعني ماتبيه

يشوفهم و هم في أحلى زينتهم .. تحتر لو مدح شغل فلانة أو حاجة مسويتها أمه .. جذي يعني ..

معاي ؟

و على هالطبع هي عايشة .. بتلقينها شوي شوي .. تقلل من روحاتها لهم .. تطلع اعذار حق زوجها عشان يهون ما

يروح لهم .. في الأخير ماتنشاف الا من وين لوين .. حتى ريلها قطعت علاقته بهم .. مو ضعف في شخصيته .. بس

غفلة ..

طيب يا أختي ياللي تعانين من هالشي .. فكري معاي انتي ليش تسوين جذي ؟؟ ليش تكرهين أهل زوجج ..

مع إني أظن فيج الخير الكثير .. و فيج الطيبة اللي مب عند أحد .. هل زوجج تزوجج من غير رضاهم مثلا عشان

تعاملينهم بهالطريقة !!! شاللي سووه عشان تكرهينهم ..



- جاوبي نفسج بنفسج -

بس خلج متذكرة إن عندج أخو بيتزوج .. ترضين ان زوجة أخوج تسوي مثل ماسويتي ؟؟؟!! أكيد ما بيكون

هذا جزاكم يوم اخترتوها له .. صح ؟

تذكري أخوج و اشلون بتكون نظرتج له .. أكيد أكيد بتقولين عنه ضعيف شخصية و زوجته محركته مثل الخاتم

في يدها ..

.
.

إذا كنتي من هالنوع نصيحتي لج : اوعي على نفسج .. و عوضي عن اللي خسرتيه ..

قرري تزورين أهل زوجج اللي قطعتيهم بإرادتج .. اخذي هدية لأم زوجج .. و قرري انج بتتركين ( الغيرة ) من غير

رجعة ..

و الله يوفقج




[[ سنة أولى زواج ]]

اكمل بعد ان ارى التفاااعل

[mm msh]

موضوعك جميل ما شاء الله تبارك الله كملى اختى انا عروسه ومحتاجه النصايح الدافئه والسهله دى

بارك الله فيك .

[خزامى المدينة]

موضوعك جميل ما شاء الله تبارك الله كملى اختى انا عروسه ومحتاجه النصايح الدافئه والسهله دى

بارك الله فيك .

الف الف الف مبرووووووووووووووووووووووك اختي الغاليه
مشكوووووووووووورة لمرورك العطر

[خزامى المدينة]

[[ سنة أولى زواج ]]


- حياتي تعيسة و السبة زوجي ! -

تابعوا معاي هالحوار .. بين صديقتين ( و هو حوار ممكن انه يواجهج ) ..

اتصلت مها على أمل مرة .. و من بعد السلام و السؤال عن الأحوال ..

أمل سألت مها : كم تزورين هلج في الأسبوع ؟

مها ردت مستغربة : يعني على حسب بس تقريبا مرتين في الأسبوع ..

أمل : تدرين إني ما أزور أهلي إلا مرة كل أسبوعين .. و بكت ..

مها تركتها تبكي و تطلع اللي في خاطرها .. و عقب سألتها : ليش ؟

جاوبتها أمل بعصبية و حرقة : ريلي ما يبيني أزورهم جذي من غير سبب !!

مها : طيب أنتي ليش معصبة ؟

أمل متعجبة : ليش معصبة !!! لأن خواتي كل خميس يتجمعون عند هلي .. جمعة و ( وناسة ) .. أما أنا قاعدة قلبي معورني

و مقهورة .. افففف شهالحياة التعيسة !

مها : زين جاوبيني أنتي تحبين زوجج ؟

أمل : اي أحبه .. و هو نفس الشي .. و عمره ما قصر علي في حاجة الا هالموضوع !

مها : اوكي متى آخر مرة ضحيتي فيها عشانه هو ؟

أمل : امممم ما أتذكر .. بس أخبر من شهرين كان مريض .. قعدت معاه و ضحيت بجمعة هلي عشانه .. و ما أنكر انه

شكرني على هالموقف ..

مها : حلوو .. بس في ظنج لو رحتي كل أسبوع مرة .. و هو مب راضي .. بتكونين مستانسة و بتحسين بالوناسة ؟

أمل : مادري بس ...

.
.

موقف مثل هذا راح يواجهج في أول سنة زواج .. و اللي عاشوا سنتهم الأولى أكيد مروا بهالموقف أو ما شابه ..

و حريم وايد .. لما يصير لهم نفس الشي .. تكبر الموضوع لدرجة انها ماتشوف و لا تفكر الا فيه .. لكن لو تريثت شوي

وفكرت بتلقى ان المسألة مش مستاهلة انها تصيح و تزعل و تعصب و تسويها مشكلة و تشوف ان حياتها تعيسة ..


يا أختي صبري شوي .. شلون تشوفين حياتج تعيسة بس عشان حاجة بسيطة ما استوت لج ( مثل جمعة هلج .. و هالكم

ساعة اللي بتروحينها ) .. حكمج على حياتج غلط و متسرعة وايد ..


للعلم يا حبيباتي .. خاصة اللي بيبتدون حياتهم الزوجية .. الحياة مب وناسة بس .. مب روحة و طلعات و جيات ..

بتواجهين كل حاجة في هالحياة .. الفرح و السعادة و الحزن و الألم .. حياتج بتكون أخذ و عطا .. و تضحيات ..

وفيها تنازلات لو تطلب الأمر ..


إذا منعج زوجج من حاجة معينة و لتكن زيارتج لبيت هلج .. من غير ما يوضح أسبابه .. هني تقدرين توصلين

معاه لحل .. و الطريقة بسيطة جداً .. قعدي معاه و فتحي الموضوع مرة و مرتين .. لكن متى ؟ لما يكون مرتاح

و مستانس منج لأنج سويتي له شغلة معينة .. ( انتهزي الفرص ) ..

و إذا استصعب عليج الموضوع .. أوصيج تطلبين ربج ييسر لج و يسهل عليج أمورج ..

.
.
.

[خزامى المدينة]

[[ سنة أولى زواج ]]

الجزء اللي فات .. كان عبارة عن مشكلة من وجهة نظر الزوجة ..

و الحين راح نعرف مع بعض شلون نتصرف لو واجهتنا مشكلة مع أزواجنا ..

في البداية تخيلي معاي .. لو صار لج موقف شبيه مثل اللي مر علينا .. نصيحة : شوفي للموضوع من زاوية ثانية ..

هنا الزوج أمر زوجته انها ماتروح بيت أهلها .. و هي سوتها مشكلة و حكمت على حياتها بسرعة ..

احنا مانبيج تسوين مثلها .. بالعكس أبيج تتذكرين إن لزوجج حق الطاعة .. يعني لازم تطيعينه - مهما كان الألم اللي

تسبب فيه - في النهاية بتشوفين إن انتي الكسبانة .. بس شكسبتي ؟

الأجر و رضا الزوج و محبته <<< يا سلام .. ما أظن يا أختي انج تبين تفرطين فيهم .. صح ؟ لأنج تبين الجنة ..

( الله يجعلنا و إياكم من أهل الجنة )

..

و تفضلي .. هذي أشيا صغيرة طبقيها لو صارت لج مشكلة مع زوجج ..

1. لو الموضوع كبر عن حجمه .. و قط عليج الزوج قنبلة .. حاولي يا حبيبتي انج تكتمين غيظج و لا تزيدين

الوضع أو حتى تفكرين في إنج تردين عليه .. و خلي سلاحج " الصمت " ..

تعرفين لما تلتزمين السكوت و بس تسمعين لزوجج و هو يصارخ و لا هو معصب .. انتي بصمتج تهدين الوضع بطريقة

غير مباشرة .. لأن الريال بيجيه وقت و بيكتشف ان هو اللي يتكلم بصوت عالي لكن انتي ساكتة .. و بيسكر على

الموضوع و بيسكت بالعربي راح ينحرج ..

نصيحتي لج : لما تشوفين ريلج يحاول يهدا .. استأذنيه و روحي توضي و صلي ركعتين أو حتى لو تكتفين بالوضوء ..

و خلي هذا مبدأ لج " ذروة الخلاف تخليني في الأخير أتجه للوضوء و الصلاة " و بتلقين نفسج هاااادية جدا .. وسبحان

الله كل اللي في نفسج بيزول ..

الفقرة اللي بهاللون .. هي إضافة من عندي


2. دائما و أبدا .. عند أي خلاف يصير بينكم تذكري حسناته و ركزي عليها .. الشي هذا بيخفف من أي شعور سلبي

نتج عن هالموقف ..

3. احتسبي الأجر في طاعة زوجج .. و تذكري انه من حسن التبعل للزوج اللي يساوي جهاد في سبيل الله << سبحانك

يارب .. فايدة عظيمة كلنا نبيها ..

4. دايما كوني الأحسن .. و خليه يشوف الغير متوقع منج .. اذا تبين شي يستوي لج " و كان رافضه " .. أحسني له قد

ماتقدرين .. و كوني كريمة في كل شي معاه .. صدقيني بيكافئج و بيحقق لج اللي تبينه .. شفتي شلون ..

5. تحملي تغلطين هالغلطة >>> و من أي خلاف أو تضايقتي منه بسبب موضوع .. تقولين انا ما راح أكلمه و لا اتصل له

و لا راح أسأل فيه .. و تسكتين عنه و لما يكلمج .. تطرين عليه الموضوع و كأن انتهت المواضيع من الدنيا ..

حتى لو كنتي زعلانة حدج منه .. احرصي على انه ما ينام الا و هو راضي و قبل هذا كله .. انهي الموضوع و لا كأن

شي صار خاصة إذا هو سعى عشان يغير الأجواء ..

6. طيب يمكن تقولين في بالج الحين .. شلون جذيه .. يعني أسكت له ؟؟ يعني ما يسوي اللي أنا ابيه ؟؟ على طول

انا اللي باسمع الكلام .. و هو ما يحقق لي حاجة ؟؟؟ و من هالكلام ..

انا اقول لج انتهزي الفرص .. اليوم فتحتي الموضوع و تهاوشتوا و تزاعلتوا و راضيتيه في الأخير من غير ما توصلين لحل

معاه .. من غير ما يوافق لج على اللي تبينه .. ردي افتحي الموضوع بس تخيري الوقت المناسب .. و لا تيأسين

مهما صار .. لأنه ممكن يقتنع و يغير رايه و هالشي بيكون في صالحج ..

" و عن تجربة .. أعند من ريلي ما فيه .. و ساعات يعاند على مواضيع صغيرة بس لأن نظرته للموضوع تختلف يشوفه

كبير .. أول مرة مصر على رايه .. ثاني مرة حاولت معاه و بعد مصر .. بعد فترة بعيدة شوي .. فتحت الموضوع معاه

و اقنعته و خليته يقول ( خلاص سوي اللي تبينه .. الحين انا فهمت إصرارج و ليش تبين تسوين الشغلة هذي ) و تأكدت

انه راضي و عن إقتناع .. و هذي نقطة في صالحي .. "

7 . آخر شي لا تهملين الدعاء بغض النظر لو عندج مشكلة او ما عندج ..




- الفقرة الجاية خاصة جداً جداً للعرايس اللي بيسكنون مع أهالي أزواجهم -





[[ سنة أولى زواج ]]


- راح تسكنين مع أهل زوجج ؟؟! -

إذا جاوبتي بـ " نعم " .. و في نفس الوقت تحاتين تصير لج مشاكل مع أمه أو خواته بحكم الإحتكاك .. عيل اقري

الجاي .. و ركزي معاي ..

- في بداية زواجج قعدي مع زوجج و خططوا لحياتكم .. و تطرقوا لموضوع السكن مع أهل الزوج ..

- انتي الحين جديدة على العايلة .. خلي نفسيتج خفيفة معاهم و محبة .. ولا تحطين في بالج المشاكل او سوء تفاهم أو

شي ثاني .. و لوصار لك موقف معاهم حسيتي من خلاله ان فيه إساءة لج .. برري لهم و حطي لهم أعذار .. و أحسني

الظن مهما صار ..

- دايما تعاملي معاهم بإحترام .. حبيهم و عاملي خواته و كأنهم خواتج أو كصديقات لج .. و اعتبري ان أمه في مكان

أعز و أقرب خالة لج أو عمة ( مابي اقول امج ) .. طريقتج هذي معاهم بتحصدين من وراها خير إن شاء الله ..

- اهديهم بين الفترة و الثانية .. لو عنده خوات في المدرسة ساعديهم في دراستهم و واجباتهم ..

- أهل زوجج مب مثل أهلج .. يعني ممكن تصدر منهم تصرفات تزعجج .. حاولي تمكسين نفسج و تكظمين غيظج

و تذكري أجر كظم الغيظ ..

- تناقشي مع زوجج في عدة نقاط و اطلبي منه :

** ما يبين جدامهم حبه لج .. ممكن يكون هو طاير فيج و يحبج من كل قلبه .. و من زود وناسته يبين هالحب جدام هله

و خاصة أمه .. هنا اطلبي منه ما يظهر هالشي جدامهم لأن ماتدرين ساعات الأم تغار على ولدها و تظن ان زوجته

خذت مكانها و انتي ماتبين مشاكل ..

** الحين العكس .. لو بدر منج تصرف ما اعجبه .. اطلبي منه ما يعلق على الموضوع جدامهم أو يحاول يعدل من سلوكج ..

و خليه يأجل نقاشه لحد ماتكونون بروحكم .. عشان انتي ماتنحرجين منهم .. و تتحسسين من الموضوع ..

** نبهيه ما يصرخ عليج جدامهم أو مثلا يعايرج بحاجة .. دايما جدامهم خليه يعاملج بإحترام .. لأنهم اذا شافوه محترمج

فهم راح يحترمونج غصب ..

** لا يتكلم جدامهم عن روحاتكم و جياتكم و لا الهدايا اللي جابها لج .. و لا عن سفراتكم .. أو على طول مدح فيج ..

مب عشان شي .. بس خله يتجنب الشي هذا على الأقل جدامهم .. يمكن خواته ما عندهم حد يطلعهم أو ما تزوجوا

.. فحفاظا على مشاعرهم .. ينتبه قد ما يقدر ..

- قسموا شغل البيت بينج و بين خواته هذا في حال انهم من النوع اللي يشتغلون في البيت أو ما عندهم خدامة ..

لأن لو تلاحظون و اكيد سمعتوا عن وحدة تقول عن مرت ولدها " هذي ما تدخل المطبخ .. و ماتسوي شي في البيت "

و ممكن يسبب هالشي مشاكل لا سمح الله ..

- اذا ما حبيتيهم لا تكرهينهم .. و خلي علاقتج بهم سطحية .. لكن انتبهي لا تخلينهم يكرهونج .. لأن صعب يحبونج

بعدها مهما سويتي .. في الأخير انتي في نظرهم " بنت ناس و غريبة " فما يهمهم اذا حبوج و لا لا .. لأنهم اذا يحبونج

بتكونين حياتج حلوة .. لكن اذا ماتقبلوج او يكرهونج بينقصون عليج حياتج .. و انتي حياتج مرتبطة بهم دامج معاهم

في نفس البيت ..

- أي شي يستوي عندهم لا تنقلينه لأي حد و تطلعينه برى البيت حتى لو تكلمتي لأمج .. هذي أسرار بيوت .. مب حلوة

في حقج لو اعرفوا انج انتي اللي تكلمتي و لا حلوة في حقهم ..

- عند أهلج و صديقاتج اذكريهم بالخير .. ولا تقولين عنهم كلمة شينة مهما كانت حياتج معاهم .. ليش ؟ لأنهم بيكونون

اعمام عيالج و سمعتهم من سمعتج و سمعة اعيالج ..

- لا تقارنين بينج و بين أهلج في أي شي .. لأن الحاجة هذي تنرفز وااايد .. و ممكن ينفسر كلامج غلط .. يعني

يمكن يحسبون انج تقولين ( أهلى أحسن .. أو مستوى اهلي اعلى منكم .. ) ..

- أخيرا : أنتي بحكم عيشتج مع أهل زوجج .. راح تعرفين شنو اللي يحبونه و شنو اللي ما يحبونه .. و على هالأساس

تصرفي باللي تشوفينه مناسب ..


[[ سنة أولى زواج ]]


- خواتي يشوفوني متغيرة عليهم بعد ماتزوجت .. هل فعلاً تغيرت ؟! -


الفقرة هذي .. بتكون مو لج بشكل مباشر .. لخواتج أكثر خاصة اللي ماتزوجوا أو أصغر منج ..

قبل الزواج كنتي معاهم على طول .. تسولفون عن المدرسة و عن الامتحانات و عن السوق و الطلعات .. يعني كنتي

قريبة منهم وااايد .. فجأة بعد ماتزوجتي صاروا يحسون ان أختهم ما عادت مثل قبل .. ما قامت تقعد معاهم و تسولف

صارت جدية وااايد .. بالعربي ( ما تعطيهم ويه ) .. و لو حاولوا يفتحون موضوع معاها تهربت أو اختصرت و سكرت على

الموضوع ..

فلو حسيتوا يا أخواتي خاصة المتزوجات حديثا .. بهالشي مع خواتكم .. أو حسيتي انهم يشوفونج متغيرة .. او شفتي

انج فعلا تغيرتي عليهم .. انا اقول لج لا تحاتين ..

بيني لهم هالموضوع .. بيني لهم انج مب متغيرة .. انتي لين الحين اختهم لكن :

** بما انج توج في سنتج الأولى .. شي طبيعي بتكونين متذبذبة .. ساعات تشوفين نفسج مع البنات و ساعات تقولين

لا انا الحين متزوجة لازم اكون اكثر جدية ..

** في هالفترة بتشوفين ان تفكيرج مشتت .. عندج زوجج ماتعرفين شلون تتعاملين معاه .. او مع اهله .. مسؤولية بيت

مجاملات و واجبات اللي صارت فجأة في ويهج ولازم تقومين بها .. غير انج مشتاقة لأهلج و لبيتكم فما عندج وقت

تتكلمين معاهم و تسولفين في نفس سوالفكم القديمة ..

** و بما انج عروس جديدة .. شي طبيعي و متأكدة ان بتكون عندج أسئلة واااااااااااايد عن الحياة الجديدة .. ما راح

تسألينها الا لأمج او خواتج المتزوجات .. غير ان سوالفج لا شعوريا بتكون عن حياتج .. فما تلقين الوقت اللي

تسولفين فيه معاهم ..

** و الحين تعتبرين انتقلتي من مرحلة للثانية .. و عادة الانسان لما ينتقل من مرحلة لمرحلة .. يقل اهتمامه بالمرحلة

السابقة .. و يركز على المرحلة الجديدة اللي هو فيها .. بتلقين نفسج تقرين عن موضوع معين .. تسولفين عنه

تتناقشين فيه .. يعني المرحلة اللي انتي فيها الحين .. بتاخذ جزء كبيييير من تفكيرج و اهتمامج ..

- طبعاً هذي مبررات لج .. كعروس جديدة وضحيها لخواتج -

أما النقاط الجاية فهي لج .. أذكرج فيها بحاجات يمكن تغفلين عنها ..

- في البداية يمكن تتفاجئين بهالموضوع .. و تقولين : شلون ؟؟ انا علاقتي معاهم مثل ما هي ماتغيرت .. لكنج في

الواقع تغيرت مثل ما أنا تغيرت بعد الزواج و غيري من المتزوجات ..

- عشان جذي لازم تضاعفين اهتمامج بخواتج .. قعدي معاهم .. ضحكي و سولفي .. كوني قريبة من كل وحدة ..

اسأليها عن دراستها و عن أحوالها .. يمكن تكونين انتي اقرب وحدة لهم ويبون منج اهتمام أكثر ..

- تذكرين الأيام الأخيرة قبل العرس .. و شلون كنتوا مع بعض .. ! تذكرين لما دخلتي القاعة بأحلى طلة .. شلون كانوا

وياج .. شلون كانوا فرحانين لج لدرجة انهم ما قدروا يحبسون دموعهم .. هذا كله لأنهم يحبونج .. فلا تخيبين الظن

فيج ..

- اتصلي على كل وحدة فيهم - من غير ماتكون لج مصلحة - حسسيها بإهتمامج و حبج لها .. هالشي بيأثر وايد في

نفسيتها و بيسعدها ..

- حاولي انج ماتروحين لهم الا وبيدج شي .. حتى لو كانت شغلات بسيطة : بسكويت / كافي / أيس كريم / عصاير ... الخ

الفعل هذا راح يفرحهم .. و يخليهم ينتظرون دخلتج عليهم ..

- اذا حافظتي على علاقتج بأهلج و الزواج خلاج تحفظين علاقتج بهم .. هالشي بيخليج قدوة طيبة لخواتج ..

- تزوجتي صح .. لكن الزواج ما يغيرج تماما من انسانة مرحة الى انسانة في الخمسين .. بالعكس خلي الزواج يصقل

شخصيتج لكن ما يغيرها ..

.
.
.
تابعوووووووووووووووووني

[F!vE StAr]

رووووووووووووووووعه

[خزامى المدينة]

الله يعطيك العافيه اخيتي

[خزامى المدينة]

[[ سنة أولى زواج ]]


موضوعنا اليوم مهم جدا .. موضوعنا عبارة عن غلطة كثير من العرايس طاحوا فيها .. من غير ما يقصدون ..


- هدية زوجي لي في ليلة زواجي -



الفقرة هذي رجعتني لكم سنة ورا لما كنت في الجامعة .. و بالضبط في مواقف الجامعة انتظر السيارة ..

الا وراي بنتين ( وحدة توها راجعة من بعد إجازة الزواج و الثانية ما تزوجت لحد الحين ) المهم العروس الجديدة هذي

قعدت تتكلم مع صديقتها عن كل شي .. هذي تسأل و الثانية ترد عليها .. كل شي يعني كل شي ..

انا مب قصدي اسمعهم .. لكن أصواتهم كانت عالية يعني غصب علي .. بصراحة انصدمت واايد ..

أنتي عروس و تبين تتكلمين و توصفين حياتج الجديدة .. عن بيتج / غرفتج / الهدايا اللي جاتج / عرسج / فستانج /

شعرج / مكياجج / راي زوجج في مكياجج .. شقال لج ما قال لج .. حتى ادق التفاصيل .. صديقاتج يسألونج و انتي

تردين و تستانسين على ردود افعالهم لأنهم منبهرين .. و سؤال ورا سؤال لين ماتوصلين لأدق التفاصيل " في غرفة

النوم " !!!!

و هذا اللي قاعد يصير مع عرايس وااااايد ..

فيا حبيبة .. عشان ماتغلطين هالغلطة .. فكري شوي ..

كم وحدة من صديقاتك جاتكو قالت لك كل شي صار معاها ؟؟؟؟

كم وحدة قالت لج ادق التفاصيل ؟؟

يمكن جوابك يكون و لا وحدة .. او مادري ..

يا عزيزتي .. حياتك الزوجية و كل شي يتعلق فيها ( اهل زوجك/ زوجك نفسه و شخصيته / بيتك / هو شنو يحب

شنو اللي ما يحب ... الخ كلها أمور شخصية ماتنذكر لحد .. أمور شخصية تخصج بروحج و تخص ريلج من بعدج ..

فلا تقلبين حياتج لسجل مكشوف للجميع .. بينما انتي ماتعرفين شي عن أي وحدة متزوجة حولج ..

لا تكونين طيبة زيادة عن اللزوم .. أخبارج هذي لو طلعتيها يا إما بتكون سالفة يسولفون فيها البنات .. أو غيره أو

حتى للحسد ..!!

فانتبهي عزيزتي و تذكري إن " البيوت أسرار "


[[ سنة أولى زواج ]]



- تحبينه ؟! -


حلو انج تحبين زوجج .. و الأحلى انج تسمعينه كلام حلو و تهمسين في اذنه .. و تعبرين عن هالحب ..

و أحلى حب هو لما تربطين قلب زوجج بالآخرة .. اغرسي في نفسه حب الله .. ساعديه على فعل الخير .. نسمع وايد

عند بعض الحريم وحبهم لأزواجهم و تعظيم هالحب .. بس لو جينا للواقع بنلقاه حب دنيوي .. ليش ؟

هي تحبه .. بس هو ما يحافظ على الصلاة حتى الجمعة !! ..

هي تحبه .. بس ما تقومه لصلاة الفجر .. مسكينة ماتبي تقعده من عز النوم !! ..

هي تحبه و تخاف عليه .. بس هو يدخن !!

هي تحبه و تخاف عليه .. بس هو يكذب و يغتاب و نمام ..

هي تعرف و تدري بذي كله .. بس ماتبي تزعجه بكثر النصايح !!! و الله الهادي !!!

مثل هالزوجة .. أنانية .. و مشاعرها مبهمة .. لأنها حبها لزوجها هو حب لذاته .. و لدنيتها ..

لو فعلا تخاف عليه و تحبه صج .. كان خافت عليه من حساب يوم القيامة .. من ضمة القبر ..

خلي حبج لزوجج يكون أسمى من الدنيا و أرفع منها




[[ سنة أولى زواج ]]

[عروس 2008]

مشكوره اختي على الموضوع الجميل والمفيد انا مرت علي حاجه الي اهيه لما يزعل واهوه مايعلي صوته للحين بس يعصب ويحرمني منالطلعات اذا ماسويت الي يبيه واخليه لحد مايهدا واحاوره والنتيجه يطلعني بدون ما يفكر