الجزء (2) من,",|| دورة : كيف تكسبين محبوبك ||,",|| للمتزوجات والمقبلات على الزواج ||

[#جاردينيا#]

سابع طريقة :: اكتشفي السر العظيم و المخبأ عن الرجل ::



الموضوع في سر ؟؟ و عظيم بعد ؟؟

يعني في حاجة ما عرفتها لحد الحين ؟؟

و أسئلة كثيرة .. ممكن أي وحدة تسأل روحها .. بعد ما تقرا العنوان ..

*
*

تطمنوا عزيزاتي .. ما في سر بمعنى سر ,, أقصد هالسر كلنا نعرفه أو عرفناه ..

و هو :: إن في داخل كل رجل - مهما كان قوي و ناجح ... - طفل صغير , يحب يحس بالمودة

و المحبة اللي يخلونه متميز و خاص ..

و على فكرة الزوج ما راح يقول عن نفسه أنا مثل الطفل أحتاج كذا و كذا .. فكوني ذكية ..

و خلي هالسر بيني و بينج

الرجل يحب يعرف إنه بالنسبة لج .. أهم من أي شي .. أهم من والديج و اعيالج و اخوانج و خواتج .. و أهم من كل هالدنيا ..

اشلون بيعرف إنه مهم عندج .. تلقينه يسأل :: قولي لي يا .... ليش أنا متميز ؟ و ليش أنا مهم في حياتج .. لا تقولين لي مرة
قولي لي كل يوم ::

بيكون هني مثل الطفل اللي بيجي و بيقول :: ماما انتي تحبيني ؟ طيب اشكثر ؟ :: و يكرر هالسؤال يومياً ..

هذا الطفل .. لكن الزوج الطفل .. يبي إنك تقولين له و تحسسينه بهذا كله .. من غير ما يكرر السؤال ..

اعتبريه طفل من أطفالك .. و دلليه و دلعيه أكثر منهم

- لما قريت هالفقرة من قبل .. عرفت وقتها ليش زوجي دايماً يسألني هالسؤال : حبيبتي :: ليش أنا مهم في حياتج ؟؟ - ما يسألني عن تقصير .. بس زيادة معرفة و دلع هههه ..

في طريقة للتدليل سهلة و بسيطة و في نفس الوقت مؤثرة ::

هالطريقة تتلخص في شنو ؟ في إنك تنادينه بأسماء غير اسمه .. بس بشرط يكون هالأسم مناسب لصفة يحبها أو موجودة فيه ..

مثلاً :: انا دايماً أنادي زوجي ( روميو حياتي ) = لأنه رومانسي ..

و هكذا ..

[#جاردينيا#]

ثامن طريقة :: أحبي قرابته ::

صحيح إنه مب شرط على الزوجة إنها تحب و تحسن معاملة ام الزوج و ابوه و إعياله ( إذا كان

متزوج قبل ) أو أي حد من أهله شرعا لكن الزوج مب

مجبور إنه يعيش حياته مع هالنوعية من الزوجات ..

اي زوجة تقدر تقول " انا احب زوجي و اعشقه و أخدمه وتحطه في عينها " لكن في الواقع

القول هذا ما تترجم لأفعال .. طيب اشلون تترجمين ذاك الحب ؟

بكل بساطة أقول : عشانه .. حبي اهله

لأن هذا هو الإختبار الحقيقي .. و قديماً قال الغزالي : ( المؤمن إذا أحب المؤمن أحب كلبه ) ..

يعني لو كنتي تحبين زوجك فعلاً .. بتحبين كل حاجة تخصه كــــــــــل حاجة .. اشلون لو كانت

الحاجة هاذي هي أهله ؟! ..

و نصيحة لكم خواتي :: مهما صار بينكم من سوء تفاهم ( بينك و بين زوجك ) او ( بينك و بين والدته )

و هذا اللي يحدث دائماً .. تحملي تخيرينه بينك و بين

أمه

لأنه لو كان رجل يحترم إنسانيته بيختار أمه , ليش ؟ لأن مثل ما نعرف و جا في الحديث إن الأم

هي الأحق بالصحبة , يعني حتى من زوجته .. لأن الزوجة ذكرت في القرآن على إنها الصاحبة

كما في قوله تعالى : [ و صاحبته و بنيه ] ..

لا تحطينه في هالخيار .. لأنه الخيار بالنسبة له صعب و صعب جداً ..

الرجل الشرقي شيحب .. و شو الطريق لقلبه ( غير معدته طبعاً ) الطريق سهل : حبي أمه

و أبوه و اعياله ( إن وجدوا ) ..

و تحملي عزيزتي تذمين أمه أو ولده

أو أبوه أو أهله .. عايلته .. قبيلته .. جنسيته ( إذا كانت غير ) .. سوي العكس .. امدحيهم و حبيهم

أو حاولي تحبينهم عشان زوجك ..

يعني شبيصير يا أختي و يا حبيبتي الزوجة ( و الكلام موجه للي عندهم مشاكل مع أم الزوج أو أهله عموماً )

لو كسبتي هالأم و حبيتيها و عطفتي عليها .. لا تنسين إنها مرة كبيرة محتاجة لإهتمام و حب

و عطف .. لأن لكل إنسان حاجة و هاذي حاجتها .. لا تلومينها .. لأن ولدها ( زوجك ) إنشغل بحياته

و أسرته .. ! عطيها اللي تحتاجه .. و في المقابل انتظري جزاء عملك .. هي بتتغير و بتصير

أحسن معاكِ و زوجك بعد بيصير أحسن و بيحترمك أكثر ..

طبعاً الكلام سهل أنا أدري ., لكن بعد التنفيذ مو صعب ( حاولي بس ) ..

و اللي ما تقدر تحب أهل الزوج .. الأحسن لها تشوف رجّال يتيم ما عنده قرابة و لا أهل ..

[انااااااا]

تسلمي كوكو ع المووضوع الحلو

كلامك والله مزبوط اكبر غلط يلي بتخير زوجها بينها وبين امه او اهله لان حتى لو اختارها هي مع الوقت بينزل من عينها لان الام ما عنها بديل ابدااااا


والله يصلح الحال بيني وبين اهل زوجي يا رب

[oummahmood]

السلام عليكم ورحمة الله وبركاته
جزاكي الله خيرا ممكن الجزء الاول ارا بط اصلي كنت متبعاه ومكملتش

[اسم الذوق]

لك مني كل الدعاء بالتوفيق

[قشطه وسكر]

مشكوره اختي على نصايحك الحلوه
وننتظر درسك الجديد

[قطقوطه مصريه]

كلامك صحيح وانا فى رايى اقرب الناس للرجل امه وللمرآه زوجها
وبمجهود بسيط ممكن تكون ام زوجها هى امها برده

[#جاردينيا#]

الطريقة التاسعة :: تجنبي الشكوك ::

في شكوك و في غيرة / الغيرة مقبولة و مرغوبة أحيانأ و انا اقصد الغيرة المعقولة .. أما

الشكوك فهي مرض ونار تغلي في قلب الشكاك .. و نار تكبر تبدا بالسؤال الواحد .. عقب هالسؤال

يستوي أسئلة كثيرة ما لها حد .. بعدين تتحول الأسئلة هاذي الى تنصت و مراقبة و تتبع و تفتيش

في الجيوب ... الخ ! عملية كبيرة و معقدة ما لنا بها ..

المرأة اللي تشك دايماً عايشة في قلق و توتر و معاناة و إكتئاب .. و ممكن تمرض بعد !! و يصيدها

مرض ذهاني و في هالحالة راح تحتاج إلى طبيب نفسي ..

عشان جذي .. إذا ما كنتي تشكين قولي الحمد لله لأن هذا أمر طيب .. و تجنبي الشك من البداية ..

و إذا ابتليتي بالشك و تعانين منه لازم و حتماً تتخلصين منه .. و تفضلي الطرق اللي ممكن

تساعدج للتخلص من الشكوك

1- اقطعي الشك من أول وهلة .. و لما تكون السالفة فكرة بس اقطعيها ..

2- إذا لا سمح الله شكيتي لا تتحققين ,, لأن ورد في الحديث الشريف ( إذا شككتم فلا تحققوا )

يعني لا تسوين شي و إذا كنتي تراقبين زوجك أو تتنصتين عليه .. اطلبي العلاج على طووول ..

و لا تطولين في المسألة ..

3- إذا كانت عندج شكوك و في مواقف أكدت شكوكج .. لا تحترقين بشكج .. روحي و صارحي زوجج و تأكدي ( إن الله لا يهدي كيد الخائنين ) ..

4- إذا عشتي في بيت أهلك .. و بين أم كانت تشك أو أب شكاك .. و تعترضتي أنتي للشكوك , اعرضي نفسج على طبيب نفساني .

5- إذا لا سمح الله زوجج فقد الثقة فيج .. بسبب شكج و متابعتج له .. تقدرين تردين الثقة و تبنينها
جديد في فترة ست شهور تقريباًُ بس متى ؟ إذا قطعتي التحقق تماماً ..

6- تعلمي الجلسة الإسترخائية .. لأنها راح تعينج على التخلص من الشكوك و التوتر بشكل عام ..

7- إذا مانفع الحوار مع الزوج و لا فادتج الاستشارة النفسية ,, وقتها اعرضي نفسج على الطب النفسي ..



طيب خلنا نقول إن الزوج هو اللي يشك فيج .. اشلون بتقدرين تخلصينه من شكوكه ؟؟؟؟

( هالكلام للي زوجها شاك على الفاضي أو الشك صفة فيه و مبتلي فيها )

انا اقول لج اشلون .. تابعيني

تفضلي :

1- إهتمي فيه أكثر ..

2- اكدي من الوقت للثاني إنه هو الوحيد اللي في قلبج .. و كل معاني الحب اللي في داخلج له ... الخ ..

3- حاولي تجرينه في الكلام .. و خليه يتكلم عن طفولته و ماضيه .. يمكن تكون في حوادث مترسبة
في نفسه .. و تخليه يشك في أي شي ..

4- تحاوري معاه في هالموضوع ( الشك ) و اوعديه إن الكلام بيدور بينج و بينه ..

5- علميه على طول وين تكونين .. رحتي مشوار .. طلعتي مع اختج مع صديقتج علميه على طول بمكان تواجدج .. هالشكل أنتي بتساعدينه يتغلب على شكوكه + لا تنسين تستأذنينه في أعمالج و خروجج .. بالعربي حطيه في الصورة ..

6- لا تسمحين له يتمادى في التحقق من شكه و متابعتج .. و أكدي له إنج مستحيل تسوين أي شي هو يشك فيه .. بعد ما تسمحين له يتعرض لكرامتج أو يشكك فيج .

7- إذا استمر في شكوكه و لا شي نفع وياه .. تعالي له في لحظة هدوء و استرخاء و اقترحي عليه إنه يطلب الاستشارة النفسية ..

" الله يهدي جميع الشكاكين من الازواج "

*
*
*

[#جاردينيا#]

الطريقة العاشرة :: اخلصي الدعاء لله ::

نعم .. أكثري الدعاء لله .. لأن من الحاجات الرئيسية و اللي بإذن الله راح تعينك على الحياة الزوجية 3 أشياء : 1- الإيمان . 2- الدعاء . 3- العمل الصالح

تذكري قول المولى عز و جل في الإيمان و العمل الصالح :: ( من عمل صالحاً من ذكر أو أنثى و هو مؤمن فلنحيينه حياة طيبة ) ..

و تذكري قوله في الدعاء ( و قال ربكم ادعوني استجب لكم ) ..

يعني تخيلي حياتك كيف بتكون لو وفيتي هالجوانب الثلاث :: أن تكونين مؤمنة بالله وحده و تعملين أعمال صالحة يتقبلها الله بإذنه .. و تطلبين ربك بنية صافية و خضوع .. و يتقبل ربك منك دعائك و عملك و إيمانك ( تخيلوا لدقايق )



هاذي 7 معينات للدعاء المستجاب ( بإذن الله ) ::

1- ادعي بخير دائماً .. و امنعي نفسك من إنك تدعين على أي بشر مهما كان ..

2- ادعي و انتي موقنة بالإجابة ..

3- خلي دعائك في كل وقت . و لا تيأسين .. لأن الله يحب من عباده الملحين بالدعاء ..
و لا تنسين أوقات الدعاء : وقت المطر / السفر / المرض / السجود / بين الإقامة و الصلاة / و بعد الصلاة المفروضة / و عند خطبة الجمعة / و قبل الغروب / و عند شرب ماء زمزم ..

4- اخلصي الدعاء لله وحده .. و لا تشركي به أحداً نبياً كان أو وليا صالحاً أو حجرا أو شجرا أو مشعوذ .. خلي دعائك لله ..

5- الصدقة .. و أنتي تدعين تصدقي .. و أنتي تتبرعين بأي حاجة ادعي الله يتقبل هالعمل خالص لوجهه ..

6- اعملي عمل صالح .. لأن الدعاء يرفع العمل (( اليه يصعد الكلم الطيب و العمل الصالح يرفعه ))

7- إذا لزم الأمر صلي صلاة الحاجة .. ركعتين تقرين في الركعة الأولى بعد الفاتحة سورة الكافرون و في الثانية الإخلاص .. ثم تدعين في السجود الأخير بهالدعاء :

"" لا إله إلا الله الحليم الكريم ,,
سبحان الله رب العرش العظيم ,,
الحمد لله رب العالمين ,,
اللهم أسألك موجبات رحمتك و عزائم مغفرتك و العصمة من كل ذنب ,,
و الغنيمة من كل بر ,, و السلامة من كل إثم ,,
لا تدع لي ذنبا إلا غفرته ,,
و لا هماً إلا فرجته ,,
و لا حاجة هي لك رضى ولي فيها صلاح إلا قضيتها يا أرحم الراحمين ,, """

بعدين تسألين حاجتك ::

""" اللهم وفق بيني و بين زوجي و عمّر المحبة بيننا ""

[#جاردينيا#]

نستكمل موضوعنا اللي بدأناه ..

و الجزء الجديد خاص بـ " غرفة النوم " .. تابعوني



في البداية .. تفضلوا هالمعلومة ::

الإنسان الطبيعي يقضي أكثر من ثلث عمره في غرفة النوم .. تخيلوا ثلث العمر بس نقضيه في

غرف النوم ..!

النوم لمدة 8 ساعات من 24 ساعة يعني ثلث اليوم .. فلو إنسان عاش 90 سنة = 30 سنة منها ! غير

ما قبل و بعد النوم , و في ناس تقرا فيها .. و ناس تشوف التلفزيون يعني ممكن توصل

ساعات الجلوس في غرفة النوم إلى 10-12 ساعة يومياً ..

بإختصار كأننا نقضي نص أعمارنا فيها .. يعني لازم تكون أهم مكان بالنسبة لنا ..



عندنا مسائل متعلقة بغرفة النوم .. نحاول نذكرها بشي من التفصيل ..

أولاً : تهيئة الغرفة :

عادة .. لما أي وحدة راح تسكن بيتها أو كان بيت أو شقة مؤقتة .. نلقاها تهتم بالصالة أو

الصالون أو الإستقبال .. و تصرف عليها الألوف في ترتيبها و غيره .. و عادة الغرفة هاذي

ما تستخدم إلا مرتين في الاسبوع ..

لكن لو شفنا غرفة النوم بنلقاها مهتمة فيها أقل إهتمام .. لأن في نظرها هالغرفة ما به أحد راح

يدخلها غيرها هي و زوجها ! ..

و أنا هنا أقول لك عزيزتي .. بالعكس المفروض تكون غرفة النوم من أحلى الغرف في البيت كله ..

*
*

طبعاً ما أقصد إنج تصرفين عليها الملايييين .. و تختارين لها أغلى الأثاث ..

لا ..أنا أبيج تعرفين .. إن غرفة النوم تمثلك أنتي .. جمالها من جمالك .. إهتمامك بها من إهتمامك

بنفسك .. و نظافتها و ترتيبها يمثلونك أنتي .. التنسيق و إختيار الألوان مهم جداً

[#جاردينيا#]

الورود :

و حلو لو تكون طبيعية ( وردة وحدة كل 3 أيام ) ..

حمرا للإثارة ( الحب و الجنس ) ..

بيضا لصفاء النوايا ( حلوة لو كان فيه خلاف لأنها تكون مثل

الإعتذار الغير لفظي ) ..

صفرا للتنشيط و الحوار ..

الإضاءة الملونة :

الأصوات الطبيعية الرقيقة

نعومة الفراش

ممكن تحطين سلة فواكه

تقديم العصاير الطبيعية

و لا تنسين :: الروايح الحلوة ..



املي حواسه الخمس : الشم / البصر / السمع / اللمس / الذوق .. بالإيجاب

نقطة مهمة

يستحسن إنك ماتملين الغرفة بالأثاث .. خلي فيها سعة + لازم تكون الغرفة مرتبة و معتدلة البرودة ..

*
*
*

ثانياً : التهيئة النفسية :

يعني لازم تكون غرفة النوم مكان آمن و مريح ..

خلي غرفة نومكم .. قلعة أمان / و عيادة تشافٍ / و مصح نفسي / و فندق راحة / و ساحل

إستجمام .. ( على فكرة ما في شي صعب .. و كل شي تقدرين تنفذينه )

[#جاردينيا#]

معينات للتهيئة النفسية لغرفة النوم



لا تتناقشين في أي شي سلبي مع زوجك في غرفة النوم .. و لا في إلتزامات البيت أو العيال ..

إذا عندك حاجة : متضايقة منه / زعلانة / تبين تعاتبين أو تلومين / العيال / المصروف / الشغالة أو أو أو .. ممكن تسوين هذا كله خارج غرفة النوم .. إختاري أي مكان ثاني في البيت أو خارج البيت حتى ..

ليش ؟
عشان مانوصل لـ غرفة النوم = مشاعر سلبية





إذا عندك أولاد .. علميهم ما يدخلون الغرفة / أو ياخذون حاجة منها إلا بإذن و لو دخلوا .. ما يبقون فيها لمدة طويلة ..
( ثواني أو دقايق معدودة )
النقطة هاذي مش صعبة لأنك لو فكرتي فيها .. بتلقين الغرفة أساسا للزوجين و مملكة لهم ..




تأكدي من نظافة الغرفة و ترتيب الفراش و تعطير المكان .. إذا الغرفة كانت حارة شغلي المكيف , يعني تحكمي بعد في درجة حرارة الغرفة ..
طفي الإنارة .. و شغلي الأبجورة الموجودة بجنبه على السرير ..
لكن اللي زوجها مايحب .. ممكن تتجاهل هالنقطة ..


و هاذي شغلات بسيطة و روتينية .. لكنها تجذب الزوج ..



قبل لا يجي بوقت قصير أو كلمك و قال إنه جاي ..
جهزي له كاس عصير حتى لو كان عصير جاهز / كوب شاي / كاس ماي << وهذا أبسط حاجة ممكن تجهزينها .. و تحطينها له على الكوميدينو ( ما أعرف له اسم غير ) المهم تحطينه جنب السرير ..

* تجربة : النقطة هاذي جربتها .. بإني أجهز عصير أو ماي و أعطيه إياه لما يوصل أو أحطه جنب السرير لما يدخل ياخذ له شاور .. و تقدرون تتخيلون ردة الفعل ..
لأن الحركة هاذي بالرغم من بساطتها إلا إنها تعني الشي الكبير للزوج = في حد مهتم فيه




خلوا غرفة النوم .. مكان شاعري ..
تهامسي فيه مع زوجك .. عن مشاعركم .. أحلامكم .. تغزلوا في بعض ... الخ ..

.
.
.

هاذي شغلات و معينات بسييييطة جدا ..
لج حرية التغيير و الإضافة فيها .. حسب مزاجكم ( أنتي و زوجج )



ثالثا : التهيئة العاطفية

بإختصار شديد جدا ..

لازم تعرفين يا أختي الكريمة .. إن في فروقات في سيكولوجية المرأة و سيكولوجية الرجل .. و فهمهم للمواضيع ..

مثال :
الرجل يعبر عن حبه >>> بالجنس ..
المرأة تعبر عن الجنس >>> بالحب ..

يعني لو يبي يبين رغبته في الجماع .. راح يظهر لج كل كلمة حب حلوة و كل معنى حلو للمحبة ..
و إذا يبي يتأكد من حب زوجته له بمعنى تحبه أو لا .. دعاها للفراش أو لاحظ مشاركتها له في ذيك اللحظة ..

من هنا .. نشوف إن الإسلام يحرص على إستجابة الزوجة لزوجها في هالعملية .. و هذا حق فوري للرجل ..
و رفضك لزوجك أو للعملية ممكن يترك أثر كبير في نفس الزوج ,, لأن رفضك = ما تحبينه ! وفقا للمفهوم اللي شرحته من شوي ..

طيب هل يعني إنك ماترفضين نهائيا و في كل مرة تستجيبينه ؟؟

إذا كنتي مضطرة ممكن إنك تطلبينه يأجل أو تستأذنين منه يعني تعتذرين منه بدلع أكيد .. لكن لا تطنشين و تطوفين الموضوع عادي ..

و شرط إعتذارك ما يطول = مو كل يوم تعتذرين أو كل مرة ..

حلو ؟

حلو ,, إذا فهمتي هالنقطة عدل , راح تفهمين سبب إصرار زوجك على هالمسألة / و سبب حساسيته في حال إنك رفضتي ..

لازم تعرفين يا عزيزتي إن العاطفة تسبقها مقدمات و تلحقها متممات ..

المقدمات و المتممات = قمة المتعة

ورد في القرآن : ( المال و البنون زينة الحياة الدنيا )

و البنون ممكن تعني مايسبق البنين .. لكن من تأدب القرآن و ترفعه بالألفاظ إختير اللفظ هذا ..
و في تصريح في آية أخرى ( زين للناس حب الشهوات من النساء)

فشهوة النساء - الجنس - محببة للرجال .. و في الحديث النبوي المصطفى حين يقول : ( حبب إلي من دنياكم الطيب و النساء , و جعلت قرة عيني في الصلاة ) ..

بإختصار == النقطة هاذي مهمة جداُ في حياة الزوج و الزوجة ==

[#جاردينيا#]

معينات لجلسة عاطفية مع الزوج

- اعدي خطة بالأشياء اللي تشوفين إنها راح تساعدج في نجاح الجلسة ..

- حاولي تسترخين و تتأملين و تتخيلين الجلسة اشلون بتكون ؟ و اشلون راح تنجح

( تخيلي نجاح الجلسة في أسمى معانيها )

- إذا عندك أطفال .. نوميهم بدري ( في اليوم اللي بتكون فيه الجلسة ) أو وديهم لجدانهم أو

أي أحد من الأقارب .. عشان ذهنك يكون صافي في ذاك اليوم ..

- سوي لزوجك أكلة يحبها ( حتى اللي ما تعرف تطبخ .. حاولي تطبقين وصفة من الوصفات

و إجتهدي فيها ) و طبعا اللي ما عندها وقت أو ماتقدر تطبخ ممكن تطلب ..

- اكتبي عبارات صغيرة و حطيها في جيب الزوج أو عند مدخل الباب ..

- الهدوء مطلوب لك و له .. عشان جذي حاولي توفرينه (حتى لو تحطين موسيقى هادية تريح)

أوه أوه كونتيسة الموسيقى حرام,,,,....؟؟؟
هلا تناصحنا وتقربنا إلى أزواجنا بعدم معصية الرحمن...
أناشيد بتكون أحسن و من غير أى إيقاع بارك الله فيك
الداعيات لك مشرفات النافذة

الأعصاب و تقلل من التوتر ..

- طبعا الملابس لها دورها .. و لا تنسين تراعين ذوق الزوج فيها .. و تلبسين له في ذاك اليوم

ملابس يحب يشوفها عليج ..

- للشموع دورها بعد .. وزعيها في غرفة النوم .. و في البيت ..

- شخصيا أركز على مسألة الروايح ( ريحتك / ريحة بيتك ) لأن لها دور مميز و فعّال جدا في جذب

الزوج .. فلا تهملين هالنقطة أبدا .. ( إسألي مجربة )

- الإبتسامة .. مطلوبة في كل وقت و خاصة لو كانت لزوجك .. ما أوصيج بالإبتسامة او ما يدخل

البيت و عبارات الترحيب .. ( ابتسمي له حتى لو كنتي زعلانة منه ) ..

- شي مهم : حطي في بالك نجاح الجلسة و بعد توقعي فشلها / اعذري الزوج ..

تصير أحيانا تكونين مجهزة و مستعدة .. فجأة الزوج يعتذر ما يقدر يجي البيت لسبب طارئ ..

- شي ثاني مهم بعد : لا تنسين تشكرين الزوج في نهايتها و امدحيه و خليه سبب في نجاح

هالجلسة ( شوفي ردة فعله = بتعجبك أكيد )

[#جاردينيا#]

ملاحظة أخواتي :

لما تسوين الحاجة أو الشغلة الفلانية ..

حاولي تخلين هالشي " ذكرى " شي ماتنسينه و لا ينساه ..

ممكن تكتبين التاريخ عشان تتذكرين ..

سوي حاجة تحسسج إنج سويتي كل هذا و بنفسج ..

تحسسج إن الشغلة هاذي خذت من وقتج و جهدج و تعبتي عليها ..

لمن ؟

لزوجج

و له هو بس

مو لأي أحد ثاني ..

**

الملاحظة الثانية :

عن تجربة ..

أحيانا لما أقوم بشغلة معينة و لأول مرة .. و تكون ماخذة من وقتي و جهدي ..

و يجي زوجي .. و ما أشوف عنده ردة الفعل المطلوبة أو اللي كنت أتوقعها .. أحبط !

بس بعدين أقول لحظة ! هو مب متعود يشوف هالشي .. و أغلب الأوقات تكون ردود أفعال

رجاجيلنا سلبية ..

يعني = لازم ما أوقف .. راح أستمر أسوي أسوي أسوي .. حتى لو كان الشي للمرة الأولى

اللي باسويه فيها .. لأن الزوج بيتغير و بيقدّر جهدي و ما راح ينساه ..


************************************************** ************************

لا تعتذرين

الفقرة هاذي .. للمتزوجات و اللي عندهم عيال ..



عزيزتي .. لا تقولين " ما يصير " أنا ( عندي بيت و اعيال و أشتغل للعصر .. و و و و ) تحطين

مجموعة أعذار ..

و بعدين اشلون ترضين تقومين بذي كله بدون ( زوج ) .. !! نعم .. أنتي لو استمريتي جذي

بتمشي حياتج من غيره ..

و هذا اللي مانبيه منج ..

لأن أنتي المسؤولة عن حياتج .. عن علاقتج العاطفية و الزوجية و الأسرية ..

بالمختصر = أنتي مسؤولة عن نجاح كل هالعلاقات .. و صدقيني إنج ما راح تنجحين لو قمتي

بها من غير الزوج ..

*
*

لاحظتوا من بداية الدورة إن الكلام كله موجه للمرأة ؟؟

زين و الرجّال ما عليه أي واجب يسويه ؟؟

ما تنوجه له مثل هالدورة ..

ما يسوي مثل المطلوب من الزوجة ؟؟؟

الجواب :

بلى .. أشياء كثيرة مطلوبة منه و لازم يسويها .. دورات كثيرة مطروحة للأزواج لازم يتسفيدون

منها ... الخ

لكن لو جينا لجانب الرومانسية .. بنلقي الضوء على الزوجة ..

لأن الأزواج أو الرجال ماتعلموا الرومانسية ..

ما قروا قصص الحب و الغرام ..

أكثرهم ما شاف أفلام من هالنوع ..

بعكس الحريم .. اللي تشدهم مثل هالمواضيع .. لأنه في طبيعتهم ..

في رجال رومانسيين نعم .. لكن الرومانسية موجودة أكثر في المرأة .. بأضعاف مضاعفة بعد ..

************************************************** **
إنتباه !

يمكن تكون البداية صعبة عليج .. إذا ما كنتي متعودة ..

يمكن تتمللين لأنج مب متعودة ..

أو تخافين ردة الفعل السلبية من الزوج ..

بس حطي في بالج الحركات هاذي تخلي الحياة الزوجية متعة .. و تكسر الروتين ..

و المطلوب منج : المحاولة لا أكثر .. و لا تيأسين ..

و تذكري : السعادة سلعة غالية تحتاج إلى جهد

[#جاردينيا#]

ما المطلوب تعلمه لأكون سعيدة في حياتي الزوجية ؟


1- واجباتك و حقوقك الشرعية .

2- واجباتك و حقوقك وفق الأعراف المعمول بها في بيئتك

3- إدارة المنزل و يشمل : التنظيف و الترتيب و الطبخ .

4- فن التعامل مع الزوج نفسيا .

5- تربية الأولاد

6- سيكولوجية العلاقة الجنسية و حاجة الرجل منها

7-فنون الصحة و الجمال

.
.

طيب من وين نتعلم كل هالأشياء ؟

اقري في هالمجال .. و ابحثي و دوري مقالات و كتب و ثقفي نفسج ..

اسألي عن الدورات و البرامج التدريبية و شاركي فيها .. بتفيدج كثير .. و بتستفيدين منها


احرصي على اللقاءات التنويرية : محاضرات / ندوات / مؤتمرات / لقاءات جماعية / مقابلات تلفزيونية مع متخصصين في هذا المجال .

احرصي على إنج تقتنين مواد مسموعة .. من الإنترنت ( على فكرة لوبحثتي في الإنترنت بعنوان
دورتنا .. راح تحصلين على مادة مسموعة ) .. بعد في أشرطة لمتخصصين .. تقدرين تشترينهم ..

لا تنسين المواد المرئية .. اشرطة فيديو / برامج تلفزيونية ... الخ ..



انتهت الدورة