ساعدوني

[همسة مصر]

السلام عليكم ورحمة الله وبركاتة
انا عندي مشكلة في حياتي وحابة اني اطرحها عليكم..
مشكلتي هي دراستي...مش بزاكر خالص..انا في سنة خامسة طب بشري..ومش بزاكر نهائي
عندي اختبار يوم الجمعه القادم ولحد الان لم ابدأ بالمزاكرة..والمفروض اني ازاكر 200 صفحة تصوروا؟
وكل مرة استعين بالله واجي ازاكر ..اازاكر كمية بسيطة جدا واليوم يضيع
مش عارفة اعمل اية وتعبت وجالي خوف كبير من بكرة لان السنادي سنة صعبة جدا جدا ومحتاجة مزاكرة من نار
ارجوكم قولولي اعمل ايه

[همسة مصر]

انا وقتي كلة يضيع على النت
او في النوم

[فرح1983]

بصي يا حبيبتي، انت اصلا مش عاوزة تزاكري، ممكن تكوني مكتئبة او فيه حاجة مضايقاكي، الأول اخلصي منها، غيري جو مثلا كدة، اخرجي شوية وبعدين ارجعي البيت وانت رفريش، وبعدين نامي بدري واصحي تاني يوم قبل الفجر بنص ساعة او بعد الادان، صلي الفجر، وقولي الاذكار كدة، واقري ولو صفحة من المصحف، واستعيني بالله، اعملي كدة سانوتشات وكوباية شاي، وابدأي، وقت الفجر دة تحفة في المذاكرة، شيلي الكمبيوتر من قدامك خالص عشان ما تضعفيش، وافتكري حاجة مهمة، اولا انت ماشاء الله مادمت في طب يبقى انت اصلا مجتهدة وزكية، وبعدين كمان في سنة خامسة يعني ماشاء الله لاقوة الا بالله قطعتي شوط كبير، استعيني بالله وادعيه من قلبك، وخلي مامتك تدعيلك، وابدئي، وعارفة ايه كمان قسمي المادة، هما مثلا 200 صفحة على 4 ايام لحد يوم الخميس، يعني كل يوم 50 صفحة، وقولي مش هنام الا لما اخلصهم،مهما كان ان شاء الله، وتاني يوم مري سريعا كدة عليهم، وبالتوفيق ان شاء الله، وافتكر ان 50 صفحة بالنسبة لمذاكرة الكليات مش كتير، انا كنت في كلية عملية برضه صعبة وكنت باعمل كدة، وكان عندنا دكتور بيقولنا طول ما انتوا بتبصوا للكتاب كدة وتقولوا ياه كل دة، عمركوا ما هتنجزوا، قسموها وان شاء الله هتخلص.
كوني عندك ثقة بنفسك قوي، وقولي ان شاء الله اللي جاي مش قد اللي فات.
والاهم من كل دة، ربنا سبحانه وتعالى وثقتك فيه، وطاعتك ليه، ادعيه من قلبك يهديكي ويوفقك، وكوني على يقين من كدة، بس المهم انك تعملي اللي عليكي، عشان اما تنامي على النخدة بالليل واما تدعيه ما تكونيش حاسة بالتقصير، صدقيني الاحساس بالندم قاتل، وربنا يوفقك اللهم امين.وابقي طمنيني.

[همسة مصر]

الله عليكي..والله كلامك جميل ودخل قلبي بصدق
ربنا يخليكي وينولك كل اللي في بالك
وان شاء الله هعمل بكلامك

[فرح1983]

ربنا يكرمك يارب، وانا والله بدعيلك، وبدعي لكل الطلبة والطالبات ، دي ايام صعبة، ربنا يهونها عليكم، ويوفق الجميع اللهم امين، وانا فعلا كنت بكلمك بصدق وربنا شهيد على كدة، وعن تجربة، انتي بس اعزمي وتوكلي واعملي، وبالتوفيق يا قمر.

[* ام ميدو *]

همسة مصر

ما شاء الله عليك شو هالتخصص الحلو يلي يرفع الراس

انا بحب يلي بيدرسوا طب _الله يوفقك

اعتقد انو انت مو على طبيعتك هاي الفترة
يعني في موضوع معين زاعجك اما يكون علاقتك بمن حولك من الاصدقاء او من الاهل /الله اعلم عليك ان تتوكلي على الله وتنسي موضوع انك ما بدك تزاكري بالعكس
حفزي نفسك وتحدثي مع ذاتك بكلمات مشجعة مو كلمات محبطة
وخصوصا انو تخصصك محتاج دراسة مو لعب وانت امل المستقبل
حاولي ان تسعدي نفسك بنفسك ابتعدي عن كل ما يشعرك بالضيق والملل والرتابة
جددي من حياتك
غيري مكان دراستك
اخرجي من غرفتك الى الحديقة بالمنزل او البلكونة او....
اطردي افكار الكسل بعيدا عنك وتذكري الثمار التي ستجنيها بعد الدراسة

رعاك الله ووفقك
بس

بفترة امتحاناتك ابعدي عن الملهيات متل النت شوي لانو الوقت بيمر وانت ما راح تستفيدي شي

ماشي
رعاك الله