الضـــــــــــــــــــــــــــــــــــــــــــــــ ــــــــــــــــرب

[من ليبيا وخلاص]

السلام عليكم ورحمة الله وبركاته



الضرب انواع

هناك ضرب الازواج لزوجاتهم وهدا شئ مخالف للشريعة الا فى حدود معينة

مش هدا موضوعنا

هناك ضرب الزوجات لاازواجهم { لااحد يستطيع انكار هدا حتى فى ليبيا موجود} تحضرنى حادثة رواها لى صديق

كان ماشى الصبح للجامعة وفات من قدام المركز لقى مراة تضرب فى راجلها بالكف قدام المركز وتقوله طلقنى وتسب فيه وما خلت شى من قاموسها اللغوى الخاص بها الا ونعتته به

وهو مسكين يا حبة عينىيقولها غير وسعى بالك الناس تتفرج وعاد زى العادة رجال الشرطة فى الوقت والمكان المناسب تلاتة يتفرجو واحد يحز {على اساس احسن واحد فيهم}

وهناك من هده الامثلة الكثير والكثير

على العموم مش هدا موضوعنا

هناك نوع ثالث من انواع الضرب وهو ضرب الاباء والامهات لابنائهم { ادا كان القصد خير اللهم اجلعه خيرا}
اما ادا كان الضرب فقط لان الابن لم يفعل شئ يرضى الاب والام وليس له علاقة بالاخلاق
فهدا ظلم
بعض علماء النفس يعتبرون ضرب الاطفال من قبل الاهل يوثر سلبا على شخصياتهم وتصرفاتهم مستقبلا

ليست لدى الرغبة فى كتابة رائ {النواعم فى برنامج كلام نواعم} لان كل شى عندهم ضد المراءة والطفل غلط ولا استبعد انهم يعتبرونه نوع من انواع الارهاب
دعونا من احلامهم الوردية

على العموم
مش هدا موضوعنا

هناك نوع اخر وهو ضرب الحديد بالحديد { هدا مثل ليس له علاقة بموضوعنا}

هناك نوع من الضرب وهو ضرب الامثال { لالا زودتها يا ليبى قول شن تبى تقول وريحنا }
{باهى ما دفش}

{ فى نوع اخر لازم نقوله وصدقونى انه ليه علاقة بموضوعنا وهو جدول الضرب } { ما تقولوش شن جاب هدا لهدا اهو حتى تشابه فى الاسماء المهم نوع من انواع الضرب}

زعما مزال فى انواع من الضرب

اعتقد فى { هدا فى حال اسثنينا المضاربة فى الاسعار بتقولى هدا هبل شن جاب الكلام لبعضه }
{ بنقولك تى مشى حالك كله يتكون من الجدر ض _ ر _ ب }

يحضرنى مثل يقال لمن لم ياخد بكلامه او رائ ابداه

{ ضرب بكلامه عرض الحائط}

فددتنى يا ليبى علاش تكتر فى الكلام خش فى الموضوع طووووووول

باهى وانت خيرك مستعجل تقول المنتدى بيسكر

نرجعو لكلامنا

لا تنكرو انه هناك نوع من انواع الضرب لم ندكره وهو { ضرب من الجنون} الدى يصيبنى فى غالب الاحيان ولا يستطيع احد الانكار بانه لايصاب به بين الفينة والاخرى}

يقولو فلان ضرب فلان هدا نوع من انواع الضرب

يقولو فلان ضرباته سيارة حتى هدا نوع من انواع الضرب

ويقولو فلان سوقه مضروب نوع من تلك الانواع

ويقولو ضرب الحبيب زى اكل الزبيب { تى اما زبيب هدا بلاش منه}

ويقولو ضارب روحه حاجة كبيرة{ تقال للانسان المتكبر}

ويقولو ضربنى وبكى سبقى وشكى { مثل نبصم بالعشرة انه خارج نطاق موضوعنا }

درتلكم زى الدكتور الفلانى عارفينه

نخش فى الموضوع ولا نزيد نهدرز شوية

خش وفكنا دهشتنا يا راجل

باهى وانت من الصبح تعيط

نوع الضربق اللى ما دكرتاش هو


الــــــــــــــــــــــــــــــــــــــضـــــــــ ــــــــــــــر ب فى المدارس
شوفتو كيف الموضوع يخص جدول الضرب ومن قريب
يا بوى المدرس اليوم ضربنى

{ان شاء الله يقتلك باهى اللى ما جيتش انا وكملت عليك تستاهل باش تشد قرايتك}

لكن يا بوى هوا ضربنى مش على خاطر القراية ضربنى هكى وخلاص

{ايه توا بتطلع انت ما درت شى لو ما درت شى راهو ما ضربكش المدرس}

فى حوش تانى بعيد شوية على الحوش الاول لكن الاحداث فى نفس المدرسة

يام الابلة اليوم ضربتنى على خاطر مش لابسه سبيدرو فى حصة الرياضة { نبى نشرى اسبيدرو زى اسبيدرو لميس }

باهى توا يجى بوك ويشريلك
وبعدين تعالى جاى من هى اللى ضربت بنيتى قلتيلى الابلة ابلة منو هده اللى ضرباتك

اليوووووووووووووووووووم نهارها اسود على راسها هداااااااااااااا مامازال تضرب بنتى انا شنى تحساب ما عندكش امالى ولا كيف
غدوة نمشى معاك للمدرسة ونوريها حسابها

{ وجى غدوة ومشت الام مع بنتها ودارت نهار على قولها اسود كحلى للمدير والمدرسة}
{لا والغريب فى الامر ان المدرسة تدافع على روحها وتقلها هدا قانون حصة الرياضة اللى ما يلبسش سبيدرو فى الحصة بياكل طريحة}
{ كيف حالك يا ابلة وهوا اما قانون اللى قال ان الطالب لو ما لبسش سبيدرو ينضرب }
ولا قانون حاطاته انتى}

وطالب ضربه المدرس كسرله ايده

وطالب صرباته الابلة كف على وجهه { مع ان الله كرم وجه بنى ادام }
وطالب ضربه المدير فلقة { لكن كلاها فلقة عليا الحلال لو جت فيا انا لما نوض نبطح المدير ومعاد ماشى للمدرسة}

وطالب شده المدير والمدرس وكلى بالكانشو والشلابيخ والعنافق والبونى منين طلعوله عيونه{ بينى وبينكم والله تقول ما يحس بكل من غدوة عاود عملته شكله جلده مات من الضرب}

وطالبة شدتها المدرسة من شعرها وتكر فيها فى الفصل بين المقاعد ما تقولش بشر { وهدا كله علاش على خاطر سهت شوية فى الحصة}

الله يسامحك يا ابلة صالحة

وطالبة الله غالب عليها دماغها هدا حده {شدتها المدرسة وهدا شى شفته بعينى وتضرب فيها بكعب الكندرة على راسها هوا راسها ناقص البنت مسكينة}

الله يسامحك يا ابلة صالحة

ومجموعة طلبة شدتهم الابلة فى تركينة الفصل وضرب وين ما يجى على الراس وعلى الوجه وفوتت فيهم نص الحصة ضرب

الله يسامحك يا ابلة صالحة

طالب ما كتبش الواجب شداته الابلة وضرباته على ايده حاله خير من اللى قبله ولاه

{ لا مدام تحت ايدها حاله مش خير لان ضرباته وهوا قالب ايده يعنى على صباعه من الخلف وما تسمع غير الطك طك طبعا صباعه نكسرو لان الابلة اليوم هداكا مزاجها مش رايق وفشت فيه غلها شن فيها املا فى من بتفش خلقها لو مش فى الطلبة اللى تقرى فيهم عاد حتى هما يتحملوها شوية زى ما ممتحملتهم}

الله يسامحك يا ابلة صالحة

الا ترون معى ان ابلة صالحة { اسم على مسمى}
هدا المدرس يعانى من بعض العقد النفسية لاباس بانه يفرغ شحنته فى الطلبة

يوم يضرب طالب بصندوق مشروب بلستك جايبه معاه من المقصف ويوم يبطح طالب ويعفس على رقبته قدام الطلب { صدقونى فيلم رعب لااطفال لاتتجازو اعمارهم 12 عشر}

علماء النفس والاجتماع يقولون ان الضرب لا ياتى باى نتيجة مع الطالب

{ على عكس رائ صديقى المدرس والدى تخرج من قسم علم الاجتماع ونسى كل ما درسه خلال اربعة سنوات فهو يقول بعد ان كان يسمعنا موشحات عن علم الاجتماع خلال دراسته فى الجامعة يقول ويردد دائما الجملة الشهيرة والتى دائما يرددها من سبقوه فى هدا المجال مجال التعليم الجملة الشهيرة والتى تقول { ما يجوش الا بالعصى }
هل تعلمون ان فى كل مدرسة عدد من الموظفات يسمونهم {اخصائية اجتماعية} وينادوةنها الطلبة ابلة

{هده الابلة التى درست علم النفس والاجتماع والمفروض انها تكون مهيئة لعملها { دائما تمسك العصى فى ايدها وتردد نفس الجمله الشهيرة ما يجوش الا بالعصى

يحضرنى موقف حدث اتناء دراستى فى المرحلة الاعدادية

بانه داث يوم { جى مدرس متعفلق وجوه مش مليح وهوا اصلا ديمة يدور فى راس من يعشش
لقى طالب فى الفصل يدربك على المقعد صح هى مدرسة مش مسرح لكن اللى صار
ويشده المدرس وهاك يا ضرب شئ فعلا حتى جنود الاحتلال الاسرائلى ما دروشى فى الفلسطنيين
شن تتوقعو من الطالب فاض به الكيل ولجا الى الخطة ب 612 ودافع عن نفسه واصبح الضارب مضروب ومنها الطالب لم يعد للمدرسة والمدرس لم يتوب عن ضربه للطلبة}

اغرب ما سمعت به فى هدا الموضوع { حدثنى صديقى المدرس اللى متخرج من قسم علم الاجتماع والدى يستعمل الجملة الشهيرة {ما يجوش الا بالعصى}
حدثنى بانه حدث شجار بين طالبة والدكتور المحاضر فى مادة علم الاجتماع والطالبة تدرس فى نفس القسم يعنى الزوز متقفين اجتماعيا}

قالى صارت بينهم عكرة وصلت للضرب تخيلو دكتور وطالبة يتشابكو بالايدى وهات يا ضرب
وعلى مرئ من الجميع طلبة ودكاترة تخيلو طالبة تضرب دكتورها ودكتور ينزل للمستوى هدا ويمد ايده على طالبة ويتعارك معاها باللسان والضرب {بونى وشد شعر وعباط وتخيل انت عاد}

كل ما فعله الدكتور فى نهاية العام انه خلها فى المادة بعد ما مسحت بكرامته الارض

اللى ضحكتنى انها هدداته وجابتله خوتها وياويله لو ما تنجحش الدور الثانى {صدقونى نجحت وتخرجت وانضمت الى جحافل المدرسين المثقفين اجتماعيا واستلمت سلاحها ودخلت معترك
الحياة الدراسية
هدا ناهيك
عن السب والشتم والاهانات التى ينالها الطلبة كل يوم الى ان تعودو عليها واصبحت ضمن قواميس حياتهم واحد اهم الكلمات المتداولة بينهم

{الله كرم الانسان والمدرسة تقوله يا حيوان اكرمكم الله }

والحيونات عدة انواع ولا يعرفون منها الا النوع الاسوء

ادا نضيف ان السب والشثم والاهانة هى نوع من انواع الضرب النفسى

الله يسامحك يا ابله ربيعة

{اوقف باهى يا باكو يا كراطون يا خروف يا سطل يا القائمة تطول}
الله يسامحك يا استاد شاكر

{بلغنى دات يوم وانا فى المرحلى الثانوية انه فى حصة العسكرية يجب على العسكرى انه يسب ويشتم الطلبة ولكن حدارى من يشتم اهلهم او وطنهم او دينهم والباقى مباح بدعوى انهم يجب عليهم الاعتياد على الشتم لعل وعسى اسر الطالب فى الحرب وعند سبه او شتمه لا يقفد اعصابه ويكون متعود زعما صح الكلام هدا}

نظرية برضو

يا معشر المدرسين والمدرسات ارحمو الطلبة والطالبات
وارتقو الى مرتبة البشر

وكفو عن الضرب المبرح وغير المبرح
وارحمو من فى الارض يرحمك من فى السماء

هناك بعض الاهل يعترضون على ضرب ابنائهم { ويولعو فى المدرسة النار لو انضرب ولدهم ياريت واجعهم حال ولدهم وحال قرايته ويحاولو انهم يهتمو بيه ويشدو عليه قرايته لا واجعهم ان الابلة الفلانية ضربت ولدهم وهى من تطلع بنت من باش تضرب ولدى انا}

وانه الى امين اللجنة الشعبية للتعليم والبحث العلمى

اصدرو قرار بمنع الضرب والعنف المدرسى وعلقو هده القرارات فى المدارس

{ كم انا نادم على كل ضربة كليتها فى المدرسة بسبب وبدون سبب يا ريت كنا نعرفو ان الضرب فى القانون ممنوع راهو الواحد ما مدش ايده لاى ان كان ومهما كان}

واخيرا وليس اخرا

الله يسامح كل من
ابلة صالحة
ابلة صليحة {صاحبة اكبر قاموس سب وشتم فى الوطن العربى}
ابلة صديقة
ايله كريمة
ايلة نادية
ابلة هنيدة
استاد عز الدين {عنده عصى قعدة عنده 10 سنوات ما فيش طالب فى المدرس ما انضربش بيها سواء طالب صالح او طالح الكل انضربو واللى ياكل منه 10 ضربات يقعد الى المرواح ايديه يسطرو ومنفوخات شكو اوليا الامور الى بوه الالف المرات واخر مرة حلفله بوه عليها ومنها حلف الاستاد عز الدين انه لن يمد يده على طالب باى عصى بعد عصاه الحبيبة والتى فارقها مجبرا وقرر ان يستعمل يديه فقط حتى لايخون دكرى عصاه اللعينة}

الله يسامحك يا استاد بشير {كان عنده طوبو غاز وما نحكيلكمش عليه}
الله يسامحك يا استاد يوسف { كرهنى فى حاجة اسمها كيمياء}
الله يسامحك يا استاد الصادق { هدا مدرس رياضة ويمارس فى الرياضات العنيفة على الطلبة}
والقائمة تطول
واشكر كل من

ابلة سارة حلوة الفيزياء والاحياء معاك
ابلة ربيعة حلوة الرياضيات معاك
ابلة زاهية اللغة العربية وقواعدها من غيرك خسارة
ابله ميسون صح الرسم مش مهم لكن استمتعنا معاك بالحصة
ابلة جميلة وابلة فاطمة وابلة خيرية وايلة هاجر {مدرسات يضرب بهم المثل فى التعامل مع الطلبة}

استاد احمد عرفنا حاجة اسمها اللغة الانجليزية معاك
استاد شكرى الاحياء فى الثانوى حصة مليحة
استاد على استاتيكا وديناميكا واحصاء فهمناهم منك
استاد صبرى واستاد خليفة واستاد فوزى {ونعم الرجال}

اما البقية الباقية والدين لم يتركو بصمة فى داكرتى لا لوم عليهم كل اللوم على داكرتى الضعيفة

يا معشر المعلمين كفو عن ضرب اينائنا والا سنغادر الى كوكب اخر لا يوجد به عصى مكانس ولا عصى مقاعد ولا طوبوات امية ولا طوبوات غاز

ان كوكب ب 612 فى انتظارنا ويفتح لنا دراعيه وهيئ لنا اطيب مقام
ولن يصعب عليا فراقكم وفراق الارض التى ولدنا فيها وعليها


ارجو ان ينال الموضوع استحسانكم كما ارجو ان لا تستعصى عليكم قراة الطريقة التى كتب بها

لانه كتب باللجهة الليبة ارجو ان تناقشو معى مشكلة الضرب فى المدارس اعتقد ان هده المشكلة تعانى منها كل الدول العربية

كما ارجو ان اكون وضعته فى المكان المناسب


السلام عليكم ورحمة الله وبركاته