طالبة مشورتكم ياللي مالي غيركم .. خصوصا سكان ينبع .

[المغتربه..]

السلام عليكم ورحمة الله وبركاته
مرحبا اخواتي كيف حالكم

انا ساكنة بالشرقية وسعيييييييدة فيها الحمدلله
زوجي من فترة جاله عرض بالهيئة الملكة في ينبع الصناعية
ويبينا ننقل هناك
وهذا الموضوع يذبحني ..

ما ابغى أترك الشرقية انا جدا مبسوطة فيها

ومن كم يوم وهو يلح ويزن يبيني أوافق

قلت عطني وقت افكر وطرررررت لكم هنا باسألكم

الي تعرف ينبع الصناعية (الهيئة الملكية ) تكلمني عنها
الحياة فيها .. المداااااااااارس اهم شي
الترفيييه اهم واهم
النـــــــــــــــــــاس بعد شي مهمممممممممم
انا عندي ولدين 6 سنوات و 10 سنوات
وكللللنا اجتماعيين ونحب النااااس والجمعااات

كيف الوضع بالبلد من ناحية الناس والترفيه

وانا ابي اتوظف مابي اقعد بالبيت

اش مجالات التوظيف ؟ أي مجال
اهم شي أحتك بناس واتعرف

ردوووووولي الله يسعدكم ويفرج عليكم

[فرولاية جده]

وعليكم السلام
ميمو
وحششششششششششششتيني

ح جيب لك الدرر حاااااااااااالاً

[خزامى المدينة]

اخيتي والله ما اعرف فيها كثير لاني من المدينة .. بس جيراننا كانوا اخوانهم في الهيئة الملكية ومبسوطين .. ويقولون مثل الهيئة الملكية يالجبيل .. ان شاء الله البنات يساعدونك ..
وترى الهئية بالملكية ارقى كثير حتى بحرها انظف ومرتب بس زحمة اوقات الاجازات ..

[الدّرر]

.،

يا أهلا والله بسوووومة ..
شوفي ماما كانت ساكنة بالشرقية بحكم دراسة بابا بالبترول والمعادن .
والآن الحمد لله مبسوطين مررررة ..

وترى يفرق لو انك جاية للهيئة الملكية ( ينبع الصناعية ) أو رحتي لينبع البحر ..
لكن اللي فهمته منك انك بتجي الصناعية ..

شوفي المدارس من أفضل مدارس المملكة بشهادة الكل لأنها مبنية على نظام
الجامعات السعودية يعني دور واحد وبوسطها الساحة ..
( يعني ما هي على شكل عمارة ) الفصول مكيفة وممتازة ..
في باص يتكفل صباحاً وظهراً بتوصيل وإرجاع أبنائك بدون أي تكلفة ( مجاناً )
مهتمين بالذات للأولاد للموهوبين والمدارس الابتدائية للأولاد ممتازة ..
مثلاً عندنا مدرسة البيروني الابتدائية ( وهي حاصلة على شهادة الايزو العالمية للجودة ) ..
بس انتي اكتبي عنها بقوقل وشوفي الأنشطة الخارجية والمسابقات الدينية والثقافية ..
وإذا تحبي تدخليه أيضاً مدرسة تحفيظ قرآن اكتبي عن مدرسة الإمام نافع لتحفيظ القرآن
تضم المرحلتين الابتدائية والمتوسطة ..
وصح بكل مرحلَة في مدرسة يختاروها تكون " الرائدة " يعني يطبق فيها الأفكار الجديدة
والأنشطة والبيروني هي الرائدة عند الأولاد ..

هذا بالنسبة للمدارس وأي استفسار أنا جاهزة ..

:

بالنسبة للمتنزهات فالحمد لله ينبع كلها متنزه يعني المدينة تراها منظمة كأفضل ما يكون ..
وحاصلة على مركز عالمي بالمقارنة بالمدن الصناعية الأخرى بحكم أنها جمعت بين الترفيه
والنظافة والنظام والصناعَة ..
يعني بما أنها صغيرة فبها ملاهي واحد فقط بالبلد وليس بالصناعيّة ..
لكن يوجه ملاهي مصغر بالدانة مول بالصناعية ..
واللي بتحتاجيه ان شاء الله بتلقيه لكن في نقطة مهمة .. لو انك انتي من اللي يحبوا فقط
الأسواق والمولات يعني ( اللفلفة بس للوناسة ) مارح تفرحي كثير عندنا بحكم أنه بينبع الآن
في مول واحد وبيتفتح مولين ثانين قريب ان شاء الله ..

بالنسبة للثقافة أغلبها رااقية جدا ًوعاالية بشهادة اللي جو وأولهم أهلي ..
لأن مستحيل أحد يعيش بالصناعية إلا وأبوه متوظف رتبة حلوة ..
مهندس / مدرس / مدير / دكتور / ... إلخ
فالاهتمام بالأبناء جداً رائع ماشاء الله وبالتالي التواصل جميل .. يعني طبعاً على حسب الحي
اللي راح تنقلي له .. لكن شوفي غالباً عندنا هنا ( يعني كل ما أسأل وحدة تقولي أيوة ) أن
كل أسبوع الجيران بيتجمعوا ببيت وحدة منهم ..
وهذا شيء حلو وترفيه وتغيير ..

:

المستشفيات برضها حلوة الحمد لله .. وعلى حسب شغل زوجك لو زوجك بيشتغل في الشركات مثلاً
سابك راح يكون العلاج والدواء مجاناً بأي مستشفى ( لكن بدون تجميل ) ..
أرامكو مثلاً يكون محددين له مستشفيات ..
يشتغل في الهيئة يعني مدرس أو أي وظيفة بالهيئة يوجد مستشفى خاص بهم العلاج مجاناً بكافة الأمور بما يدخل
فيها التجميل ( تقويم الأسنان وغيرها )

:

المراكز الصيفية لا أعلم عنها كثيراً لكن بالنسبة للبنات والأولاد الموهوبين أو من يرى الآباء
فيهم موهبة يتواصلوا مع المدرسة ويحاولوا ترشيح ابنهم لاحدى المراكز الخاصة بالموهوبين ..
وبالذات الأولاد ترى شي جميل جداً أخي فيه من أكثر من 4 سنين بالإجازة يعني يتعلموا الربوت
وأنشطة أخرى جميلة ..

:

الأندية ممتازة الحمد لله ومحافظين عليها ..
في دورات فروسية ودورات سباحة وأندية رياضة ... إلخ ..
وأيضاً حلقات التحفيظ تقريباً بكل حي لا زم تلاقي مسجد تقام فيه حلقات حفظ قرآن ..

:

ومجالات التوظيف على حسب شهادتك وتعليمك ..
عندك المدارس مثلاً .. المراكز الصيفية .. البنوك النسائية .. الأندية .. إلخ

يعني ما عندي خبرة بالتوظيف كثير ..

:

امممم ايش بقي ؟
أيوة المطاعم الحمد لله حلوة ( أنا ما لي خبرة كثيرة فيها )

وشوفي باختصار ..
احنا ينبع حبيناها وعايشين فيها أكثر من 11 سنة والحمد لله أفكر كمان لو اتزوجت أعيش فيها
ولا راح أقبل لأولادي مدارس غيرها أو مثلا ًالجبيل الصناعية لأنها نفس الفكرة ..
لكن ناس عن ناس تفرق ممكن انك انتِ مثلا ًجاية من الشرقية وهناك أكثر المنتزهات .. المطاعم
.. إلخ
وينبع صغيرة لسى يعني أكيد المرافق بتكون أقل ..

وربي يكتب لكم اللي فيه الخير ^^

[الهِمَمْ ..~]

أؤيد الدرر وبشدة
أنآ وعآئلتي أيضاً من سكآن ينبع الصنآعية من 18 سنة .,
والحمدلله مرتآحين جداً
استخيري ولا تترددي بالنقل وحيآكم الله بيننآ ~

[الدّرر]

.،

وصح نسيت ^^
العناية بالمسابقات جداً رائع الحمد لله ..
يعني على مستوى المملكة مستحيل تلاقي مسابقة إلا وينبع حاصلة على مراكز فيها ..
والشركات أيضاً تقيم مسابقات على مستوى ينبع ككل ( صناعية والبلد )
والحمد لله الإشراف جميل

[المغتربه..]

الله يسعدكم ياااااارب على ردودكم وتفاعلكم
الدرر حبيبتي الله يسعدك على هذا الشرح الوافي
لا انا موو من محبي الاسواق والصجة بالعكس اعشق الهدوء
لكن ما اقدر اعيش بدون ناس !
خصوصا اني حكون مغتربة ومالي احد
احب اجتمع مع جارات يكونون نفس الفكر والبيئة
نطلع سوى نفطر سوى نتسوق سوى
احب اولادي يختلطون بأولاد ويلعبون معاهم يكونون من بيئة متقاربة لبيئتي
هذا الي معلقني بالشرقية مو لاجل الشرقية نفسها
لا .. لأني ساكنة بسكن جامعة الملك فهد للبترول والمعادن
والناس الي هنا متصاحبين ومتقاربين وكلنا مع بعض دايم
فاتعودت دايم اتواصل مع الجيران والحبايب
ماااااااا اقدر اعيش مقطوعة ومبتورة مالي ناس !

اتمنى تكوني فهمتي قصدي
من نقطة ثانية المدااااااااااااارس
اولادي بمدارس الجامعة وهي افضل مدارس بالمنطقة الشرقية
ابغى المدارس الي ينتقلوا لها تكون بمستواها وأفضل
راح ادخل على موقع المدرسة الي قلتي عليها واشوف

الله يكتب الي فيه خير
والله زوجي كل شوي يقول يلا وافقتي ؟ اقبل العرض؟
وانا مابي احس اني عقبة بطريق طموحة وبنفس الوقت متخوووووووفة

[الدّرر]

.،

الله يبارك فيكِ وربي يكتب لك اللي فيه الخير ..
المدارس الحمد لله نظامها راقي ..
وإذا سبق ودرستي بالجبيل الصناعية تقريباً نحن مثلها
لكن مدينة ينبع الصناعية يسموها " مدينة الهدوء والأحلام "
حتى المتنزهات والشواطئ هاادئة ومنظمة .. : )

وحتى المدارس متميزة الحمد لله من ناحية المراقبة والنظافة والحمد لله ..
واحنا هنا عندنا الجامعة اللي بالصناعية أخت اللي بالبترول والمعادن
نفس المواد والتخصصات ..
إذا تحبي تكملي مثلاً الدراسة ..

وفي الأخير استخيري ربك وصلي الاستخارة ..
وإذا قلبك مطمن وافقي وإذا غير كدى يكون شر إن شاء الله وربنا صرفه عنكِ

[المغتربه..]

الله يسعدك حبيبتي
طيب المدارس منهاجها مثل الحكومي ولا الأهلي؟؟
يعني الكامبيوتر والانجليزي كيف عندهم ؟؟
اولادي الحين واحد طالع اولى وواحد طالع رابع ماخذين شهادات تفوق بالانجليزي والكامبيوتر
فمدارس ينبع تتبع اي نظام؟؟

ولا والله ما اعرف مدارس الجبيل للأسف

وبالنسبة للسكن تنصحي بأي حي ؟؟
ابغى حي يكون فيه حركة ..

وسمعت انه في نادي فروسية ونادي نسائي يجتمعوا فيه

هذا اي أحد يدخله ويروحه ؟؟

تعبتك معاي حبيبتي بس تعرفين النقل مو شي سهل الواحد يقرر بشأنه

[الدّرر]

.،

امممم شوفي ما عمري دخلت أهلية ولا أحد من أخواني ..
الأهلية باختصار للي يبو الفشالة لأبناءهم بالذات هنا لأنها يعني مثل ما يتقال
ادفعي ودرجات أولادك مجااناً ياخذوها وطبعاً هذا الشي مو حلو لأن الابن بيتخرج
ولا هو عارف شي ..

الحكومية حلوة ونفس المناهج الرسمية .. أنا ما لحقت على المناهج المطورة لكنها
قوية ..
الحاسب تبدأ الدراسة الرسمية له من صف أولى متوسط .. هذا بالنسبة للبنات
أما الأولاد فأتوقع عادي مثل باقي مناطق المملكة وحتى الانجليزي يعني المناهج
موحدة والله أعلم ..
إذا تحبي أشوف أسأل لكِ أخي بس هو الآن مو بالبيت وأستفسر عن المناهج الي درسها ..

:

عن أفضل الأحياء والله ما عندي خبرَة وعلى حسب عمل زوجك ..
والسكن على حسب المتيسر يعني ممكن أقول لك عن حي ولا تلاقي فيه مثلاً بيت
إيجار أو ملك تستطيعي تسكني فيه ..
خلي زوجك يستفسر من احدى العقارات أو ما أعرف ايش يسموها اللي تختص بالسكن
ويخبرهم عن المواصفات ويبحثوا له ان شاء الله ..

أما عن المرافق فبكل حي يوجد مسجدين على الأقل والمرافق الأخرى : بقالات ومطاعم وو ..
وغير كدى ينبع كلها صغيرة يعني تحتاجي شي من آآخرها وانتِ بأولها يعني كلها
ثلث أو نصف ساعة وطلبك عندك ..

وأما عن الفروسية فأخي وهو صف 5 ابتدائي سجل فيها وكل سنة بياخذ دورات ومستمتع
فيها جداً .. وحتى السباحة مهتمين فيها ..

أما عن النوادي فعندنا عدة نوادي ..
بعضها خاصة بالشركات يعني مثلاً اللي زوجها يشتغل بأرامكو في نادي كبير لهم وكذا
وما عندي خبرة بهذا المجال لأني ما عمري رحت النادي رغم اني عندي بطاقة نادي سابك لأن
الوالد يشتغل فيه ..

وفي مثلاً عندنا الندوة العالمية للشباب الإسلامي تنظم ملتقيات دعوية
وفي ملتقيات حلوة بتصير بالذات للي تحب الدعوة ..
تقدر تروح على المدارس تلقي محاضرات / الجامعات / النوادي / ...

[الدّرر]

.،

وعادي بالعكس يسعدني إني أساعدك ( )
أي استفسار أنا بالخدمة ولو تحبي أسأل لكِ الوالد عن شي محدد .. : )

[المغتربه..]

ياعمري ماقصرتي .. ابغى اعرف نظام المداارس .. مناهجها .. تتبع النظام والمناهج الخاصة ولا الحكومية
يعني الانجليزي والكامبيوتر من سنة كم ؟؟؟؟؟؟
زي الاهلي من سنة اولى
ولا زي الحكومي من المتوسط
يعطيك العافية ياقممممر

[الدّرر]

.،

آسفة غرّوبَة نسيت الموضوع

المدارس مثل ما قلت لك تتبع المناهج الحكوميّة ، يعني مثل باقي مناهج
المملكَة .

الإنجليزي للأولاد كان من صف 3ابتدائي وبالمناهج الجديدة صار من صف 4
وللبنات كان من صف 6 سادس وصار الآن من صف 4 مثل الأولاد

الحاسب الآلي الأولاد من صف 4
والبنات من صف 1 متوسط بالمناهج الجديدة بعد ما كان من صف 1 ثانوي ..