استفسار عن التنزه في اسكندريه الجميله

[الاميره الطيبه]

السلام عليكم ورحمه الله وبركاته
عايزه اعرف منكم يا اسكندرانيات يا حلوات جواي لشويه اسئله عندي
انا عايزه اعمل رحله لعيلتي كده ونروح اسكندريه ونزور قصر المنتزه فيها وكنت عايزه اسئل
1- رسوم الدخول من بوابه المنتزه الرئيسيه؟
2- هل متاح الدخول لقصر المنتزه نفسه والتجول فيه؟ ورسوم الدخول؟
3- هل التجول في الحدائق متاح؟
4- احسن شواطئ لمنتزه واسعار الدخول وتاجير الكراسي والترابيزات؟
5- اسعار المطاعم بالداخل هي هي عاديه ولا مبالغ فيها؟


6- ايه تاني ممكن زيارته في الاسكندريه من اماكن للسياحه لشوارع تجاريه فيها اماكن اكسسوارت وملابس؟

وجزاكم الله كل خير

[عزوتي ابوي]

وعليكم السلام ,,

حيا الله حبايبنا في مصر

ان شا اءلله بنات الاسكندريه يفيدونك ويجابو على اسئلتك

[زوووزا]

السلام عليكم ورحمه الله
اختى الكريمه
اهلا بيك ومرحبا فى اسكندريه الجميله وان ش الله تنورينا انت وعيلتك
بصى ياستى قصر المنتزه مفتوح لجميع الناس والرسوم على البوابه مش فاكره كام بالضبط بس السعر فى متناول الجميع اصلى مارحتهاش من زمان والحدائق جوه جميله ومساحه واسعه جداا ويارب تستمتعى انت واسرتك بالرحله
بالنسبه للاكل والشرب احنا دايما كنا ناخد حاجتنا معانا لان طبعا الاسعار جوه سياحيه
بالنسبه لاسكندريه نفسها لو انت قاعده كذا يوم احلى فسحه فى الدنيا
مثلا الشواطئ البحر كله شواطئ فيها المجانى وفيها الخاص بس رسوم بسيطه مش غالى
مثلا منطقه سيدى بشر وميامى بتكون فى الصيف زحام جداااا بس بتحسى بالمصيف فعلا فيها وفيها شارع خالد بن الوليد شارع تجاري ورخيص وبرضه قريب منها شارع الجلاء بمنطقه فكتوريا محلاته حلوه واسعاره معقوله وكمان ملك حفنى فى سيدي بشر لجوه شويه حلو برضه فى الشرا
ولو نازله اسكندريه لجوه شويه شارع اللاجيتيه فى منطقه الابراهيميه كله محلات واسعاره حلوه اوي ومحلاته شيك
وبالنسبه للشرا ء اكمله بالمره طبعا المنشيه اكبر واشهر سوق فى اسكندريه بالنسبه للشرا حتلاقى كل اللى نفسك فيه وفيها منطقه اسمها زنقه الستات وسوق ليبيا وجنبهم ممكن تتمشى شويه فى شارع فرنسا تتفرجى على سوق الدهب ومحلات القماش وفى المنشيه قبل ما انسى عندك بأه زنقه للعب وزنقه للصينى زنقه للورد وزنقه للادوات المكتبيه بصى ما تعديش كل حاجه من الابره للصاروخ وناحيه شارع السبع بنات حتلاقى فى المنشيه على الناحيه التانيه هم ما يتلم تشتري اللى نفسك فيهوعرض النساجون بتاع السجاد ومن هناك تتمشى تتفرجى فى ش صلاح سالم على محلات الموبيليا بصى المنشيه دى تاخديلها يوم كامل كده فسحه وفى الاخر تتطلعى على البحر تقعدى شويه وتشمى هوا
ويوم كده تاخديه فى بحري وابو العباس طبعا اسكندريه الجميله الشاطئ هناك روعه وممكن تركبى المراكب وطبعا لازم تروحى قلعه قايتباي والاحياء المائيه وماتنسيش تاكلى جيلاتى من عند عزه اشهر جيلاتى هناك وكمان كسكسى ورز بلبن ونسيت اقولك حسنى بتاع المشاوي احلى مشاوي هناك جنب ابو العباس تدخلى تصلى وتدعى للمسلمين وكمان ابوشعره مشاوي مشهور فى بحري
نرجع تانى للشرا عندك طبعا محطه الرمل شارع سعد زغلول والنبى دانيال محلات جميله بس السعر اغلى شويه
وطبعا الغالى اوي محلات منطقه رشدى وشارع سوريا
اما المولات عندك كتيييييييييييييير اوي كارفور وجنبه منطقه الداون تاون دى فسحه وحدها
وفى سموحه جرين بلازا حلوه اوي محلات ومطاعم وملاهى وجواها الفا ماركت وجنبها بالمره تروحى مول زهران وممكن تتمشى شويه لمنطقه سيدى جابر تتفرجى على احلى محطه قطار فى اسكندريه وتعدى على مول كيروسيز فى مصطفى كامل وبعدين تركبى مشروع من شارع ابوقير تروحى مول الديب فى رشدى وبعده مول سان استفانو ودول غالييين شويه وكمان فىه مول الوطنيه فى منطقه لوران ويا سلام لو اخدت الترام الصبح كده وهى فاضيه واتفرجت على اسكندريه كلها من اولها لاخرها
وقبل ما انسى ارخص منطقه فى اسكندريه على الاطلاق منطقه كرموز لبس ومفروشات وكل حاجه
اسواق الخضار والاكل كتيره من جنبك فى المندره سوق المندره وبعد كده سوق المعهد الدينى فى العصافره وفى سيدي بشر سوق درباله وبعد كده سوق كليوباترا وبرضه سوق شديه وكامب شيزار وكمان سوق محطه مصر باب عمر وفى منطقه المنشيه وبحري سوق بحري وتلاقى كل حاجه رخيصه
نسيت اقولك ارخص مول فى اسكندريه فروعه فى كل مكان فتح الله ماركت له فرع كبير فى المندره جنبك وفروعه كتيره جدا فى كل مكان وفى مترو برضه ليه كذا فرع فى محمد نجيب وش الاذاعه فى جليم وش البرت الاول فى سموحه
اما مطاعم الاكل مالهاش اول ولا اخر اصناف واشكال من اول بيتزا هات وماكدونالز لحد محلات المشاوي والكشري كل حاجه ابوربيع وجاد و..........
ومحلات السمك كتيره برضه في كذا واحد عالبحر برضه فى بحري مش فاكره الاسماء اظن قدوره و........
يارب اكون افدتك انا كتبت اللى افتكرته ولو افتكرت حاجه تانيه اقولك واي سؤال انا فى الخدمه
رحله سعيده ا ش الله

[زوووزا]

نسيت اقولك لو تقصدى قصر المنتزه مبنى القصر نفسه ده غير متاح للجمهور بس الحدائق بتاعه القصر دى فسحه لوحدها ولو عايزه اي استفسار انا فى الخدمه قولى لى انت اش الله حتقعدو فى اي منطقه بالضبط وانا اقولك تركبى مواصلات ازاي عشان ما تتكلفيش تكاسى كتير والسلام عليكم

[الاميره الطيبه]

ماشاء الله عليكي يا زوووزا ده انتي قاموس كامل عن اسكندريه هههههههههههههه
معظم الشوارع الي قولتيها دي كنت بسمع عنها في التلفزيون بس. بس عمري ما روحتها

بجد والله انا سعيده جدا بردك عليه دانا هطبع ردك ده واخده معايا وانا مسافره علشان انا اكيد هنسي كل اسامي الشوارع دي
بس تعرفي انا بسمع عن زنقه الستات دي من زمان ونفسي اروحها جدا واعرف ان فيها اكسسوارات حلوه وانتي شوقتيني اروح المنشيه جدا بحب اوي الشرا والفرجه علي المحلات

وانا يا هكون في العجمي يا العصافره علي الكورنيش لسه مش عارفين

واخيرا جزاكي الله عني كل خير يا قمر

[زوووزا]

السلام عليكم ورحمه الله
ان شاء الله رحله سعيده
العصافره اقصى الشرق والعجمى اقصى الغرب
نصيحتى العصافره احسن عشان تعرفى تتحركى لاي حته فى اسكندريه اسهل
اما لو لازم العجمى لو معاك سياره خاصه مفيش مشكله بس المواصلات العامه غلسه اوييييييييييييي عشان تنزلى اسكندريه نفسها صعب جداا وخصوصا فى الصيف والتاكسى اقل حاجه 20-30 جنيهالعجمى دى تبقى فسحتك كلها عجمى يعنى شواطئ ومحلات هناك وهى حلوه برضه البيطاش والهانوفيل وابو يوسف
المسافه من العجمى مثلا لقصر المنتزه ساعتين زمن يعنى سفر تانى
اما العصافره قريبه اوي يمكن 5 او10 دقائق
اش الله تستمتعى واسرتك بالرحله
والسلام عليكم ورحمه الله

[ELLOOL]

ما شاء الله عليكى يا زووزا ان شاء الله اول ما انوى اروح اسكندرية هاطبع ردك واخده معايا والله فعلا بس نسيتى تقوليلها على بلبع لزوم الكباب وكده هاهاها

[الاميره الطيبه]

يا خبر ابيض !!!!!!!!!!! ساعتين من المنتزه للعجمي؟ هو علي حسب الحجز يا زوووزا هنشوف ايه الي فاضي ونحجز فيه . وانتي عندك حق في وجهه نظرك دي بتاعه العصافره. ربنا يسهل ونلاقي مكان فاضي. وعلي العموم هو فيه عربيه مش هنحتاج مواصلات

ايه بلبع دي يا جماعه انا اول مره اسمع عنها هي فين بالظبط وتبع ايه في اسكندريه او اروحها ازاي؟

[زوووزا]

بالتوفيق ان شاء الله
بلبع ده محل مشويات مشهور فى شارع ملك حفنى فى سيدي بشر
واهلا بكل زوار اسكندريه ومحبيها

[ELLOOL]

اسكندرية ساحرة البحر المتوسط اعشقهااااا

[الاميره الطيبه]

دخلت مخصوص يا زوووزا علشان اشكرك انا لسه راجعه من اسكندريه ونزلت في العصافره علي نصيحتك علشان مكنش بعيده عن اماكن التنزه. وكمان عملت بنصيحتك ولفيت في اسكندريه وكأني اعرفها روحت بحري وشفت المراكب الي هناك والانفوشي وروحت قلعه قايتباي والمنشيه والزنقه وروحت المنتزه والمعموره واخدت كل الكورنيش من اوله لاخره. وطبعا روحنا شواطئ والحمد لله روحنا قبل الزحمه. واكلنا اسماك وجبنا كل حاجه مشهوره بيها اسكندريه زلابيا بالسكر( في القاهره المشهوره بالعسل)- وام الخلول- وشربنا خروب من منتجات اسوان في خالد ابن الوليد
اول مره انبسط كده. والفضل ليكي يا زوووزا والله
جزاكي الله كل خير - وانا في الخدمه لو تحبي تنزلي القاهره

[زوووزا]

حمدا لله على السلامه
الحمد لله انك استفدت من كلامى ولله الفضل والمنه
وعقبال كل اجازه وانت طيبه يارب
اللهم انفعنا وانفع بنا يارب

[نسائم حائره]

الحمد لله على السلامة يا الاميرة الطيبة
ماشاء الله زوووووووزا ما سابتش حاجة
انا جيت متاخرة شوية روحتي و رجعتي بس
المرة الجاية بقى ان شاء الله
بس شاطرة الوقت ده هو الافضل لكن الصيف بتكون الزحمة شديدة
يارب تكوني انبسطتي و عقبال المرة الجاية

[نسمه ليبيه]

زوزا والاميره الطيبه الله يسامحكن ذكرتونى بايام الاسكندريه الحلوه الله الله عليها ياريت يرجع يوم واحد من ايامها

انا بقى لى كم سنه مارحتش واما قريت موضوعكم قلت لزوجى لازم ننزل للاسكندريه

ورووزا انا مايكفينيش رد فى المنتدى انا لازم اروحلك شخصيا واتعرف عليك وانت اللى تفسحينى فى الاسكندريه هههههههه انا ليا سبع سنوات مازرتهاش
وسلام

[زوووزا]

اهلا ومرحبا بكل محبى اسكندريه وزوارها
يارب تستمتعو وتتبسطو دايما عندنا
اختى نسمه ليبيه اهلالالالا بيك تنورينى وتشرفينى
بس ادعيلى ارجع من الغربه نفسى ارجع واستقر فى مصر بلدى الحبيبه واسكندريه احلى مكان سكنت فيه ده انا وانا بكتب عن اسكندريه بلدى حنيت ليها وانا بوصفها زي ما اكون ماشيه فى شوارعها وبتفسح فيها زي زمان
بجد ابوس ترابك يا بلدى وبنا يهون علينا وعلى اللى زينا الغربه
واهلا بكل حبايبنا