أسئلة محرجة للبنات والزوجات

[دانةالدنيا]

الاخت طماطه:شوفي حبيبتي انا ماأنصحك تشرين دواء ماتعرفينه لان العطرين يبيعون بعض

النباتات اللي تسبب الخراب مثال:الصك والك معروف يخرب وشكله زي الكلوه لونه بني واملس هذا ياساتر منه يسبب الخراب بشكل مرعب. وصدقيني الادوية اللي كتبت عبارة عن مردود

وهي ممتازة .اما شاي الاعشاب مايطحن تغلينه على شكله لمدة عشر دقايق وتحلينه اما

بسكر نبات او عسل طبيعي .الشبة خذي الحجم (كبر حبة المشمش) واطحنيها واضيفي عليها تقريباَ

12 م.ك من البودره المفضله عندك وهذي للاستخدام اليومي ماراح تضر اذا كل يوم الصباح غسلتي منطقة الابط ووضعتيها وهكذا

اختي الحبيبه اخت القمر: جزاك الله كل خير انا مانسيت سؤالك بس ماخليت ولا مرأة متخصصه بطب العرب ماعرفها مسألتها لاني انا ماعرف الاجابه غير كذاانا معمري ركبت لولب. المهم اغلب الحريم اللي سألتهم قالوا لي ممنوع استخدام التحميلات مع الولب يخربن اللولب

اختي الغاليه اوراد:لقد ذكرت المكروشة وشرحت طريقتها قبل كذا بس ابعيدها مرة ثانيه عشان اوضحها اكثر: وهي ممتازة جدا بس تبي الحذر والتعامل الجيد مع البخار عشان متسبب حروق

خذي كرش ذبيحة غنم لاتكون مقطعه يعني على شكله غسليهاونظفيها وبعدين احشيها بأدويه مثل:

كمون +فلفل اسود+حبة حلوه+دارسين(قرفه)+حلبه +محلب+نونخه ماش+قيصوم+شيح+يانسون+ميرميه+حزاة+الحبة السوداء+قرنفل)وبعدين تخيطينها وتحطينها في قدر كاتم لمدة ساعه بعدين تسكرين النار ولاتفتحين القدر خلي لهواء ينسم مع الفتحه المخصصه بعدين بربع ساعه خذي القدر معك داخل بطانيه وافتحيه شوي شوي واستنشقي البخار واذا تقدرين تاكلين منها يكون احسن وبعدين اجلسي لك شوي انتي ومتلحفه بالبطانيه وخلي احد يروح ويوزنلك الدش على ماء دافي وقومي وانت والبطانيه وادخلي تحت الدش وتروشي ,والهدف انك ماتطلعين من تحت البطانيه عشان ماتتعرضين لتيارات الهواء المختلفه ويكون الماء اللي تتروشين تحته دافي .وكذا تمت العمليه كامله .

اختي الحبيبة هتون المدينه:كبو اللهواء مكون من كل الاعشاب اللي ذكرت سابقا واللي زي المزمار

يسمى عود الهواء(اسمه توي اعرفه من امي) والي اختك حصلت عليه هذا اسمه فلفل الهواء وها العنصرين اخلطيهم مع بعض راح اعطيك بعض من مكونات كبو الهواء(محلب+ورق حناء+فلفل هواء+ عود هواء+مرة + حلتيته+خوا جوا+قشر بصل+كمون+هدب اثل).

اختي فدائيه من الرياض:اسمعي اول مرة اسمع بشيء اسمه شاي الهواء وكذلك سألت عنه بعض نساء طب العرب ويقلن نفس كلامي مافيه شيء اسمه شاي الهواء يمكن يكذب عليك العطار او انه يستخدم لانواع اخري من الامراض

اختي بداير: اللي يسونه الاخوة السودانيين بصراحه معمري جربته لكن فيه نساءجربنه ويمدحنه وانا ماأدري عنه شيءحبيبتي خروج الهواء هذا خراب وما يسبب الم ابد ابد لكن الميلان والالتهابت هي اللي تسبب الالم وانتي تقولين انك كشفتي ويقولون لك مافيه شيء وانا اسألك لو كان كل شيء تمام ماكنتي حسيتي بالألم ولاطلع من هواء صح؟ عشان كذا اقولك شكلك معك ميلان ويمكن للخلف واذا تقدرين تجين هند اهلك بالاجازة لاتخلين نفسك روحي لمرأة متخصصه بعلاج طب العرب وياليت تكون هذه المرأه من نجد لانهم جدا شاطرات.اما علاج الميلان فلايعالجه اعشاب الذي يعالجه (المخبنة والتدليك)وهذا يسونه الحريم وياسبحان اللي عطاهم المعرفه .تخيلي بنت عمتي عندها ميلان ومحد اكتشف هذا الميلان وكانت دايم تشكي من الالم وقلنا لها اكيد ميلان وراحت لمرأة وعالجتها والحمدلله

الحين تعدل الرحم والحين هي حامل ويكون بعلمك أي واحده عندها ميلان يأما متحمل ااو اذا حملت مايثبت لازم تأخذ مثبت والعلاج مرة في الشهر حتى يتعدل بعض الحريم من اول شهر وتطيب وبعضهن يبيلها 3 شهور.

حبيبتي نسريييييييييييين :وتري العلاج والنظام يبي صبر لاتفترين او تتهاونين واهم شيء يكون الرحم قوي ويتحمل الحمل لان صحة المرأة من صحة ارحامها وانا شخصيا اعرف واحدة مهتمه بنفسها وبرحمها وما شاء الله عليها الحين عمرها 50 سنه وماشاء الله عليها تعطينها 35سنه ونشيطه وحيويه.

وعندها من الاطفال 15 ابناء وبنات واصغرهم عمره 3سنوات.

بدور : هل الفلفل مع العسل في اخر ايام الدورة زين للمرة حيث سمعت من الصديقات انه يحرحر .....!! وهل المحلب ينزل المويات ..

فيافي : نعم اختي بدور الفلفل الاسود ممتاز مع الشوربات والايدامات والمرقوق والمطازيز والعسل ايضاممتاز لكن معمري انا خلطتهم مع بعض والمحلب ينشف وينزل المويات بس مايستخدم إلا في اخر ايام الدورة او 20 يوم الاخيرة من النفاس بدور : هل شرب منقوعة العنزروت في ايام الدورة ضارة لاني سمعت من بعض الاخوات انها ترخي..!!

للفائدة لقد استعملت الشبة وياليتني ما استعملتها الله اعلم وش صار لكني ادركت نفسي وانقذتها

من هلاك كاد ان يبطش بها (مويات ما توصف ) المرة بعد عناية الله هي الحل الوحيد .. انصح الجميع بها" لاتذكريها لعدوك " غاليتي وش رأيك بالغسول المذكور"جرجبيت ريسيب" انة يطهر ويضيق

فيافي : اختي بداير:الله يجزاك خير ويصلح لك ماعطاك فعلا حنا في حالات الكسور والجروح الصعبه نمنع المصاب من اكل السكر لانه مايساعد على التأم الجرح او الكسر وننصح بالعسل الطبيعي لانه يساعد على تكون الانسجة التالفة. عشان كذا قليل مانستخدم السكر في النفاس او الحيض ونلجأ الى العسلالطبيعي .

اختي bodormo3 :بدور لا منقوع العنزروت ان شاء الله مايضر لانه منظف للمعده والامعاء ولا يضر ابدا لكن يكون مكون من(عنزروت+مرة+شوي محلب) ويشرب يومياَ اما الشبه فهي مخربة جدا جدا بعض النساء تستخدمه لجهلها كتحميلات او كغسول لمنطقة المهبل وهي لاتعلم ان اثره شديد وتسبب التهابات وتخرب اما اغسول اللي ذكرتيه ما أعرفه .

فدائية من الرياض : طيب أخت فيافي إذا ( لاقدر الله ) وكانت الولاده قيصريه هل أستعمل كل هذه الأشياء الكبو ، شاي الأعشاب ، التحاميل ، الغسول ... وإلا خلاص أريح عمري مالها فايده ؟؟؟؟

لؤلؤة : حبيت اسأل الدش المهبلي 00زين ولا يخرب المرأه لان صديقتي قالتلي حطي فيه مويه وملح وتغسلي فيه اومويه مع مره في الدور او النفاس او الايام العاديه 00000000والحامل هل الماي والمره او الملح يضرها لو تشطفت فيه من جوا 00000000وش احسن حاجه للمره في النفاس التنقع في الماي والملح لمده عشر دقايق او التشطف فقط 00وش احسن يوم تبدا فيه بعد الولاده بالماي والملح لاني سمعت لازم بعد اسبوع من الولاده 0000000وهل استمر فيه لاخر يوم من الاربعين 0000بغيت اسأل عن البخور متى تبدأ فيه الوحده بنفاسها في اي يوم ولمتى لحد ماتخلص الاربعين ولا لا

فيافي : اختي فدائيه:انا جبت بعملية ومشيت على النظام لان الارحام هي الاساس والخراب يكون بالارحام مو بالمهبل. بالنسبه لشاي الهواء زي ما قلتلك مافيه شاي هواء لكن ممكن المقصود المطبوخة وفيها مجموعة من الاعساب فيه حاجه يابسه زي ورق البازلا وخشب زي الاغصان وحب صغير احمر هذي تنظف من الدم ولكن فيها اعشاب لابد تتخلصين منها لانها اذا انقطعت عنك تخربين

ولذلك اعطيتك شاي اعشاب حتى لو ماتوفر ماتخربين اذا تركتيه وانا استخدمه وخواتي وخالاتي وكلنا ولله الحمد تمام

اختي لؤلؤة:الدش المهبلي مايضر بس استخدميه من برىاما التنقع بالماء تجنبيه لان الحين اللحم اذا تعرض لماء يفسد والارحام بعد الولادة تكون عباره عن لحم متجرح فوش يصير لو تعرض لماء (تخرب الارحام) والتشطف للحامل عادي بس مو داخلي وتتجنب التحميلات عشان ماتسحب موية الطفل

اما الكبو يستخدم في الايام الاخيرة من الدورة او20 يوم الاخيرة من النفاس وافضل شي بالليل عند النوم.

أخت القمر : فيافي قلت مع اللولب اتجنب التحاميل,,,طيب بقية الادوية اللي ذكرتيها تكفييعني ،،،اذا كنت تعبانة ممكن بعد الله تساعد على الشفاء

[دانةالدنيا]

أوراد :فيه وحده قريبتي عندها ضعف في المبايض وكل ماحملت وصار لها شهر سقطت ومافيه مستشفى إلا وراحت له بس ما استفادت شي وش تنصحينها تستخدم من الأدويه

فيافي : اختي الحبيبة: اخت القمر مافيه اي شيء اذا تركتي التحميلات واهم شيء الادويه الداخليه

السفوف والشاي والاهم انك تتقيدين بترك الممنوعات والجوع اثناء الدورة والحيض وان شاء الله بتشوفين بنفسك الفرق لما تخف المويات والرطوبة ولكن استمري ولاتملين

اختي اوراد: اذا تكرر التسقيط عند زميلتك فما ادري وشو السبب لان لابد ان تكشف عليها مرأة متخصصة بطب العرب في بعض الحالات لايكون معروف عند النساء ولذلك تنصح بالرقية الشرعية

فقد يكون عين او نفس هي المانع اما اذا كان التسقيط معروف سببه عند الاطباء مثل (قصر المهبل) فهذا اكيد يحتاج ربط ويسويه المستشفى واللي مثل حالتها لاتستخدم اي دواء شعبي حتي لا يطيح الطفل وحتي الحلب توقف استخدامه

اختي اوراد:قلتي صديقتك عندها ضعف عليها بالحلب حتي يتم الحمل بعدين توقف استخدامه

وممكن تستخدم عسل طبيعي +بار النخيل(كافر واحد) وتأخذ ملعقة كل صباح وان شاء الله يكون حمل وانا اخاف ان صديقتك معاها ميلان معه عشان كذا مايثبت الحمل وبالغالب اللي معاها ضعف بالمبايض قليل مايثبت الطفل لكن انا انصحه تعالج عند مرأةطب عرب.

طماطه : بغيت أسئلك عن الرز ناكله عادي بفترة النفاس والدوره؟؟لأن فيه ناس يقولون يكبر البطن ليه هو يضر أكله بهالفترتين؟؟_ بالنسبه لشاهي الأعشاب ذكرتي أنه ناخذ 3ملاعق كبيره من الأعشاب وش كثر الماء اللي نغلي فيه ؟منقوع العنزروت والمره والمحلب قد إيش أشرب منه والماء اللي أزيده قد ايش هو كثر اللي آخذ منه ؟؟_ البنت بفترة الدوره تسوي ( كبو الهواء ) ؟؟ومتى أصلحه؟؟وهل ضروري أسويه وإلا أكتفي باللي قلتي بفترة الدوره؟؟عزيزتي فيافي أنا طلبت منك تعطينا إذا فيه برنامج تتبعه الحامل فترة الحمل وكذلك الأشياء اللي تسهل الولاده لأن أختي حامل

ياسمينا : التجشؤ الكثير بصوت عال يعني الهواء اللي يطلع من المعدة .ومو بعد أكل يعني على طول

هل هو دليل على شيء مو زين ؟؟؟

هتون المدينة : ماهي المقادير تبع كبو الهواهل مقاديرها تقاس بالكوب ام ماذا

وسن : متى تستخدم التحميله يعني من اول يوم من النفاس حتى لو كان فيه جراحه00000

فيافي : اختي العزيزة طماطه:اكل الرز عادي بس المشكلة فيه انه يكبر البطن ويسمن وثقيل على المعدة عشان كذا نستغني عنه بالبر وخاصه البر ونخالته مثل المطازيز او المرقوق او ايدام لحم مع خبز بر.اما شاي الاعشاب 3.م.ك مع 3اكواب ماء حجم وسط منقوع العنزروت كوب ماء صغير او وسط واذا شربتي زيدي نفس كمية الماء واذا ذابت العنزروت والمرة والمحلب اضيفي ثاني .

البنت عادي تتكبا؟ والكبو ضروري وافضل طريقه له هي كالتالي:حطي الفحم في المبخرة تحت كرسي مفرغ اجلسي على الكرسي والمبخرة تحته وضعي على الجمر قبضه من الكبو وتكونيين شايلة بس الملابس الداخلية وهذى يكون كل ليله عند النوم وفي الايام الاخيرة من الحيض او النفاس.

بالنسبه للحامل افضل شيء لها المشي وبعدين اذا بدت الالام (الوضع)تشرب حلب وتأكل رطب (والرطب ذكرة الله لافضل نساء اهل الجنه مريم عليها السلام) وانا اعرف نساء كثير ولدتهن سهله من الله ثم للرطب وانا للاسف ما جربته لاني استفرغ اثناء الالام الله يكرمكم ولكن امي واختي جربنه

كذلك اذا ماتوفر الرطب خذي تمر واعبطيه بماء وزعفران واقرائي سورة الزلزلة واول آل عمران واشربيه

اختي ياسمينا: والله مااعرف عن التجشؤ شيء.بس اذا كان طول الوقت مع راحه كل محصل التجشؤ ورغبه للاستفراغ مع عدم شهية للطعام او كره للاكل (زي الوحم)والوجه لونه اصفر والرموش متفتلة(كأنها محروقه) فهذي اسمها خشة برد وتكون مصيبه الشخص بعد اكلة دسمة ومتعرض للبرد شديد وهذي لها علاج اخر.

اختي العزيزة هتون المدينه:كتبت الطريقه في ردي علي طماطه واذا فيه شيء مو واضح لاتستحين

اسألي عادي لاني انا ما احب اخذ أي شيء على عماي لازم اسأل واللي ما اعرفه اقول ماأعرفه وهذا اول العلم.

اختي وسن:نعم التحميله من اول يوم لانها تعمل كمطهر للجروح وكمنظف وطارد للدم الفاسد .

اختي الحبيبة لؤلؤة:نعم النفاس ماتتنقع في بانيو ابد ابد ابد ليش؟لان الماء يدخل الارحام ويفسدها(يخربها) والتروش (الاستحمام)ضروري مرة في الاسبوع بس علي السريع وانتي واقفه تحت الدش اما التشطف للمناطق الدخليه يكون يوميا بس(بالارطى+ الملح + الماء )غير كذا ممكن تغسل الرقبه والصدر الى السرة فقط واهم شيءالقدمين لايتعرضون لماء لفترة طويله او تمشين على الرخام حافيه لازم تلبسين شبشب لان البرد مو زين للقدمين.

ياسمينا .. اجل هذي خشة برد واذا اهملت تتحول للصفار العلاج:اخلطي المقادير التالية :

3.م.ك عنزروت+ 3.م.ك مرة+ مكعب من الحلتيته المطبوخه (مو الرطبه)وتلقينها عند العطار +3.م.ك علك مر+ م.ص كاثه +م.ص من الصبرة(المباركه)+ اقل من ربع ملعقه صغيرة كبريته .بعدين تأخذين ملعقه صغيرة من الخلطه مع كوب ماء حار وخليها لحد متبرد وحركي ثم اشربيها. يمكن يصير معك شوي اسهال (الله يكرمكم) بس لاتخافين اهم شيء تقيدي بالمقادير لان مثلا عندك الكبريته لونها رصاصي بودرة خطرة شوي ماتكثر اتمنى انك فهمتي واستمري على العلاج لحد متطيبين وهي ممتازة حتى للاطفال من عمر 3سنوات وما فوق. على فكرة ترا ريحتمه مرعبه بس عادي واذا جمعتيهم اطحنيهم بس في مكان برا المطبخ في الحوش مثلا لان اذا انكبو في المكان ماترو ريحتهم ابد

[دانةالدنيا]

بدور : هل الرشاد في ثاني يوم من الدوره له فائدة ..

ياسمينا:الشراب يكون على الريق.. وإلا عادي خلال النهار وهل المعدة لازم يكون فيها أكل ؟وكم مرة في اليوم ؟طريقة تنظيف العنزروت ؟ فيه شيء معين ينشال منه ؟علك اللبان... يكون لين وإلا يابس ؟

لؤلؤة : انا في ولادتي الاولى كنت اتروش يوميا ماكنت ادري ان المويه تضر لابعد اتاخر اتليف واتفرك واتنقع مرتين في الملح في اليوم

هتون المدينة : ذكرتي عن خشة البرد وان ابنتي عمرها اربع سنوات وفيها الاعراض اللي ذكرتيهافهي اذا اكلت الاكل احس انها ودها تطلعة لكن انا توقعت انة حلقة صغير لهذا السبب فارجو منك التوضيح

بداير : الدش المهبلي من جوه ما اسويه ابد لو مره بعد الدوره ويكون عباره عن عسل وماء دافي علشان انا بعدة عن الى في الصيدليه با المره والعسل وش رايك

أخت القمر : اود ان اسالك عن الماش ،،،انا اذا استخدمته يبين مفعوله بسرعةينشف ويوقف الافرازات ،،،ياليت لو تقولين رايك فيه اخاف انه مثل الصك واللك اللي يخرب؟؟؟

فيافي : اختي بدور:الرشاد ينشف الدورة بدون تنظيف عشان كذا نستخدمه مع التمر بس اول ايام الدورة وفي الايام الاخيرة نستخدمه مع التمر والسفوف

اختي ياسمينا:تشربين الدواء مرتين في اليوم على الريق وعند المغرب من نفس الكوب يعني الصبح نص الكوب وعند المغرب باقي الكوب.العنزروت زي التراب وهولونين حليبي واحمر واذا اضفتي له ماء يلزق مع بعضه وما يحتاج تشيلين منه شيءالعلك المر طعمه مر وشين وهو دوائر صغيرة مو زي العلك المستكه.

اختي هتون المدينة:اعطي بنتك منه وان شاء الله اذا ما نفعه ماراح يضرة وراح تلاحظين اذا خذته راح تتعدل شهيته وتنفتح وتزين حاله واذا تبينها تسمن شوي عطيها100 غرام من المحلب + سكر نبات اطحنيهم وكل يوم .م.ص

اختي ام فيصل: مو هذي المشكلة وانا احاول الحين احلها بالبحث .

اختي العزيزة بداير:ابدا لاتسوين دش مهبلي اثناء الدورة حطي تحميلات او تشطفي

اختي اخت القمر:لا الماش ممتاز جدا جدا وقت الدورة ولا يهمك استخدميهوهو مو مثل الصك واللك

محبوبة : ممكن تساعديني في معرفة العفص ايش هو وهل يصلح لتنظيف الرحم من الالتهابات

أم عبير : انا لي 15يوم مخلصه الاربعين واحيانا يعورني ظهري مررررررررررررره وتنزل مني افرازات الله يكرمك بنيه او ورديه او دم خفيف ...مع ان الدوره جتني بعد الاربعين على طول ماادري وش الحل وجع ظهري متعبني مره خاصه مع شغل البيت والاطفال

أم حصونة : , بغيت اسالك هل (خشة البرد ) هى اللى نسميها غبطة؟؟ واعراضها معدة منتفخة وريحة البطن خايسة ( الله يكرمك)ونلاحظها بالصغار اكثر شى لما يكثرون من البفك والبطاط , لان فى حرمة تعالج قالت ان البفك اخطر شى للطفل يخيس بمعدته وبعدها كل ما خرج بطنه تشمين ريحة خايسة ونصحتنا ان ما نعطى عيالنا منه.فهل هى اللى قلتيها؟؟ وعندى سؤال ثانى اعرف طفل فيه بو صفار من يوم ما انولد! لما اهله راجعوا فيه لقو كل شى فيه سليم واللون الاصفر اللى فى وجهه خلقة ما يروح وكبده سليمة مافيها شى الحمدلله. بس قال الطبيب انها حالة نادرة جدا . عندك علاج له؟ تصدقين فى عجوز تداوى شافته وقالت لامه جيبيه اكويه على رؤوس الاظافر وهو يطيب باذن الله ويروح البو صفار منه!! شرايك؟؟

فيافي : اختي محبوبة : تجنبي العفص لانه يخرب سواء حمستيه او طحنتيه

اختي ام عبير:الماش حب زي حبة الوبياء لونه اخضر وهو ممتاز ويضاف ممكن مع المرقوق

او المطازيز او يطحن ويضاف الى السفوف

اختي ام حصونه:خشة البرد تختلف عن الخبطة الخبطة هي عبارة عن تلبك معوى وممكن يزول مع زوال المسبب لتلبك لكن الخشة لا تصيب بسبب الدسم عند التعرض لبرد وتسري مع الدم

والمصاب بالخشة يكرة الاكل ويصيبه الخمول ويصفر بشرته ورموش العين تتفتل(زي المحترقة) ولا يصيبه اسهال ولامغص اما الطفل اللي قلتي ممكن تعطيه (عنزروت بس تخففه مو ثقيلة ) وعسل طبيعي واذا مانفع تكويه عند المرأة

طماطه : بغيت أسألك حبيبتي ياليت تعلميني الأشياء اللي نعطيه المولود مثلا للماغص وغيره..وياليت تذكرين المقادير والوقت علشان ما أعيد السؤال نفسه.بغيت أسألك أختي بناته يوم ولدتهم كل الليل يصيحون ولاندري وش السبب لدرجة إن بنته الأولى حصله بعج وسووله عميله.والثانيه مثل إخته كل الليل إلى الفجر تصيح بصوت واحد ولما سألنا وحده من الحريم الكبار قالت لنا نقطوا بحلقه نقطتين مره وصلحناه وكأنه أحسن إذا تعرفين السبب قوليلنا وعلمينا وش نسوي ؟؟صديقيني محتارين وش نسوي والخوف للي بيجي يصير مثلهم

فيافي : اسموحة اختي ام عبير والله نسيت اولا دورة النفاس تسمي(ردة النفاس) وهي مهمة وممكن انتي مانظفتي زين يعني باقي دم فاسد وابعطيك وصفه استخدميها مع الدورة القادمة

( فنجال مرة+فنجال حبه سوداء) اطحنيهم واخلطيهم مع عسل طبيعي على الريق وان شاء الله بيتحسن وتنظفين اما اذا استمر وجع الظهر فيمكن متعرضه لظغط اثناء الوضع من الممرضات وصاير شيء لفقرات الظهروالافضل تأخذين اشعه للاطمئنان .واذا ماصار تحسن بلغيني

اختي طماطه:للمولود اذا فيه مغص اطبخي شوي كمون مع ماء وسكر نبات ورضعيه

يهدي المغص اما اطفال اختك فامراض الاطفال تختلف فمثلا ولدي الصغير بعد ماجبته بأسبوعين صار بس يصيح ويرجع راسه وراء ومايرضع بغى يموت وماخليت مستشفى ماوديته المهم وديته لمرأة متخصصه بالاطفال وشافته وقالت لي مشتم بريحان ولازم كوي المهم كويته وتوكلت على الله ماتصدقين نام على طول ورضع ولله الحمد عشان كذا صعب اقولك وش فيه لكن اكيد انتم بعد الولادة مارضعتوة جليكوز لانه ينظف المعدة وهوحلو للمواليد

[دانةالدنيا]

بدور : هل خشة البرد علاجها اللي ذكرتيه.. هو نفس اللي يبيعونة الحريم (سعوط)ام لازم انا اخلطهم رغم ان الحريم موثوق فيهم ..لونه بين الكحلي والبني سؤال ثاني ...طولنا عليك ..ما ننعطا وجه...ما عندك خلطة ترد حالي مع الرغم من ان جسمي زين لكن اريد وجهي يمتلي شوي (اعشاب )

أم عبير : ممكن اعرف شلون تعرضت للضغط من الممرضات ؟؟ونسيت اعلمك انه ظهري بدا يالمني قبل الولاده بخمس ايام يعني الالم موجود قبل الولاده وسؤال اخير الله يعطيك العافيه وش الحل اذا كنت متعرضه للضغط من الممرضات يعني مافيه شي اسويه او اكله قبل الدوره الثانيه واخاف مع الرضاعه تطول ماتنزل والالم صعب خاصه مع شغل البيت

طماطه : كم مقدار الجيليكوز في الرضاعه وكم مره في اليوم؟أضيف للجليكوز سكر نبات أو عسل لأنه طعمه مالح؟؟ فيه شاهي المولود يصلح بالبيت وهو مكون من :حلب + كمون + يانسون + كراويه +نعناع +|حبه سوداء نخلطهم مع بعض من طحن وناخذ ملعقه صغيره ونحط عليه مويه مغليه ونخليه ألين يصير دافئ ونشربه..وش رايك فيه زين وإلا مو زين للمولود بالنسبه لحلة بنت أختي صياح من الليل للفجر والعصر تلوى من بطنه وإذا رضعت الله يكرمكم تستفرغ والله يكرم الجميع البراز قليل ولما عطيناها مثل ما قلتلك نقطتين من منقوع المره الله يكرمكم برزت وإرتاحت..

فيافي : ام بدور ممتاز السعوط مع الدواء اللي كتبتلك يعني اضيفي سعوط مع نفس الكوب اللي فيه الدواء ويشرب وانا للاسف ما أعرف مكونات السعوط وإلاكان كتبته لاني اخذه من عجوز تقرب لامي وحنى متكلين عليها ولا عمري فكرت اخذ مقاديرة

اختي ام عبير:الضغط من الممرضات يكون بتفريق القدمين ودفعهن للخلف بشده ومع الالم ما تحسين لكن بعدين تكتشفين ان اخر عضمه بالظهر متحركه عن موقعهاعلى كل حال الم الظهر طبيعي بعد الولاده وتجلسين تقريبا ست شهور وانتي تعانين منه وخاصه اذا كنتي غير معتاده على المجهود

العضلي لكن انصحك تأخذين اشعه على الظهر واذا طلع كل شيء تمام لاتضغطين على نفسك بالشغل وكلي (الماش) وهو ممتاز للعضام والجروح وتقدرين تأكلينه في اي وقت اما الرضاعه الطبيعيه ماتضر ابد بل على العكس مفيده للام ولطفل.

طماطه:لا يأختي شراب الجيليكوز حلو مو مالح والطفل ابدا ماتعطينه ملح في السنه الاولى من عمرة عشان ما يصاب بالتسمم.انا ابوصفلك الجليكوز: في علبه زجاج صغيره علتها طبعه ورديه وهوثقيل حالي والغطي معدني وهو مصنوعه عشان تشيلين الغطى وتحطين بداله الحلمه حقت الرضاعه. الشاي اللي قلتي حلو بس شيلي منه اليانسون والحبه السوداء لانهم حارين على معده الطفل الصغير ممكن تعطينه هذولي اذا كان عمره اربعة اشهر بالنسبه لبنت اختك ابغى اسألك؟؟؟ هل تخريجه(ولكم الكرامه) زي الخيوط الصمغيه اللي فيها لون اسود او اخضر غامق او زي القطن الابيض وله ريحه كأنه طالع من ثلاجه ومعاه زي الزلال

فيافي : نووفتي الرد جاك بالطريق بالنسبه لفاكهت الصيف زي المشمش والعنب والكرز بعد الاكل يعني على شبعه بس لاتكثرين اما اذاكان العنب حامض تجنبيه كذلك الرمان ممنوع الخوخ ممكن بس على شبع

طماطه : أخت فيافي زي القطن الأبيض وله ريحه وزلال.. بالنسبه لشاهي المولود اللي قلتلك عليه كم مره نعطيه المولود.؟؟

فيافي : اختي طماطه هذا برد يمكن اختك نايمه عند المكيف بدون لتغطي البنت زين المهم اعطوها من الشاي اللي ذكرتي تقريبا رضعتين الى ثلاث رضعات باليوم بس بدون لا تطحنون الاعشاب اغليها 10 دقايق وصفيها بالرضاعه ونقعيله شوي عنزروت في فنجال قهوه وخليها خفيفه واعطيه مرتين مرة الصبح ومرة عند المغرب واذا تعرفين السعوط عطيه سوي مع العنزروت منه وطمنيني على بنت اختك اذا فيه تحسن لازم

طماطه : بنت أختي اللي أقولك عليها كبيره لها سنتين وشوي والحمد الله ما تشتكي من شي بس أختي من كثر ما تعبت من بناته لأنهن نفس الطريقه وخافت ليكون كل عياله نفس الشي لأنها تعبت تخيلي ماتنام ولاترتاح وقلق وخوف على البنت يعني حالتها النفسيه مرررررررررره تعبانه وخافت ليصير كل عياله نفس الشي وتعيد المأساة من جديد حبت تسألك وتعرف السبب علشان إذا جاها مولود جديدتكون عارفه السبب وتداويه لأنهم نفس المشكله وحده ..

فيافي : الله يخلي لاختك بناته بس الحين خليها تعطي بنته لو مرة بالاسبوع (عنزروت)اما بنسبة للمواليد ابعطيك بعض النصائح للمستقبل

اولا: بعد الولاده مباشرة تعطيها جلوكوز رضعه كامله ليش؟؟؟؟لان الطفل يكون في بطنه بعض من سوائل الام فلازم تطلع والجليكوزيساعد على تنظيف باطنيته

ثانيا: تشربه مغلي الكمون مع سكرنبات

ثالثا: تحرص على الدفى وتعطيه عنزروت لو مرة في الاسبوع بس تخففه

رابعا: تحاول ترضعه طبيعي لو فترة الاربعين لان هذا مفيد لطفل ولها

طماطه : ممكن نعطي المولود شاهي الأعشاب اللي قلتلك عليه وندهنه بزيت الزيتون يومياطبعا مع النصايح اللي قلتيلي عليها ..وكم مره نعطيه من الشاهي ؟؟وكم المقدار؟؟؟كم مره نعطيه من الجلوكوز طبعا غير الرضعه الكامله اللي قلتيلي عليه؟؟كم المقدار؟؟؟متى نوقف الجلوكوز مانعطيه المولود؟؟؟كم مقدار العنزروت اللي نعطيه المولود؟؟؟ومتى نوقفه عن المولود؟؟

نسرين : بس بغيت اخبرك اني ماشيه تمام على النظام وبديت احس ان خروج الهواء قل بنسبه كبيره عن قبل قبل خمسة أيام كنت مسافره ووديت معاي الأدويه وكل شي بس تعرفين زحمة السفر ويا العيال يعني شوي صار في خربطة في العلاج بس في هالأيام ما أدري الحين اواصل عادي والا اعوض الأيام اللي طافتني يعني ازيد العشرين يوم الأولات خمسة ايام بعد على نفس الأدويه وبعدين انتقل للعشرين يوم الأخيره.

فيافي : اختي طماطه:اعطي الطفل من شاي الاعشاب اللي عندك عادي في اليوم مرة واحده

واذا فيه مغص مرتين اما الجليكوز اعطيه مرة واحده كل صبح فترة الاربعين بس وبعدين اقطعيه

العنزروت مقدار ملعقه صغيرة مرة في اليوم الزيت الزيتون يدهن الصدر والبطن بزيت دافي مرة الصبح ومرة عند النوم

اختي نسرييييين:الحمدلله على التحسن واذا ان شاء الله استمريتي في كل دوراتك بتشوفين العجب وياليت انك مالخبطتي لان الفايدة في الالتزام بالنظام بس معليش الحين بعد مارجعتي كملي النظام عادي واذا جتك الدورة اقلبيه على الايام الاولى من الدورة ثم الايام الاخيرة من الدورة ثم كمليه عادي وصدقيني وحدة مشت على النظام 3 دورات هي وزوجها حسو بالفرق

طماطه : كم مقدار الجلوكوز في الرضاعه ؟؟ياليت تبينين لي مقدار العنزروت والماء ؟؟

فيافي : اختي طماطه:لا مافيه تعارض ولا شيء انا اقولك تعطينه عنزروت لو مرة في الاسبوع اذا هو طيب مافيه شيء لكن اذا كان تعبان تعطينه ممكن مرة في اليوم ملعقه صغيره او ملعقتين صغار مايضرة ان شاء الله يعني اذا هو تعبان مرة تعطينه مرتين في اليوم عنزروت مرة الصبح ملعقه ضغيرة ومرة المغرب ملعقه صغيره بس اهم شيء ماتثقلينه تتركينه خفيفه

[دانةالدنيا]

لؤلؤة : يقولون الغسيل بالصابون والشامبو للمنطقه يخرب ايش رايك 00وهل في صابون طبي تعرفينه زين وفي حريم ينشفون المنطقه التناسليه من داخل بشاش او قماش ناعم هل هو كويس ولا لا

أم الحسن : إذا كانت المرأة ولله الحمد سليمة ولا تعاني شيئا مما سبق من بعض أمراض النساء فهل هناك أعشاب معينة تتناولها المرأة أثناء الدورة مثلا لتحافظ على صحتها مع زوجها؟

والسؤال الثاني:إذا كانت المرأة قبل النفاس لا تعاني من أي مرض مما سبق ذكره فما هي نصيحتك لكل امرأة نفساء ويمكن أن نطلق عيها(النصيحة الذهبية) حتى ترجع مثل ماكانت وتنال رضا زوجها؟

طماطه : في فترة النفاس فيه شي نستخدمه علشان البطن يرجع لوضعه الطبيعي أي مثل ماكان قبل الحمل ؟؟_ حبيبتي أبغى غسول للمنطقه يومي وأنا طاهره ما فيني الدوره ومنب نفاس ؟أنتي ذكرتي ( أرطأ+ ماء + ملح ) لكن ماذكرتي المقادير ياليت توضحين حبيبتي..وإذا طبخته أحطه بالثلاجه وإلا برى وكم مره باليوم؟؟كذلك التحميلات:م ك مره + شوي محلب + ملح خشن.<<< ياليت توضحين الشوي وش كثره والملح وش كثره

أم الحسن : عن قشر الرمان وبأنه يزيل البطن بشكل فعّال .والوصفة هي:نضع قطعة من قشر الرمان الجاف في ماء مغلي ونتركه يغلي خمس دقائق ثم يشرب فنجان صغير على الريق يوميا (والله يعينكن على مرارة الطعم).والوصفة يحتاج لها قوة إرادة حتى نصل إلى المطلوب

وسن2: بالنسبه للسفوف هل يمكن ان يخلط مع الحليب ويشرب 0000

نسرين : للي تعاني من بروز الكرش: خذى كميه من قشرالرمان اليابس اطحنيه ثم انخليه ثم ضعي عليه كميه من العسل الطبيعي كوني منهاعجينه متماسكه شكلي منها على هيئه اقراص بحجم نصف حبه الباندول ضعيها في علبه ثم ضعيها في الفريزر استعمليها في العشرين الاخيره من النفاس (او) في الثلاثه الايام الاخيرة من الحيض خمس حبات في الصباح على الريق وهى مفيده ايضا للمعده وتقوم بتنضيف الرحم

فيافي : اختي لؤلؤة:التغسيل بالماء او الصابون وقت الحيض او النفاس من مسببات الخراب ولكن في الاوقات العادية غسلي بماء وصابون عادي ولكن تجنبي الشامبو او الصابون المعطر انا شخصيا استخدم (صابون ديتول) بس مو دايما واحرصي انك تنشفي المناطق هذي بعد التشطف بمناديل أي نوع لان الفطريات والبكتريا تحب تتجمع في المناطق الرطبه الحارة وهذا من المساعدات على حصول

الالتهابات.

اختي ام الحسن: وان شاء الله سوف اعمل بنصيحتك وافرد نصيحه ذهبيه واذكر فيها كل شيء اما السيدة التي تريد المحافضه على صحتها انصحها بأن:

1ـ ان تستمر على نظامها الذي اعتادت عليه ولاتغيره

2ـ ان لاتشتري ادويه مطحونه من العطار او أي امرأة دون ان تعرف مكوناته فقد يكون بعض الادويه مخلطه من نباتات ضارة لها

3ـ تتجنب الجوع فترة الحيض او النفاس

4ـ ان لاتستخدم تحميلات لاتعرف مكوناته وافضل التحميلات اللي ذكرت لانه لو تركته لم تؤثر عليها .

واتمنى اني وضحت مع ان الذاكرة بعض الاحيان لاتسعفن

مشكورة ام الحسن وقد استفيد انا منها ولكن قشر الرمان معروف كعلاج لقرحة المعده

اختي طماطه:البطن لم يكن مشكلة كبيرة قبل 30 عام فجداتنا وامهاتنا كن ينجبن 15 من الابناء او 12ولانرى لهن بطون وكان الدواء هو نفسه الذي نستخدمه الان وانا لاانكر ان العمليات تؤثر ولكن لعمل الشاق له دور فمثلا عندك المشي على الرمال (الثمامه,الدهناء,النفود)كله تمسح البطن

مسح فقد كانت جدتي حامل في شهرها التاسع ولانرى لها بطن كله من المشي لذلك اللي يكبر البطن شرب الماء اثناء الحيض والنفاس عدم الحركه فمهما اكلتي من الادويه حتي تذهبي البطن لن يروح مادمتي لن تبذلي مجهود عضلي وانا اعرف افضل رياضه وهي المشي على الرمال وصعودها فهذه تشد عضلات البطن شد خيالي, ايضا تمارين البطن اما ادويه شعبيه تنزل البطن ما اعرفها .

اختي طماطه:والله يا اختي انا اقدرها تقدير ولكن خذي مقدار 3كوب ارطا 1ملح +لتر ونصف ماءواغليهم وهذا يمكن استخدام يومين ومافيه داعي تحطيهم في ثلاجه ولكن اذا كثرتي الكميه احفضيها في الثلاجه اما التحميلات م.ك مرة + فنجال ملح خشن+ م.ك محلب اعجنيهم بعسل طبيعي لحد مايتماسكون وكوريهم كبر حبة نوى التمر ويبسيهم يومين وبعدين استخدميهم.

اختي نسايم:اولا المفروض متأكلين حبوب منع حمل وانتي توك ماسبق انك ولدتي ثانيا ماتاكلين حبوب وانتي عندك هرمون الحليب مرتفع الحين زواجك له سنه وانتي اكلتي الحبوب ست شهور صح فلازم تعطين نفسك سنه بعد الحبوب مناعه مايصير فيه حمل يعني اذا صارلك سنه وست شهور من زواجك ابدي فكري بالحمل واهم شيء ريحي نفسيتك ولايصيبك القلق بعدين قبل لاتبدين بالعلاج الطبي استخدمي شاي الحلب مع عسل طبيعي ولاتستعجلين توك عروس لاني اخاف تهلكين نفسك بالادويه وانتي اخذه حبوب حمل وتختلف مناعتها من واحدة لاخري فبعض النساء اذا اكلت الحبوب تكتسب مناعه عن الحمل لمدة 3اشهر عن الشهر الواحد وبعض النساء تحمل وهي تستخدم حبوب منع حمل لذلك لاتستعجلين .

اختي وسن2:لاتخلطين السفوف بالحليب السفوف يكون مطحون وتأخذين بملعقه وتبلعينه وعشان يروح ميلزق بالحلق تشربين وراه حليب .

اختي نسريييييييييين: والوصفه اللي ذكرتي ممتازه للمعده

طماطه : بالنسبه للغسول الأرطأ كم مره أستخدمه في اليوم هل كل ماأدخل الله يكرمك الحمام أتغسل منه ؟؟سؤال ثاني :الحين إذا بغيت أغسل المنطقه أغسلها بماء ثم بالأرطأ؟؟

[دانةالدنيا]

فيافي : الغسول مرة في اليوم ايام الحيض والنفاس واكتفي بالتنشف بالمناديل اطبخي الارطا بالماء والملح مع بعض وهذولي استخدميهم لتشطيف تلك المناطق

أم عبير : يافيافي ولدي الحين عمره شهرين واحس ان معه بلغم الله يعزك اسمع صوت خشخشه بصدره لكن من دون كحه سؤالي هل اقدر اعطيه مره الحين يعني مهيب قويه عليه ؟؟؟؟؟؟؟ واذا عندك وصفه للكحه والبلغم الله يعافيك عطيني

أم حصونة : اختى فيافى تعرفين شى عن ( السقاط) احنا نسميه شذى واذا تاخرتى فى علاجه يسمونه( عظيم) وتكون اللوز نازلة وتخلى الطفل ما يرضع العلاج اللى نعرفه من امهاتنا انه نرش راس الطفل بماء بارد عشان يشهق ويروح السقاط . عندك حل ثانى؟؟واباسالك عن الكوى اللى نسميه ( الترقيش ) شرايك فيه ؟؟ حريمنا يقولون انه زين للطفل اللى فيه (اخيته)مادرى شنو يقصدون بس والله بنتى بعد الله وبعد ما رقشتها حرمة بطلت من الصياح وزان حالها.

فيافي : اختي ام عبير :انا ملي خبر كبيرة بالاطفال بس من علاجي لعيالي يعني معرفه محدوده

بس بالعاده اذا فيه كحه مع حشرجه اعطيه منقوع العلك المر وطريقته اخذ كوب علك مر في لتر ماء واخليه ينقع في الثلاجه وكل يوم اعطيه ملعقتين كبار مع اني ما استغني عن الطبيب حق الاطفال

اختي ام حصونهالعظيم)معروف عندنا ويكون علاجه بالترفيع مع السعوط مع انه النصيحه العامه

عدم الترفيع اما(اخته)نسميها الخشه اللي سبق وذكرتها والافضل علاجها بالدواء السابق واذا مانفع يكوى الطفل

أم حصونة : انتو مثلنا بالترفيع. يعنى احنا نرفع بالطريقة التالية: نجيب نوى التمر ونصفه جمب بعض على شيلة ونبرمها على شكل اسطوانى وبعدين نرفع الطفل فيها بان نضعها تحت اللوز بالضبط ونرفعها شوى شوى. مع ان امى تقول مو زين يتعود الطفل عليها

فيافي : اختي ام حصونه :نعم فيه تشابه بالترفيع ولكن بدون نوى التمر

اختي طماطه:اغلي الارطى مع الماء والملح لمدة ربع ساعه وبعدين صفيه واحفظيه للاستخدام

زينة : وحدة متزوجة منذ مدة طويلة عندها ثمانية بنات واولاد متزوجين .من فترة صار معاها هبوط بالرحم لانها بتعمل اشغال البيت لوحدها . وشكت لي من انه كان قبل ذلك يصدر معها اصوات وخاصة اثناء الصلاة .

طماطه : إذا فيه غسول يومي في وقت الطهاره ؟؟وش نحط على سر المولود علشان يطيح ؟؟

أم رماز : كن هل تعرفين علاج طبيعي لقرحة عنق الرحم غير علاج الكي بالمستشفى

أم لهوم : بغيت اسالك وش رايك بقشر الرمان كغسول هل يخرب ومتى ممكن استخدامه يعني ممكن كل يوم من غير ايام الدوره.وش فوايده؟وبعد ممكن استخدام الماء والملح كغسول كل يوم من غير ايام الدوره ؟وش فايدتهم ولو استخدمناهم بانتظام وبكثره؟سؤالي, بعد مايحطون الكبسولات بالليل كيف تنشال ,يعني هي بتذوب وبتخرج مع الدوره

أم حصونة:التحميلة بنفسها بتذوب داخل الجسم وتنظف كل اللى داخليعنى ماله داعى تشيلين همها.

فيافي : اختي زينة :بنسبه لهبوط الارحام ما أعرف عنه شيء يمكن النساء الكبيرات والقديمات في طب العرب يعرفن اكثر مني والله كان ودي افيدك لكن ماعندي علم به و المعروف والشايع ان الاجهاد والعمل الصعب من مسببات نزول الارحام

اختي طماطه:افضل غسول يومي الماء ولابأس بصابونة(ديتول) مرة واحدة في اليوم اما سر المولود احرصي على نظافته وذلك بتنظيفه بمسحة طبيه كل يوم وبطريقه لطيفه وعاده يطيح سر المولود من 15 الى 20 يوم وبعد مايطيع ذري عليه شوي (صبرة) المباركه وممكن تجيبين قرش اونص ريال وتلزقينه على السر عشان اذا بكى الطفل مايطلع او ينفتح سرة طبعا بعد ماتنظفين السر بمسحه تذرين شوي صبرة ثم تلزقين القرش العمليه يوميه اما الطهار اهم شيء لاتشيلين اللي يركبون المستشفى واكتفي انك تصبين زيت زيتون عليه مع مطهر جروح وبعد مايشيلون المستشفى اللزقه صبي عليه زيت زيتون ولاتنظفين اللون الابيض اللي يطلع تراه جلد ينمو وهو طبيعي بيلتأم من نفسه

اختي ياسمينا:بالنسبة لمقادير الخشه بعد ماتطحنينه وتحطينه بعلبه تأخذين كل يوم مقدار .م.ص

بكوب ماء وهكذا واذا خلص المقدار بعد اسبوع اطحني ثاني واعيدي العمليه لحد ماتعافين اتمنى اني وضحت وسامحيني على القصور والتأخير

اختي العزيزة ام رماز:بصراحه علاج لقرحة الارحام ما أعرف ولكن فيه عجايز يعرفون عن طريق ادويه او كي خارجي بس انصحك اذا عندك هذي المشكله تشوفين عند اكثر من مستشفى واذا اجمعوا انه عندك هذي المشكله دوري افضل طبيب يسويها وسويها عنده احسن لك .

اختي ام لهوم :بالنسبه لقشر الرمان انا ماعمري استخدمته ولكن هو قابض وكانو اول يستخدمونه في الدباغ لانه يقسي واعتقد انه ان شاءالله مايضر بس افضل شيء كغسول يومي بدون ايام الدورة

الماء العادي لان فيه مثل يقول(كثرالشد يرخي) وما انصحك بالماء والملح يوميا لانه يجفف خاصه كغسول يومي مع انه ضروري ايام الدورة اما التحميلات مثل ما قالت اختي الحبيبه ام حصونه.

[دانةالدنيا]

أخت القمر : ودي اسالك عن الرياضة بالنسبة للمراةهل منها ضرر ؟؟؟كثير يقولون انها تسبب نزول الارحام ما ادري وش رايك؟؟؟؟؟؟

ميلاف : وقلتي ان الي خربانه مره تمشي على نظام مده اربعين يوم وقلتي ان الحلب للدوره ثلاث ايام وللنفاس 20 يوم ياريت تقولي الحلب كم مده اذا ني ما ولدتولا في دوره انا بصراحه احس برطوبه معليش علي الصراحه لاكن وش مالي غيرك زوجي كثير الشكوي مني وبصراحه قررت امشي علي طريقتك 40 يوم بس قوليلي الممنوع من الاكل اتركه با الرغم من عدم وجود دوره والحلب الله يخليك كم مره ومنقوع الارطي والملح كل يوم والتحا ميل كل يوم مده اربعين يوم ولا لا

شوق : ابن اخوي عمرة سنتين ونص تقريبا وبطنة منتفخة دائماومعاه كتمه ايش احسن شي له

فيافي : اختي العزيزة اخت القمر:الشغل والرياضه الغير عنيفه ماتضر بالعكس تقوي العضلات ولكن اذا ماعمرك سويتي رياضه ابدي بالتدريج حتى تتعودي عليها بس الاعمال العنيفه وحمل الاشياء الثقيلة هي اللي تسبب نزول الارحام وانا اشجعك على الرياضه بس لا تكون عنيفه

اختي ميلاف :ياليت توضحين بالنسبه للنظام اتبعيه لمدة اربعين يوم حتى لو كنتي مو نفاس بس انك بالنسبه للنظافه عادي غسلي وتنظفي بالماء ولكن اذا جتك الدورة وسط هذي الايام اقلبي

النظام من جديد واتركي الممنوع من الاكلات بالنسبه للحلب عادي مع السفوف يكون مطحون في الايام الاولي والايام الاخيرة تحذفينه وياليت تقرين اسئلة البنات والردود عليهن

اختي شوق:بالنسبه لولد اخوك سوو له الدواء اللي ذكرته للاخت ياسمينا دواء الخشه بنفس الطريقه يمكن ينفعه والظاهر ان الولد ما نظف بطنه زين بعد الولده وهذا لو كنا نتبع سنةالمصطفى محمد صلىالله عليه وسلم بتحنيك الطفل بعد الولاده لكانت صحتهم تمام وغير كذا لابد اي مولود قبل لايرضع حليب الام يرضع سكر نبات مع كمون او جيلكوز حتى ينظف بطنه.

رهينة الذكريات :هل المراه فى النفاس لازم تلبس شيله ودلاغات عن الهوا مع ان فى حريم يقولن مو لازم اهم شى الدويات وباالنسبه للبنت كذالك فى وحده اعرفها بنت ماتزوجت بس يطلع معها افرازات زرقاء تميل الى الاخضرار وعرسها بعد شهر ،اختى لها كرش وهى جايبه 4 اطفال مع انه اللى معها نفس الاطفال بس بدون كروش شنو حلها وهى المسكينه متعقده حيل وحده تقول انه هوا والمراه اللى نفاس وحيض هل اول شى تشربه القوه مع العنزروت فى حريم يقولن الريوق الفطور بعدين منقوع القهوه لانه يسد النفس

فيافي : اختي رهينة الذكريات: بالنسبه لسؤالك الاول المرأة سواء بنت او متزوجه مافيه داعي للبس الشيله والقفازات اهم شيء اذا كنتي في موسم الشتاء تلبسين بنطلون عشان الهواء مايدخل ويسبب الخراب وكبر البطن اما البنت اللي تطلع منها افرازات زرقاء اولا عليها تسوي تحاليل في المستشفى عند طبيبة نساء واذا ما عندها اكياس اواي شيء اخر وقالت لها الطبيبه انه مجرد التهابات فاهذا دليل قوي على انها عدمانه من شدة الخراب لانه وبصراحه قليل من البنات يكون معاهم الخراب بهذا الشكل لو كانت متزوجه ممكن لكن اعراضه تخوف عشان كذا انصح انه تسوي تحاليل بالمستشفى واذا النتيجه سليمه ومجرد التهابات (ان شاء الله سليمه) تهتم بنفسها اثناء الدورة وتتجنب البارد والمشروبات الغازيه والممنوع من الفواكه والخضار من الردود الماضيه وتستخدم السفوف وشاي الاعشاب والتمرة مع الرشاد مهمه وان شاء الله ماتشوف شر

بالنسبه لاختك اذا ولادتها طبيعيه وحجم البطن كبير ياليت تحاول تتذكر هل في واحد من اولادها جابته وقت الشتاء وكانت تمشي حافيه ومتهتم بتدفية نفسها بالملابس الداخليه يمكن داخلها هواء عشان كذا لازم تستخدم كبو الهواء مع انه اذا داخلها هواء ممكن تنحل مشكلة الارحام ولكن كبر البطن صعب يرجع زي اول الله يكون بعونها ولكن انصحيها وشجعيها على تمارين البطن وشوي شوي مو تعذب نفسها اما المرأة بالنفاس اهم شيء تبدأ يومها على ماتعودت عليه خاصة السليمه ولكن طريقةالنظام اللي انا كاتبته هو افضل شيء لان كل حاجة محسوبه يعني توقيت هضم المعده وتوقيت امتصاصها للادويه وتوقيت الفائدة من هذه الادويه.

شوق : سالتك قبل كدا عن الانتفاخ للاطفال قلتي استخدمي الوصفة الى كتبتيها لياسمينا المهم لقيت هذي الوصفة بعد بحث متعب فهل هي المقصودة 3 ملاعق كبيرة عنزروت+ 3ملاعق كبار مرة+ مكعب من الحلتيته المطبوخه (مو الرطبه) وتلقينهاعند العطار +3.م.ك علك مر+ م.ص كاثه + م.ص من الصبرة(المباركه)+اقل من ربع م.ص كبريته ملعقه. بعدين تأخذين ملعقه صغيرة من الخلطه مع كوب ماء حار وخليها لحد ماتبرد وحركي ثم اشربيها واذا هي فما هي الكاثة حتى العطار ما عرفها هل لها اسم تاني وعندي ملاحظة صغيرة انتي اثناء الوصفة ذكرتي ان التقيد بالمقادير لان الكبريتة خطيرة و العطار يقول الكبيرة ما تنفع للشرب فايهما الصحيح وثاني شي ياريت عند كل عشبة او مادة توصفيها وتعرفي ان فيها خطورة تنبهي البنات عشان ما يكثرون منها ويتمسكون بالمقادير

بنت ينبع : احب اسألك حسيت انه لازم استمر على العلاج اربعين يوم وسوف ابدأ من بداية الدورة فهل اخذ علاج الايام الآولى وعلاج الآيام ألاخيرة وبعدين ابدأ بالعلاج من جديدولا اخذ علاج الآيام الاولى عشرين يوم حتى بعد ما اطهر وهل التحميل اثناء الدورة والغسول يكون مجرد شطف من الخارج او لابد من الداخل انا جبت جميع المطلوب بس العنزروت مثل اللبان الذكر بس لون احمر والارطا مثل الحجر ولونه ابيض انا شاكه فيه لانه وصفك له غير والقيصوم كيف شكله وكبوا الهوا ما احد عرفه

طماطه : بس حبيت أقولك اللي سويناه بسر المولوده قالت لنا وحده حطو عليه زيت زيتون كل يوم وراح يطيح من نفسه وحطيناه وطاح السر خلال 3 أيام وبطلنا نحط عليه والبنت الحين عمرها 3 سنوات والحمدلله ماشفنا عليها شي وش رايك أخت فيافي ..

لؤلؤة : بغيت اسألك ايش رايك بالبخور في الجاوي العشرين الايام الاخيره من النفاس لمدة ساعه 000000او سعف النخل 0000000ردي علي ضروري

ياسمينا : أختي فيافي العطار ما عرف الكاثه وخيرني بين الكبيريت الأصفر والبيض .ما الفرق بين الحلتيته الطريه واليابسه .... على الصحة ؟

دندونه : مشكلتي اني دايم احس بنغز في جنبي اليمين مره واليسار مره قبل موعد الدورة باسبوعين تقريبا واثناء ايام التبويض المفروض بالاضافة لآلام في احدى الجنبين اثناء الجماع قبل موعد الدورة باسبوع تقريبا ..قلت يمكن المشكلة تكون ميلان في الارحام

رهينة الذكريات : حبيت استشيرك بشى وهو فى شى يسونه الحريم اثناء النفاس وهذى اخذناها منجداتنا انها تكبا بكرش الخروف او راسه تاخذ الكرش وتعبيها دويات من ( رشاد وحلبه وكلهم)وتخيطهم بعد ذالك تكبى فيه تحت البطانيه وتبخر بلبخار مال الكرش وتاكل منه الى الصباح

لين تعرق اذا عرقت معناه انه فى نتيجه وهذا يتبعنها خواتى فى النفاس مارايك فيها ارجوا الافاده

وماعلاج غازات اللى تصيب المراه المتزوجه؟

فيافي : اختي شوق: نعم هي نفس الخلطه اللي ذكرتي والله ياختي ماأعرف لها غير ها الاسم(كاثة) وممكن انك تحذفينها اذا ماعرفتيها وبالنسبه للخلاطات السابقه الخاصة بالنفاس والخائض انا حطيت خلطات بأذن الله ماتضر ابد ولكن خلطة (الخشة) هي اللي فيها بعض المقادير اللي خطيرة وانا نبهت عنها والحمدلله تقريبا اغلب النبتات اللي ذكرت ممتازة ولافيها مضره وخاصه اني اغلب هذه الخلطات موروثه يعني نستخدمها جيل بعد جيل وماشفنا الا العافيه يعني ادوية النفاس والدورة والخشه ورثينها من جدت جدتي

اختي بنت ينبع:مع بداية الدورة ابدئي بنظام الثلاث الايام الاولات ثم الثلاث الايام الاخيرات وبعد ماتخلصين وتطهرين اعيدي النظام من جديد 20 يوم الاولات ثم 20 يوم الاخيرات واثناء هذه الفترة اذا جتك الدورة اقلبيه من جديد واذا خلصتي كملي على الايام الاخيرة لحد ماتخلصين كل 40 يوم وان شاءالله ماتشوفين الا العافيه وبالنسبه للتحاميل تستخدم اثناء الدورة او بدون عادي اما الغسول فمن الخارج فقط اما العنزروت لونها مختلط بين الحليبي والاحمر وزي الحصى الصغير وطعمها مر واذا غسلتيها تلزق مع بعض واذا نقعتيها يكون لونها مائل للعكر وتذوب جزئيا اذا طولتي ناقعته(لمدة يومين) اما الارطا فهي جذوع نبات صحراوي معمر وهو مجود في الرمال الصحراويه ويكون على شكل اخشاب تكسر وتطحن وتستخدم وهو ليس ماذكرتي يمكن اللي عرض لك العطار شبه اما القيصوم نبات صحراوي وله مواسم ينبت فيها وريحته عطريه حلوه اما كبو الهواء معروف ولكن انا راح اعطيك بعض من مكوناته (محلب,ورق حناء,فلفل هواء, عودهواء, مرة , حلتيته (رطبه او يابسه) خواجوا , قشربصله , كمون, هدب اثل)

اختي طماطه:جزاك الله كل خير واذا الطريقه اللي قلتي نفعت مع مواليدكم فالمفروض تتبعونهامع بقية المواليد والله يرزقكم بالمولود الذكر لانى فهمت انكم لم يولد لكم مولود ذكر واهم شيء الصلاح

اختي الحبيبه لؤلؤة:اذا قصدك البخور الجاوي الغير مفصود ولونه ابيض وريحته يعني فانا اعرف انه يستخدم لتبخير المنزل لكن انا ماعمري تبخرت فيه ولذلك لااستطيع اني انصحك بشيء لااعلم عنه

اما سعف النخل لا ماأنصحك فيه لان مافيه نفع

اختي العزيزة ياسمينا:والله لااعرف للكاثه غير هذا الاسم وممكن انك تحذفيها اذا لم تجديها واذا انتي من اهل الرياض انصحك انك تروحين للصمعاني في حي المروج والرجل معروف بصدقه وخوفه من الله ولا ازكي على الله احد ممكن انك تجدين ماصعب عليك من الادويه عنده

اختي دندونه:المشكله اختي الالم اللي تقولين ماتحسين فيه الا عند قرب موعد الدورة يعني مو مستمر لانه لو كان مستمر وخاصه وقت الحماع كان قلت ميلان ولكن انتي حددتيه بوقت معين يعني هذا شيء مرتبط بوقت الدورة ويمكن انك تعانين من فرط في نشاط التبويض وانا انصحك بالذهاب الي الصمعاني عندك بالرياض اذا انتي من اهل الرياض وممكن هو يدلك على نساء ثقه نصيحه اميلك لاترسلينه او تعرضينه في أي منتدى لاني انا عانيت منه ولا ودي أي وحد ة تمر باللي مريت فيه.

اختي رهينة الذكريات:انا سبق واني ذكرت المكروشه وهي ممتازة للنفاس بس تبي احد يعرفله

اما حشو الرأس (راس الغنم ) فهي ممتازة ولكن صعبه طريقتها وهي ممتازة للي داخلها هواء بالراس ومن اعراضه صداع مزمن وشديد يمكن يستمر لاكثر من يوم مع دوخه ورغبه بالاستفراغ وخاصه اذا تروشت وتعرضت الوحده لهواء

[دانةالدنيا]

لؤلؤة :وكبو الهواء اللي انتي ذكرتيه فيه ورق حناء هل الحنا كويس ومايسبب شمم ورق السدر هل هو يحط مع البخور ولا لا انتي ذكرتي منقوع مكون من كوب ماء -ملعقه صغيره مره - ملعقه صغيره محلب-ملعقه كبيره عنزروت هل ستخدمه لاخر يوم في الاربعين يعني من البدايه الى النهايه كل الاربعين وانتي ذكرتي ان المحلب مايستخدم العشرين الايام الاولى00فهميني ارجوك من اليوم وانا في موضوعك اكتب لاني في الشهر السادس وابغى اجمع معلومات منك بدري والله يعطيك العافيه اختي فيافي الادويه هذي ماتخرب اذا جمعتها وطحنتها من الحين ولا بدري مرررررررررره ابي افتك

فيافي : اختي الحبيبه لؤلؤة:المحلب وبالكميه اللي ذكرت وهي ملعقه صغيره ماتضر على العكس

تبعد الشمم ولكن الهدف من عدم تكثير المحلب في الايام الاولى هو انك ماتنشفين على خراب لان المحلب ينشف واذا تقيدتي بالمقادير ان شاء الله بتشوفين الفرق والمنقوعه ممتازة كل ايام النفاس

عشان تنظف المعده والله يقومك بالسلامه ولكن اهتمي بنفاسك القادم زين لانه باهتمامك ممكن ترجعين بنت والكبو معاه حناء بس ماعمري حطيت معه ورق سدر الادويه مافيه مشكله انك تجمعينها الحين ولكن خلي طحنها اذا جاء الشهر الثامن على خير ولاتنسين نفسك من اذكار الصباح والمساء وادعي لنفسك ان الله يهون عليك بيوم هالجمعه المبارك

طيوبه : انا عندي مشكله ما ادري سببها من شهر وانا اعاني من نزيف وذهبت لاكثر من طبيبه والادويه مع اختلافها الا ان تاثيرها لوقت محدد ثم يرجع النزيف المهم وقررت ازالة اللولب مع ان الفحص لم يبين اي مشكله في اللولب المشكله اني خلال فترة النزيف جاتني الدورة وتعرضت لبردشديد لاني كنت مسافرة في مكان بارد ولم انتبه لنفسي وشربت اشياء باردة ويمكن هو السبب في خروج الكثير من الهواء مع النزيف والان احس بضيق شديد لا اعرف ماذا افعل خاصة اني امتنعت عن زوجي فترة طويله تقارب الشهر ولقد اشتريت كل الأعشاب ما عدا كبو الهوا لا احد يعرفه

لؤلؤة : اذا كانت الوحده مسقطه0ومسويه عملية تنظيف تسوي نفس النظام للنفاس ونفس البخور والى متى يعني كم يوم .

نووفتي : هلا والله وغلا ...وشلونك فيافي (حسبي الله على اللي تسلطوا علىجهازك والمهم انك ماتزعلين زوجك الله يسخره لك ويخليه لك)فيافي عمرك سمعتي عن لحاء الطلح يقولون انه يستعمل كبو وفيه ناس جربوه يمدحونه وش رايك؟بالنسبه للعنزروت اللي مع المنقوع انا طحنته ينفع؟

فيافي : اختي طيوبه:بالعادة اللي تركب لولب يصير معاها لخبطه يعني نزيف اصبري عليه واذا تبين توقفين النزيف ( شبه سوداء ويكون حجمه كبر حبة الحمص+ فنجان حلب) اطحنيهم وخذي ملعقه مع كوب حليب على الريق وان شاء الله يوقف النزيف المهم انك حاولتي تهتمين بدورتك وخاصه البرد اما كبو الهواء ممكن انتي تجمعينه وانا ذكرت مكوناته في الردود الوارده في هذي الصفحه او اللي قبله وبالنسبه للنظام اذا انتي سويته ماكان فيه داعي تمتنعين عن زوجك اذا لم تكوني نفاس او حائض

اختي لؤلؤة:المسقطه اذا كان مدة العوار 15 يوم تقسم الايام 7ايام على الايام الاولى و8 ايام على الاخيرة وبالعادة العوار مايتعدي 15 الى 20 يوم وتستخدم نفس الادويه بس انها تكثر من الكمون في الايام الاخيرة

اختي طماطه:والله اذا فيه انذار اجهاظ فأفضل شيء لها المستشفى يعطونها مثبتات وتحاول تبعد عن الاجهاد العضلي والنفسي



اختي الحبيبه نووفتي:سمعت ان فيه نساء يستخدمونه لكن انا ماعمري جربته والشيءاللي ما جربته ما اقدر انصح فيه لاني ما ادري هو زين ولاشين وبالنسبه للعنزروت المفروض انك ماطحنتيها بس مافيه شيء استخدمي اللي عندك واذا خلص لاتطحنين الجديد.

طماطه : أخت فيافي مشكوره حبيبتي بس فيه ناس إنصحونا بالحلب لانه يرفع الجنين وناس قالوا تشرب منقوع المره إذا نزل معه الله يكرمكم دم ولا ندري من نسمع كلامه علشان كذا أنا قلت مافيه غير أخت فيافي تدلنا على الصواب ..

وردة الأمل : اريد علاجاللعقم فأنا لي فترة متزوجة والسبب انه عند زوجي لزوجة في الحيوان المنوي وقلة عدد والمشكلة الاخرى هي اردافي فهي كبيرة ولكن وجهي صغير بالنسبة لها ولا استطيع ان اعمل ريجيم بسبب الفرق

أطياف : فيافي .. أنا زواجي بعد شهرين .. وحابه أتطمن على نفسي .. أنا دورتي مدتها 3 أيام بس .. وتنزل الدورة بدون ألم ..يعني ماادري إلا وهي نازله علي فجأه .. أحياناً يكون هناك ألأم خفيفه .. هل هذا دليل على شي .. أو هو شي عادي .. ولو حبيت آخذ الخلطات اللي قلتيها وشلون آخذها في الثلاث أيام الأولى وأنا دورتي كلها 3 أيام؟؟ .. وهل للبنت إنها تاخذ مثل هالخلطات حتى لو كانت ماتعاني من شي .. ؟؟؟بعد الدورة بعشرة أيام يمكن أو أ:ثر أحس آلام مثل نغز السكاكين في أسفل بطني مع إفرزات شفافه شوي .. فهل هذا شي عادي ..مرة كنت أطوف حول الكعبه .. ومشيت كثير بصراحة لأني كنت أطوف فوق والشوط الواحد كان طويل .. المهم .. جلست أ{تاح شوي وأشرب مويه ..وبعدين قمت فجأه وأثناء قومتي حسيت وكأنه سكين نغزتني بقوة داخل رحمي .. وشوي خف الألم ..ولما رحت لدورة المياه لقيت على ملابسي الداخلية مثل الدم خفيف لونه بني .

فيافي : اختي طماطه:بالنسبه للعوار ما انصح بالحلب لانه يرخي الارحام ولكن عليها بالكمون اذا الجنين حي بيرتفع واذا هو ميت او ضعيف او مشوه بيطيح اما المرة لا ولا ولا لانها تساعد على تسقيط الجنين حتى لو كان سليم

اختي وردة الامل:اولا ياأختي عليك انتي وزوجك بالدعاء وان تراعي شروطه وان تتحري اوقات استجابة الدعاء ودائما افضل شيء اتباع هدى المصطفي محمد عليه افضل الصلاة والتسليم بالتداوي مثل اخذ 7 حبات من الحبه السوداء مع ملعقة عسل كل صباح وانصحك ان تدعي زوجك يجرب الحلب لمدة شهرين كسفوف وشاي مرتين في اليوم بعد الشهرين اضيفي العسل الطبيعي(سدر)مع بار النخيل واتركيه يستمر عليه انتي مولاازم تاكلين معاه اذا مافيك شيءوان شاء الله يكون حمل ولكن اهم شيء الدعاء والثقه بالله اما كبر الارداف وصغر الوجه ماعندي له علاج ولكن اختي تعاني نفس

المشكله وهي تلعب الهيلاهوب عشان يتناسق الجسم.

اختي اطياف:فيه بعض النساء دورتهن بس 3ايام عادي لذلك يومين اولات ويومين اخيرات(اضيفي يوم زياده)يعني بعد ماتطهرين وتصلين اضيفي يوم عادي اما النغز اللي تحسين فيه فأكثري من الفلفل الاسود مع اكلك فترة الدورة وجميع النظام السابق يصلح للبنت الا (التحميلات)اما الدم اللي طلع منك اثناء الطواف فهذا دليل على انك ماتعملين اي مجهود اذا جتك الدورة وهذا دم فاسد وطلع لما سويتي

هالمجهود لذلك انصحك بالعمل والحركه الطبيعيه اثناء الحيض

رابط الموضوع : http://www.wahaweb.com/pens/topic.as...age=5&ARCHIVE=

[ام عبود وسلوم]

جزاك الله خير اختي على هذا النقل الرائع وعندي لك طلب اود معرفة اسم المنتدى الي نقلتي منه هذه المعلومات اود ان اطرح اسئله وشكرا لكي

[Norah]

السلام عليكم

اعاني من رياح مع صوت شديد اثناء الدوره الشهريه لاكن ليس دائما احيانا واحيانا بعد الدوره الشهريه وبعض المرات يكون الصوت شديد والريح قويه لدرجه اني احس بمثل وخز الابر في فتحت المهبل من قوه خروج الريح

لكن الان صار لي كم دوره لم ياتيني الريح لكن اعاني من افرازات دائمه يكون لونها بيج مخاطي

واحيانا افرازات جبنيه صفراء وهذي نادرا ما اراها ومن قبل حوالي اكثر من سنه عانيت من افرازات ملونه خضرا وصفرا اتتني وانا في عمر 14 وكانت تاتيني بشكل غير مستمر يعني احيانا تجلس اكثر من سنه ثم ترجع لي واخر مره شفتها وعمري 21 سنه وتصاحبها رائحه كريهه وقويه

مع العلم اني بنت والدوره الان غير منتظمه عندي لاكنها طبيعيه

التشخيص والعلاج جزاكي الله خير على الخاص

مع العلم اني سمعت ان البنت لا تتبخر من تحت

[دانةالدنيا]

حبيبتي ام عبود وسلوم أنا وضعت الرابط
والموضوع موجود في منتدى واحة المرأة وانا حقيقة اخذتة من منتدى اخر وحفظتة في الكمبيوتر ولاكن لااعرف اسمى المنتدى إلى اخذت منه الموضوع
حبيبتي Norah اسئلتك كلها موجودة في الموضوع لو انك قراتة بي تمعن لوجدتي الجابة ولاكن لاباس سوف اساعدك
إلى تعانينا منه يااختي هوه خراب في الرحم وبما انك بنت فليس هناك علاج خارجي لكي لانك مازلتي بنت ولاكن علاجك يكون في الغذاء
وهذا بعض ماذكر في الموضوع
(علامات الخراب ماهي:

خروج سوائل بكثرة طوال اليوم تقريبا بعض الحالات معها رائحة كريهه بعض الحالات يخرج منها هواء من منطقة المهبل مع صوت محرج)
ولان لابد انعرف المسببات للخراب والأمراض الأخرى لتجنبها وهي:

اثناء الحيض او النفاس او العوارعليك تجنب الأتي:

الجوع الشديد(يعني رجيم يوقف) او التخمة الزائدة

الأكلات اللزجة مثل المولخية, الباميا,البصل الاخضر,الشمام ,البطيخ

الحوامض خاصه اليمون, لاباس بأكل برتقاله في اليوم ولاكن بعد الشبع

الأيسكريم,الحوامد بشكل عام

تعريض القدمين للماء او المشي حافية على البلاط البارد او الأستحمام بكثرة

او اخذ دش مهبلي وانشاء الله سوف اعطيكن الوسائل البديلة مع المحافظة على النظافة اليومية

المشروبات الغازية

حمل الأشياء الثقيلة او سحبها وهذا لايمنع الحركه والعمل بل على العكس اعملى الأشياء السهله وتحركي لاكن لاتجهدي نفسك فوق طاقتها

الآن العلاج وخطواته بالتفصيل

فترة الحيض

اذا فترة حيضك 6اياماتبعي التالي:الثلاثة الاتام الاولى

اما النفاس فتستخدمها 20 اليوم الاوله

في الصباح سفي مقدار 2ملعقة كبيرة من هذه الخلطة التالية على الريق مع كوب شاهي او حليب وتكون هذهالخلطة مطحونه ( كوب حلب+نص كوب حبة سوداء+فنجان قهوةحبة حلوة+ملعقة كبيره قرنفل)

وان شاء الله سوف اكمل بقية الموضوع مع نظام غذائي كامل يصلح كرحيم ومفيد مع باقي الأدوية الأخري حتي اخر اليوم يعني ماذاتفعلين من الصباح حتي المساء كل فترة الحيض والنفاس , لأني تعبت شوي وللحديث بقية

بعد ذلك تتناولين التالي: تمر معبوط(وياليت تكون عجوه) + م.ك. سمن غنم او زبدة يطبخ على

النار هادئه لمدة 10 دقائق ثم يضاف إليه حب الرشاد او تستعيضين عنها بعصيدة التمر المحلاة وهي عباره عن( كوب تمر بدون النوى + 4كوب ماء) ثم توضع في الخلاط وتصفى ويضاف اليها كوب دقيق اسمر ثم توضع على نار هادئة مع التحريك حتى تثخن مثل الباشميل يستغرق طهيها ساعة تقريباَ ثم تضيفين إليها فلفل اسود ,ممكن تعبينها في علب يلاستيك على كميات وتوضع في الثلاجه وكل ما بغيتي تأكلين تطلعين علبه وتحميها بعد ذلك بنصف ساعه تقريبا الافطار وهو على رغبتك لكن ابتعدي عن المعلبات

ممكن بعد ساعه اذا جعتي تتقهوين او تشربي شاهي اعشاب وهو مكون من ( ميرميه

+ اعواد شيح+ شوي كمون +شوي حبه سوداء+ شوي حزاة+ سوي قيصوم+ شوي

قشرقهوه+شوي نونخه+شوي دارسين+شوي ينسون)

الغــــــــــداء:

ممكن مطازيز مع لحم +لوبياء

ممكن مقلقل لحم فقط مع خبز بر

ممكن مشاوي مع ايدام لحم بدون خضار او الخضار التالية( حبة كوسة+حبة بطاطس

لوبياء حمراء) خففي من الطماطم لانها حامضه

ولا بأس في الفاكهه بعد الاكل مثل تفاحه او برتقاله تجنبي الموز لانه لزج

بعد الغداء بربع ساعه عليك بمنقوع التالي: في كوب ماء( م.ك.عنزروت+م.ص.مره+ شوي محلب) لانها تعمل كمهضم وملين وتنضف الأمعاء ولابأس من اضافة الماء اليها كلما انتهت الكميه واستخدامها لاكثر من يوم طبعا توضع في الثلاجه

وقبل ما تشربيها بنصف ساعه طلعيها من الثلاجة.

فترة العصر وبعد الغداء ب3ساعات اشربي شاهي الاعشاب السابق مع 2.م.ك من السفوف السابق. اذا جعتي كلي ماتشتهي نفسك إلا الممنوع ممكن شابوره بر

العشــــــــاء:

المجال امامك مفتوح الا الممنوعات اهم شي لاتجوعين ممكن بعد العشاء تأكلين سلطه + برتقاله

هذا النضام الغذائي يستمر كل فترة الحيض او النفاس اما الأدويه بس لثلاثه الأيام الاولى

من الحيض والعشرين من النفاس

بالنسبه لنظافه ممكن الاستحمام كل اسبوع اما يوميا فتغسلي من الرقبه الي السرة بماء وصابون عادي وتجنبي وصوله الى المناطق لأخريلأن اعطيك الغسول التالي لمنطقة المهبل وهو:

( ارطا يكسر+ يطبخ مع ماء + ملح) تلاحضين لونه يتحول الى الاحمر لاتخافي عاديثم صفيه وضعيه في جركل وتوضئي منه يومياَبالنسبه لتحميلات المهبل:ملاحظه للمتزوجات فقط اطحني مقدار .م.ك.مره +شوي محلب+ ملح خشن واعجنيه بعسل طبيعي ان وجدكل ليله ضعي تحميله واحده صغيره كبر نوى التمر ( اصنعي كميه تكفي نفاسك)اوحيضك

ادوية العشرين يوم الاخيرة من النفاس او الحيض:

طبعا نفس التسلسل الغذائي ولكن الادوية تختلف خذي الدواء التالي على الريق2 ملعقة كبيرة مع شاهي الاعشاب السابق اطحني(كوب حبة سمراء+م.ك.قرنفل+ م.ك.دارسين+م.ك.فلفل اسود+ م.ص.محلب فنجان قهوة كمون+ م.ك. نونخة + فنجان قهوة صغير حبة حلوة)

التمر مع الرشاد استمري عليه لانه ينظف الارحام

(اما النغز اللي تحسين فيه فأكثري من الفلفل الاسود مع اكلك فترة الدورة وجميع النظام السابق يصلح للبنت الا (التحميلات))
اكرر اختي يجب عليكي طبع الموضوع حتى تقرئية بي تمعن وتركيز اكثر ويكون مرجع لكي في المستقبل

[دانةالدنيا]

ولاتنسيني حبيبتي أن تهتمي بي نظافتك الشخصية اثناء الحيض للأنا ا البكتيريا والجراثيم تتجمع في الامكن الرطبة الغير معرضة للهواء
فعليك بي الغسيل بي الماء والصابون الغير معطر في كل مرة تغير فيها الفوطة
وأيضاً شيئ مهم تغير الفوطة الصحية بي استمرار

[Norah]

جزاكي الله كل خير اختي دانا

صاحبة المشكله تحرص على نظافتها الشخصيه من ملابس او فوط وعلى التهوئه المنتظمه

لكن الا يتاثر الغشاء من جراء الريح الخارجه من الرحم والتي قد تكون قويه ؟

[جندية مجهولة]

جزاك الله خير موضوع مفيد جزاك الله خير لنفع اخواتك المسلمات

[دانةالدنيا]

والله حبيبتي Norah ماعندي خلفية إذا كان يؤثر على الغشاء
والله كان نفسي افيدك لااكن للأسف
لاكن اوعدك إن شاء الله إني ابحث عن الاجابة حتى ولو حصلت عليها بعد فترة سوف ارسل لكي رسالة خاصة إن شاء الله

جندية مجهولة حياك الله وان شاء الله تكوني استفدتي