تخلصوا من السمنه بأكل اللحوم والدهون..؟!

[رحيل العمر]

هلا ومشكوره والرجيم شكله روعه بس ممكن يا عمري تعطيني المقال كامل او رابط للمصدر صراحه ودي اعرف كيف يتفاعل لانه الدهون مو داخله مزاجي بس اكيد الدكتور واثق ويكفي التجارب اللي ذكرتيها...
وانتي يانور الهدى ياعمري يعطيك الف عافيه والله افديتيني من زمان ادور لمنتديات للرشاقه
والرجيم مشكوره والله يبارك فيك..

[اليس]

مرحبا بنااات
اختي مس بيوتي كيفك وايش الاخبار ....ناويه تبداين الرجيم متى ؟؟انا معاك ...
حبيبتي ريتاج : ترى سالت صديقتي وقالت لي انها كانت اذا صحت من النوم تاكل تفاحه او برتقاله وحده بسسس واحيانا بس تشرب فنجان قهوه ساده ......وقرب العصر كانت تاخذ من المطعم بروستد او كباب او اي شي من اللحوم وتاكل الى ان تشبع .....وبالليل نفس الحكايه واحيانا تاكل سلطه مع العشا ......وكانت تسوي رياضه ربع ساعه او عشر دقايق ...
وهي تقول لي سوي هالرجيم بدل الكيميائي ...وانا محتاااره

[رحيل العمر]

اليس يا عمري بغيت اسال صديقتك كيف جربت الرجيم من عندها او حد دلها عيله ؟؟؟
والدهون كيف ما ضرتها وهل سبب لها الرجيم شي ثاني؟؟؟وهل هو يختلف عن رجيم مس بيوتي لان في رجيمها ممنوعه الفاكهه؟؟
ويعطيك الف عافيه...

[اليس]

مرحبا حبيبتي رحيل العمر

شوفي عيوني هالرجيم اعتقد هو تقريبا يشبه اللي كاتبته مس بيوتي ....
بس ماادري بالضبط هل هو نفسه او لا
لان صديقتي جابت هالرجيم من دكتور بالرياض والدكتور هذا كتبه لزوجها مش لها ...وهي كانت توها مطلعه من الاربعين ...ووزنها كبير وجسمها محتاج لغذاء بعد الولاده ...ولكنها صممت تسويه وفعلا سوته ووالله العظيم يارحييل انها نزلت 14كيلووو قبل نهاية الشهر ....وزي ماقلت لك انها كانت تاكل احيانا نوع من الفاكهه "حبه واحده"فقط .....وطبعا ماضرها ابدا لانها اصلا لما حضرت زواج قريبتها "ماشاااالله عليها "كلهم اعجبو بجسمها ورشاقتها ....وهي قالت لي سويه وعلى مسؤليتي بس انا عموما مااحب اللحوم كثير لاني اميل للفواكه ...بس الحين انا متحمسه له ......والحمد لله ماسار لها اي مشااكل ابدا ابدا ....وتقول انها اول ثلاث ايام كانت تجوووع بس بعدها فعلا زي ماقالت الاخت مس بيوتي ان الجسم يكون فيه نشاط وغير عن باقي الرجيمات ...
اختي رحيل يعطيك الف عافيه ...اسئلي ومايردك الا اصابعك
عموما انا بقول لصديقتي انها تتكلم عن تجربتها هنا بنفسها ....

[مس بيوتي]

رحيل العمر هلا فيج غلاتي...

هذي مقاله للدكتور بجرديه غير انه مقابلين ناس مجربين هذا النظام بالاضافه الى النالس اللي نعرفهم شخصيا ومجربينه.... للاسف ما عندي الرابط والله..

بس ممكت اكتب لج تفسير اوضح واكمل بالنسبه اشلون يعمل هذا النظام عشان تطمنين اكثر...

واللي جربوه اهما خير برهان .....

اليس مشكوره غلاتي تسلميييييييييييييييييين حبوبتي...

واهوا فعلا نفسه بس يمكن اهيا غيرت بالنسبه لحبة الفاكهه مو مشكله يعني..

واهوا صج ينزل الوزن بهذي الصوره اللي قالت عنها اليس بالضبط وكل اللي جربوه يقولون نفس الكلام..

بالاضافه انه مافي خمول ولا كسل بالعكس حيويه ونشاط ونوم هاديء
واعتدال بالنسبه للضغط والسكر .... ونشاط بالحاله الجن...يه ايضا... وتعدل ملحوظ..

شوفي حبيبتي رحيل العمر انا بجربه بعد اسبوه تقريبا لان الحين اجرب رجيم على ما اخلصه بس باقي اسبوع وعلى طووووووووووول ابدي في هذا النظام لاني مقتنعه فيه وايد وكافي اللي نسوفه من اللي مجربينه.. غير جذي له فوايد وااايد..

حبيبتي رحيل العمر انا بكتب لج تفسير اوضح بالنسبه لهالموضوع ..

[مس بيوتي]

هذا هو تفسير السر؟!

انا ابي اكتب كلام الدكتور واللي يقول انه مسئول عنه طبعا....
لان الرابط مو موجود...

الخطوات التفصيليه لمعرفة ماهية هذا النظام:

قبل كل شي هناك مصدران للطاقه في جسم الانسان المصدر الاول الذي نستمد منه طاقتنا هو الكيبوهيدرات او النشويات... اما المصدر الثاني فهو البروتينات او الدهون وافضل طاقه هي المستمده من النشويات... بمجرد ان يأخذ هذه النشويات تتحول في آخر المطاف الى سكريات في الجسم..
والسكريات لها اضرار كبيره جدا وبالتالي غدة البنكرياس تفرز هرمونا وهو هرمون الانسولين...
والانسولين في هذه الحاله يتجه للسكريات التي جاءت من النشويات ليقوم على تذويبها وكل ما يقضي على السكريات الانسان يشعر بالجوع فيتجه لاكل الفاكهه والحلويات وكل المواد الغذائيه التي تحتوي على سكر حتى يقوم بتعويض ما افتقده عندها يشعر بالنشاط ..

وهنا يقوم الانسولين بنفس العمليه مره أخري....

يسمى الانسولين(هرمون السمنه) فله مضار كثيره بالاضافهالى منافعه الكثيره ...
ون ارار الانسولين انه يسبب تصلبا في الشرايين اضافه الى اضراره الكبيره على القلب وبالتالي هدفنا هو تقليل من كمية الانسولين وتركه فقط للحاجه لان الانسولين يؤدي الى متاعب نفسيه عندما يكثر استخدامه في الجسم وذلك عن طريق التذبذب الذي يحصل للجسم عندما تدخل السكريات ويذيبها الانسولين وهكذا معدل السكر يصبح غير ثابت في الجسم ..

وبالتالي يشعر الانسان بالارهاق والتعب...

مما سبق نعرف انه من الافضل الابتعاد عن النشويات(الكيبوهيدرات) واستخدام الطاقه البديله وهي الدهون ..

فعندما استغنى عن الكيبوهيدرات لمدة اربعة اسابيع مثلا يبدأ الجسم يعطي اشاره الى حاجته للطاقه فيبدأ تلقائيا بالاتجاه الى الدهون كمصدر آخر للطاقه فتبدأ عملية حرق الدهون التي كانت تقبع في اجسامنا سنوات.......... اذن حرق الدهون بدلا من حرق السكر..





هذا جزء من كلام الدكتور عن النظام وكيف يعمل وشرح لنا نظام الغذاء وكيف يكون بالجسم وكيف يعمل....

[رحيل العمر]

مشكوره اليس يا عمري وتعبتك معاي ويعطيك الف عافيه بس ممكن سؤال يعني صديقتك كان نظامها فطور حبة فاكهه يوميا .. الغداء اي نوع لحوم مقلي او مشوي...
العشاء لحوم مع سلطه... كذا كان نظامها صح ونزلت 14 كيلو والله روعه انتظر ردك وياليت والله تقولنا تجربتها على فكره انا اموت في تجارب الرجيم احب اقرأها صراحه اتشجع بشكل فضيع والا انتي اكتبي تجربتها بالتفصيل عالعموم الله يعطيك العافيه عمري...
اما مس بيوتي يا عمري والله تعبتك معاي بس فهمت اكثر الله يجزاك خير ويناولك مرادك يارب والله الرجيم فعلا روعه وفعلا قنبله والله بس الواحد يستمر عليه كم اسبوع وهل بعدين يرجع لنظامه العادي او لازم بالتدريج؟؟ وهل ممكن حبة فاكهه يوميا؟؟؟
صراحه جننتك شكلي ووقفت لك وقفه سامحيني يا عمري وجزاك الله الف خير....

[مس بيوتي]

هلا يا قلبي رحيل العمر بالعكس ترى اسالتج مهمه وتساعد غيرج بعد....

يقول الدكتور ان ميزه هذا النظام عكس الريجمات الاخرى.


شنو ميزته؟؟؟؟؟؟؟؟؟

ان الجسم يبقى محافظ على توازنه ولا يتغير لو بعد سنوات....
بعكس اي رجيم ثاني اول ما ينقص الوزن فهلا وبعد الرجيم يرد الجسم كما هوا.... وترد الكيلوات وترد المعانات مع الرجيم....

ولكن هذا النظام يبقى محافظ لان الجسم ما راح يتقبل اي مواد غذائيه مضره....


وبالنسبه للفاكهه ممكن عالفطر مثل ما قالت اليس بس ترى اهوا من الممنوعات بس مو مشكله اذا حبة فاكهه واحده....

وبالعكس حبيبتي الغاليه ما تعبتيني ولا شي انا بالخدمه لاي سؤال تحت امرج...

ولا تتردين لاي سؤال يطري على بالج....

اليس يالغاليه انا ببدا بعد اسبوع تقريبا على ما اخلص الرجيم اللي انا مسويته الحين...

وراح الغج قبلها بجم يوم انشالله.... اذا تحبين تبدين معاي..

وياريت حبيبتي اذا تقولين حق صديقتج تتكلم لنا عن تجربتها مع هذا النظام عشان البنات يعرفون اكثر عنه...

تحيــــاتي للجميع

[فراولاية]

عزيزتي مس بيوتي صدق هذا الرجيم أخاف أسوية

بيزيد الوزن مش بيقل وكم كيلو ينزل في الاسبوع

ممكن آكل مايونيز وكتشب وهذة الاشياء

[ريتاج]

غاليتى مس بيوتى
هل ينفع الجزر و اللفت المبشور ضمن السلطه ؟
وهل ممكن اىكميه من الجبن واىنوع مافى ضرر؟ كلماتك الرقيقه تطمئن ولكنى قلقه شوى
وهل ينفع المايونيز ؟؟؟؟
ارجو من الغاليه أليس ان تكتب لنا الوجبات بالتفصيل لصديقتها التى جربت هذه الحميه

[اليس]

ياحياتي يامس بيوتي ....انا اتابعك

مس بيوتي انا الحين مقرره اني ببدا الرجيم بس متى ....قريب ان شالله
وشوفو حبايبي
الغاليه رحيل العمر اسالي براااحتك والله يساعدك
والاموره ريتاااج انتظري بكره بالليل صديقتي تكتب رد لاني ارسلت لها رساله وطلبت منها تكتب هنا او انا بكتب كللللل اللي تقوله
وحبيبة قلبي مس بيوتي انا خلاص اوعدك بكره بالكثير بالليل اجيب كل شي عن رجيمها ....
رحيييييل العمر بكره ان شالله ترتااااحين لما تقراين ردها كااامل وبالتفصيييل الممل عشان تشوفين تجربتها وتتحمسين باذن الرحمن ......ريتاج استني شوي لاتزعلين بكره يعني بكره انا حاسه بحماسك والله يساعدك

[مس بيوتي]

هلا حبيبتي فرولايه... ليش خايفه؟؟؟ بعد كل هذا تخافين؟؟؟ بالعكس حبوبتي هذا الرجيم كل اللي جربوه اشادو فيه... والنتيجه انشالله مضمونه وينصح فيها الاطباء..

في انواع رجيم ما تسوي شي ومع هذا ما نخاف منها..
اشلون اذا كان رجيم مثل هذا؟؟؟

لا تخافين ما يزيد الوزن واقري المكتوب عدل حتى تقتنعين... مو معقوله بعد كل هذا التفسير تكون قلقله يا عزيزتي

والمايونيز والكتشب ممنوع طبعا...


حبيبتي الغاليه ريتاج تطمني يا عيوني مو اول ناس احنا راح انجربه صدقيني لو تمعنتي شويه بكلام الدكتور وتفسيره راح تقتنعين لان عملية الغذاء تسير وفق منظوم ودوره متكامله اهوا فسرها لنا وفسر اشلون تعمل هذي الدوره اثناء الهضم وشنو يترتب على انواع الاطعمه.. اقريها عدل... وحطي في بالج ان اللي يزيد الوزن النشويات والسكريات..


صدقيني انا تأكدت من هالشي تدرين اشلون؟؟؟؟؟

لان انا اكثر من مره اسوي رجيم وبيني وبينج ما ينزل وزني واذا نزل ينزل بطييييييييء او ما ينذكر اصلا...
والحين انا اسوي الرجيم الكيميائي...
بس احس دايما اني محتاجه لشي حلو او سكريات مثل الكاكاو سبحان الله شعور من غير ما اقصد يعني... وهذا الشي اللي فسره الدكتور ان الجسم اذا نقص شي من اللي يحتاجه يلجأ على طول الي السكريات واللي اهيا ضاره للجسم...

عشان جذي احسن شي الدهون لانها اول شي تعطي طاقه وثاني شي تذوب حتى اثناء النوم..
جذي ضربتي عصفورين بحجر...

تطمني يا عيوني واهم شي اذا حبيتي تبدين التزمي بالمسموح واذا في صنف مو مذكور لا تاخذينه عشان لا يكون مشكوك فيه يعني اخذي كل شي الا الممنوع التزمي فيه..

بالنسبه للخضر كلها مفيده ومسموح فيها اي نوع منها...

والمايونيز معروف انه يسمن فا اكيد ممنوع

الجبن اي نوع وبأي كميه مسموح فيها بس من غير خبز طبعا...

وعلى فكره الوجبات انتي تسوينها لا تنطرين احد عشان لا تلتزمين والدكتور يقول هذا مو رجيم هذا نظام فقط يعني انتي تعدين وجباتج عشان لا تملين... بس انه يكون من ضمن المسومح والممنوع فقط...

وعلى فكره الدكتور يقول ان اكبر غلط ان ناخذ الحليب او الجبن قليل الدسم لان هذا الكلام غير صحيح...

يعني اخذي اي نوع من الجبن وبأي كميه...

انا احاول اييبلكم نظام معين او معلومات اكثر من ذجي من المدرسه اللي مع خالتي...

وعلى فكره فراولايه النظام هذا تقول خالتي ان نزل المدرسه من اسبوعين بس يعني اللي اين عليها نزل وزنها تقريبا 15 كيلو من شكلها طبعا بس ما تدري بالضبط....

يعني تخيلو وحده بدينه صارت رشيقه... شنو تتوقعون شكلها..؟؟؟

اكيد من غير ما تعرفون اشكثر نزل الوزن تستنتجون من هذا النظام انه نافع بالفعل...

وكل جسم وطبيعته يمكن تنزلين اكثر من 15 كيلو بس وحده ثانيه تنزل 15 او اقل شويه...


ما يضر لو جربتوه لفتره .. احنا ياما جربنا انواع رجيم واغلها مو نافعه...

عشان جذي انا بجربه بالاضافه اللي الكلام اللي شفته والمعلومات اللي جمعتها عنه...
راح اجرب واعطيه فرصه ومو خسرانه شي لو جربته...


واي سؤال اخواتي بالخدمه

[bosy98]

تسلمى مس بيوتى

لكن أنا كنت عايزة أعرف لوسمحتى .. ممكن اكل أى كمية من المسموحات؟

[مس بيوتي]

بعد قلبي اليس مشكوره على دعمج الدايم حبيبتي انتي...
وانا راح ابدا بعد 7 ايام انشالله بس اخلص الرجيم... ونبدا انا معاج انشالله...

تسلمين يا قلبي... احنا بنتظار صدقيتج تكتب لنا وتقولنا عن هذا الرجيم...

bosy98 هلا فيج عيوني..
ممكن تاكلين من المسموحات اي كميه صح ... بس طبعا مو لي درجة التخمه..
يعني يقولون اكلي حتى الشبع بس احنا لا انمصخها ...

اكلي لما تشبعين بس تفرطين بالاكل عشان تشوفين النتيجه الحلوه اللي ترضيج ..



ريتاج حبوبتي انشالله تطمن قلبج الحين واقتنعتي يا عيوني ..
تطمني يا قلبي وشدي حيلج وتوكلي على الله وابدي فيه اذا تبين واي شي يخطر على بالج تبين تعرفنيه لا يردج الا اصابعج .. ويالله تحمسي معانا


احيـــــاتي لكم

[ريتاج]

حبيبتى مس بيوتى
ان شاء الله معاكم وعلى رأيك حبوبتى اننا جربنا انظمه كتيره لعل ان شاء الله يكون فيه الخير
لاننا سنكون غير مقيدين وسنأكل ماهو محرم علينا
بالنسبه للمايونيز ليه ممنوع ؟ مكوناته غاليتى لاتحتوى على سكر
اما بالنسبه للكاتشب فلابد السكر فى صنعه وسؤالى عن الجزر لانه به نسبة سكر واخاف ان
ان يعوض الجسم السكريات
تعرفى اختى انا سعيده بهذه الحميه لاننى كنت اسير على انظمه كلها خاليه من اللحوم بأنواعها والنشويات وطبعا جميع انواع الدسم
اختى سؤالى ماذا ان شاء الله بعد فترة النزول هل استطيع ان ارجع للاكل العادى بدون زياده ارجو ممن جرب هذا النظام ان يدلنا ؟؟؟؟؟؟؟
((( متى استطيع ان أشرب الكابتشينو ))) بصراحه هوعندى افضل من الشاى والقهوه
000000غاليتى أليس000 انا فى انتظااااااااااااار رد صديقتك واتمنى ان تكتبى لنا التفاصيل
يعنى الافطار الغداء العشاء بين الوجبات ماذا كانت تشرب غير الماء من سوائل لان الشاى و القهوه بدون سكر يكون أذى للمعده عافانا الرحمن 000 اخواتى سامحونى على كثرة الاسئله
وجزاكم الله عنى كل خير و فرح قلوبكما