تويت
بداية جديدة لحياة جديدة قبل رمضان (العدد محدود)
يا بنات فاضل علي رمضان تقريبا شهرين عشان كده لازم نظبط نفسنا و ننزل شوية حلوين كده قبل رمضان و ده هيدينا دافع نحافظ علي شكلنا الجديد في رمضان و نعيد بألف صحة و رشاقة
عشان كده انا قررت أفتح الموضوع ده لبداية جديدة لحياة جديدة
انا جبت لكم ريجيم سهل و جميل و صحي و يسهل اتباعه و مجرب من قبل ناس نزلوا عليه ما شاء الله كتير
بس أهم حاجة الالتزام
النظام
يحتوي النظام على 6 بنود ده هيبقى اكلك طول اليوم قسميهم بالطريقة اللي تناسبك
البند الاول: الالبان:
كوب ونص لبن خالي الدسم او 2كوب زبادي لايت
البند الثاني:النشويات:
3/4 رغيف بلدي(ماعرفش عنكوا اسمه خبز اسمر ولا ايه)
او 3ملاعق ارز مسلوق(طبعا بمية بس من غير زيت)
او حبة بطاطس مسلوقة
البند الثالث:اللحوم:
ربع دجاجة (من الصدر مسلوقة او مشوية بدون اي سمنة او زيت ومنزوعة الجلد )
او سمكة بلطي في حجم الكف(مشوية طبعا)
اوقطعة لحم بتيلو في حجم الكف مسلوقة او مشوية
او قطعتين جبنة قريش في حجم البيضة(دي للمش عايزة لحمة)
البند الرابع:
بيضة مسلوقة
البند الخامس:الخضراوات:
كمية غير محددة من الاتي:
كرنب -جزر(واحدة فقط) -قرنبيط-خيار-سبانخ-طماطم-خس-كوسة-خرشوف-عصير لمون-فاصوليا خضر-بصل-جرجير
البند السادس:الفاكهة:
ثمرة تفاح متوسطة الحجم او 1 موزة صغيرة او 2 جوافة صغيرة او 1 برتقالة متوسطة او 2 كمثرى صغيرة او 300 جم فراولة او 500 جرام بطيخ او500 جرام شمام او2 خوخة متوسطة او3 يوسفي كبيرة او 3برقوق كبيرة او1 مانجو صغيرة
----------
يتم اختيار صنف واحد من كل بند
يوميا
يعني يا بنات تختاري نوع واحد من كل بند و يبقي ده أكلك طول اليوم بالترتيب اللي يريحك بدون اي الزام بنوع الفطار او الغدا او العشا كلي اللي انتي عايزاه في الوقت اللي انتي عايزاه بس لا تخرجي عن أكل اليوم
ملاحظات:
-يجب شرب كوب ماء دافيء على الريق وقبل النوم
-ممنوع الشرب اثناء الاكل اوقبله او بعده بربع ساعة
-يمكن اضافة الملح والفلفل والبهارات والاعشاب والجيلاتين والبصل والتوم
-يمكن عمل الارز او الخضار على شوربة الدجاج او اللحمة المسلوقة(البند الثالث)
-عند الجوع ممكن اكل جريب فروت اوخضراوات(الموجودة في البند الخامس)
-يمكن شرب الشاي القهوة الليمون عصير جريب فروت عصير طماطم بيبسي او سفن دايت(باي كمية)
-ممنوع استعمال الزيت او السمن
-ممنوع استعمال السكر الطبيعي ويستبدل بسكر منخفض
السعرات
طيب زهقتي و عايزة تغيري من غير ما تبوظي الريجيم؟
ممكن تستبدلي الاكل اللي في البند اللي عايزة تغيريه بأكلة تانية بس لا تخرج سعراتها عن سعرات البند ازاي يعني؟
بند الالبان:100سعر
بند النشويات:من200 ل280
اللحوم:220 سعر
البيض:75
بند الخضراوات:40
بند الفاكهة:من80 ل120
دهون(دي سعرات زايدة بتبقى في الاكل غصب عننا زي اللبن خالي الدسم بيبقى فيه برضو نسبة دهون اللحوم
مابنقدرش نشيل منها الدهون نهائيا):من90ل135 سعر
يعني مثلا لو عايزة أغير البيض
نلاقي بند البيض فيه 75 سعر حراري
يبقي في الحالة دي ممكن أكل اي حاجة سعراتها لا تزيد عن 75 سعر و طبعا نكون حذرين في الدهون و الحلويات جددددددددددددددددددددا
يعني من الاخر النظام ده بيعتمد علي السعرات حوالي من800-1000
سعر حراري في اليوم
و بعد كده فيه نظام تثبيت هأبقي انزله في وقته عشان نحافظ علي وزننا
نيجي بقي لقوانين الاشتراك
أولا العدد محدود يعني عندما يكتمل العدد 15 بنوتة هنقفل باب القبول معانا
ثانيا: يجب الالتزام التام بالريجيم المكتوب هنا حتي نشجع بعضنا و ما تبقاش كل واحدة ماشية علي نظام فنتشتت
ثالثا: الالتزام بتصوير الميزان يوم الجمعة و تنزيله
وممنوع الاعتذار عن الميزان لأي سبب كان
رابعا : الالتزام بالدخول يوميا و كتابة اليوميات و ان استطعتم تصوير وجبة واحدة في اليوم و لكن ذلك ليس اجباريا
خامسا: من لا تكتب ردا لمدة أقصاها أسبوع تخرج من المجموعة تلقائيا
سادسا: لا للفري لمدة شهر عشان عايزين ننزل شوية حلوين قبل رمضان
سابعا: من لا تجد في نفسها الارادة الكافية للالتزام رجاء لا تشترك في هذا الموضوع فهو للجادات فقط
فرجاء لا تضيعي وقتك و وقتنا
ثامنا: الالتزام ب 1/2 ساعة رياضة من أي نوع يوميا مشي او رقص او اي رياضة
تاسعا:سوف نلتزم جميعا بالميزان يوم الجمعة و تنزيل صورة الميزان و الانطلاق السبت باذن الله
وفي خلال اليومين التاليين يبدأ التسجيل
لذا اذا كنتي تجدي في نفسك الهمة و العزيمة بسرعة
سجلي اسمك ووزنك وطولك و الوزن الرغوب
تعليق