$$$ ملف كامل عن شغل الجاكار $$$ "تريكو وبس"

**mistry** · 17-09-2010, 11:06 AM

مقدمة

بداية شغل الجاكار من الحاجات الجميلة المبهرة اللى اعتقد ان التريكو بيتميز بيها.
والجاكار هو الشغل بالالوان
وعادة هو بيستخدم أكتر فى هدوم البيبهات والاطفال الصغيرين
وبرضه الكبار لهم نصيب مش قليل

أنا شخصياً بأعشق شغل الجاكار. ولفترة طويلة جداً كان كل شغلى فى التريكو حاجات جاكار ونادر لما كنت بأشتغل حاجة فيها غرز

ان شاء الله فى مرة أبقى أنزل لكم صور لبعض الحاجات اللى أنا عملتها جاكار.
طيب يبقى احنا عرفنا هنا اننا بنشتغل بأكتر من لون واحد ممكن يكونوا لونين او أكتر حسب الرسمة نفسها

الغرزة المستخدمة فى الشغل هى غرزة الجيرسيه
اللى هى عبارة عن سطر بالكامل عدل (وجه / أمام الشغل)
والسطر التانى كله مقلوب (ظهر/ خلف الشغل)
وهكذا
نادر جدا لما نلاقى جاكار مع غرز

الجاكار بيكون عبارة عن رسمة إما بتغطى المساحة كلها بتاعة الشغل زى دى

أو بتكون فى النص مثلاً أو على جنب
زى دى

وممكن كمان تكون وحدات متوزعة بشكل معين فى المساحة كلها زى كدة

**mistry** · 17-09-2010, 11:08 AM

عفواً

حبيباتى أرجو الانتظار وعدم كتابة تعليقات حتى أنتهى من عرض الموضوع بالكامل
لاكتمال الفائدة بإذن الله

مشكورين

**mistry** · 17-09-2010, 11:24 AM

عموماً أهم حاجة عندنا هى الرسمة. وازاى هنوزعها على الشغل لو هى مش مغطية الشغل كله.

الرسمة اللى هى أحيانا بيسموها "الموتيف" فى كتب التريكو أو حتى المجلات.
بتكون عبارة عن مربعات زى الشبكة والرسمة متوزعة عليها
كل مربع من المربعات دى بيمثل غرزة فى السطر الواحد.
وطبعاً كل صف من المربعات عبارة عن سطر واحد فى الشغل
طيب خلينا بأة كدة نوضح بصورة أحسن
عشان يكون الكلام عملى

يعنى مثلا الموتيف ده عبارة عن 13 غرزة (عرض الرسمة) والطول 18 سطر.

طيب ازاى بأة هنشتغل
تابعوا معايا

**mistry** · 17-09-2010, 11:27 AM

بسم الله نوضح كيفية قراءة الموتيف

على بركة الله
نسمى الله ونبدأ نشوف هنقرأ الموتيف ازاى

قراءة بترون (موتيف) الجاكار:

أول حاجة مهمة لازم ناخد بالنا منها
ان الأسطر الفردية بنقراها من اليمين إلى الشمال.
أما الأسطر الزوجية بنقراها من الشمال إلى اليمين.

ولما نرجع للموتيف بتاعنا هنلاقى الرسمة بتبدأ من السطر الرابع
وبما ان السطر الرابع ده زوجى
(يعنى نقراه من الشمال إلى اليمين)

فهيكون السطر كالتالى:
6 غرز باللون الأساسى – 6 غرز باللون الثانى – 1 غرزة باللون الأساسى.

السطر الخامس:
(هنبدأ عادى من لليمين للشمال) فيكون السطر:
3 غرز باللون الأساسى – 1 غرزة باللون الثانى – 1 غرزة باللون الأساسى – 1 غرزة باللون الثانى – 7 غرزة باللون الأساسى

وهكذا

**حبيبه أمها** · 17-09-2010, 11:31 AM

موضوع مهم اووووووووووووى ميسترى

وحيفيد بنات كتير ان شاء الله

وخصوصا ان شرحك جميل وواضح

بصراحه بيعجبنى اسلوبك البسيط

فى انتظار تكمله الموضوع

**shoshw** · 17-09-2010, 11:36 AM

طبعا موضوع مفيد جدا مدام من ميسترى ربنا يخليها

**mistry** · 17-09-2010, 11:54 AM

ادخال الألوان:

نيجى بأة للحاجة المهمة فى شغل الجاكار وهى ازاى ندخل اللون بشكل جميل وبحرفية

عادة اللى بيشتغل جاكار (وخصوصاً فى البدايات) لما ييجى يدخل لون تانى ييجى عند الغرزة اللى فيها تغيير اللون ويمسك الفتلتين (اللونين) مع بعض ويشتغل الغرزة
بس الطريقة دى فيها عيبين بيشوهوا الشغل وبيخلوا شكله مش حلو أبدا
أول حاجة ان بتبقى الغرزة فيها اللونين وده بيشوه الرسمة نفسها
تانى حاجة وهى الأخطر ان الشغل من الظهر بيكون كله خيوط متسابة بالعرض كدة
وده بيعمل مشاكل فى الغسيل وكمان بيضايق فى اللبس وخصوصا اذا كان الواحد لابس خواتم مثلا
ولو طفل ممكن الخيوط دى وخصوصاً لو كانت مساحتها كبيرة تضايقه جامد
الأفضل انى أسيبكم مع مجموعة صور تبين الطريقة دى
عشان يكون الكلام أوضح

(على فكرة الصور بترتيب الخطوات)

ملاحظين تعدية الخيط بالعرض ازاى

شايفين الشغل فاصل ازاى بين اللونين

وأخيراً شوفوا المنظر بايخ إزاى

بصراحة ما قدرتش أكمل
حاجة بشعة للغاية
وواضح جدا ان الرسمة معالمها مش واضحة
وكمان شكل ظهر الشغل وحش أوى وكل الخيوط دى بالعرض
تخيلوا بأة لو مساحة كبيرة (عدد كبير من الغرز) والشغل بأكثر من لونين
كان هيبقى الوضع شكله إزاى

**mistry** · 17-09-2010, 12:09 PM

طيب إيه ؟؟؟؟ !!!
زمانكم بتقولوا رونا مالها
هى بتعلمنا ايه بالضبط

اصبروا يا حلوات ان الله مع الصابرين

طيب اذا كان الصور اللى فاتت دى مش حلوة والشغل بيطلع مش مضبوط وممكن يكون مكلكع والخيط ممكن يشد ومشاكل كتير

الشكل المقبول ممكن يكون ازاى
تعالوا كدة نشوف

ايه رأيكم فى الصورة اللطيفة دى

فيونكة لذيذة مش كدة

طيب وايه رأيكم فى شكلها كدة متناسق والألوان واضحة وباين حدود الفيونكة ومافيش تداخل فى الألوان صح

طيب وايه رأيكم فى الصورة دى كمان

شايفين الظهر يتاعه نضيف ازاى

هو ده بالضبط اللى عايزين نتعلمه

نفصل شوية عشان تستوعبوا

ماشى

أقوم أصلى الضحى وأرجع لكم

**السيدة فاطمة** · 17-09-2010, 12:57 PM

ربنا يخليكي ليه ولكل إلي يحبوكي
ماشاء الله عليكي وعلى شرحك إلي احلى من الحلو في الدنيا كلها

صرت انط من الوناسة

**mistry** · 17-09-2010, 01:02 PM

المشاركة الأصلية بواسطة السيدة فاطمة

ربنا يخليكي ليه ولكل إلي يحبوكي
ماشاء الله عليكي وعلى شرحك إلي احلى من الحلو في الدنيا كلها

صرت انط من الوناسة

يا عمرى ربنا يسعد أيامك
زى ما بتسعدينى كدة
والله كتير عليا خالص كل الحفاوة دى يا فاطمة
ربنا يديم المعروف

**ميس فلة** · 17-09-2010, 01:12 PM

جميل جدا الموضوع مع انى مش بشتغل تريكو بس واضح انك عملتى فيه جهد غير عادى بانتظار الباقى يا قمر
وشكرا على تعبك

**mistry** · 17-09-2010, 01:49 PM

المشاركة الأصلية بواسطة aml mabrouk

جميل جدا الموضوع مع انى مش بشتغل تريكو بس واضح انك عملتى فيه جهد غير عادى بانتظار الباقى يا قمر
وشكرا على تعبك

أهلا بيكى يا أمل
دايما بتنورى مواضيعى بردودك الجميلة

نفسى كدة فى مرة التريكو يستهويكى وتقررى تتعلمى
وساعتها عيونى ليكى يا ست الكل
بارك الله فيكى

**أم لؤي3** · 17-09-2010, 02:06 PM

الف شكر لك واتمنالك الخبر والسعاده مثل ما عم تسعدي الاخرين

**mistry** · 17-09-2010, 02:29 PM

المشاركة الأصلية بواسطة قمر 30

الف شكر لك واتمنالك الخبر والسعاده مثل ما عم تسعدي الاخرين

ولك مثل ما تمنيتى لى وأكثر ان شاء الله
ربنا يسعدنا جميعا