اسمعوا سالفتي

[*نورا*]

السلام عليكم
اسمعوا سالفتي
تعرفون شغل السنار اللي تعلمناه بالابتدائي اللي هو التريكو من تخرجنا من الابتدائي وانا ماشفت السنار واشوف مره صوف تداخل الوانه اعجبني واشتريته وصلحت شال بالغرزه العدله الى هنا تمام نجي للمشكله
اني ماعرف اختم الغرزه معلوماتي ان الختم يشبه غرزه المقلوبه لكن كل ماسويها افشل تطلع غرزه مش ختم وش الفرق بين الختم والغرزه المقلوبه ارجو من اللي عندها فكره تفيدني لان لو ماعرفت كل شغلي لمده شهر يبي يروح

[نورلينة]

هلا يانورا

انا مثلك اعرف أشتغل بالسنارة واذا ماباقي إلا غرزة الختم ....سلمتها لماما عشان تختمها

لأني ماأعرف أختمها

أسفه ماأقدر أفيدك

[- asma -]

هلا نوار

ان شاء الله البنات يفيدوك
تراني ميــــــــح في السنارة والصوف



وينك يا كشتبانة

[loleta]

انا امبارح حطيت رد وماشفته اليوم ... ختم السناره مثل شغلها انتي الحين لما تشتغلين المقلوبه تدخلين السناره اليمنى في اول حلقة من السنارة اليسرى ...بشكل مقلوب وتلفي الخيط .....الختمه نفس الشي بس لاتاخذين اول غرزه لا خذي اول غرزتين يعني كل حلقتين سواء واشتغلي عادي ...اذا مافهمتي على شرحي احاول ارسملك في الرد الجاي

[إيمان علي]

وأنا مثلك، من زماااااااااان ما عملت شيء بالسنارة، ولكن أذكر أن أمي كانت تبدأ لي وتختم لي، ومثل ما ذكر لوليتا، البداية والنهاية نفس الشيء!

[*نورا*]

نور
صدى
ايمان علي
كلكم مشرفات وماتعرفون اهي اهي
لا عاد امزح معكم شكرا لمروركن وجبر خاطر الضعيفه اختكن

المنقذ لوليتا الله يجزاكي خير خليكي معي خطوه خطوه ترى مره محتاسه
انتي قلتي الفرق بين المقلوبه والختم اني في الختم اخذ كل غرزتين سوى صح
طيب بعد مااخذ عرزتين اشتغل عليهم عادي يعني الف علهم الخيط وطلعهم ويدخلوا في السناره الثانيه والا كيف

[loleta]

خليكي معاي لما تشتغلين المقلوبه عند الختمه خذي غرزتين من السنارة الشمال وحطيهم باليمين واشتغلي عادي
1 / ادخلي السناره اليمنى في غرزتين من الشمال
2 / اعدلي السنارات ولفي الخيط عليها واشتغليها مثل المقلوبه
3/ وارجعي ارمي الغرزتين وهكذا مايبقى طول فتره الختمه الاحلقه واحده في السنارة اليمنى تستخدم لعقد الخيط في الاخير .
اعتقد ان شرحي مو واضح بس اوعدك اشتغل الليله عينه صغيره واصور لك مراحل العمل

[loleta]

شوفي يانورا عملت لك عينه صغيرة وصورتها مثل ماواعدتك وان شاء الله يوضح شرحي ...
1/السناره اللي فيها شغل علي يدك الشمال والفاضية عللى اليمين
2/ ادخلي السناره اليمنى في غرزتين من السنارة الشمال بشكل غرزه مقلوبه
3/ الحين اعدلي السنارة
4 / لفي خيط الصوف داير مايدور على السنارةمن اليمين الى الشمال وادخليها بين السنارتين
5 / الحين اشتغلي عادي مقلوبه
بتلاقين نفسك تشتغلين مقلوبه عادي بس مافي غرز تنتقل الى السناره اليمنى
بس احسن حاجة تتدربين على قطعة صغيره خارجية عشان تعبك مايضيع

[loleta]

نورااااااااااااااااااااااااااااا
انتظري ...لا تسوين شي من اللي قلته لك .......في حاجه غلط ... والله اني خجلانه منك ...بس وعد مني اعيد لك العمل 100 %

[*نورا*]

اختي الكريمه لوليتا
الله يجزاكي عني خير الجزاء
اللهم فرج كربها واعطها من خيري الدنيا والاخره
والله اني خجلانه منك حيل تعبتك معي اللهم اجعله في ميزان حسناتك
شوفي يالغاليه ماقدر اعد لك كم مره صلحتها بس قلت ماراح ارد واقول ماعرفت لحد مااحاول كل جهد بس فشلت محاولاتي وجيت للمنتدى بقول اني فشلت يوم شفت ردك واستانس الحمدلله يعني فيه امل الحمدلله ثم الشكر لمجهودك معي وياليت يكون كلام بدون صور علشان مااجهدك معي واذا ماوصل الشرح استفسر منك

[loleta]

رجعت لك اختي نوره واتمنى اني ماتاخرت عليك لاني عملت العمل كذا مره عشان اتاكد من الطريقة ومااتسرع مثل المره السابقة
تابعي معاي الخطوات :
1/ اشتغلي غرزتين مقلوبه عادي كل وحده بروحها وانتي تشوفين السناره اليمين فيها غرزتين مقلوبه واليسار باقي الغرز اللي مابعد اشتغل فيهم .
2/ لا حظي الصوره ادخلت السناره الشمال في الغرزه الاولى اللي تحت من السناره اليمين بشكل غرزه مقلوبه يعني دخلت السناره من الاعلى للاسفل .
3/ الحين احاول اسحب الغرزه بالسناره كاني اسحب الغرزه رقم 1 الى السناره الشمال متجاوزه الغرزه رقم 2 ...ركزي في الصوره .
4 / الحين الغرزه رقم 1 انتقلت الى السناره الشمال وباقي غرزه في السناره اليمين ...
5 / الحين الغرزه اللي نقلتيها للشمال ارميها ...يعني اسحبيها الى ان تطلع من السناره كانك تفلتينها ..
6/ الحين بقت عندك غرزه واحده في اليمين وغرزه مفلوته طولت المسافه بين الغسنارتين وباقي الغرز في السناره اليمين
7 / الحين اشتغلي غرزه واحده مقلوبه وكرري العمل من الاول ... ومستمره معاك بالشرح ..حتى تنتهين من القطعة اللي تشتغلينها .......لان عيني عليها ...

[*نورا*]

الحمدلله
واااااااااااااااااااااااااو ماصدق نجحت نجحت نجحت
بفضل الله ثم بفضلك اختي لوليتا الله يسعدكي وعد مني لادعي لكي مثل مافرجتي عني

تصدقين وانا اجرب الختم كانه شي في ذاكرتي استيقظ من ابتدائي والله بدري ذاكرتي

وبالنسبه لانك حاطه العين عين عليها والله ماتغلى عليكي مقدمه

وانتي لو تسمعين سالفتها نكته
اعجبني صوف وتداخل الوانه واشتريته كذا بدون ماافكر اصلح فيه شي ويخطر على بالي اصلح شال لزوجي ويشوفني اصلح بهاالصوف ويسألني ماشالله تعرفين قلت له ايه وهذا شال لك ومن يومها وهو كل يوم ها خلص الشال حقي ترى الشتاء جا وانتي ماخلصتيه وصار متحمس ويوم قربت اخلص قلت خليني اشوف انا اتذكر لختمه والا ناسيته طلعت ماعندي سالفه وضاق خلقي لكن الحين فرجت احمدك يارب ....
<<<<<<<<قصت قصه حياته

[- asma -]

مبروك نورا



عم استنى هديتي

[loleta]

هذا انا اناقز من الفرحه لان لو مافهمتي علي ...بتحطم لاني مدرسه ولازم اعرف اشرح ولا ..البنات يروحون فيها ....
نورا لو سمحتي ......واحد بطانيه وثنين شراب للشتاء واللون على ذوقك