ممكن مساعده سريعه وعاجله من اى حد عنده فريزر

[ام بيدو2007]

معرفش أذا هنا مكان الموضوع او لا .لكن حماتى ربنا يهديها عايزه تجبلى هديه فريزر .ورحت اشوف معاها لاقيت اشكال كتيييييييييييييييييييره وشركات كتير محلى ومستورد. والمشكله انى معرفش اى نوع افضل او ماركه اواللى بباب واحد او الادراج واحترت واحتار دليلى ..
السؤال اللى عندها فريزر او تعرف حاجه معينه او الافضل مع العلم ان المساحه عندى صغيره ومش عايزاه يسحب كهربا كتير وبكام واشتري من الوكيل افضل او المصنع .
معلش طولت عليكم بس من فرحتى بالفريزر اللى لسه مجاش .

[]FoOoShIa[]

آمممم شوفي أختي حنا عندنا ببيتنا فريزر حجمه صغنون مره .. وبعدين احس افضل تجيبني اللي بابه من فوق

لأنك تقولين ماتبغين ياخذ مساحه .. وجيبيبه صغير لكن طويل يعني عميق ..

وبالنسبه للشركات ماعرف والله يمكن حبيباتنا يساعدونك ..

واتوقع اي شركه ماراح تضر والله يبراك لك فيه يارب

[yomizo]

افضل الانواع اللى يكون لها ادراج
لان اللى بفتحه من فوق لما تخزنى بيه الاشياء ممكن ان يلقطوا روايحهم من بعض لكن لما يكونوا مصنفين كل في درج يكون افضل وبتلاقي منهم احجام كتير يعنى موجود عند اختى الصغير فيه اربع او خمس ادراج وكتير حلو ولا واخد اى مكان
وفي عندنا في البيت عند ماما الكبير في حجم البراد ( التلاجه ) وبرده بادراج افضل كتير من اللى كله على بعضه
لانه بجد بيلقط روايح الاكل من بعضه وكله سايح على بعضه وتقعدى تدوري فيه على اللى انت عاوزاه لما تتجمدى
موجود عند حماتى ومش طايقاه

والمستورد طبعا احسن من المحلى لانه بيكون له صيانه وضمان وموثوق فيه
اهم حاجه انه يكون نو فروست( نو فروزين )
يعنى مابيعملش تلج وده مش هتلاقيه الا في المستورد

[farah111]

اختى الغالية
طبعا الادراج احسن كثير ..لان الثانى ال بباب واحد مشكلة لما تحبى تجيبى اى حاجة من اخر تضطرى تتطلعى كل شئ علشان تجيبيها. و الادراج اكثر سهولة و ترتيب

بالتوفيق

[ام بيدو2007]

FoOoShIaاختى
جزاكى الله خيرا على اهتمامك وشكرا على ردك
للاخت فرح وyumizoعندكم اى فكره عن المستورد يعنى الاسعار او ممكن ادور فين يكون ثقه فى القاهره لان فى محلات بتبدل قطع الغيار الجديد وتحط مكانها مستعمل ويعمل خصم بسيط حصلت معايا وانا بشترى الغساله وباظت من اول يوم وياريت يعنى لو ارخم كمان حبه واقول قريب من مدينه نصر .هههههههه
لا انا موافقه أى حته فى القاهره وجزاكى الله خيرا

[farah111]

بصى ياجميل عارفة وانت رايحه من مدينة نصر الى مصر الجديدة بتدخلى شارع النزهة قبل الكوبرى فيه معرض اعتقد اسمه الامل هو محل معروف و محترم وفيه ماركات كثير اختى جهزت من عنده
بالتوفيق

[قطايف]

أفضل نوع للفريزر هو اللي جاي مثل الثلاجة ( بالطول)وحجمه مناسب جدا للمساحات الصغيرة ولاياخذ حيز وجدااا عملي

[farah111]

اختى الغالية

ماركة whirlpool رخيص ومريح

من المعرض الـ فى شارع النزهة

والاهم ان عندهم صيانة

[ام بيدو2007]

شكرااااااااااا
انا لسه اول مره اشارك بمنتدى . لكن حسيت بروح الاخوه هنا .جزاكم الله خيرا وربنا ميحرمكوش من بعض وشكرا على اهتمامكم.هاروح ان شاء الله بس بعد مانتهى من عمليه بنتى ادعولها بالشفاء العاجل ........

[el-haboba]

شكرااااااااااا
انا لسه اول مره اشارك بمنتدى . لكن حسيت بروح الاخوه هنا .جزاكم الله خيرا وربنا ميحرمكوش من بعض وشكرا على اهتمامكم.هاروح ان شاء الله بس بعد مانتهى من عمليه بنتى ادعولها بالشفاء العاجل ........

اهلا وسهلا بيكى ...وان شاء الله تسعدى بصحبتنا جميعا فى احلى وارقى منتدى ....
وانا كمان مع راى الاخوات ان اللى بادرا ج راسية احسن وافضل حتى وان كان اغلى

حماتى عندها واحد زى الخاص بالسوبر ماركت وبنجيب منه الايس كريم (عميق )
مش بتعرف تنظفه ولازم تقف على كرسى عشان توصل لاعماق البحار (قصدى اعماق الدييب فريزر )
وكمان الروايح على بعضها توم على بسطرمة على فراخ بانيه متبلة ....
من الاخر هاتى الراسى وانتى مغمضة بالنسبة للماركة مش هقدر افيدك وان شاء الله الاخوات يفيدوكى
سلامة بنوتك ,,,وان شاء الله يتم شفائها على خير
تقبلى مرورى ورغييييييييييي

[خيرزاد]

اولا الله يشفى بنوتك
احسن حاجه زى ما الاخوات قالولك اللى فيه ادراج وفى منه لحد3 ادراج يعنى مش هياخد مساحه واعتقد والله اعلم ان ماركه الاسكا افضل حاجه وفى الاسئله الافاده ان شاء الله

[FOFFA]

شوفي عند بي -تك..أو كارفور..
الأفضل المصنوع في مصر..علشان تضمني الصيانة
أنا جبت أجهزة مستوردة ...ولما احتاجت لصيانة
مالقتش التوكيل ..قفل وساب مصر كلها
وزي ماقالوا الأخوات الرأسي أفضل
مبروك مقدما ..وربنا يجازي حماتك كل خير ويديم المحبة بينك وبينها

[ام بيدو2007]

جزاكم الله خيرا وشكرا لكل اللى ردوا عليا .
وشكرا لدعواتكم لياسمين بنتى ياريت متنسوهاش بدعائكم ربنا يعجل بشفائها جزاكم الله الجنه .

[أم سعاد]

احسن فريزر الطويل اللي بادراج هو رائع لان كل درج سوف يكون مستقل مثلا درج للحوم واخر للخضروات واخر للفواكه انا عندي ده بس للاسف ماركته مش حلوه لانه بيعمل ثلج وهو الاسكا

[ام بيدو2007]

جزاكى الله خيرا اختى ام سعاد انا فعلا رحت سالت فى المعرض وقالى ان كريازى احسن بس اغلى كتير تقريبا 900جنيه الله المستعان