الى الاخوات الليبيات

[marta23]

انا راجعة الي ليبيا قريبا لاستقر في بيتي الجديد ان شاء الله بس مش عارفة مكان مضمون اشتري منه اثاث البيت بالاخص غرف النوم والالات الكهربائية لان بقولوا كله صناعة صينية وبسرعة يتكسر ياريت تنصحوني ببعض الاماكن المضمونة

[شذىالعطور]

اهلا بكِ اختى

ان شاء الله الاخوات فى ليبيا يقدمن لكِ الافادة

[زنوبيا مصطفي]

اهلا وسهلا بيك اختي العزيزه في ليبيا وان شاء الله توصلي بالسلامه
عندنا في ليبيا اثاث رائع وكيف ما تبي وعلى فلوسك اثاث تركي وايطالي وصيني ومصري وليبي وامريكي
ودرجات وكذلك الفرش السجاد اشكال والاوان ولكن قوليلي انتي من وين في ليبيا

[marta23]

شكرا لك اختي شدي العطور علي هذا الترحيب وجزاك الله خيرا علي هذا المجهود

مرحبا اختي زنوبيا شكرا علي ردك انا مقيمة في مدينة الخمس يعني نقدر نشري الاثاث من طرابلس او مصراتة
ياريت لو تقدري تعطيني اسماء معارض معروفة وشنو برأيك بالنسبة لغرف اولاد اشتريها جاهزة او افصلها في ورشة
وشكرا لك علي المساعدة

[ورده في البستان]

بسم الله الرحمن الرحيم
الحمد لله واللهم صلي وسلم وبارك على محمد رسول الله وعلى أله وصحبه أجمعين
وعليكم السلام ورحمة الله وبركاته
جزاك الله خير
إن شاء الله الاخوات يفيدوك

[زنوبيا مصطفي]

اهلا بك اختي من الخمس انا من بنغازي للاسف ما اقدر اساعدك
عموما الاثاث موجد ومتوفر وبالنسبه لغرف الاطفال الافظل الجاهز تشكيلات روعه
وصاحب المحل يرشدك للصناعه الافظل والجوده الاحسن

[79nana]

اختي الغالي اهلا وسهلا في بلادنا الحلوة ويارب يسعدك ويهنيك يارب شوفي اني ليا تلاتة سنين في امركيا ولاكن انقولك لو تبي حد يفصل اتات وجلسات نازكة وراقية ومتينة امانة امانة عليا راجل امين ومقوم الصراحة وبضاعته رووووووووعة ودقوه حلو هو في طرابلس ونسباتنا يديرو في جلسات روعة واتات لو تبي نعطيك رقم تلفونة اني حاضرة غير قوليلي واني نبعتهولك علي الخاص

تحياتي

[marta23]

آلسلام عليكم
اختي وردة في البستان شكرا لك
اختي زنوبيا يارت كنتي قريبة بس طمنتيني ورح اخذ نصيحتك بالنسبة للغرف الاطفال وشكرا علي اهتمامك بموضوعي
نانا 79 يا ريت تعطنى اسماء المعارض لقلتي عليها ومكانها في طرابلس ومعلش بنسالك بما انك ما ليكش هلبة بعيدةعلي البلاد برآيك من وين تنصحيني نشري الالات الكهربائية بما فيها الغسالة والثلاجة بصراحة ملخبطة مش عارفة حاجةياريتكم تعطونى معلومات تعروفها علي الاثاث وشكرا لكم علي اهتمامكم

[shantal]

اهلين اختي ومرحبتين بيك وان شاء الله توصلي بالسلامة

بالنسبة للاثاث فيه معارض كثيرة في سوق جامع الصقع بطرابلس وكذلك فيه معارض في قرقارش وقرجي وبالنسبة للمطابخ فيه معرض في زاوية الدهماني قريب من المركز الثقافي المصري بس نسيت اسمه فيه أثاث ومطابخ خيالية وعلى فكرة تقدري تاخدي جاهز او تعطيهم المقاسات وتشوفي التصميم المبدئي بواسطة الكمبيوتر اما الورشة فهي في مالطا وشغلهم راقي جدا

وبالنسبة للاجهزة الكهربائية تجديها في سوق الثلاثاءالجديد وسوق المهاري ومعارض وكلاء LG منتشرة في اكثر من مكان بطرابلس كما انه فيه وكلاء لماركات اخرى اما السجاد فسوق جامع الصقع الجديد بلا منازع فيه كل ما تتخيلي

لي عودة ان شاء الله ونجيبلك معاي اسماء اماكن محددة في طرابلس حتى تمشيلها مباشرة لانها لا تحضرني الان

وربي يوفقك ويرجعكم بالسلامة يارب

[noony suger]

مرحبتين فيك اختى البضائع الموجودة فى طرابلس روعة و طبعا كل حاجة بسعرها الحمدلله على رجعتك سالمة

[marta23]

اختي شانتال شكرا لك علي كل هذه المعلومات بصراحة ساعدتيني هلبة ونراجي فيك بيش تجيبي لي اسماء محددة وان شاء مانتقلش عليك بس ردودكم علي طمنتني
اختي نوني شكرا لك والله يسلمك

[79nana]

آلسلام عليكم
اختي وردة في البستان شكرا لك
اختي زنوبيا يارت كنتي قريبة بس طمنتيني ورح اخذ نصيحتك بالنسبة للغرف الاطفال وشكرا علي اهتمامك بموضوعي
نانا 79 يا ريت تعطنى اسماء المعارض لقلتي عليها ومكانها في طرابلس ومعلش بنسالك بما انك ما ليكش هلبة بعيدةعلي البلاد برآيك من وين تنصحيني نشري الالات الكهربائية بما فيها الغسالة والثلاجة بصراحة ملخبطة مش عارفة حاجةياريتكم تعطونى معلومات تعروفها علي الاثاث وشكرا لكم علي اهتمامكم

ان شاء الله حنسال اماليا في طرابلس وبادن الله حنقولك كان في اي مكان كويس يشرو منه استنيني
وهادم ارقام الي يديرو في الجلسات والاتات ولاكن والله نسيت وين هما بالضبط ولاكن مجرد ما تتصلي بيهم حيكلموك ويقولولك كيف برنامجهم

عمي كمال وهدا رقمه 0925247455

وهدا ولده محمد 0926584171
وربي يوفقك بادن الله

[قطرةمن مطرة]

السلام عليكى أختى مارتا32بالنسبه للأثاث فى ليبيا زى ما حكت احدى الأخوات انه فيه جميع الماركات ولكن من خلال تجربتى الشخصيه لم أجد أحسن من منطقة ((قرقارش)) فى بيع الأثاث فهو يفى بجميع أغراض المنزل من الكهربائيه الى الفرش والسجاد والمكاتب والصالونات العربية والأجنبيه وجميع ماركاته عالمية ذات جودة عاليه . أتمنى لكى التوفيق

[ابريكه]

اوخيتي ربي يرجعك سالمة غانمة
كل كلام البنات مزبوط
قرقارش معروفة بالتميز
وجامع الصقع خلية بروحة
واني من سبها لكن نشري من هالاماكن لما جهزت بيتي الجديد
وان شاء الله تحصلي اللي خاطرك فيه
واتهني فية