تويت
نجاح الحقن المجهري بعد فشل 8 محاولات ঔღঔ تجربة متميزة ঔღঔ
السلام عليكم ورحمة الله وبركاته
قصة حياتي لوجة الله تعالى
انا هدخل في الموضوع علطول في بنات كتييير من ملف الحقن المجهري يعرفوني بس انا بقالي فترة كبيرة مش بدخل خالص بسبب اني نفسيتي كانت تعبانه جدا ومكنتش عايزة ابقي مصدر تشائم لأي حاله مشابهه ليا ففضلت البعد بس كنت بطمن علي كل واحده فيكو من حين الي أخر
المهم انا هحكلكو قصتي من البداية علشان اللي ميعرفنيش كويس وعلشان ابقي مصدر تفائل وأمل لناس كتييير اوي فشلت معاهم عمليه الحقن المجهري اكتر من مرة .
انا متزوجة من حوالي اربع سنين واعاني من الاندومتريوزس وزوجي عنده ضعف في العدد والحركة يعني من اخر ملناش غير الحقن المجهري الا اذا اراد ربي شيئا.
المحاولة الأولي ( مركز فارس )
المهم اول عمليه حقن مجهري كانت في يناير 2008 وكان التبويض ممتاز ورجعت 4 اجنة من الدرجة الأولي وكان الدكتور متفائل جدا لأن كل شئ كان مبشر بالخير ، لكن ربي لم يرد لي الحمل والحمد لله
المحالة الثانية
ثاني محاولي كانت أجنة مجمده في مايو 2008 ، لكن الأجنة لم تكن جيده بعد فك التجميد ولا اعرف السبب الي الآن ، المهم لم يحدث الحمل والحمد لله
فقررت ساعتها اني لن اكرر العملية مرة اخري الا بعد ما اعالج الأندومتريوزس ( أكياس الشوكولاته) أولا ، وبعد استشارة اكثر من طبيب قرروا استئصال الأكياس بعمليه جراحية طبعا كنت متردده جدا بس توكلت علي الله وعملتها عند د. عثمان اللي في المعادي ، علشان لو في اي حد بيتابع معاه أحب اقولكم بلاش بلاش بلاش بلاش ارجوكم تروحولو خالص ، طلع دكتور مادي جدا ولا يهمة الا الماده وخلاص ، ولكن ما حدث حدث وحمد الله علي كل شئ
وبعدها لم يعطيني اي حقن لوقف الدورة حتى يمنع رجوع الأكياس مرة اخري ولكن تركني هكذا وبعدها بست شهور عندما ذهبت الي المركز لعمل عملية حقن مجهري مرة اخري اكتشفت رجوع الأكياس وكأني لم افعل اي عمله ولا شئ ، طبعا كنت هتجنن بس قلت خلاص اللي ربنا رايده هيكون
المحاولة الثالثة (يناير 2009 )
التنشيط اصبح سئ للغاية سبب العملية والمبيض بقت استجابته ضعيفة جدا ، والدكتور قرر انه يترك الأجنة لليوم الخامس ليتأكد انها تعيش بعد اليوم الثالث ويزيد فرصة النجاح ، وفعلا رجعت الأجنة في اليوم الخامس وكنت متفائلة جدا ، لكن هرمون الحمل كان موجود ولكن نزل في خلال 3 ايام بعد التحليل الحمل والموضوع خلص والحمد لله
المحاولة الرابعة ( مايو 2009 )
التنشيط ازداد سوء والأجنة كانت سيئة جدا جدا لدرجة اني رجعت جنين واحد فقط ومن الدرجة الثانية ، وطبعا لم تنجح العملية والحمد لله
فقررت ساعتها اني اذهب الي مركز جنين لأني سمعت من بنات كتيير انه كويس اوي وبيكتشف سبب فشل المحاولات ، هوا فعلا مركز ممتاز والدكتور متفتح ومطلع علي كل ما هو جديد وانا كنت مرتاحة معاهم جدا جدا جدا ولكن الرزق من عند الله رب العالمين ليس بالدكتور مهما وصل علمه .
فقام الدكتور بشفت الدم من الأكياس عن طريق المنظار الرحمي واعطاني 3 حقن زولادكس لمدة ثلاث شهور لمنع التبويض والدورة من النزول ثم بدأنا في محاولة الحقن المجهري بعدها
المحاولة الخامسة ( اكتوبر 2009 )
كنت في المحاول دي سعيدة جدا بالملف بتاع مركز جنين بتاع دينا ( أم كرمة)
المهم ان التنشيط كان بشكل مختلف تماما عن المركز الأول والتبويض الحمد لله اتحسن كتييير بس طبعا مش زي ما قبل العملية بس احسن من أخر مرتين ، ولكن برده لم يتم الحمل والحمد لله
المحاولة السادسة ( يناير 2010 )
هذه المحاولة الدكتور غيري التنشيط مرة اخري وفعلا وصلت لترجيع الأجنة في اليوم الخامس وكان الدكتور مبسوط اوي انا تفائلت ، ولكن لم يرد الله ان يتم الحمل والحمد لله بالرغم من ان كل العوامل كانت توحي الخير
المحاولة السابعة ( مارس 2010 )
الدكتور قالي مش عايزين نأجل كتيير علشان الأكياس مترجعش تاني ورجعت في اليوم الخامس مرة اخري وايضا لم يرد ربي ان يحدث حمل والحمد لله
ولكن في هذه المحاولة كان هناك اجنة مجمده فقررت ارجعاها لعل وعسى يكون لي نصيب فيها
المحاولة الثامنة ( مايو 2010 )
كانت هذه المحاولة من اسهل المحاولات علشان مجمد وكانو برده في اليوم الخامس علي فكرة لأن د حسام لا يحب التجميد الا اذا وصلت الأجنة الي اليوم الخامس ولكن لم يحدث حمل ايضا والحمد لله
هناااااا كنت استنفزت كل ما املك من طاقة وقررت عدم عمل اي محاولات اخري خصوصا اني عملت كذا محاولة ورا بعض بدون اي راحة فكنت نفسيا وجسديا وماديا استنفزت تماما فوق ما تتصورو ، واعتقدت ان ربي كتب علي عدم الحمل والخلفة استغفر الله العظيم
المهم بدات اشغل نفسي بحاجات تانية غير الحمل واشتركت في حقط قرآن ودروس دينية و قدر الله لي ان اذهب لأداء فريضة الحج والحمد لله وكانت من اروع الحاجات اللي عملتها وبشكر ربنا عليها جدا جدا
وبعد رجوعي من الحج كنت في حاله نفسيه عاليه جدا ولم افكر ايضا في اي عمليات ولا كنت اريد اي شئ غير ارضاء ربي وكنت سعيده بهذه الحاله والحمد لله الذي هداني لهذا وما كنا لنهتدي لولا ان هداني الله .
وبعد 3 شهور من رجوعي لقيت جوزي بيقولي انه عايز يعمل محاولة جديدة في الوقت اللي انا اريده واكون مستعده نفسيا لهذا ، طبعا انا اتخديت في الأول من فتح هذا الموضوع وارتبكت وبدأت اتوتر وبعدين جوزي قالي انا مش عايز اخرجك من الحاله الكويسة اللي انتي فيها ولكن وقت ما تحسي انك مستعده قوليلي .
طبعا كنت بدأت افكر ولكن بخوف بفكر لمحاولة ارضاء زوجي وانا عارفة انه نفسه في طفل جدا جدا فعملت استخارة كتييير علي اني اعمل العملية تاني ولكن في يوم قررت اني حتى لو هعمل العملية مش عايزة اعملها عن حد عملتها عنده قبل كدة بالرغم ان مركز جنين ممتاز ومريح ولكن لم اكن اريد الذهاب الي هناك انا لغاية دلوقتي مش عارفة ازاي القرار ده انا اخدته ، لأن جوزي مقتنع بدكتور حسام جدا ومكنش مقتنع بتغييرة لأن التبويض معاه بيكون كويس جدا ، ولكن انا حسيت انها الاستخارة اني نفرت من مركز جنين بالرغم اني لغاية هذه اللحطة لم اري تطور في اي مركز مثله .
فكنت في حيرة في اختيار اذهب لمين ، فقررت الذهاب الي د اسماعيل ابو الفتوح وافتكرت كذا واحده من اللي كانو معانا في الملف الحقن عمله عنده وكان بيشكرو فيه برده من دقدوقة واوشي اللي انا فكراهم
المهم عملت استخارة عليه اكتر من مرة وكل ده وانا بتملكني الخوف والقلق طبعا لأني لا اريد اي شئ يعكر عليا صفو الجو اللي انا عايشة فيه بعد الحج .
فذهبنا في فبراير 2011 وقرر الدكتور اني ابدأ من يوم اللي ذهبت فيه ، طبعا اتخديت وحسيت اني هبدأ خلاص انا كنت فاكرة اني لسة فترة وبعدين نبدأ زي ما بيحصل مع د حسام ، ولكن ما حدث اني بدأت فورا ، فقال لي زوجي هذا نتيجة الاستخارة فتوكلت علي الله وبدأت وكانت الأيام تمر بسرعة ولا احس بيها ولا افكر في شئ كل التعلق بالله سبحانه وتعالي
وبعد عملية السحب كان التبويض معقول ولكن لقيتهم بيكلموني تاني يوم من السحب بيقولولي تعالي بكرة علشان ترجيع الأجنة !!!!!!!!
طبعا استغربت انا كدة هعمل الترجيع في اليوم الثاني يعني محصلتش حتى اليوم الثالث فطبعا حسيت ان الأجنة مش كويسة فتوكلت علي الله وقلت انا عملت كل حاجة اقدر عليها وقبل كده رجعت في افضل الأيام وهو اليوم الخامس ولم يحدث شئ فربما الله كان يريد ان يعلمني ان العلم مهما تتطور فعلم الله أعلي وأعلم
فذهبت وانا في حاله عادية جدا يوم الترجيع لا اردد غير الاستغفار وادعو الله ، وتعبت جدا في الترجيع بسبب ضيق عنق الرحم عندي وكانت الأسطره مش عايزة تدخل وده كان بيحصل مع د حسام علشان كدة كنت باخد بنج في الترجيع مع حسام بس المرة دي نسيت خالص اقول لدكتور اسماعيل علي الموضوع ده وقلت عايزة اشوف الأجنة وهيا بتدخل ، المهم تألمت ألم فظيع لا يوصف ولكن كنت استغفر وادعو استغفر وادعو ان ربنا يهون عليا .
وفضلت نايمة في المركز حوالي ساعة ونص وبعدها روحت وكانت بالصدفة في اليوم ده العيله عند زوجي متجمعين علشان عيد الأم واحنا في بيت عيله ومينفعش اني منزلش ، روحت ريحت ساعتين كدة وبعدين نزلت براحة وفضلت قاعده مش بعمل حاجة بس كل اللي كان مقلقني نزول السلم وبعدين بعدها بيومين نزلت برده وهكذا يعني المدة كلها مش نايمة ولا مش بتحرك لأ اول ثلاث ايام فقط مريحة ومش بعمل حاجة خالص ويعدين بدأت اتحرك عادي واطبخ علي خفيف وبنزل السلم براحة سلمة سلمة بس بنزل وبقعد مع الناس عادي .
كنت متوكله علي الله فعلا وحسيت من جوايا ان لو ربنا رايد شئ هيكون اكيد مش السلم او اني اقف خمس دقائق اعمل حاجة هيأثر عليا .
وعدت فترة الاسبوعين بسرعة جدا ولأول مرة محسش بالفترة دي لأني كنت عامله برنامج ماشية عليه من قراءة القرآن وسورة البقرة والرقية والأذكار والاستغفار ، كنت حاسة اني مش عايزة اعمل التحليل وافضل كدة كانت فترة سعيدة جدا بالنسبالي ومتعبتش فيها خالص من التفكير والقلق اللي دايما كان عندي في الفترة دي
المهم جه يوم التحليل ودعيت ربي كتيير انه يرزقني الصبر عند القضاء ويقنعني بما رزقني والاستغفار طبعا .
دخل عليا جوزي وهوا ماسك النتيجة في ايده ومش بيتكلم طبعا انا حسيت ساعتها ان خلاص ربنا مش رايد فقلتله ايه النتيجة ، لقيته بيقولي قدر الله وما شاء فعل ،فأول حاجة قلتهالو طب الحمد لله، وبيديني التحليل ببص فيه فلقيت بوزتيف ساعتها مكنتش فاهمة فببصلو لقيته بيدمع وانا بقولو يعني ايه الكلام ده ، هوا ده بتاعي ولا ايه وطبعا وانا ببكي ومش مصدقة وبقوله ليه بتقولي قدر الله وما شاء فعل ،بيقولي لأنه فعلا قدر الله وما شاء الله مش لازم تتقال بس في الحاجة الوحشة ، طبعا كان بيحاول يشوفني متماسكة ولا لأ مع انه مش واقته خالص الهزار ده
طبعا اعدت اعيد وابكي في نفس الوقت وابص علي التحليل وعلي اسمي واتأكد انه بتاعي مش متلخبتين ولا حاجة وسجدت شكرا لله تعالي علي نعمة عليا
ولغاية دلوقتي انا مش مصدقة بس انا كان عندي ثقة كبيرة في الله وكنت متوكله علي الله في كل حاجة حتى لما كان بيحصل حاجة مش متوقعة مكنتش بزعل اوي وبقول لو ربنا رايد هيكون انا مش فارق معايا اي حاجة
الحمد لله كما ينبغي لجلال وجهك وعظيم سلطانك
الحمد لله كما ينبغي لجلال وجهك وعظيم سلطانك
الحمد لله كما ينبغي لجلال وجهك وعظيم سلطانك
الحمد لله كما ينبغي لجلال وجهك وعظيم سلطانك
الحمد لله كما ينبغي لجلال وجهك وعظيم سلطانك
انا لسة في الأول خالص طبعا ولسة ولا سمعت نبض ولا حاجة فقلت اكتب قصتي علشان ابث التفائل في قلوب كل واحده فيكو وان ربنا ان شاء الله شايل لكل واحده فينا رزقها في اليوم المناسب ليها ،
وعايزة من كل واحده تقري قصتي تدعيلي بثبات حملي وانه يكمل علي خير ويرزقني ربنا الذرية الصالحة يا رب العالمين .
مدونتي مطبخ ام مرمر و ليلو
تعليق