فى بيتنا شرطة...

[um bader]

السلام عليكم و رحمة الله وبركاته و بعد...

كيفكن يا أحلى أمهات وكيف الأولاد معاكم.

طبعا نحن الآن فى عطلة الربيع والأولاد مبسوطين بالبيت و الفيقة المتأخرة والفوضى اللادراسية

ولأنى أنا تعلمت الكثير من الركن بأن أكون أم مرحة ومهتمة بأطفالها عملت جدول لقضاء وقت مفيد و طيب مع الاولاد

فمن ضمن الجدول زيارة أحد أصدقاء الأستاذ بدر وفعلا خططنا و ذهبنا للزيارة,

ولكن المفاجأة التى لم أكن أتوقعها هى أن بدر مسك التيلفون و إتصل على 911

ماعمل شى بكل سهولة أغلق الهاتف من غير أى كلام وأكمل لعبه..

رن التيلفون و إذ بالشرطة على الخط تسأل عن سبب الإتصال؟؟؟؟

حاولنا إقناع الشرطة بأن الولد كان عم بيلعب ودق بالغلط....

مافى نتيجة هدول شرطة مو حيا الله...

قالوا: لازم نجى نشوف الموضوع حققوا مع صاحبة البيت وأخذوا بعض التفاصيل... لبسنا و جهزنا حالنا لأستقبال الضيوف القادمين...

أنا ما تسألوا عن مشاعرى... يعنى كنت فى غاية السعادة و الهنا من تصرفات الشباب الحلويين اللى عندى.

بدأت أنظر فى بدر و إذ على خده علامة زرقاء سألته من شو هالضربة؟

قال بابا خبط الباب بوجهى اليوم الصبح.

قلتله نعم!!!!!!!

كيف؟؟؟

قال كنت بدى إدخل الغرفة فسكر بابا الباب من غير ما ينتبه فضربنى.

مسكته قلت له إذا سألتك الشرطة من شو قول خبطت وجهى بالباب. من غير بابا...ماشى

مسؤولية يا إختى..... شغلة بتخوف.

المهم بعد شى ساعة طرقت الشرطة الباب وتفضل شرطى ضخم و معه شرطية حبوبة.

وسلموا وكانت إبتسامة عريضة على وجوههم

يعنى ماحاولوا يخوفونا أو يرعبونا بدأوا يسألوا عمن إتصل ولم كان الإتصال و ماهى الضرورة من الإتصال...

شافوا إنه مافى شى و إنا مجتمعين و مبسوطين... ومجرد إنها لعبة من طفل مشاغب لا أكثر

بدأوا يسألونا عن أسماءنا و جنسياتنا... وقبل ما يخرج الشرطى قال ممكن أسألكم سؤال؟

قلت فى قلبى الله يستر... مصيبة راح تصير.

قلنا تفضل!!

قال شو عم تطبخوا؟؟؟؟ شامم ريحة حلوة..

كان وقت الغدا قامت ست البيت الله يجزيها الخير تحلف عليهم و تعزمهم على الغدا....

ضحك الشرطى و قال كل مرة إتصلوا علينا لما يكون عندكم ضيوف ... فأتبعته كاثى الشرطية و قالت لبدر بس تأكد إنه نحنا اللى مداوميين مش غيرنا...

يا حليل الشرطة... حبوبين.. على قولة الولاد ماما حبيناهن للشرطة حلويين

قلتلهم كيف لكان كثير كثير حلوين... الشرطة أصحابنا و بيحبونا..إشوى و منصير أهل.

قام عمر و قال أنا بدى إطلع شرطى بس أكبر,,,,

والله يستر ما يصدقوا ويتصلوا عليهم مرة ثانية.... مش كل مرة بتسلم الجرة....

وصلت على البيت متوترة مابعرف ليش مع إنه كانوا كثير بسيطين و حبابين بس والله أنا خايفة و متوترة من إنه تتكرر العملية و تسير مصيبة....

عندك ناصر من كثر ماهو نشيط بسم الله عليه مافى حيط ما بيدخل فيه و كل ما تسأليه من ضربك هون بيقول ماما...

والله بريئة حتى المدرسة بتسألنى و بتقلى ناصر قال إنك ضاربتيه على ظهره...

أنا صرت هيك.. . قلتلها والله بريئة مش أنا... كان عم بيلعب مع أخوه وشده على السجادة و إنجرح مش أنا.

اليوم قررت أجلس بالبيت وهددت الأولاد مافى سفر ولافى طلعة بعد هيك إذا ما بيتحسن السلوك...

إيش رأيكم أبطل أصير أم ديموقراطية و لا كيف؟؟؟؟؟

[تطوان]

السلام عليكم ورحمة الله وبركاته

اه يا ام بدر مسكت على الجرح .......تربية الاولاد صعبة هنا وخصوصا سهولة الاتصال بالشرطة

انا اولادي مازالو صغارا لكن من الان وانا افكر كيف سيكون الحال لما يكبرو ........خصوصا لما اسمع حكايات

ابناء العرب هنا - الله يهديهم بس - ابو العيال اتعقد وبيفكر انه يرسلنا الى البلد كي يدرسو هناك ويكبرو في بلدهم

ولكنه عين في النار وعين في الجنة .....لما يفكر يجد انه لا يستطيع الحياة بمفرده ولا انا اقدر خليها على الله وبس

الا ضحكوني الاشبال عندك ربنا يحفضهم لك ويهديهم ويطعمك برهم يارب ......

وتسلمي على الموضوع......

[ام سهيل]

ههههههههههههههههههاي
ام بدر احلى شيء انه عجبتهم ريحة الطبخ

فكرتيني لما كان ابو زوجي بامريكا كان يعزم مدرسينهم اللي في الجامعة طبعا هم مساكين اكلهم مافي بهارات ولاتسبيك
ومرة كانوا عاملين اكلة مفلفلة والاستاذ عجبته وصار ياكل حتى وجهه من كثر الحرارة صار طماطم


المهم

ابنك ناصر مثل رنا صارت كل ماطلبت منها المعلمة شيء تعمله تبكي وتقول لها لا ماما راح تضربني
مع اني ما ابضرب
لكن البنت صارت تحب تلفت نظر خاصة مع الغيرة

لكن طالما اننا امهات مظلومة وبريئات
وهن مو راضين يتقبلونا هيك فشو رايك نتحول ونصير شريرات حتى لما يتبلوا علينا يكون التبلي صح .

[البشرى]

هههههههه ضحكتيني يا ام بدر
وشر البلية مايضحك
الحمد لله عدت على خير
بس الحزمممممم مطلوب يا اختي

[Um Obaid]

اهههه يا اختي على شغلة الشرطة ابني كان عمره 9 شهور وبحب يلعب بالموبايل دايما بقفله وبعطيه اياه علشان ما يجنني بس في يوم لعب فيه وهو مقفل واتصل على الشرطة كيف صارت ما بعرف بس الله ستر ما إجوا الشرطة لأنه الله يسلمه كان بيلعب وطلع صوته عندهم انه بيلعب فما اجوا بس لما شفت الخط مفتوح ما تشوفي الرعبة اللي دقتها

[إيمان علي]

قصتك منعشة جداً كالعادة يا أم بدر، ما عرفت أضحك والا أبكي
يبدو كل واحدة فينا مرت بمرحلة تخص الشرطة، ونحمد الله أنه الشرطة هنا فعلاً في خدمة الشعب مش مثل... احم... المهم..
المشكلة عزيزتي أنه المدارس الأجنبية دائماً بيدرسوا الولاد أنه إن ضربك أحد تبلغنا.. ولما يحصل أي شيء لولد، أول اتهام بيكون على الأهل، وكأن التربية صارت جريمة. ولكن الحمد لله، هنا قرروا أنه ضرب التأديب لا يعاقب عليه القانون ولا يسأل فيه.. لكن الضرب المبرح المؤذي هو اللي ينال العقاب. وصراحة معهم حق في هذه القرارات، لأنه القصص اللي عم نسمعها عن ضرب الأبناء شيء ما بيركب على العقل، والله سمعت قصص زمان بتشيب الشعر ما بقدر أتخيلها وصعب حتى أحكيها.. ولهذا كان لازم على الشرطة أنها تتدخل.

ولكن طبعاً لا بد أنه الموازين تختل ويصير البريء يروح بجريمة المجرم.. !

بالنسبة لأولادك، ما شاء الله نشاطهم زائد وبالتالي بدك تحطي جهد كبير معهم باستمرار.. والله يعينك.. لازم باستمرار تحكي لهم قصص عن الكذب والاتهامات الباطلة، والبطل يكون دائماً حبوب بس مشكلته بيكذب وبيدعي على غيره بشيء ما حصل، وتحكيلهم عن النتيجة .. دائماً القصص تؤثر على الأطفال أكثر بكثير من التوجيه المباشر، خاصة لو كان بطل القصة طفل حبوب

وإذا زادت عن الحد، احجزي على سوريا بأقرب فرصة، واعمليلهم قتلة محرزة هناك، والشرطة بتساعدك إذا بدك هههههههههههههههههههههههههههههههههههههههه مش هم في خدمة الشعب؟





ملاحظة.. النقطة الأخيرة دعابة، مش ترسلوها لأقرب مركز شرطة؟!

[um bader]

حياك الله أختى تطوان...

عجبتنى الولايات المتفرقة !!!!

شو بدنا نعمل مشكلة الأولاد لما يعرفوا شىء بيحبوا يجربوه و خصوصا إنه الشرطة هنا حبوبين وبيتكلموا مع الطفل وبيلحسوا عقلو بسرعة...

الله يعينكم وإيانا ,,, بس إقلك شغلة وجودكم مع أبو العيال كثير مهم... وإعملى مثلى كل ماكانوا يعزبونى هنى و صغار أقلهم ترا اخلى الشرطة تاخدكم و توديكم عند كنديين يعملوكم خدم و يعضكم الكلب فكنت اهددهم إنى أنا اللى بدى إشتكى عليهم... وحتى الآن بهددهم وبقلهم اللى بيروح راح يعيش مع الكلاب ويسير مو مسلم ويكبر ويموت و يروح على النار... وبالمقابل بقول ونحنا منكون رحنا على الكويت عند تيتى وجدو و أعمامك و أخوالك و منكون مبسوطين و إنت لحالك زعلان و عم تبكى..
يعنى عم بواسى نفسى لعل الله يسلمنا من هالمشاكل ...

[um bader]

لك شرفتينى يا الغالية يا أم سهيل,,,
تعالى نورجيهم العين الحمرا بلكى بيتربوا,,,,

والله أنا من إمبارح وأنا عم برفع معنويات ناصر وقله إنت اليوم بتسير 5 سنوات يعنى صرت كبير وبدك تبطل تصرخ وتبطل تزعج وتروح عالروضة...

وكل إشوى بقله كنت إنت ببطنى و بعد إشوى بتطلع... فكثيير مبسوط وعامل حاله كبير هلق... بس رايح جاى عم بيطلب منى كيكة وهدية... مابعرف كيف بدى نسيه...
بس أنا حابة أعمله شغلة مميزة تحسسه إنه صار كبير...

ربى يهديه ويصلحه شيبنى والله و أنا بعدنى صبية قلبنا سعدية و حمدية.. لازم بكل رد تدخل سعدية عالخط.

[moon light 2]

أختي العزيزه أم بدر أعجبتني جدا القصه فالأولاد أحيانا يتصرفون تصرفات بالنسبه لهم تعتبر لاشئ وبالنسبه لنا تعتبر مشكله كبيره كما حدث معك .
الله يخليلك اياهم يا رب ويهديهم ويصلحهم الك .

[رائده]

أختي الحبيبة أم بدر

قصتك ممزوجه بين الضحك والالم

هذا ابنك حفظه الله لك ستوعب الدرس مظبوط من الشرطه عندما اخذ الدرس وحب يطبق عملياً

هو يكون عم يلعب واهل يكونوا دمهم عم يغلي

تربية الأولاد علم وبحر بس لازمهم طولة بال وسعة صدر يا أختي الله يعطيك القوة والايمان ويطلع اشبالك من دعائة الايمان
غاليتي

رائعه انت كما عهدناكِ ... تلهب القلوب والعقول بكلماتك

تتفنن في تسطير بما جادته به قريحتك تسلل الى قلوبنا بخفة وجمال

بس أنتِ يمكن دمك عم يغلي غليان

سمعنا القصتك من طق طق لسلام عليكم وشتهينا نعرف شو كنتِ طابخه يوميتها

دمتِ بود الرحمن

[um bader]

يا ميت هلا بالبشرى... أى حزم يا إختى من كثر الحزم راح ننفجر,,,



آه والله قلبى من كل شىء طافى يعنى لما بيعطلوا الأولاد بالبيت بتطلع شغلات بقول مين إنتوا ما بعرفكن... مو هيك أولادى,,,

بتطلع شغلات منهم يا بتخجل يا بتخزى مثل هالموقف أول مرة بزور المرة ,,,

أضحكك أنا مدرسة أولادها لغة عربية...

فطول الوقت و هى تقول...." دى مدرسة أولادى بيتعلموا عندها علم و خلق,,,,

طيب مش أعلم أولادى بالأول يا إختى... ياللعار... فشلة غير شكل... قال خلق و علم والله سكاكين بقلبى... بعلم ولاد الناس وبينفع و أولادى ولاد الشيييخ على قولة جيرانى هنا الحمد لله...

___________________

أم عبيد إبنك 9 أشهر وعرف رقم الشرطة لما يسير 9 سنوات إيش راح يعمل...
عم بمزح ربى يحفظه لك و يحيمه ويجعله قرة عين لك و لوالده.

[um bader]

أمونة شو شرطتنا بخدمة الشعب وبخدمة الأهل كمان....
والله أنا خايفة اندق قتلة مع الولاد... حاكم الجانى و المجنى عليه لازم يعترف ويتعاقب... كيف لكان...

إسمعى انا بدى روح على الكويت عند اعمامهم خليهم يشوفوا ولاد أخوهم بلكى بيساعدونى وبيحنوا علية

الله يهديهم ويعينى عليهم....
المشكلة حاولت أعرف شو السبب اللى خلاه يعمل هيك ماكان يقر....

قال وشو قلت لحالى بخلى ناصر بالداى كير تبعه وبروح من غير مشاكل ,,,طلعت شيطنة ناصر أهون من عملة الكبير,,,,

وما بتصدقى قديش الولاد فرحوا بالشرطة,, ورجعوا عالبيت عم بيفكروا كيف بدن يسيروا كبار ويعملوا مثلهم,,,,, لاء بيعجبوك حمشين مو عاجبهن غير المسدس بالموضوع,,, خايفة يطخونى اول وحدة من كثر ماهنى طاير عقلهم.....

[*نومية حلوة*]

تحياتى لك اخت ام بدر

انا اعانى من المشكلة

اولادى كلما تشاجرت معهم او اردت اخوفهم بعقاب

هددونى فى الشركة قصدى الشرطة هههههههه

قال شو علموهم الرقم عندما كانو فى الروضة واطفالى حابين يجربو الرقم

بس علة مين؟ على امهم

هذا ثمن الغربة

[um bader]

اللهم آمين لأختى لوز...

نعم الأطفال بيحبوا كل شى جديد وكل شى ممنوع,
بعد هذه التجربة الأولاد حبوهم للشرطة الله يستر يعزموهم عنا شى يومو أنا ماعندى خبر...

_______________________

مرورك الأروع يا أم محمد.

كم أستعذب كلماتك فلها نكهة و مازية خاصة يا رائدة..

يا ستى كنت معزومة عند أخت مصرية.
وكانت عاملة كشرى مصرى... أول مرة باكله مثل المجدرة بس عليه معكرونة و صلصة ثوم بمعجون طماطم... وبصل محمر.

وكانت عاملة بيتزا,,,,, ودجاج مقلى كثير ظريف هوى اللى كانت طالعة ريحته..
وبطاطا مقلية.... وهريسة وأنا كنت آخذة معى طبقات النسكافيه....

وقعدت تمدح للشرطة بحلويات الشام و سوريا... حتى الشرطى إستغرب قال عاملين كل هالشى وبتاكله كل هالحلو,,, كيف مانكن إسمان؟؟؟

مانو عرفان إنه أعصابنا بتحترق كل لحظة مع الأولاد وفوران الدم... يعنى لو كنا مثلهم ماعلى بالنا كنا أكيد راح نسمن من هالأكل الطيب بس يا إختى ركد وسمات بدن مع الأطافيل بتذوب كل الشحوم.

تفضلى رئودة والله مانك غريبة... فنجان قهوة بس.....

[um bader]

تحسين إنت هدديهم بالشرطة مو هنى....

لاء عن جد كلميهم إنه هذا غلط و إزعاج للسلطات و من هالحكى...وإذا حبوا يتصلوا بالشرطة خليهم يتصلوا كونى على برادة قلبك وما تخافى مثل ماقالت إيمان الشرطة فى أخذ أولاد الشعب..
الله يحفظهم ويهديهم يارب...