حبيت اكتب الموضوع ده لإنى استفدت كتير منه
وفيه امهات قليلة الخبرة زيى وممكن تستفيد منه
انا بنتى جهاد عندها سنتين وشهر
جالها التهاب فى الحلق او لوز
اخدتها عند طبيب وكتبلها خافض ومضاد حيوى
اخدت جرعة من كل حاجة بس الحرارة مانزلتش
وانا كنت بديلها الخافض من اليوم اللى قبله
جات على الفجر فى اليوم اللى اخدتها فيه للطبيب وانا منتظرة موعد الجرعة التانية من المضاد
ولقيتها بتهمهم واسنانها طابقة على بعض وجسمها سايب
عرفت ان عندها تشنج حرارى ومابقيتش عارفة اتصرف ازاى
اخدناها بسرعة على مستشفى الحميات وقالولنا هيعملولها دش 10 دقايق او ناخدها للبيت لو قريب نعمله فى البيت
وكتبولنا حقن مضاد حيوى مع الخافض على اساس اننا نخلص الحقن ونكمل بالمضاد الشراب
اخدناها عالبيت ونزلناها تحت الدش بس ماطولناش وكملنا بالكمادات واديناها الحقنة والخافض اللبوس
ابتدت تفتح بقها شوية وشربناها ميا وعصير ورجعت كل اللى اخدته والبلغم
نامت وصبحت كويسة الحمد لله بس الحرارة ماكانتش بتنزل غير بالخافض لغاية ماخلص المضاد
بعد كدة اخدتها لدكتور تانى كبير نصحتنى بيه قريبتى عشان لو لسة تعبانة اشوف هيقوللى ايه
كشف عليها وماكاتبش مضاد يعنى الحمد لله بقت كويسة
المهم من قبل ما اسأله اى سؤال نزل عليا بالنصايح
سألنى بتاخد كالسيوم قلتله بقالها فترة لأ
قاللى اديها كالسيوم لغاية ماتطلع الأربع ضروس التانيين
وعن السخونية
قاللى لما تسخن ماتفكريش ايه سبب السخونية
خلى كل همك انك تنزلى الحرارة
خلى عندك مقياس الحرارة اللى بيتحط ع الجبين وتلجتين صغيرين فى الفريزر وخافض الحرارة فى التلاجة
اديها خافض حرارة بيمشى معاها وبتحسى انه بينزل حرارتها ( بالنسبة لجهاد اللبوس )
وكل شوية تقيسى حرارتها
لقيتى لسة الحرارة مش نازلة
شاورلى على مكان فى جنبها من تحت خالص ناحية الزائدة الدودية
قاللى حطى ايدك هتلاقى عرق بينبض
حطى تلجة فى الجنبين على العرق اللى بينبض ده
ولو الحرارة مانزلتش حطيها فى طبق ميا لغاية سرتها بس ( بيقول ان الطفل لو اتعمله دش لكل جسمه ممكن يصاب بنزلة شعبية )
وفيه صديقة قالتلى ان دكتور ابنها قاللها كدة برضه وحرارة ابنها كانت بتنزل على طول
وقاللى قيسى حرارتها على طول وان شاء الله الحرارة هتنزل
اهم شئ الحرارة ماتعديش 38 عشان التشنج مايحصلش
ان شاء الله اكون افدتكم
وربنا يحمى اطفالنا جميعاً
الروابط المفضلة