اخواتي قبل فتره نزلت موضوع اطلب فيه رأيكم لأن ابني في الروضه معلمته توقفه
تقريبا كل يوم عشان حركته كثيره ...
باختصار انا كلمت المعلمه بالتليفون على الروضه -لأني حاولت اقابلها في الروضه وهي تجي متأخره وزوجي عنده عمل - المهم،اني كنت احاول اتكلم بكل هدوء واقولها اني اقدر تعبكم والضغط اللي عليكم...والله يعينكم...والله يجزاكم خير..وانا اقدر جهودكم...
ومن هذا الكلام..
وهي كانت طريقتها هجوميه ومن ضمن الكلام (انتي ولدك حركاته كثيره ويطلع على الطاوله انتي تبغيه يطيح ...)
قلت (لا ياقلبي لكن اذا جربتي معاه التوقيف والعقاب جربي التشجيع ..ممكن تتقولي انا معايا اليوم ثلاث حلويات وراح اختار ثلاث اولاد شاطريين وما يتحركوا ...)
قالت الروضه موفره لهم الحلويات والألعاب)
قلت (انا اتكلم عن ضبطهم بالفصل يكون بالتشجيع افضل من العقاب..)
المهم يااخواتي ماراح اطول عليكم ....
ولدي من الإسبوع الماضي وهو ياخذ بسكوت من البيت ويقولي ياماما اعمليلي كيك و...
طيب ليش حبيبي ؟
قال( عشان اعطي الأبله هي تاخذ من الأولاد وتاكل مع الأبلات الثانيين..)
بصراحه حزنت على ولدي ،لأنه يحاول يلفت انتباهها ...وفكرت اني احاول اقابلها عشان اشوف هل تغير الوضع ...
وطبعا بسبب انشغال زوجي فكرت اني اكلمها بالتلفون ..المهم كلمت معلمه ثانيه اعرفها وقلتلها تسألي عن الوضع وقلتلها عن ابني اللي يحاول يلفت انتباهها ويسترضيها بطريقته-مش فاهم انه اذا جلس عاقل ممكن تعطيه وجه-المهم جاني ابني امس وقال (ياماما الأبله كانت معصبه علينا كلنا وقالتلي قول لأمك تكلمني)
طبعا بعد عدة اتصالات قدرت اكلمها وقالت(ياام خالد ولدك زادت حركاته وانا ماتهمني حركاته لأنها على نفسه لكن صار يأذي زملائه يرميهم بالألوان..)
وبعدين صارت تصرخ ياخالد اجلس عاقل خلاص ....
بصراحه انا تفاجأت من اسلوبها...مع انه كان عندي خبر انه فيه معلمات في هذي الروضه ماعندهم شهادات جامعيه وبعضهم خريجات اقسام غير رياض الأطفال..
لكن توقعت انه اذا كانت المعلمه راح تتعامل مع اطفال اكيد راح يكون عندها سعة صدر وعلم على الأقل بالفروق الفرديه وكيفية التعامل...
المهم انا قلتلها اكيد انه يحاول يلفت انتباهك..
ماراح اطول عليكم بردها <<<<مع اني طولتها فعلا
لكن افكر جديا اني مااخليه يروح بعد كذا لأني اخاف انه نفسيته تتأثر من كثر الصراخ عليه امام زملائه ..وبعدين ولدي الحمدلله يعرف يكتب الحروف ويحفظ بعض السور..وانا ممكن اكمل معاه في البيت..
عندي ملاحظتين :اولا لاتقولولي كلمي الإداره لأن المديره ولله الحمد اشد فقرا ثقافيا من المعلمات...
وثانيا انا غالبا بعد اسبوعين راح اسافر لأهلي لأني مالقيت شغاله وبنتي الصغيره الله يحفظها تعبتني وانا حامل كيف بعد مااولد بالسلامه ان شاء الله ،وطبعا راح آخذ اولادي فحيتوقفوا عن الدراسه..
سامحوني اني طولت عليكم لكن حبيت تكونوا ملمين بأطراف الموضوع عشان تعطوني رأيكم لو كنتوا مكاني..
رجاءا اللي تدخل ترد باي شي يبرد قلبي لأني حاسه اني مقهوره من الوضع ولدي مااستفاد اي شي منهم ،هو من اول يعرف الحروف والأرقام والسور..وهم اخذوا حقهم _ حسابهم_كامل..
الروابط المفضلة