السلام عليكم
ازيكم يا بنات ويا امهات ولله العظيم ما تتصوروش انا فرحانة بيكم اد ايه وبوجودى معاكم فى المنتدى الرائع والهادف ده.
انا عندى 22 سنة مخلصة كلية تربية وجربت المدارس اشتغل فيها ومعرفتش كنت بتعب وحسيت انها مسئولية كبيرة فقررت اشتغل فى حضانة وقدمت فى حضانات كتير واخييييييرا واحدة فيهم اتصلت بيها ورحت واشتغلت بقالى يومين لحد دلوقتى.
المشكلة بقى انى بحب المكان اوى واصحابه ناس كويسين جدا بس فيه بنات هناك بيعاملوا الاطفال بطريقة وحشة وبيضربوهم وانا مش عايزة اتكلم دلوقتى لانى عرفت ان فيه بنات منهم حيمشوا بعد رمضان ده غير انى لسه جديدة ومش عايزة اعمل مشاكل دلوقتى وبتكلم معاهم براحةوبيعاملونى بطريقة وحشة ومستتقلين دمى ومش مرحبيين بيا جدا بس انا بستحمل وحستحمل علشان ربنا يكرمنى ويساعدنى انى احقق هدفى.
وبعدين انا عرفت انى ممكن اخد ثواب لو غيرت نيتى ناحية الاطفال دول وعاملتهم كأنهم اولادى ان شاء الله نيتى وهدفى : (( انى اطلع جيل واثق فى نفسه ومعتز بدينه وعنده مبادىء وقيم متمسك بيها وعارف دينه كويس اوى )) بس مش حينفع اعمل كده لوحدى محتاجاكم تساعدونى انا لسه جديدة فى الموضوع ده وخايفة عايزة حد يوجهنى برضه ويقولى اتصرف معاهم ازاى؟؟ نفسى اطلع صلاح الدين تانى او عمرو خالد او مصطفى حسنى او اى شخصية تقدر تأثر فى المجتمع بشكل ايجابى ويارب اقدر اقدم حاجة لدينى وبلدى قبل ما اموت وربنا يتقبل منى ويرضى عنى وعن كل واحدة تقدر تساعدنى ويكرمها ويحقق لها كل اللى نفسها فيه امييييييييين يارب .
انا رفت انى ممكن احكيلهم قصص دينية حلوة بطريقة بسيطة يتعلموا منها قيم ومبادىء واكلمهم عن ربنا كتير واسال كل واحد هو عايز يبقى ايه لما يكبر لو واحد مثلا قالى مهندس اقوله يا باش مهندس واديلهم اهتمام ورعاية لانى عرفت ان دكتور احمد زويل مامته كانت بتعمل كده معاه وهو صغير وكتبت على باب حجرته دكتور احمد زويل واديكم شايفين ما شاء الله بقى ايه دلوقتى ولازم طبعا يببقى فيه اتصال بينى وبين اولياء امورهم .
ارجوكم يا بنات ويا امهات ساعدونى انى اربى الاطفال دى صح واقدر اقدم لهم حاجة محتاجة معلومات كتير فى الموضوع ده ومحتاجه احس ان فيه ناس بتحبنى وبيساعدونى وواقفين جنبى .
وجزاكم الله عنى الف خير احبـــــــــكم فى الله.
الروابط المفضلة