السلام عليكم ورحمة الله وبركاته
حبيبتي أم قسمت حمدا لله انك رديتي علي .. ربنا يزيدك علما ورزقا ويشرفك وايانا برؤية وجهه الكريم ان شاء الله
بالنسبة للكوفيه بعد اذنك ما هي غرزة الحرف أحاول اعملها .. ولو عملت اول غرزتين عدل يبقي لازم اعمل أخر غرزتين كمان مش كده..؟؟
وجزاكي الله خيرا

كتبت بواسطة أم قسمت

حبيبتي زهره
كلامك جميل جدااااا وطالع من نفسيه جميله وصافيه ربنا يحميكي
انتي وصلتي لفين ياقمر علشان نكمل

ان كانت نفسي جميلة دا من جمالك اللي نور موضوعي وان كانت نفسي صافية دا بس من صفاء نيتك واخلاصك في تعليم البنات الله يوفقك دايما ويبارك لك في ذريتك ويجعلهم من الطيبون ، أمين يا رب

والله يا ست أم قسمت انا بحبك في الله ، وزي ما بنقول في مصر بحبك لله في لله قبل حتي ما ابقي عضوه في المنتدي ، كنت باشوف ردودك علي الأخوات ومحاولاتك القوية في مساعدتها وبصراحة حضرتك والأخوات اللي زيك هما اللي خلوني احب المنتدي واحب الأعمال الفنية ، أصل انا بنوته واحده وماما مدلعاني شويتين ومش بتخليني اعمل اي حاجه في البيت عشان كده انا باحب المنتدي عشان نفسي اتعلم كل الحاجات اللي تنفعني وتنفع بيتي في المستقبل ان شاء الله ، علي فكرة ماما حبتك جدا من كتر كلامي عنك دايما ودايما بتسألني عنك

حاضر هانزل لحضرتك اخر صورة ، وكنت واقفة عند حردة الرقبة ، مش عارفه اعمل حردة الرقبة ، اللي غايظني اني دراستي اصلا انجليزية وباعمل دبلومة ترجمة انجليزية وكل ما اجي اقرأ الباترون احس بالتخلف العقلي عمل زي الطلاسم مش عارفه افكه

كتبت بواسطة nessma1

ربنايخليكي ليا يارب يا احلى زهرة
انا بصراحة فكيت اللخبطة اللي كنت عاملاها كلها
بس خلاص انا عقدت النية وان شاء الله هابدأ من أول وجديد
مع غرزة الحمصة ربنا يوفقني يا رب
وكل اللي باتمناه انك ما تزفيش مني
ربنا يبارك فيكي

ويخليكي ليا انتي كمان يا جميلة ويخليكي لبنوتك ولأحبابك كلهم
برافو عليكي اولا النية وبعدين كل حاجه هاتيجي علي مهلها
انا عارفه يا حبيبتي ان الحمصة دي غلسه شوية بس صدقيني انا كنت كده وقعدت ايام احاول فيها ولو لاحظتي في تطبيقي للظهر هتلاقي كل سطر الحمصة فيه مختلفة عن السطر التاني بس ولا همني برضه كملت وفي اخر سطر عرفت ازاي بتتعمل وكنت راضيه عنها خااااااالص الحمد لله .
بصي يا جميلة انا هاحاول اشرحهالك كده من وحي الخيال اصل انا دلوقتي في الشغل (والعدة في البيت ) وبعدين في حاجه كمان الحمصة اكتشفت ان ليها كذا طريقة ، علي العموم انا هاشرحهالك لو برضه لسه معرفتيش هاخلي حد لما اروح ان شاء الله يصورني وانا باعملها خطوة خطوة ، انا مش عارفه لو ينفع اصور فيديو واحطها في المنتدي اكيد هاتبقي احسن والكل يستفيد ، بصي يا ستي انتي تشتغلي الغرزة كأنك بتعملي غرزة مقلوبة يعني تتدخلي الأبرة اللي في ايدك اليمين في الغرزة اللي علي ايدك الشمال وتلفي الخيط علي الابرة اليمني وتسحبي ( عادي خالص كأنك بتعملي مقلوبة ) بس سيبي نفس الغرزة اللي علي الأبرة اليسري زي ما هي ، وبعدين لفة الخيط علي الأبرة اليمني وبعدين دخلي الأبرة اليمني في نفس الغرزة اللي احنا سبناها موجودة علي الأبرة اليسري واعملي غرزة مقلوبة بس من الخلف (يعني من خلف الأبرة اليسري) وبرضه اوعي تسلتي الغرزة اللي علي الشمال كده هتلاقي 3 غرز موجودين علي الأبرة اليمني ، اعملي كمان غرزة مقلوبة علي نفس الغرزة الموجودة علي الأبرة اليسري ( معلشي هيا قصة طويلة شوية ، بس ان شاء الله ربنا هينورلك بصيرتك) وبعدين اسلتي الغرزة اللي علي الأبرة اليسري ، وهتلاقي ان علي الأبرة اليمني 4 غرز عملناها من غرزة واحدة بس من الغرز الموجودة علي الأبرة اليسري ( يعني كأنك بتزودي عدد الغرز) بعد كده لفي الشغل ، يعني خلي الأربع غرز اللي علي اليمين علي ايدك الشمال واشتغلي الأربع غرز دول مقلوبين ، وبعدين لفي الشغل تاني علي الجهة الصحيحة واشتغلي كل غرزتين مع بعض مقلوبين ، كده بقي عندك بدل الأربعة اتنين وموجدين علي ايدك اليمين ، اسلتي التانية من الأولي كأنك بتقفلي الشغل ، كده بدل الغرزتين عندنا غرزة واحدة بس وهتلاقي كل الهيصة اللي احنا عملناها دي عملتلك كورة صغنونه امورة زيك ، أدي يا ستي الحمصة ، سهلللللللللللله خاااااااااااااااااالص خالص
معلشي انا عارفه ان طريقة شرحي تتوه اكتر بس معلشي حاولي كده في الشرح ولو برضه ماعرفتيش هاصور الغرزه خطوة خطوة عشان تشوفيها ، وربنا معاكي .
علي فكرة : الحمصة ليها كذا طريقة زي ما قولتلك قبل كده بس دي احسن طريقة انا عملتها ونجحت معايا ممكن تشوفي تطبيقي في الصفحات السابقة وتحكمي.

ماشي يا أحلى زهرة
هاحاو تاني ودعواتك كده معايا

ربنا معاكي ان شاء الله
بس انتي طمنيني علي شغلك باستمرار

حاولت اسوي الغرزة ولكن حسيت إني تلخبطت..

احتاج إلى شرح مرفق بالصورة.. الله يعافيك...

تقبلي مروري،،

كتبت بواسطة أمورة الستات

حاولت اسوي الغرزة ولكن حسيت إني تلخبطت..

احتاج إلى شرح مرفق بالصورة.. الله يعافيك...

تقبلي مروري،،

مش عارفة ايه بس اللى حصل ؟؟؟؟؟؟

زهرة يا قمر انتي فين؟؟؟؟

معلشي يا نسمة يا حبيبتي انتي اكيد عرفتي ان النت في مصر اصيب بالشلل التام كام يوم وكمان عليا ضغط شغل كبيييييييييييير بروح البيت مش باشوف غير السرير في وشي
انتي يا جميلة عاملة ايه ؟ واخبار الشغل ايه ؟ انا معاكي ومتابعاكي بس انتي ايه الأخبار وصلتي لحد فين؟؟
محدش يعرف اخبار عن ام قسمت ؟؟ بقالها كتير مادخلتشي عندنا تطمن علي الرعية

امورة الستات
اهلا بيكي معانا واحنا وياكي بس اي غرزة هيا اللي مضايقاكي
الحمصة برضه ولا ايه ؟؟