شفت موضوع في عالم حواء وحبيت يكون في زيه هنا لأنه بصراحة مرة مهم ومفيد وأنا كنت ولا زلت في أمس الحاجة له :
فرجاء كل وحدة حابة تفيد أخواتها تكتب المنطقة اللي ساكنة فيها وأسماء المحلات اللي تشتري منها مع وصف مبسط اضافة لنوعية المشتريات وأسعارها حتى نتنور كلنا ونروح على بصيرة وراح أبدأ انا :
أنا ساكنة في المدينة جربت قرطاسية المطار في الحرة الشرقية على ما أظن تحصلي فيها الخيوط الرفيعة تبع المفارش بريال ونص للفة والصوف في أنواع كتيرة أكترها على 5 ريال للفة وتكون 50 أو 100 غرام ما عدا الكشميري بيكون الحبة بريال 20 غرام
وفي مكتبة ابن هشام في الخالدية عند الاسكان .. وتحصلي الخيوط الرفيعة بريال وبتنوع أكبر عندهم ألوان حلوة لكن الصوف أقل
ودلوني على محلين ما جربتهم واحد اسمه تامر وتمارا بس غالي والتاني في سوق الكعكي الدور الثاني اللي في قباء
بس صراحة أحسن شي للي تقدر انها تروح جدة سوق الهنداوية تشتري بالجملة وبتراب الفلوس .. أنا رحت بضعت من عندهم مع انه كانوا كلهم بيقفلوا وصرنا أنا وزوجي سباق نجري عالمحلات وندور الألوان الحلوة بس كل اللي أخدته من الكشميري تشتري كيس فيه 16 حبة كل وحدة 20 غرام ب8 ريال ( يا بلاش )
ولقيت نوع صيني أغلى شوية وخامته حلوة الكيس فيه 12 حبة برضو 20 غرام ب 10 ريال ..
والسنانير تعبت أدور مقاسات كبيرة اللين ربنا فرج همي وجابتلي مرت أخويا مجموعة من أمريكا جنان ما شاء الله
سؤالي : مني محصلة خيوط قطن زي اللي أشوف الاخوات المصريات هنا يشتغلوا بيها ممكن تدلوني فين ألاقيها ؟؟
الروابط المفضلة