السلام عليكم ورحمة الله
موضوعنا إنهارده ايه - اقولكم
لو جمعنا كل انظمة الرجيم نلاقيها بتدور حول نقط ثابته ممكن تتغير بتغيير طريقة الطبخ او تبديل اصناف الأكل طبعاً انا باتكلم عن انظمة الرجيم الصحيه اللي مش بيكون فيها حرمان ولا إسراف في الأكل
يللا نرتب خطواتنا ونشوف هانعمل ايه
اولاً:
ننوى نيه خالصه لله اننا نطبق الآيه الكريمه في سورة الأعراف قال تعالى : بسم الله الرحمن الرحيم
( يَا بَنِي آدَمَ خُذُواْ زِينَتَكُمْ عِندَ كُلِّ مَسْجِدٍ وكُلُواْ وَاشْرَبُواْ وَلاَ تُسْرِفُواْ إِنَّهُ لاَ يُحِبُّ الْمُسْرِفِينَ )
ثانياً :
ممكن أي حد يرتب جدول رجيم حسب امكانياته وأكلاته المفضله وطبعاً نراعى فرق الأوزان ودى محتاجه ترتيب مع بعض
وثالثاً :
هانجمع كل نصائح دكاترة التغذيه اللي فعلاَ مفيده جداً وهى :
1 ـــــــــــ تنظيم مواعيد الوجبات ( لو فطرنا 9 نتعشي 9)
2 ــــــــــــ علي مدار اليوم ناكل 3 وجبات أساسيه و2 خفيفه زى واحدة فاكهه أو خيار أو جزر
3 --ـــــــ لا للأكل في وقت متأخر بالليل وخصوصاً النشويات
4ـــــــــــ ممنوع كل انواع التسالي والمقرمشات على الأقل في الشهر الأول وبعد كده هانحسبها سوا
5 ــــــــــــ لا للمقليات وبدلها نشوي وكمان طبعاَ مشكلتنا الأزليه الحلويات وخصوصاً الشرقيه طبعاً ربنا يكرهنا فيها يارب كلنا
6 ــــــــــ مرحباً بلعب أى رياضه سواء المشي أو شغل البيت بس بذمه أو سلالم طبعاً الطلوع مش النزول أو رياضه المشي في البيت ودى عن تجربه رياضه هايله جداً ومناسبه للأوزان العاليه وموجوده على
النت اسمها ( Walk at Home)
امثله نجمع فيها من كل بستان اكله :
أولاُ وجبة الإفطار تحتوى على
بروتين + نشويات + شاى أو قهوه
امثله للبروتين : 4 معالق فول بدون زيت أو 2 بيضه / أو نصف كوب جبنه قريش / او شريحة جبنه / او معلقه ممسوحه جبنه كريمى / او 2 مثلثات لايت
والنشويات : إما 2 توست أسمر او نصف رغيف
وممكن مع الفطارخيار أو طماطم
:أما الغدا
نوع بروتين + نوع خضار مطبوخ او على البخار + سلطه + اربع معالق أرز أو مكرونه أو نصف رغيف أو واحدة بطاطس في حجم كوب
إختيارات البروتين :
ربع فرخه / أو شريحة لحم في حجم راحة اليد ( بدون الأصابع ) / أو سمكه في حدود ربع كيلو / أو 2 بيضه / أو علبة تونه بدون زيت
أما العشا :
كوب زبادي أو لبن مع ثمرة فاكهه او اتنين حسب الوزن
وممكن للأوزان العاليه واحدة توست أو ربع رغيف مع بيضه أو جبنه قريش كبديل للزبادى والفاكهه
اللى عايز ينزل أسرع بلاش عيش في العشا
انا الحمد لله ليا تجربه سابقه من سنتين كان وزنى 92 ونزل الى 72 مع رجيم النقاط وبعد لخبطه كتيييييييير وافترا في الاكل وزنى دلوقتى 77 يعنى زياده خمسه كيلو ولكن في الفتره دى كنت دايماً احاول اني اطبخ بشكل صحى يعنى تقليل دهون جداً وتقليل في الحلويات
اكيد عايزه ارجع التزم تانى واتمنى حد يشجعنى ونمشي سوا على اي نظام ولكن نستمر مع بعض لأنى محتاجه جداً أنزل وزنى بسبب ألم الركبه والظهر ربنا يبارك في صحتكم
اهلاً بكل من تشارك معى ونبدأ بقوه وبعزيمه ان شاء الله وناخد من كل بستان أكله
الروابط المفضلة