اخواتي في الله ..ربنا يسعد اوقاتكم
بدايه جديدة لجزء جديد بحمد الله...بتمنى نحقق فيه الاوزان اللي بنحلم فيها ...
بالبدايه بحب اتشكر كل الاخوات اللي كانو معنا واضطروا يتركونا ...ام شذى (بسبب الاضطرابات في ليبيا ..الله يحميها واهلها ويبعد عنهم كل اذى وينصرهم)ام يوسف وخديجة(بسبب الحمل ..ربنا يتمم حملهم بخير ويقومهم بالسلامة مع اطفال اصحاء )
نها ..ام حبيبة...ومن قبل مستبشررة بالخير....اخت البنين...ام حباب
وبقينا حاليا انا (ام لانا)وحبيبتي واختي في الله ام عمار
ورجعت فتحت باب التسجيل ...فكل اخت مرضعة وحابة ترجع لوزنها المثالي نحن بنرحب فيها...تدخل وتسجل يومياتها وبياناتها..وتنتظم معنا بشكل يومي
مرة في اليوم على الاقل
رح ارجع اذكركم بأنه بهالتنافس مابنتبع نظام حرمان او انظمة غذائية قاسية لأننا بنرضع اطفالنا رضاعة طبيعية ومن حقهم علينا أنهم يتغذو ..كل اللي بدنا ياه اننا نخفف من أكلنا بشكل متوازن ..ونلعب رياضة أكتر ونشرب مي واشياء مفيدة وتساعد ع در الحليب
الحلو بتجمعنا انو كلنا حالنا زي بعضو ..يعني عنا لخبطة هرمونات وطالعين من ولادة من فترة وماعم نقدر ننام بالليل ..يعني هي فرصة تنافس وفش خلق لما الوحدة فينا بتكون مدايقة لأننا أخوات في الله
شروط التنافس
1-الوزن كل اسبوعين (بيكون صباح يوم الجمعة )ولازم تكتبولي الوزن بيوم السبت لأنو الجمعة يوم فري واللي بتكتب وزنها بعده حتى لو كانت نسبة نزولها اكتر شي مارح ينحط التوقيع باسمها
2-رح نحط توقيع لتنافس المرضعات ووقتها لازم الكل يحطوه بتوقيعهم
3-لازم شرب الماء يوميا وضروري ألا يقل عن لترين
4-لعب الرياضة ضروري (تمارين-مشي -درج-رقص................)المهم اقل شي 20دقيقة باليوم والنسبة رح تزيد
5-من باب التغير واللخبطة ومشان مايتعود جسمنا عالحرمان ويبطل نزول رح نترك يوم الجمعة من كل اسبوع يوم فري (بس هذا لايعني انو ناكل بدون حساب)بدنا نشوف كيف رح نقدر نسيطر ع حالنا حتى لو كان اليوم فري
6-ضروري تسجيل اليوميات مشان نتناقش فيها ونستفيد من بعض ..ومافي تسيب يعني ماتفوتوا تسجلو يومياتكم الا لظروف طارئة
7-عقوبات مشددة على التهاون بالاكل وهي تمارين رياضية عالغالب
8-اللي بينزل وزنها اكتر شي خلال الاسبوعين بالاضافة انو رح ينحط توقيع باسمها رح تنصحنا بشي عملتو لحتى ساعدها تنزل ورح نحاول نعمل متلها مشان نستفيد
9-لو سمحتوا العضوات القديمات بالمجموعة والجدد تكتبولي الوزن اللي بديتو منو والوزن الحالي والعمر واذا بتشتغلو ولا لأ وعمر اصغر طفل عندكم
10-الحلويات والمعجنات ر ح نخفف منها قدر المستطاع ..اليوم اللي بنعرف حالنا رح نعك فيه بالاكل لازم نخفف الاكل باليوم اللي قبلو مو اللي بعدو
11-لكل متنافسة الحق بانها تاخد لون تكتب فيه يومياتها وبفضل يكون حجم الخط كبير لأنو أغلينا عم تكتب وابنها او بنتها بحضنها فعم تكون القراءة للاحرف الصغيرة صعبة
بتمنى نوصل كلنا للوزن اللي بدنا ياه ورح نبدا من اليوم على بركة الله واهم الشي النية ..ننوي كلنا انو ينزل وزننا حفاظا ع صحتنا ولنرضي أزواجنا ونقدر نهتم بأطفالنا
بشوفكم ان شا الله باليوميات بكل همة ونشاط
الروابط المفضلة