السلام عليكم ورحمة الله وبركاته
انا حبيت اكتب تجربتي مع هذا المرض المجهول بالنسبه لنا جميع وأرجو منكم جميعا الدعاءلاولادي بتمام الشفاء من هذا المرض
يوم السبت اللي فات رجعت ابنتي من المدرسه وحرارتها 38اخدتها فورا ورحنا للدكتور وقالتلي انها عندها شوية احتقان خفيف في اللوز بس الدكتور قالتلي لما سألتها ممكن دي تكونAH1N1 اننا حنعالج علي انه برد عادي ليوم الاثنين ولوماتحسنتش حنعمل تحليل
وبدأنا فورا العلاج باعتبار انها تعاني من برد عادي جدا مخفض حراره مضاد حيوي, العادي في دور البرد يعني
وكانت الحراره بتروح وتيجي يعني مش زي ما انا شخصيا كنت فاكره ان انفلوانزا الخنازير حراره متصله مابتنزلش
وكانت الاعراض باظبط هي هي زي البرد العادي .يعني لما بتاخد المخفض بتنزل عادي جدا لمدة ساعه او اتنين .
ويوم الاتنين ماكنتش حاسه ان فيه تحسن وكمان رجع اخوها من المدرسه وحرارته 38 برضه
اخدتهم هما الاتنين فورا ورحنا للدكتوروقالتلي نعمل تحليل حالا ولان المستشفي اللي بروحها مافيهاش تحليل الانفلوانزا
اتجهت لمستشفي بتعمل التحليل بس مش التحليل الكامل لان تحليلAH1N1 علي مرحلتين اول مرحله مسحه من الانف لاكتشاف اذا مايوجد فيروس انفلوانزاA وللا لأ ولوطلعت النتيجه ايجابيه ييجي الجزء التاني اللي هو تحليل دم لمعرفة نوع الفيروس لان فيروس انفلوانزا A يندرج تحته اربع انواع انفلوانزا بس تحليل الدم بتظهر نتيجه تاني يوم ,اما المسحه الخاصه بالانف بتظهر بعد ساعه والدكتور قالتلي انه بما ان الفيروس المنتشر هو AH1N1
يبقي مش حنحتاج تحليل الدم وخصوصا ان التمي فلو مؤثر في جميع انواع فيروس A
وفعلا اخدت الكتور المسحه من الاتنين وبعد ساعه ظهرت النتيجه ايجابيه .........وطبعا اترعبت وارتبكت وماكنتش مستوعبه
وبدأت الدكتور تتكلم معايا انه برد عادي جدا لو اتعالج صح وكلمتني عن اهمية الينسون وشرب كميه كبيه جدا من العصائر يوميا برتقال طبيعي وليمون وان الاكل يبقي مسلوق وكل الحاجات اللي بنعملها في البرد العادي
وبدأنا فورا التمي فلو للاتنين مرتين يوميا لمدة خمس ايام وطبعا عملنا اشاعه علي الصدر للاطمئنان علي حالة الرئه ولقينا فعلا بدايات التهاب رئوي بسيط بس وبالتالي بدءوا يأخذوا مضاد حيوي مع التمي فلو وطبعا ادويه موسعه للشعب الحمدلله ماكنش الموضوع يستدعي العلاج في المستشفي وروحنا البيت وبدأنا العلاج فورا .
وده رابع يوم في العلاج والحمدلله رب العالمين هما احسن كتير دلوقتي بس ارجوكم ادعلهم ربنا يكمل شفاؤهم علي خير.
المهم التجربه دي اثبتت لي ان مش كل اللي سمعناه عن المرض ده صح
ده فعلا برد عادي بس عايزتركيز وعلاج صح ويجب التعامل معاه من غير هلع
تاني حاجه انه فعلا لايحتاج الامر الي المخاطره وأخذ مصل مش معروف اثاره الجانبيه ايه لانه بجد برد عادي
بس لازم العلاج بالتمي فلو مش اي حاجه تانيه
انا كنت بشربهم ينسون باستمرار وعصاير كتير جدا جدا علشان المرض ده بيعمل جفاف في الجسم وبيكون مصاحبه اسهال
وكنت بشربهم معلقة عسل ابيض وليمون يوميا
ومتابعة الحراره باستمرار والكمدات لو لسه ميعاد الخفض بدري عليه وفيه حراره
وعموما الحراره بتختفي تماما بعد يومين من تناول التمي فلو
يا جماعه ياريت اي حد يكون عنده تجربه مع هذا المرض المجهول ياريت يكتبها هنا في الموضوع ده وانشاء الله تجاربنا دي تنفع ناس كتير بادن الله وانا جاهزه للاجابه علي اي سؤال لو اعرف اجابته لاني طبعا مش دكتوره
بس ممكن اجاوب علي اللي اعرفه
وربنا يحفظ ولادنا جميعا يارب
الروابط المفضلة