اختي العزيزه خسي بمزاجك بدل ما تخسي غصب عنك
السلام عليكم ورحمه الله وبركاته
اخواتي الغاليات مرتادات قسم الريجيم
النهارده حصل حاجه خلتني افكر بجد احنا ليه معندناش اراده وليه الاراده مبتجيش الا لما نبقى مغصوبين
النهارده كنت في مول من المولات وقابلت واحده صاحبتي مقابلتهاش من حوالي 7 شهور وكانت من اصحاب الوزن الثقيل كان وزنها ماشاء الله 124 كيلو النهارده فوجئت انها ما شاء الله جسمها بقى تحفه
وبعد السلامات سالتها عن وزنها قالتلي 72 فسالتها عملت ايه علشان توصل للوزن ده خلال المده دي
فوجئت بابتسامه حزينه وهي بتقولي ان مره واحده وهي في بيتها داخت واغمى عليها
ولما اتنقلت المستشفى التحاليل اثبتت ان السكر عندها عالي وغصب عنها لازم تغير اسلوب اكلها وتغير نمطها الغذائي كله
ولاقيتها بتقولي ياريتني عملت ريجيم بمزاجي بدل ما انا هفضل اعمل ريجيم طول عمري لان السكر كان سبب من اسبابه السمنه لان عائلتها معندهاش تاريخ مرضي لمرض السكر
بعد ما مشيت قعدت افكر
انا اعرفها من سنين وياما حاولنا نعمل دايت وكانت هي يوم والتاني وبتبطل وانا كمان زيها
لكن دلوقتي هي مجبره تعمل ريجيم فهل الواحده فينا لازم تجبر انها تعمل دايت لسبب صحي؟
كام واحده مش عارفه تخلف وهي وجوزها زي الفل بس السمنه مانعاها؟
كام واحده ركبها واجعاها ومش قادره تتحرك ولا تقوم بواجباتها المنزليه بسبب السمنه؟
كام واحده بتلبس اللي بيفرضه عليها وزنها مش اللي نفسها فيه بسبب السمنه؟
كام واحده خايفه على جوزها لابيص لواحده تانيه او حتى يقارن مابينها وبين اللي بيشوفهم في التليفزيون؟
علشان كل الاسباب دي لازم كل واحده فينا تقف وقفه مع نفسها وتقول لنفسها اعمل الدايت بمزاجي بدل ما اعمله غصب عني
اعملي الدايت وضبطي جسمك وانتي لسه بصحتك بدل ما تعمليه غصب عنك لا قدر الله وييجي اليوم الفري متقدريش تاكلي اللي نفسك فيه
والسلام عليكم ورحمه الله وبركاته
رد مع الاستدلال
كتبت بواسطة ذات العفاف
الروابط المفضلة