بسم الله الرحمن الرحيم
اخواتي العزيزات في الموضوع الآتي سوف اشرح لكم بشكل كامل عن الآلية التي سوف نطبقها في الحملة بشكل مفصل
صحيح الشرح رح يكون طويل شوي بس بدنا الكل يفهمه عشان تصير عملية التطبيق روتين يومي وشي سهل
والبداية رح تكون مع............
نظام البداية السريعه(fast break)
زي ما نحنا عارفين كل شي بالدنيا لما نبداه بنبداه شوي شوي
ومن الامثلة على ذلك مغنيين الاوبرا بيغنوا نوتات بسيطة لتجهيز صوتهم قبل أي حفلة
لاعبين سباقات السيارات بشغلوا السيارات قبل السباق وبياخدوا كذا لفة في حلبة السباق
متسلقين الجبال بحاولوا قبل ما يتسلقوا انهم يروحوا يخيموا عند الجبل ليتعودوا على الجو
لاعبين الرياضة بيعملوا تمارين احماء قبل اي رياضة
وغيرهم الكثير والكثير من الامثلة
الخلاصة :
ان كل خطوة او عملية كبيرة بتبدا بخطوات صغيرة متواصلة لنوصل بعدها لاقصى حد من العزم والطاقة
اذا لنوصل لاعلى طاقتنا وتركيزنا في عملية خسارة الوزن وننجح في هذه العملية اليس منطقيا ان ناخذ فترة بسيطة لتهيئة العقل والجسم لما سوف يحدث لاحقا؟؟؟؟؟؟؟؟؟؟؟؟؟؟
يعني لازم نعمل احماء للجسم والعقل لتحضيرهما لما سوق يحدث لاحقا
هذه الفترة(فترة الاحماء) هي ما نسميها بــــ نظام البداية السريعه
وخلونا كلنا نرجع بعقلنا لكل الريجيمات والحميات الي اتبعناها سابقا وكنا نحاول فيها نغير كل شي بين يوم وليلة
بدون ما نعطي الجسم والعقل فرصة للتاقلم
وبوقت قصير شو رح يصير
<<<تخيلوا الجسم متل الماكينة او الآلة وشغلناها فجاة على سرعة عالية
بوقت قصير رح يخلص الغاز او الوقود رح تتباطأ السرعة وممكن كمان تخرب عدة اجزاء من هادي الآلة
ورح نكتشف انه الامر كتير كبير وانه نحنا ما عنا ارادة ورح نرجع متل ما كنا ولا كانا عملنا شي
اذا البداية السريعه هي عملية تحضير للجسم والعقل لاستيعاب التغييرات والاستمتاع بها بدون حدوث عامل المفاجاة الي كلنا بنكرهه بحالة الريجيمات
والاهداف الي مفروض نكون حققناها بهذه المرحلة هي:
-ايجاد العزم والارادة للاستمرار والتواصل والمساعدة في مراحل الدايت القادمة وهي اصعب اكيد.
-ايجاد المعرفة بقواعد التغذية الصحيحة وبناء الثقة بقدرتنا على تجاوز جميع مراحل خسارة الوزن.
-التعود على الحمية الغذ1ائية تدريجيا
اذاخلال فترة البداية السريعه سنعمل على تطهير الجسم من العادات السيئة والبدء بعادات صحية جديدة
ومن الضروري اتباع هذه الفترة بحذافيرها وعدم التفريط في أي وجبة مهما كانت صغيرة.
بنظامنا رح نركز على النظام الغذائي والرياضي والحافز للاستمرار<<<يعني الجهد رح يكون جماعي لنوصل لاهدافنا
لانه الانظمة الي اتبعناها سابقا كنا نتبع نظام اكل بحذافيره وبالنهاية نقرف من الوصفات كلها
او نركز على تمارين لمناطق معينة لحد ما يصيبنا شد عضلي ونحلف ما نرجع ابدا للرياضة
او يصيبنا احباط من قلة الحافز والتشجيع
وبحملتنا ما رح يصير هيك ابدا
رح نركز على كل الاهداف ونعالجها جميعها لما يضل عنا ولا حجة
بنظام البداية السريعه الي رح يستمر لمدة اسبوعين
كل وحدة فيكم رح تختار 3 اهداف وتعمل على تحقيقهم يوميا
والاهداف رح تكون
هدف غذائي
هدف رياضي
هدف لخلق الحافز والتشجيع
ورح كل يوم تدخلوا و تحكولنا كيف حققتم هادي الاهداف
وعلى مدة اسبوعين البنت الي بتلتزم بتحقيق هذه الاهداف اكتر شي هي الي رح تحقق اكبر نجاح في الوصول للوزن الي بدها اياه لانه الالتزام بهذه الاهداف هو الركيزة والاساس للاستمرار
وكلامي هاد رج ترجعوا تتذكروه بعد شهرين او تلات
وتشوفوا مين الي التزم ونجح ورح تلاحظوا انه كان نفس الشخص الي التزم بالبداية
لانه الغاية من هذه الاهداف هو التعود على نمط حياة
والالتزام به لمد اسبوعين
وخلق العزم والارادة للاستمرار
طبعا في خيارات والمفروض تختاري من كل فئة هدف واحد بس للتركيز عليه وبتحسي انك محتاجيته اكتر شي
وهذه هي الخيارات لاهدافنا الثلاثة بتختاري من كل فئة هدف واحد فقط كما ذكرنا وهو اكتر هدف بتحسي انك لازم تحسنيه وتغيريه بحياتك
الغذاء:
-تناول غطور غني بالاياف والبروتين
-تناول حبتي فواكه او خضراوات يوميا
-تناول 4 حصص من الكاربوهيدرات المركبة
-الامتناع تماما عن المشروبات الغازية
-عدم تناول الطعام امام التلفاز
-اخذ طعام العداء الصحي معنا للعمل وعدم اللجوء للاطعمه الجاهزة
-شرب 10 اكواب من الماء
-احصاء السعرات الحرارية للاطعمة التي تناولناها
اللياقة:
-التمرن لمدة 10 دقائق باستخدام التمارين الاساسية cardio exercise
-الحصول على نوم لمدة 8 ساعات
-القيام باي نشاط حركي خارج المنزل
-القيام بتمارين التمدد لمدة 10 دقائق
-الخروج للمشي
-عد السعرات المحروقة يوميا بواسطة التمارين الرياضية
-القيام بالتمارين 15 دقيقة اثناء مشاهدتنا التلفزيون
الحوافز:
-اخبار شخص واحد عن اهدافك التي تطمح للوصول لها
-الكتابة عن برنامجك واهدافك في المنتديات مثلا
-جمع صور لاشخاص فقدوا وزنهم والاحتفاظ بها كحافز
-القراءة عن تجارب اشخاص نجحوا في فقدان الوزن
-مكافاة نفسك معنويا
-قراءة الاقتباسات من اقوال اشخاص مشهورين وناجحين لخلق الحافز
-اذا كان هناك أي شيء سماعي من ادعية او احاديث او موسيقى عالية او غيرها تبث فيك الحماس فاستمع لها يوميا
-التحدث الى الاشخاص الايجابيين ليعملوا على دعمك
-اجر مع نفسك حوارا داخل عقلك حول اهدافك وكم ستتغير حياتك وصحتك اذ1 حققت اهدافك.
اذا هذه هي الثلاث فئات والمفروض نختار نقطة واحدة من كل فئة والاختيار مو عشوائيا
لا
بنختار النقطة الي بنحس انها اضعف شي عنا ولازم نشتغل عليها ورح تنابع بعض لمدة اسبوعين
وخلال اسبوعي البداية السريعه وبالاضافة للاهداف االثلاثة المذكورة اعلاه رح نشتغل على عدة استراتيجيات
اغلب الناس والانظمة الي بنتبعها بيغفلوا عن هذه الاستراتيجيات
بينما لو اتبعنا هذه النقاط وطبقناها لكانت نسبة نجاح الانظمة الغذائية في العالم بنسبة 95%(على ذمة الموقع الي عم نتبع منه هذا النظام)<<<<بس قولوا ان شالله
الاستراتيجية الاولى:
هل تعرف ماذا تاكل؟؟؟
هل تستطيعون العد؟؟؟؟ اكيد بنستطيع
اذا هذا هو المطلوب بهذه الاستراتيجية انه نعرف انه 300 كالوري اكتر من 200
وانه 4 غرامات دهن مثلا اقل من 6 وهكذا..........
اذا متل ما ملاحظين اهم مبدا عنا هو عد السعرات
لانه المعروف انه المفروض نحرق سعرات اكتر من ما بناكل لينزل الوزن وهذا ما سوف نعمل على حسابه وتحقيقه يوميا
طبعا من المصادر المتعددة بالنت رح نقدر نعرف السعرات الموجودة بكل شي رح ناكله
ورح نعد مزبوط ما رح نتحزر انه قطعة الخبز فيها كذا كالوري
من اولها بدنا نمشي صح وهيك اتفقنا
وما بدنا نقلق اذا فينا نكمل اليوم وناخد سعراتنا كاملة رح نترك القلق للمراحل الجاية بعد البداية السريعه.
الاستراتيجية الثانية:
ايجاد الوقت
كلنا عنا وقت زيادة بس ما عم نعرف نستثمره صح
كل الانظمة الي اتبعناها سابقا كنا بنحاول نتاقلم معها
النظام هاد هو رح يتاقلم معنا وشوي شوي رح يصير نظام حياة
والتغييرات البسيطة رح تفرق معنا وبوقت قليل مو شرط نضل طول اليوم نلعب ونجهز حالنا ونصير بحالة طواريء لانه نحنا عاملين دايت لا الفكرة ابسط من هيك بكتير
كيف ممكن نستغل الوقت وننحف بمدة قصيرة
-ايجاد البدائل:مثلا في بعض الوصفات بيدخل فيها مايونيزوبتعرفوا انه الحصة الوحدة من المايونيز فيها 100 سعر حراري
ممكن نستعمل الخردل(الماستردة) للنكهة وزي ما بتعرف انه الحصة الوحدة من الخردل فيها 11 سعر حراري
اذا وفرنا اكتر من 80 سعر حراري بثواني بمجرد تغيير الاكل وبدون ما نحرقهم بالرياضة
-جمع الاهداف مع العائلة:وهيك بقل الوقت وكمان بنخسر وزن
ممكن نطلع مشوار مع العائلة بس نمشي بهاد المشوار هيك بنكون عملنا واجب اجتماعي ورياضي
ممكن تلافي وصفة زاكية صحية ولذيذة
وفيكِ تقدميها للعائلة على الغدا او العشا وهيك بنكوني خلصتِ من طبخ وجبتين وخسرتِ وزن بنفس الوقت
ومع المدة بتصير القصة كتير مرنة وبتصيري تعرفي كيف تنقصي الوزن وتوفري الوقت وتعيشي حياتك وتطلعي وما ترتبطي بالبيت لانك عاملة دايت وما عندك وقت
-واذا ما كان فعلا في وقت حاولي قدر المستطاع تلعبي ولو 10-15 دقيقة وشوفي كم رح تملاي تمارين بهاد الوقت القصير بعد ما تكوني فعلا نزلتِ وشفتِ نتائج حلوة رح تصيري تستثمري الدقيقة لاقصى حد ممكن
الاستراتيجية الثالثة:
تنظيم التسوق وخلق البيئة المناسبة لمساعدتنا على انقاص اوزاننا
وهذه تتم بثلاث خطوات
1)منع الاغراءات
-نبدا بالمطبخ حيث نستبدل كافة الاغذية الغير صحية باغذية صحية نحدد ماذا نريد من المتجر قبل ان نذهب ونلتزم بما نريده
-اخذ الغذاء او سناك صحي معنا للعمل والعمل على اكله اذا جعنا بدل اللجوء الى البيبسي او البسكويت او غيره
-اكل سناك بسيط قبل الذهاب للاكل خارجا
-دائما وابدا وجبة الفطور اساسية مهما كانت الظروف
2)تعزيز وسائل الراحة
-ترك اطعمة صحية في مكتبنا ومطبخنا وجميع المنزل وحتى السيارة للجوء اليها في حال ضيق الوقت وعدم استطاعتنا الطبخ
-عند قيامنا بطبخ أي وجبة فلنجرب ان نزيد المقدار المطلوب ونحفظه في الفريزر لوقت لاحق
3)الشراء بحكمة وعدم الاسراف بدون أي داعي
-مثلا لا داعي للانضمام الى نادي راقي جدا ما دام النادي العادي يؤدي الغرض
او ما دمت تلتزمين بما هو مطلوب منك لا داعي للنادي من اصله
-لا داعي لشراء الاغراض والاجهزة الرياضية المكلفة
كل ما يلزمك هو حذائين رياضيين مناسبين وبعض المعدات البسيطة حاليا
كالاوزان,الكرة المتوسطة, كرة التمارين , حبل القفز
الاستراتيجية الرابعة :
الابقاء على اهدافك في اول اولوياتك داخل عقلك
اهدافنا الي رح نركز عليها رح تكون موجودة بدماغنا بالاول بس بعدين رح تصير تتنافس مع الاولاد ومشاكلهم والمسؤوليات وارقام التلفونات واخبار الاخوان والاخوات
ومش اكيد انه اهدافنا رح تفوز وتاخد المركز الاول بالدماغ
التركيز على الاهداف دائما<<و هادي النقطة رح نزكر بعض فيها هون بالمنتدى اول باول
وبالبيت دائما خلي عندك صور مشجعة
احضري برامج مشجعه مش تحضري برامج طبخ ونفخ
ضلي اكتبي ملا حظات مشجعه وعلقيها حواليكِ
.
.
.
بالنهاية هاد شرح عن اول اسبوعين
صحيح طويل بس شرح منطقي وعلمي ومجرب
مممكن نتعب
ممكن نزهق
ممكن نشوف انه النتائج بتطول لتبان
بس نضل نتزكر دائما
انه ما في شي حلو بيجي بدون تعب
نحاول ناخد البرنامج كشي ممتع مفيد للصحة ويحسسني و يخليني اشعر انه انا عم بعمل انجاز بحق نفسي
ورح اعمل اشياء في ناس كتير غيري ما قدروا يعملوها ولا رح يعملوها
وهاد ما رح يخليني ازهق
والنتيجة صحيح رح تطول بس رح تكون دائمة وملفته من جميع النواحي
ودائما نتذكر انه نحنا عم نعمل ونشتغل لنوصل لشي عظيم لانفسنا
فخلينا نحاول بكل الطرق الممكنة وغير الممكنة للوصول لاهدافنا والابقاء على نفسيتنا ونظرتنا الايجابية
طبعا هيك بنكون اخدنا فكرة عامة عن النظام الي رح نمشي عليه
هلا رح نركز على النظام الغذائي
والنظام الرياضي
وطريقة خسارة كيلو اسبوعيا باسلوب علمي وحسابي عن طريق حساب السعرات الداخلة والخارجة
ورح انزلهم بمواضيع مستقلة
الروابط المفضلة