كل سنه وانتم طيبين
العيد خلص وخلص العك والتخبيص على راى رشيقتنا جنا الروح( عيد.... بأي حال رحلت يا عيد....
بوزن زائد...ـام بكروش فيك يزيد... )
عاوزين نبدأ من جديد بدايه قويه اكيد الكل اكل اللى فى نفسه ومحدش حرم نفسه من حاجه نلتفت لصحتنا ورشاقتنا ونعتبر اللى فات كان اعاده لنشاطنا وتجديد للهمه
اكتشفت حاجه غريبه جدااااا وانا باكل الفته بتاعة العيد ان الاكل فعلا نعمه بس بتروح لذة الاكل بعد ما نقوم من السفره اما نعمة الصحه بيفضل جمالها موجود معانا طول ما احنا بنحافظ عليها وطبعا الصحه دى امانه عندنا من الله لازم ننتبه ليها ونحافظ عليها
والريجيم مش معناه الحرمان لان انظمة الريجيم كتير ومتنوعه ممكن ناكل كل اللى نفسنا فيه بنظام السعرات او النقاط وكل واحده تتبع النظام المناسب ليها ولاسرتها يعنى الموضوع مش صعب جددوا نيه الريجيم وحطوا هدف قصادكم للوصول ليه
تجمعنا له شروط اغلبكم حافظها بس حكتبها تانى لانى زودت حاجات بسيطه عليها علشان توافقوا عليها مره تانيه لان اى اخلال بيها فيه جزاءات بتطبق ( اللهم احفظنا )
1 - الالتزام بالدايت 100 % ومفيش اعذار ( اللى حتقول معزومه وخبصت يا ويلها ) لاننا ببساطه ممكن نزوغ باكل كميات قليله فى العزومه والاكثار من السلطه
ولما تروحى بيتك مش تدخلى تتعشى لأ خلاص تنامى خفيفه (بشوف بنات بتروح من العزومه تتعشى يا عينى يا جبروتك )
2 - المشى 4 ساعات فى الاسبوع على الاقل قسميهم براحتك ( اللى مش ناويه تلتزم بالشرط ده متدخلش احسن ) عاوزه تعملى رياضه براحتك المهم يكون 4 ساعات
3 - شرب الماء كتير ( رايحه جايه تشربى صحيتى من النوم تشربى رايحه تفطرى اشربى تتغدى اشربى تضحكى اشربى الخ الخ الخ ...... )
مش عاوزه اعذار ( بطنى اصلها ايه او بنسى اشرب او الميه بتعمل معرفش ايه ) اتصرفوا بقى اتعودوا عليها حتبقى عاده عندكم
الماء ضرورى للجسم والبشره ونضارة الوجه غير انها بتخرج السموم
4 - الميزان كل اسبوع وحددت يوم السبت للوزن ( اللى عاوزه توزن الجمعه وتاخد الفرى ماشى اللى توزن السبت ماشى )
الوضع ده مبدئيا بنائا على رغبتكم بس انا مش مقتنعه بيه بس حنجرب لو لقيت النتايج محبطه حيرجع كل 10 ايام
5 - اللى حيزيد وزنها حتكتب فى التوقيع ( انا دبدوبه كبيره ) بالبنط العريض
الحمله دى فيها انذارين الثالث طرد حنذر البنت المخالفه فى يوم التقييم بعد الميزان مرتين متتاليتين المره الثالثه حبطل اكتب ليها تعليق كل يوم لمدة اسبوع فضلت على حالها مضطره اسفه انى احذف اسمها من الحمله
الشروط الاختياريه ( بس برضوا اجبارى )
1 - تصوير الميزان وتحميله فى المنتدى ووضعه فى الرد
شرب سوائل تساعد على الدايت ( جنزبيل بالليمون جريب فروت او برتقال شاى اخضر يا سلام عليه) كل على حسب ظروفك وتقبلك للمشروبات ده)
2 - لكل مجموعه قائده تشجعهم وتحمسهم وتكون قدوه ليهم
وممكن تنظم لهم جدول للرياضه والتمرين لو حبت
3 - حنختار كل كام يوم واحده مننا تحكى تجربتها مع السمنه والسبب اللى خلاها تبدأ ريجيم ودايت عاوزيننفيد بعض واعتقد ان مفيش اكتر من التجارب الحقيقيه تقدر تشجعنا وتعرفنا ان مفيش مستحيل بأذن الله
زودت مجموعة الرشاقه لاصحاب الوزن المثالى لمتابعتهم فى تثبيت الوزن
بتمنى من البنات اللى حتشترك تقدر
شدتى عليكم لانه كل فى مصلحتكم
اللى عاوزه تجدد اشتراكها تتفضل بعد قراءه الشروط جيداااا
علشان منزعلش من بعض
لان تقييمى بعد كل ميزان مش على نزول الوزن لكن على تطبيق الشروط الاجباريه
اتفقنا
البيانات المطلوبه للكل جديد وقديم لانى بعمل تحديث للبيانات
الطول
الوزن
حنبدأ دايت فعليا وتسجيل اليوميات من يوم السبت
كتابة الوزن الجديد اجبارى
يلا بالتوفيق لينا كلنا بأذن الله
الروابط المفضلة