السلام عليكم ورحمة الله وبركاته

أنا آسفة يا بنات دخلت بينكم بالنص ، بس أنا بحب السوالف .. خاصة سوالف التسوق، وسمعت سيرة الأردن ، قلت أدخل وأسلم عالأخوات وأقول لكم :

حياكم الله في بلدكم الأردن ، والله إني فرحانة إنه في بنات من المنتدى بيزوري الأردن ـ هيك حسستوني إني مش غريبة بينكم .. والأردن وأهلها بيرحبوا فيكم ..

وبالنسبة للأخت الكمثري : مبارك زواجك ، وأقولك أنا أستعمل كريم أساس ماكس فاكتور جداً روعة.

هلا والله مس بيوتي

اها فهمت عليكِ تقريبا عن الكحل
بس ماعليك امر حبيبتي
طلعي لي الصوره ههههههههههه من الويب سايد افضل
لو بتقدري.............؟
محل ريفا يابيوتي
لسه زميلتي بالدوام مبارح بتحكي لي عنه
وعن بضاعته كتير مميزه وراقيه ........بدي امررر عليه ...

شهوده والله شوقتيني على وصفك
سيتي سنتر الفوق شفتهم تابع لشركه مبروك صح؟
بس بالاستكانات ان شاءالله لما اتزوج ههههههههه رح اخدك معي برحلة تسوق
شو رايك



امممممممممممممم
عروس الشمال اهلا وسهلا فيكِ حبيبتي
شكرا على الترحيب كلك ذوق واصاله
ع فكره انا فلسطينه بس مقيمه بالكويت وكتير رحت للادن زياره وعجبتني

كمثرى الف مبروك سلفاً...

ما شاء الله عليبك ياشهوووده انتي وطيووفه..مسوينها خوووش قعده...ولمه حلوووه...
بصراحه انا تسوقت للسفر..لأني ما شيه الأسبوع الجاي ابها البهيه..(الله يانا اشتقتلها مووووت)..طبعا لأن متوقعه ان في ناس بيزوروني وأزورهم رحت فصلت لي دراريع(جلابيات) عند العربيد بصراحه انصدمت من الموديلات والأسعاار بعد صار لي أربع سنسن ما طبيته..بس من قريت موضوعك اللي في ركن السياحه والسفر قلت بعد ما يبيلها لازم نروووح والله يجزاك خير..لقيت شئ فظيع ..صراحه صج الحريم اللي مسووين في بيوتهم مشاغل كنت أشتري منهم على 40 و45 على دراريع قاصين علينا..
لقيت موديلاتهم وأحلى بعد...أذا طارت سعرها على 15 و18...
وناويه اروح هاليومين بعد أبي اشتري صناديق مع عطورها..هدايا,,احتمال آخذ من الفايز اللي بالفحيحيل..سعره حلو وشغله حلو ومظمون..لأني أبي آخذ كميه..وبالنسبه لقصر السلطان كلامك في محله..أواني منزليه روووعه وأول بأول ينزلون شغلات جديده...وربي يشفيلك عيالك ويقومون بالسلامه.......يااااارب...
طيووووووووووفه يالغاليه.. وحشتيني موووت...
بالنسبه لكريم الأساس (شارمل) حلو بس لا تكثرين منه..أخذي اللون الوردي سيراميك..وخلطيه مع شوي كريم لندن..يطلع فظيع ..وما يطلع قوي بالعكس انتي تتحكمين في درجة اللون وقوته...صراااحه ضحكتيني أكيد اللي ببيضون ما راح يمدحونه..طبيعي بتمشي بضاعتها اللي تبيع...بس أكثر وحده تعرف اللي تبيه ويصلحلها هي انتي,,,,
شكلك مثلي أمووووت على شئ اسمه المكياج وعلى كثر ما احبه كثر ما أخاف انه يخرب بشرتي,,,,,والا نفسي يكون على طول حاطه كريم خفيف او بودره بالبيت بس أتردد ..اخاف انه يكون له تأثير على البشره...كلامك حلووو وقعدتكم أحلى ..بس أنا تعبت من الكتابه...واللي عندها سؤال على سوق الفحيحيل تتفضل ...ممكن نساعدها...
اختي الغاليه على قلبي ام عبد العزيز ...(محبة القرآن)..جايه ابها ان شاء الله الأسبوع الجاي وأي شئ تآمرين عليه من الكويت أنا حاضره..........أختكم اللي تحبكم في الله...نفووووووووووووووووله.....

هلا والله بطيف وبيوتي حياكم شفيكم ماتقهويتو ياحافظ الخير وايد شتشربون ولا تبوني اعزمكم على مغل محل ؟

على طاري مغل محل بنات جربو الي بالسالمية الي يم المبرور عجييييييييييييييييب خاصه الريش الهنديه بدون صلصه يعني بالتتبيله الهنديه بس وشوربة الدجاج بالكريمه والذره يم يم جوعانه <<<<<<<<

هلا والله بالضيفة الجديده عروس الشمال وياليت تنورينا بالكويت عن قريب ان شاء الله <<<<<<<

مس بيوتي شكرا لك وشوقتني اشوف بضاعة المحل تدرين صيف والزيارات تكثر ,,,, ومشكوره حبيبتي على الدعاء

بس ماقلتينا شنو ماركة القلم الادعم ويدهن داخل العين ولا لا شكل المكياج ناعم وانا احب المكياج الناعم خصوصا للزيارات ,,,,,,,,,,,

طيف هلا حبيبتي ان شاء لما نفرح فيك بكون المرشد التسوقي تبعك <<<<<<<<<<

وبالنسبه اذا كان تابع لشركة مبروك والله لا مادري انا اروح الجمعية الي بستي سنتر واعد للسوبر ماركت ويكون عندهم عروض على الاواني وعروضهم جدا حلوه ,,,,,,,,,

بنات قلولنا اي احسن رقم للكريم ماركة ماكس فاكتر واسم البودره للي مجربتة فيكم ,,,,,, ؟؟؟

حياك حياك الغالية انفال القعده صارت عامره

عاد ها لاتقطعين شتشربين ؟؟؟؟؟؟؟

بنات منو منكم جربت دهن همتاج يقولون ينباع عند الهنود بدينار ويقولون فظيع احسن من دابر املا

صراحة دابر املا زين للشعر بس ريحته ويييييع بس شنسوي نبي الزين ,,,,,,,

نفوله روحي سوق الجمعة بس موتضحين علي ويطيح من عينك والله اخذت منهم دشاديش لبنات خال رجلي بالسعودية هداية ,,,,,,, عجيييييييييييبه واقولك قصتهم (( يبيعون الزايد من العربيد يعني الي الزبونه مااخذته اكثر من شهر تلقينه يبيعونه هناك وتدرين بكم 3 دنانير تخيلي بس عاد ها انت وذوقك لقيت مره دراعتي الي لابستهم الهام الفضاضله بمسلسلها الاخير اخذتهم ب5 تصوري يمكن وحده مقلدتها ومااستلمتها والهمدي الخبل باعها بالسعر هذا تصوري !!!! )) وشريت منهم شانون هندي الاصلي الدراعة بدينارين ونص عجيبه الخبل الظاهر مايعرف ان مترها ب3 دنانير والله الكل يسألني عنها بس عاد ها ماقلتلهم اخاف اطيح من عينهم تشيحطت وقلت مخيطتها بس ها سوق الجمعة انت وحظك يوم حلو ويوم الله يديم الفضل

ما شاء الله عليك يا شهوده..دمك خفيف وعسل..... >>>>حلوه (بنات خال رجلي)...
وانا وياكم متابعه...واي شئ جديد يستجد راح أبلغكم......(طبعا اذا رحت تسوقت)..

اشتقت لكم يابنات
ومشكورة أختي عروس الشمال ورحت شريت ماكس فكتر أمس بصراحة عجيب
وسكتوا رحت اليوم سويت مقابلة ان شاء الله يقبلوني قبل ماسافر الحسا والخبر علشان اجهز واشتري بدلات
والله بدلاتهم عجيبة واسعارهم الأحلى وبروح مرة وحدة وسوي البطاقات
شهوده حبيبتي شخبار أعيالج ان شاء الله اشوا
بنات خاطري ازين ممر العروس عندكم أفكار حلوة
أنا فكرت أحط ليتات أصغار على الأرض علشان لين أسكر ليتات العرس يطلع يبرق عرفتوا قصدي
ايش رايكم بالفكرة

بنات سمعتوا عن خبير الأعشاب زين الأتات شريت من عنده تونيك حق الشعر الراس يقوي البويصلات ويزيل القشرة بس لمدة عشرة أيام واذا زدت يوم راح ينقلب ضدي
يعني الشعرة الي تطيح راح تطلع متينة وقوية ماتنقطع
في حد مجربة والا أقولكم النتايج بعدين
وشريت من عنده كريم ثلالي المفعول وكريم المرمم الطبيعي علشان البشرة راح تتقشر من الكريم الاول والكريم الثاني يرطبه بصراحة شد بشرتي ووجهي صار بنفس اللون يعني كان عندي حوالين الفم اغمق من خدي وفتح اللون والحمدالله جاب فايدة

السلام عليكم ورحمة اله وبركاته ،،


ما شاء الله ما شاء الله الديوانية عامرة بس أقول شهوده أنتي مسميتها ديوانية حق الكويتيات أشوف أنقلبت وصارت خليجية على شامية يعني سامحينا إذا دشينا عليكم عرض أختي لأن الصراحة سوالفكم ما تنمل وخاصة إذا السالفة فيها سوق سوق سوق سوق هني عاد أنا خلاص باصيرلكم لزقة جونسن وما بافارق كلش موليه.

شهود أشلون عيالج ألحين أنشاء الله بخير مع أني ما عرف شنو العنقز؟؟ هل هو بو شنيتر عندنا بالبحرين اللي الياهل يسخن وتطلع بسجمه حبوب سوده ويقعد يحك يحك لين ما تطلع روحه؟؟ إذا كان هو كل اللي تسوينه خذيهم البحر وخليهم يسبحون لأن ماي البحر وايد زين حق الحبوب السوده يذبحها مرة وحده أو إذا كان عندج بالبيت أو بيت الجيران شجرة نيم خذي أوراقها وفوحيهم في ماي وخذي الماي وسبحي اليهال فيه هم وايد زين ( مع تحياتي / الدكتورة أوميجا ) خهخهخهخه

كمثرى ( خذني هواكم يا هل الدوحة) يا ريحة الحبايب شخبارج فديتج أنشاء الله تمام يعطيج العافية وألف مبرووك عاد هاذي الأيام أحلى الأيام أيام التجهيزات والركضه والتسوق والمشاوير اللي ما تخلص ومثل ما قلتي ترى أسواق الحسا منعوته أنا مارحت بس نا أعرفهم راحوا يقولون عندهم أشياء رخيصة وايد وخاصة خام السهرات والجلابيات والأحسن يا وخيتي ترى روحي الكويت (آخين على الكويت) أنا رحت مرة وحده وميته آبغي أروح مرة ثانية لكن عاد شاقولج ما عندي أحد يشجعني ، ومن كلام البنات شفشفوا يوفي على الروحه هناك ياربي والله الله يسامحكم ، المهم خذي لج لفه بالكويت وما بتندمين بتحصلين كل شي هناك موجود وبأحسن الأسعار (( شهود قاعده أسوي لكم دعايه))، وحق العطوارات والأطياب العربية ما يحتاي أنا الصراحه أحب أسواق الرياض حق هالشغلات ما شاء الله عندهم أشياء تهبل تهبل شنو دهن عود شنو عو شنو بخور شنو روح الورد شنو ورد طايفي شنو خلطات ما أقدر أوصف لج وغذا بغيتي أسامي محلات قولي لي أنتي بس قولي وفالج طيب ، على فكرة زين الأتات صار لي فترة أسمع عنه لكن مادري وين أحصله عندكم فكرة إذا موجود بالبحرين ؟؟، أو بالرياض وين أحصله؟؟


مس بيوتي هلا وغلا فيج حبيبتي على فكرة بغيت أصحح لج أسم المسكارا أو الآي شدو مو بيبي براون أسمها بوبي براون هاذي الماركة صج حلوة

بنات ماكس فاكتور شغلاته عجيبة أنا من فترة بسيطة شريت الكريم أساس اللي أسمه كلور أدبت color Adbet أنشاء الله يكون الأسم صح دايم يحطون دعايته بالتلفزيون الصراحه حلو وايد ولا كأنج حاطه كريم أساس يعطيج لون طبيعي وناعم وحتى البودرة بعد حلوة وايد أنا الحين أستخدمها من فترة وما غيرت عنها لأنها وايد حلوة ومع الأساس تطلع شي شي، أنا أموت بالمكياج بس الله يهداه أبو الشباب ما يحبني أحط أبداً أبداً إلا في المناسبات وبعد شرط ما يكون وايد شدو على عيني أما في الأيام العادية فأختكم قحيه أبد ماكو غير كريم النهار وشوي بودرة علشان أخفف لمعة الكريم حكم القوي

على فكرة آخر أخبار رامز البحرين دريتو أنه قام ينزل خام سهرات وجلابيات والله العظيم هذا رامز قصة ، أنا ما أروح له وايد إى حق شغلات معينه يعني سماطات أكل أدوات التنظيف يعني وزوجي ما يحبه وايد يقول شغلاته مضروبه وفيها أشياء مغشوشه يعني مو كل شي ينشرى من عنده، حق الأماعين والكاسات والصواني حلو، بس ما كنت أدري أنه فتح بالكويت عبالي بس بالدمام والبحرين والدوحه

طيوووف أشلونج يا أروووبه اليوم أكتشفت الوجه الآخر لطيوووف ، الوجه الحلو للآنسة طيف الوجه الجمالي بتاع الموضة والحركات طيووف إذا بانزل كويت بامر عليج وبنمر على شهود ووبنروح نتسوق واوو والله خوش فكرة عاد حزتها يبيلي همجه فلوس يا الله أقدر أخلص كل المحلات اللي تقولون عنها، التنانير الجينز غرااااامي يا طيووف غرامي بس في البحرين ما يتحصلون بسهولة وإذا حصلتي بتحصلين في المحلات الغالية يعني تطلع الوحده مو أقل من عشرين دينار بحريني. طيوف ماركة الأساس هذا اللي تتكلمون عنه موجود بالبحرين ولا بس بالكويت شنو أسمه شارمر مدري شرمل يوووه نسيت وحتى هذا كريولان بعد موجود بالبحرين ( عاد اللي يسمعني يقول هاذي 24 ساعة المكياج ما يطيح من عينها) يوووه مسكينة خاطري بالدنيا حتى لو حط باخذه حق وقت العازه فيها شي


أنفال تروحين وترجعين بالسلامة أنشاء الله ، إيه والله يقولون أبها تجنننن عليكم بالعافية أنشاء الله درب السلامة

هذرت وايد بنات أخليكم ألحين

يحليلج ياأميجا وينج من زمان والله سوالفج حلوة ماتنمل
على طاري رامز يقولون حناهم زين حق الراس ولايبيعون حلاوة لازالة الشعر خووووش حلاوة
وعلى طاري الكويت والله خاطري أروح بس محد يوديني
يالله ان شاء الله أزورها مع زوجي
والى اللقاء بروح اشوف مسلسلي