طيب يا جماعة الموضوع ده مُهم
من كام يوم جبنا ال iphone6 ده من السعودية (اللي علبته بيضا كلها وعليها كلمة iphone6 في الصورة اللي على الشمال)
وبما اني جبت أيفون قبل كده ف انا استغربت شكل العلبة، عشان شكل العلبة الطبيعي المفروض بيبقى عليها صورة الموبايل من برة كده زي اللي على اليمين او تكون العلبة بيضا تماما من غير حتى كلمة أيفون في الواجهة .. ف انا شكّيت بس لما فتحت الموبايل من جوا لقيته شكله جديد تماما.
انا متعوده لما بجيب الايفون بدخل اعمل check على ال model وال serial number بتاعه ع الويبسايت ده: http://sndeep.info/
ف دخلت عملت check ع ال sn وكان مظبوط بس لما جيت أدخّل الmodel code جابلي error
فين وفين لاحظت ان في جملة مكتوبة من برة ع العلبة وهي: Apple Certified Pre-Owned
لما عملت سيرش على الموضوع فهمت ان الموبايلات اللي مكتوب عليها كده من برّة مش جديدة تمامًا.
يعني ايه؟ مستعملة؟
لا برضه هي مش مستعملة بشكل حرفي لكن في أجزاء منها تم استخدامها ف موبايلات أبل قبل كده.
يعني مثال: موبايل أبل جديد واتكسرت شاشته ف رجع ل Apple ف أبل قررت تعيد استخدام الاجزاء السليمة منه (البورده مثلا) ف موبايلات جديده وهي دي فكرة ال Apple certified pre owned دي.
طب ليه واحد ممكن يشتري ده؟
١- لان أبل بتخفضُه رُبع التمن تقريبًا
٢- بناء على كلام أبل ف الموبايلات دي بتمر بنفس مراحل quality check - اختبارات الجودة اللي بتمر بيها موبايلات أبل الجديدة تماما ومبتنزلش السوق قبل كده
٣- العلب بتتباع مغلقة وعليها ضمان سنة كأي أيفون جديد
طيب المشكلة فين؟
المشكلة ان المفروض البياع يبيع الموبايلات دي مُخفضة بنسبه ٢٣٪ زي ما قريت والمفروض يقولك انه مش جديد ١٠٠٪
ف المشكلتين ان في بياعين بيبيعوها بسعره زيه زي الجديد تماما ويغفلك،
وفي اللي بيبيعه مُخفض بس كأنه عامل عرض من غير ما يقول كل ده.
بعيدا عن كل ده، هل هي كويسة فعلا ولا لا؟ الله اعلم.. بس حتى لو كويسه من حق المستهلك يفهم ويختار
الكلام ده ف بلاد العالم الاول برة مفهوم طبعا والبياع بيبقى قايل كل الكلام ده لكن عندنا الناس محتاجة تعرف عشان متتخمش ف خدوا بالكوا
*ملحوظة: كل الموبايلات الأبل المعاد تصنيعها -كلها بلا استثناء- مكتوب عليها ال جملة دي Apple certified pre owned - ف أبل مبتضحكش على حد لكن اللي ممكن يضحك عليك هو البياع لو انت مش فاهم معنى الجملة*
لينك مقالة بتشرح الموضوع اكتر للي حابب:
http://indianexpress.com/…/how-certified-pre-owned-iphones…/
---
---