السلام عليكم ..

كيف حالكم صبايا انشالله الكل بخير ..

حبيت نقدملكم مسجات ليبية واتمني انها تعجب الجميع ..

*صمتي خير من كتر الكلام وحتي ان قلت ماعندى جديد والا صار صاير من أيام عشقك دوم يسري في الوريد ..جنسك بشر في وصفك ملاك نوعك ذهب في قوة حديد .. ما ننساك ولا غيرك حبيب نين القبر يبقالي مديد..

...........................

*ما حد يشق القلب من غير تفكير حتي ايدين الأطباء ترتجف وتحتار .. حبك صلب يشق القلب من غير تحذير ويبني بداخله قصور وانهار .. هادى الحقيقة قلتها من دون تزوير وارسلها لك يا غالي تذكار ..

............................

*تخيل في يوم !!

انه من يعزك يرحل او يموت فجأه يا تري بتلوم نفسك لأنك في يوم خليته ؟ أو يمكن جرحته وما راضيته ؟ أو في يوم تناسيته ؟ دامه جنبك اليوم حاول تحبه دوم ترا كل غالي لك يمكن ما تشوفه بعد اليوم ...

....................

*احترنا فيهم عدو جفو هانو عزيز عليهم .. الا القلب كيف الطفل بين ايديهم .. كيف الغوالي يكسرو خاطرنا .. حرنا واحترنا والجفا حيرنا غوالي جفو واحنا خطا مادرنا ..؟؟

.............................

*قولولهم .. ضعنا اضياع ..ومرايفين نين انتهينا .. صمام قلبنا سلم وطاع .. والكبد راحت سحينا .. والعقل للعين تباع .. وزاد عالغوالي حنينا .. ايهف كيف نوبات الصداع .. غلاهم امعانا وفينا ..

............................

*جرحك وجرحي وجرح ناس كتيره ..

عليه صابرين ولاهين بغيره .. جرح امشرم .. وكل ما اتجي بتلايمه يصرم وما يطيق .. لاشم الدوا يتورم .. ويدفق نزيفه دفق وادى الهيرة .. لاطاب لابيه الزمان تبرم .. كاره حيث الحلم وتفاسيره ..!!

........................

*دوقت المساء مسيتكم بالماسي .. وحسيت حاسو حواسكم وحواسي .. وقت المساء مسيته , حواس حسكم بالسادسه حسيته بلا حس حسي لحسكم حاديته وحاسو الحواس في حسكم واحساسي , حاسب حسابي والحساب لقيته كيف ما حسبت احساسنا في حباسي ..!!؟؟

........................

*اصعب شي اهمومك تحكي للي ماهو شاقي بيك .. واصعب شي يكون حنينك للي موش حنون عليك .. واصعب شي ايميل شرابك للي مو عطشان عليك .. واصعب شي ايبيعك صاحب وانت تحسابه شاريك .. وقطر الحياة ماشي ...؟؟

...........................

*في جزء من النص مفقود وفي جزء ما زال غايب .. وفي جزء من الكليه مصهود ..و في جزء من النار دايب وفي جزء من الكبد مكبود غايب عليه الطرايب .. وفي جزء من الفكر مشرود أسبابه فراق الحبايب ..وفي جزء من العمر مفقود خلا الوجه والراس شايب ..وفي جزء ماعاد موجود خداته رياح الحبايب..

..........................

*سوا غبتي ولا جيتي انتي العزيزه الغاليه سوا زعلتي والا رضيتي ماليش غيرك والي .. مازال عندك صيت ومازال شانك عالي وما زال كان حكيت نحكي عليك ليالي ..؟

.........................

*مش عالوطاء قدرك مكانك عيني .. عزيز ونفرح بيك وين تجيني .. مش عالوطا عالحاجب انت مقامك .. حب فيك او واجب .. سواء الناس عاجبهم سواء موعاجب .. الناس فوتهم انت اللي تعنيني..؟؟

...........................

*خليك جار القلب وخلي القلب جارك ويش ما دار الوقت لا تقطع عليا اخبارك ..

............................

*لحظه ..!! يا خاطري غلطان في تفكيرك تحساب يرجو فيك دارو غيرك .. يا خاطري ظنك خايب .. ناسك جفو دارو أحباب قرايب ؟

...........................

*ماله بنه .. عندى العمر متكدر أحليلي منه .. بلا شوفتك هالوقت .. ماله بنه ..

.........................

*كل شي في الدنيا فاني .. وربي كرمني وما نسانى .. أحلي حبايب في الدنيا عطاني ..

...........................

*يا وردة فوحي علي من سكن روحي ومن ملك قلبي وعالج جروحي ..

............................

*ماني قده نسيان عزيز كيف روحي انعده ديمه أنوده لو يطلب عيوني ما نرده ...

...........................

*ينشد ديمه مابين ضي النهار والليل والتعتيمه عليك خاطري نشاد ينشد ديمه ..

...........................

*عليك ايمسن عيوني اشتاقن وبغلاك ايحسن .. وايقولن اشتقنا ما عليك ايدسن ..

..........................

*يا رفيق عيوني انصونه غلاك ونحرصه بجفوني وما يوم ترخص ..

..........................

*يا شمس يا جايبه دفاء هواهم .. أجبر بخاطري شيل السلام قداهم..

...........................

*غلطان من يبعتلك رساله ويقولك انحبك المفروض ايجي لعندك ويبوس خدك ..

...........................

*المساء بدونك ظلام والصمت بعيونك كلام وألف وردة ليك قبل ما تنام ..

..........................

* استوطن ودار املاك .. غلاك في تراكين خاطري ..

.........................

*عالبال ديمة راكم كان سهيت يجبدني حنين غلاكم كذاب عقلي كان قال نساكم ..

..........................

*عندك مكان فيه العقل .. تحظري تغيبي ماليه بالغلا ..

..........................

*أحباب ...!! نشتاقلهم أعزاز طول العمر منبدلهم وين ما انحس القلب محتاجلهم نترك جميع الناس وانراسهم..

..........................

*الروعة دوبك .. وروعة الروعة ..رمشتك لهدوبك ..والرابعة بالحيل يقسم صوبك ..وأروع روايعهن انكون معاك يا روعتي في الكون من يسواك..

...........................

*كل الكلام شوية ما يوصفك ياللي عزيز عليا لو كان نكتبه..

...........................

*صدمات عمري زادتني شجاعة أي شي نحبه اتوقع ضياعه ..

............................

*ما بين لحظه ولحظه يخطر عزيز وضحكته والصحبه ويجن خاطري ..

..........................

*ممكن شقانا في الحياه يلهينا لكن غلاكم دوم ساكن فينا ..

......................

*يا نجمه فالعالي في وسط السماء, عندى اغزيل رايح في وسط الظلام ..

......................

*نقطع عليه انفاسه وانهزبه واندير راسي وراسه .. القلب كان نساك ..

...................

*ماهن معاي معاك عقلي وروحي يا عزيز احداك ما هن معاي معاك ..

.........................

مانوعيك أعطيني رقم نومك فالمنام نجيك اسمع كلامي خير ما نوعيك

...........................

*يا ليت مثلك بالخلايق ملايين .. لكن حلاوة الشي نادر وجوده ..

...........................

*عديهن أيام العمر يوم بيوم علي قدهن تلقي غلاك يدوم ..

............................

*زيد الجرعة وارسل سلام القلب باقصي .. سرعة مدمن عليه غلاك زيد الجرعة..

..........................

*تقاوى سمه تقول مدمن علي هيروين يبي شمه غلاك يا غالي تقاوي سمه ..

........................

*عاملني زي المضاد الحيوي كل 8 ساعات أرسلي رساله أو حتي زي الفيتامين مرة في اليوم كلمني مش تخليني زى دواء الحموضة عند اللزوم تفكرني ..

........................

*اللي يودني نهواه , ونحبه بعزة نفس ! نشهر الصوب معاه , واضح وضوح الشمس ! يعيش الغلا سلطان وينسي جروح زمان ! ترخص فداه الروح , ونقول شوي ؟؟

.......................

الغالي ما ينعرف غير لا غاب .. والحبيب تعرف قيمته نين تفقده ماني بمشاعر الغلا كذابه ولعابه. ولاني منافقه بحب اللي عرفته.. ابياتي ما تمدح غير عزيز وحبيب .. وانا ما اكتب لغير اللي انعزه ..

وانشالله ينالواعجابكم نونا 91...

جزاكى الله خيرا

بوركت ياغالية

شكرا ..حلوات

حلوين مره
وراح احفظهم عندي

رائعه يا نونا
..................اكثر شي عجبني

*كل شي في الدنيا فاني .. وربي كرمني وما نسانى .. أحلي حبايب في الدنيا عطاني ..

شكرا ليك حلوييين جدا
بارك الله فيك
رح احفضهم عندي ان شاء الله
لك ودي ...

كتبت بواسطة مجموعة الام

جزاكى الله خيرا

و جزاك بالمثل اختي نورتي

كتبت بواسطة نجوم حياتي

بوركت ياغالية

شكرا لمرورك

كتبت بواسطة بنت طرابلس

شكرا ..حلوات

وانتي احلا بنت طرابلس شكرا لمرورك