الى كل اخت منتظرة الحمل
الى كل اخت جربت كل حاجة ونفسها تبقى ام
الى كل اخت بتقعد كل شهر تحسب ايام التبويض
--
--
--
--
--
حبيت النهاردة احكى لهن تجربتى
انا متزوجة من سنة وكام شهر
ومن اول شهر فى زواجى ربنا كرمنى بالحمل بس مكنتش اعرف انى حامل (عروسة جديدة ومليش خبرة)
واشتغلت فى الشقة وتنظيفها
ومحصلش نصيب
الحمد لله
جيت الشهر اللى بعدها على طول ابتديت احسب لأيام التبويض وانتظر الحمل
وطبعا خلال الشهر دة مكنتش بخرج ولا بشتغل فى الشقة كتير ولا ببذل مجهود فى اى حاجة خالص علشان لو كان فية حمل ميحصلش اجهاض لا قدر الله
وفعلا
عملت اختبار الحمل وبان خطين
كانت فرحتى عامرة ومكانتش الدنيا مكفيانى فرح
بقيت اخلى بالى من كل حاجة
وعدت الشهور الثلاثة الاولى
صادف زفاف اختى بداية الشهر الرابع عندى
وطبعا انتوا عارفين يعنى اية زفاف فى العيلة وخاااااااصة لما تبقى اختك المقربة ليكى
مش معنى الكلام انى اجهدت نفسى فى الشغل
بس ربك لما بيريد
مكنتش بتحرك من مكانى
يوم فرح اختى الصبح كنت عند الدكتورة وقالتلى النبض كويس والجنين كويس
سبحان الله
لما سافرت تعبت شوية فى المواصلات
نزلت عليا مية
وانا بما انى مليش خبرة فى الحاجات دى قلت لما هرتاح هبقى كويسة ان شاء الله
وعدى يوم واتنين وشهر وانا بحس على طول بمغص وتقلصات واقول دة هتلاقية من اعراض الحمل
ولما رحت للدكتورة اول ما كشفت عليا بالسونار
لقت الجنين ميت بقالة شهر
وعشت ايام يارب ما يكتبها على حد ابدا يارب
وعملت العملية فى اسرع وقت
ومن بعد النفاس ابتديت احسب ايام التبويض
وكل شهر احسب واقول دة الشهر دة
لأ الشهر اللى بعدة
لكن ربك لما بيريد
وفضلت 5 شهور احسب والدورة تيجى فى نهاية الشهر
ناهيكى طبعا عن حرقة الدم والاعصاب اللى ببقى عايشة فيها لو الدورة اتأخرت يوم ولا اتنين
وفى الاخر رحت لدكتورة طلبت منى تحاليل وحاجات كتيرة كدة
وقالتلى تابعى معايا علشان التبويض
وكنت فعلا بتابع
لكن ربك لما بيريد
وبردة جت لى الدورة
كنت فى يوم عند ماما واختى كانت نازلة اجازة من الامارات
وهى حامل زى ما بعضكم عارف
قلت آخدها تكشف عند الدكتورة اللى انا كنت بتابع معاها فى الاول خالص
وحكيت للدكتورة عن ظروفى
وعلى التحاليل اللى عملتها
عارفين قالتلى اية
قالتلى يابنتى انتى لية عاملة فى نفسك كدة
انتى كويسة والحمد لله ومفيكيش حاجة خالص
بس ربك لما بيريد
بس
--
---
----
-----
واخدت الكلام منها
وارتحت من مجرد كلمة انتى كويسة ومفكيش حاجة
والله يابنات لو تصدقوا من 5 شهور مكانتش نفسيتى مرتاحة ولا مطمنة قد الفترة دى
ومحطيتش فى دماغى حمل
ولا حسبت ايام تبويض
ولا غيرة
وخرجت
وسافرت
ورحت اماكن كتير
ومكنتش بحسب حساب لأى حاجة
ولا حتى كنت بحسب الدورة هتيجى امتى
والله يابنات زى ما بقولكم كدة
بس كنت دايما لما بصلى
بدعى
واقول
"ربى لا تذرنى فردا وانت خير الوارثين"
والله والله انتوا يابنات متعرفوش سحر الدعاء دة
وفى مرة تعبت وحسيت ان نفسى مش قابلة ريحة الاكل
الشك دخل لقلبى
وقلت بردة احلل زيادة تأكيد
وانا والله انا نازلة لمعمل التحاليل وانا متأكدة ان مفيش حمل
ولقيت دكتورة التحاليل بتقولى
-
--
----
-----
--------
مبروووك يا مدام
انتى حامل
انا من كتر الفرحة مكنتش مصدقة
قلتلها لأ انتى بتضحكى عليا
قالتلى والله انتى حامل
ساعتها افتكرت كلمة الدكتورة
ربك لما بيريد
وفعلا
ربك لما بيريد
ولا ايام تبويض
ولا كلوميد
ولا اى حاجة فى الدنيا
ربك لما بيريد
ربك لما بيريد اختى منتظرة الحمل
بيسهل لك امورك
ويرزقك من حيث لا تحتسبين
صدقونى والله الموضوع كلة نفسية
انتى طول ما انتى نفسيتك تعبانة من الموضوع دة
لو عملتى اية
مش هتحملى
لكن لو آمنت بإن
ربك لما يريد
هتلاقى كل اللى نفسك فية بيتحقق
ويارب مكونش طولت عليكم
بس حبيت اطمن كل اخت منتظرة للحمل وبتجرى ورا الدكاترة
ربك لما يريد
ربك لما يريد
اتمنى اكون افدتكم
الروابط المفضلة