✿* وأخيراً ..قصة ولادتى بحبيب قلبى " سيفـ " ربنا يحميه*✿
:
السلامـ عليكمـ يا أحلــى صبايــا
أولاً : احبـ اشكر الغاليه " ام سهيل " مشرفة قسمـ الحمل والولاده،وجميع اخواتى الغالياتـ بتجمع (رجب وشعبان ورمضان)
على فكرة كان موعد ولادتى المحدد 16/9/2009
ولكن ..
يوم 26/8 كنت فـ شغلى عادى الساعه واحده الضهر وبينما انا بتكلم مع مديرتى فـ الشغل ، لقيت مايه نزلت عليا ..
روحت الحمام عشان اشوف ايه ده .. لقيت مايه نزلت تانى وبشكل اكبر ..
رجعت مكتبى ..وسألت مديرتى .. قالت لى خدى تاكسى وروحى حالا ..
سالتها : دى علامة ولاده ؟
قالت : ايوه
وانا بصراحه كنت قريت انها من علامات الولاده ..
وخفت اوى وقلت يبأه انا هولد دلوقتى .. وحفت احسن اولد فـ الشارع
قلت اروح للدكتور وبالمناسبه عيادة الدكتور كانت قصاد شغلى على طول ..
وانا فـ العياده اتصلت بزوجى وقلت له ان نزل منى مايه وانى روحت للدكتور
وطلبت منه يجيلى عند الدكتور ..
وطــول ما انا ماشيه والمايه عماله تنزل منى ..وكأنها حنفيه مفتوحهـ ..!
وجالى فعلا زوجى هناك ودخلت للدكتور وقلت له ان فى مايه نزلت منى بكميه كبيرة وكشف عليا !
وقالى : هتولدى قيصرى !
ليه يا دكتور ..؟!!!
لان الرحم مش فاتح !
انا بصراحه انصدمت وخفت اوى ..
قالى لو عيزانى اولدك دلوقتى او اؤدامك لغاية 7 الصبح عشان تحضرى نفسك ..
قلت له : اوكـ ..
وخرجت انا وزوجى من عند الدكتور ..
واقترحت على زوجى انى اروح المستشفى عشان اكشف واتأكد من كلام الدكتور
ووافق زوجى وروحت المستشفى وهناك كشفوا عليا كشف مهبلى وكان مؤلم جدا..
وقالوا الوضع طبيعى بس الرحم لسه قدامه وقت على ما يفتح ..لانى بكريه ..
والبكرية بتتأخر شوية ..!
المهم حجزونى هناك وركبولى محلول ..
وخدوا منى دم عشان يشوفوا الفصيله ..
و خدونى على جهاز فحص نبضات قلب الجنين ..
وحجزونى فـ المستشفى ..
وكانوا مانعين اى حد يدخل معايـــا ..
فين وفين على ما بدأ يجينى مغص بسيط عادى ومحتمل ..
ولحد قرب الفجر كان الرحم فاتح 1 سم بس
وقد كده فترة كبيرة .. وبدأت الالام الطلق اللى كانت بتخلينى اصرخ وابكى
لدرجة انى مكنتش بعرف افرد ضهرى منها ..
وبعدها الرحم فتح 2 سم وقعد فترة اكبر على كده .. وكده مش متحمله الالام الطلق ..
وبصراحه صبرى نفذ ، وخرجت لزوجى .. وقلت له خرجنى من هنا .. انا مش قادرة استحمل ..
انا عايزة اولد قيصرى ..لانى معنتش قادرة استحمل الالام الطلق !
بس قعد يصبر فيه وهو و الناس اللى حواليه ..
وخدونى مرة تانيه على جهاز قياس نبضات قلب الجنين .. والحمد لله كان الوضع تمام ..
وهنا لقوا الرحم فاتح 2 ونص سم ..
وقالولى : كده فى امل انك تولدى طبيعى ..
وانا بصرخ وبتألم .. بس قلت فـ نفسى على 7 الصبح لو ماولدتش هامشى واروح اولد قيصرى !
بس كل اللى حواليا كانوا بيصبرونى ويهدوا فيا ..
وكل شوية يجوا يشوفوا الرحم ويشكفوا عليا يلاقوه لسه ..
فين وفييييييين ع الساعه 12 الضهر لما الرحم فتح الحمد لله ..
وقعدوا يقولولى ادفعى لما تيجيلك الطلقه .. وانا بصراحه مش عارفه امتى الطلقه بتيجى .. لانى كنت حاسه بألم مستمـــــــر ..
قعدت ادفع وادفع ، ومفيش حاجه بتنزل ..
وبعدها قالوا لى يلا على غرفة الولاده !
دخلت غرفة الولاده .. وبدأت ادفع وداسوا فـ بطنى جامد اوى ..كنت بتألم
بس استحملت ودفعت عشان اخلص من انا فيه ..
دفع والتانيه .. وكان الباشا " سيفـ " شرف للدنيا واذان الضهر بيقول : الله اكبر ..
يلا عقبال كل البنات الى على وشك الولاده ، وعقبال كل منتظرات الحمل والولاده يارب ..
رد مع الاستدلال
كتبت بواسطة مجنونة فيك
الروابط المفضلة