حكاية سلمى لما إجت عالدنيا...قصة ولادتي
أول شي بحب أحكي إنو بعد تعبي بالحمل و الوجع اللي شفته بالولادة, هلأ عرفت قيمة ماما و لو ضليت ليل نهار أبوس إيديها و رجليها ما بوفيها حقها,,الله يخليها إلي...لولا وجودها جنبي ما بعرف شو كان صار فيي
و تاني شي بحب أشكر أم سهيل مشرفة قسم الحمل و الولادة و أخواتي و حبيباتي بتجمع شهر رجب شعبان رمضان 1430 هجري..مضينا مع بعض أحلى أوقات و كانو بالنسبة إلي زي الأهل
اليوم عمر سلمى 19 يوم و كل يوم بمر ببالي تفاصيل ولادتي.الحمدلله كانت سهلة..صحيح توجعت كتير بس بالنسبة لغيري كانت سريعة...الحمدلله الله هونها علي.
المهم كان موعد ولادتي ب 20-9 و لما دخلت التاسع رحت فتحت ملف بالمستشفى لأنو أنا لحد الشهر الثامن كنت بالمغرب و لما رجعت عالأردن عند أهلي تابعت عند دكتور جديد بالمستشفى..حكالي أنو وضعي منيح و أنو أراجعه بشكل أسبوعي.
يوم الخميس 3-9 رحت عند الدكتور للمتابعة الأسبوعية و كان صارلي 10 أيام بالتاسع.
شاف البيبي بالسونار و حكا أنو أنا بالأسبوع ال 37 و عمللي فحص داخلي عشان يشوفلي الرحم واسع ولا ضيق و كانت المفاجأة...
حكا إنو عندي توسع 4 سم و إنو خلال يومين بالكتير رح أولد! أنا و ماما انصدمنا خصوصا إنو ما عندي وجع بالمرة.
حكيت مع زوجي بالمغرب و خبرتو و حكالي إنو جاي عالأردن يوم السبت الفجر, ضليت أدعي إنو ما أولد لحتى ييجي زوجي...
يوم الخميس ما كان عندي وجع, نمت و صحيت عالسحور...تسحرت و بعديها صار معي مغص بروح و بيجي..راح الوجع عالساعة 8 الصبح نمت و صحيت الساعة 10..كان الوجع خفيف بعدين راح الوجع تماما.
ماما ما رضيت إني أضل صايمة, أفطرت و كملت اليوم عادي,,, حتى ساعدت ماما بالطبخ..رجعت نمت و صحتني ماما على أدان المغرب.
عالساعة 7 رجع الوجع, كان خفيف و بعدين صار يزيد شوي شوي و بعدين ماما صارت تحسبلي الوقت بين الطلق لقت أنو كل ربع ساعة.
صارت الساعة 9:30 و أنا مو مقتنعة أنو هدا الوجع طلق ولادة يمكن لأني كنت حابة إنو زوجي يكون معي.
كنت أتحمل الوجع و ما صرخت ولا إشي ولا حتى كنت أبين لحدا إنو موجوعة.
عالساعة 10 حكت ماما مع الدكتور و حكا إنو لازم أروح عالمستشفى و أنا رافضة أروح, بعدين صار الوجع يزيد و صار كل 10 دقايق.
بعدين أخوي أصر إنو لازم أروح عالمستشفى, وصلت هناك عالساعة 10:45 بالليل. حطوني على جهاز فحص قلب الجنين, و إجا دكتور و دكتورة و فحصوني لقوا التوسع 8 سم, و مع هيك كان الوجع عادي بقدر أتحمله. الدكتورة حكتلي إني جبارة لاني متحملة,,حكتلي أنو لما يوصل 8 سم بتكون الوحدة عبت المستشفى صراخ.
كانت ماما معي و ماسكة بإيدي و أنا كنت ساكتة و متحملة, و كل ما كانت الدكتورة أو الممرضات ييجو يفحصوني كنت أتوجع بس مع هيك كنت أتحمل. بعد نص ساعة صار الوجع لا يكمن تحمله و صرت أبكي و أحكي لماما ودوني عالبيت بطلت أولد! و كنت أنادي على زوجي و خايفة كتير....
بعديها إجو الدكاترة فحصوني و لقو التوسع تقريبا كامل و دخلوني غرفة الولادة هالساعة 12 بالليل بالزبط, كان الوجع كتير و كنت أبكي بس بدون صوت لأني كنت مستحية من الدكاترة.
ضليت أحكي للممرضة إنو بدي ماما بس حكتلي أنو ممنوع و حكتلي ما تخافي كمان 5 دقائق بتكوني ولدتي.
إجا دكتوري و فجروا كيس المي و نزلت المي دافية و بعدين حطولي قسطرة و نزلوا البول.
كنت حاسة أنو في شد هائل, الدكتور حكالي شدي و أنا أحكيلو مش قادرة أشد, كنت سامعة شو بحكو الدكاترة بس حاسة حالي بعالم ثاني. بعدين سمعت الدكتور بحكي إنو شاف الراس و إنو حجم الراس صغير و أنو وزن البيبي رح يكون صغير, بعدين حطولي مخدر بيثيدين و ما حسيت بحالي إلا و أنا بغرفة ثانية.
ما كانت ماما موجودة و ما كان في حدا عندي, إجو ممرضات ثنتين سألتهم أنا ولدت؟ حكولي ولدتي و جبتي بنوتة. غيرولي الروب و حكيتلهم ينادولي ماما. بس كنت تعبانة كتير و مو واعية على حالي. كانت الساعة 12:45
بعدين إجت ماما و أخوي و مرتو و أخوي الثاني و ماما حكتلي إنو بنوتي حلوة و بتجنن و انو وضعها تمام بس وزنها قليل 2 كيلو و 440 غم و إجيت سألتها إلها شعر ولا لأ؟ هههه شوفو فضاوة البال!... حكتلي إنو إلها شعر أسود و غزير.
نقلوني على غرفتي و كانت الساعة 1 بالليل. ضلوا أهلي عندي و بعدين الساعة 2 حكي معي زوجي تلفون و حكالي أنو وصل عالمطار, وصل لعندس الساعة 3 الصبح.... ما صدقت إنو صار عندي كان إلي شهرين مو شايفتو... حكالي الحمدللة عالسلامة و ضل يمسح على شعري و أنا أحكيلة إنو تعبانة و مو قادرة أتحرك.
بعدين راح شاف بنتنا بالخداج حطوها هناك لأنو كان معي إلتهابات قبل الولادة و خافو الدكاترة إنو تنتقل إلها الجرثومة أثناء الولادة. رجع من عندها و حكالي و كان فرحان كتير.. طلبت أشوف بنتي بس حكولي أنو ممنوع عشان الغرفة فيها تكييف و بخافوا عليها من البرد.
راح زوجي من عندي الساعة 4 الصبح و ضلت ماما عندي و ما نمت بالليل, ضليت فرحانة و مش مصدقة إني ولدت و صرت أم..ضليت أتخيل شكل بنتي بتشبهني ولا بتشبه أبوها.
ما صدقت لما طلع الصبح, وديت مسجات للكل إني ولدت و صارو يحكو معي تلفونات يباركولي..... الساعة 10 رحت شفت البنوتة بالخداج..كان قلبي يدق و كنت مشتاقة إلها كتير...بس شفتها كانت نايمة زي الملاك ما صدقت إنها بنتي.... صرت أحكي لماما أكيد إنهم مخربطين و إنها مو بنتي لأنها بتجنن! صارت ماما تضحك و تحكيلي هاي أكيد بنتك.
حطيت إيدي على قزاز الحضانة و صرت أطلع عليها...صارت تبكي.... صرت أنا كمان أبكي... شعور الأمومة أحلى شعور بالدنيا... الله لا يحرم حدا من هاي النعمة...
ضلت بالخداج 3 أيام و بعدين طلعت....
سلمى نورت حياتنا و خلتها أحلى...
هاي قصة ولادة سلمى....طولت عليكم فيها بس انشاءالله تكونو حبيتوها...
رد مع الاستدلال
كتبت بواسطة أريس
الروابط المفضلة