نصيحة أخوية خلاصة تجربة غبية!!!
يا صبايا، من حرصي عليكم حابة أنصحكم، وهي نصيحة خلاصة تجربة خاصة ما بحب سلبياتها تحصل معاكم:
عادتي في تنظيف المناطق الحساسة قبل الحمل كانت استعمال العقيدة أو الحلاوة، كنت أنظفهم كل شهر أو أقل، والنتيجة كانت نظافة لا مثيل لها وياخد الشعر فترة تا يطلع مرة تانية،
مع الحمل اتغيرت الموازين، وحسيت انه المنطقة الحساسة إياها صارت حساسة أكتر...يعني كل مرة أنظف فيها أشعر بألم أكبر، وبتعرفوا مع كبر حجم البطن مع تقدم الحمل بصير الموضوع أصعب،
كل هاد ما خلاني أتنازل عن العقيدة، لأنها بنظري لا يعلى على نظافتها،
الكارثة اللي سويته في الشهر التاسع، صرت أنظفها بشكل مبالغ فيه، كل أسبوع، والطريقة كالتالي:
أنظفها المرة الأولى بالعقيدة
أعيد عليها المرة التانية بالماكينة!!!
وآخر مرة وهون الشعرة اللي قصمت ظهر البعير:
آخر أسبوعين في التاسع صرت بعد التنظيف بالطريقتين اللي ذكرتهم أعيد عليها كمان مرة بالكريم!!!
ما بعرف إذا هاد اسمه وسواس ولا شو...بس هاد اللي بعمله...هلأ وين المشكلة؟
المشكلة أول شي ظهرت عندي بقع بنية، سألت الدكتورة عنها وقالت لي انها تشققات ورح تسبب ترهلات!
ووين الكارثة؟ انه بعد الإجرام اللي أجرمته في أكثر منطقة حساسة صار عندي التهابات لا تطاق، وحرقة شديدة في البول، وما خليت شي ما عملته...وانتوا عارفين انه الإلتهابات مو هلأ وقتها أبداً...لأني على وشك ولادة ، ومو باقي لنهاية شهري الا يومين!!! والكل أكدلي انها الإلتهابات على موعد الولادة تسبب آلام شديدة للنفاس...
الله يهونها علي...
الصراحة انا حبيت أنصحكم بعدم المبالغة في الأمور، مع اني متأكدة اني ما رح أتراجع عن اللي بعمله، لأني مسرسبة وموسوسة زيادة، بس الشاطر اللي بتعلم من خطأ غيره، وعالأقل اللي مش قادرة أنا أطبقه لأسبابي النفسية حبيت أنصحكم فيه يمكن أنتو تكونوا أعقل مني وأرحم بأنفسكم...
وسلااااااااااااااام...
الروابط المفضلة