لكل إللى متأخر حملهم سنة أو أقل ..مهم جدااااا.. (تجربتى)
السلام عليكم ورحمة الله وبركاته
الحمد لله رب العالمين وبه نستعين والصلاة والسلام على أشرف المرسلين
أحبائى فى الله
رزقكم الله الذرية الصالحة عاجلا وليس آجلا آآآآآآآآآمين يارب العالمين
أنا حبيت النهاردة أحكيلكم قصتى وأقولكم تجربتى علشان تستفيدوا منها لأنى حاسة إن فى كتير فى المنتدى فعلا محتاجنها
هحاول أختصر ومطولش عليكم
أنا متزوجة من سنة و9 أشهر . حملت بفضل الله بعد زواجى بشهرين والحمد لله تم الحمل على خير وأنجبت طفل جميل ولكن توفاه الله بعد 35 يوم من ولادته
وبعدها لأنى كنت تعبانه جداااا من الحمل والولادة وكمان وفاة الطفل كانت مأثرة على نفسيتى فحبيت أريح شوية وأخدت حبوب لمدة شهرين فقط لأنى مكنتش مستعدة لحدوث أى حمل وكنت فاكرة إنى هاخد أكتر من كدة بس بعد شهرين حسيت إنى نفسى أحمل تانى علشان أحاول أعدى أزمتى وحزنى على طفلى وأحس إن فى أمل جديد
أول شهر محصلش حاجة (مكونتش مهتمة أوى آدينى بستريح كمان شوية ) تانى شهر مفيش .. تالت شهر بدأنا نتربص لأيام التبويض عشر أيام فى الشهر تقريبا بيحصل فيهم جماع يوميا حسب نصيحة الدكتورة بتاعتى وبعدين الدورة إتأخرت وبعدين جات وبدأ اللعب بالأعصاب والتوتر يبتدى .. ولأن زوجى طبيب وعنده عيادة كان حكاية العشر أيام التبويض يحدث فيهم جماع كل يوم كان شئ صعب الإلتزام بيه .. فكونا بنحس بتأنيب الضمير والتقصير
والشهر إللى بعده أول ما يبدأ أبدأ أكتب أيام الشهر فى ورقة وأخمن أيام التبويض وأعلم عليها وأضغط على زوجى تى لو كان تعبان أو راجع من العيادة متأخر وكانت أيام خالية من المتعة عبارة عن تأدية واجب منزلى ... حتى إننا كنا أحيانا لما بتنتهى أيام التبويض بنبعد عن بعض وميحصلش بنا أى علاقة إلا فى أيام التبويض إللى بعدها
حتى إنى إتصلت بالدكتورة وقولتلها مفيش طريقة تانية قالتلى لأ لازم عشر أيام التبويض يحصل فيهم جماع كل يوم أو على الأقل جداااااااا يوم ويوم بس مهم جداااااااااااا
بصراحة ملينا حتى إنى كنت متماسكة لحد الشهر الخامس إتأخرت عليا الدورة 5 أيام ويوم لما جات إنهرت فى البكاء الحمد لله أنا راضية بقضاء الله وعارفة إنى أحسن من ناس كتييييييييييييير جدا بس الضغط النفسى بيأثر وكل إللى حوالينا بيسأل وبيوترنا أكتر
وقررنا أنا وزوجى إننا نسافر لطبيبة أخرى سمعنا عنها كلام كويس وكنا فاكرين إنها هتدينا منشطات أو أى حاجة تساعد
المهم روحنا للدكتورة
وحكينالها القصة من الأول
قالتلنا إننا لسة بدرى أوى لما نقلق .. وقالت إن لما الزوج والزوجة بيكونوا طبيعيين مفهومش أى مشاكل بتكون نسبة حدوث الحمل واردة خلال أول سنة زواج .. لما بتتأخر عن كدة بنبدأ نشوف فين المشكلة وممكن ميكونش فى مشكلة
يعنى تأخر سنة مش مقلق ... وبالذات ليا لأنى حصلى حمل قبل كدة
وقالتلى إنها مش هتدينى أى حاجة خالص دلوقتى وقالتلى إنسى الحكاية دى خالص كمان 6 شهور على الأقل وبعد كدة ممكن نبدأ نشوف لو فى مشكلة نعالجها ولو مفيش هنفضل زى ماحنا
سألتها عن أيام التبويض
قالتلى إنها مش محتاجة مننا أكتر من مرتين إسبوعيا على مدار الشهر كله تكفى لحدوث حمل بإذن الله ولا تعدى أيام تبويض ولا تتعبى نفسك
لأن الحيوانات المنوية بتختزن فى رحم المرأة من 3 إلى 4 أيام وبتكون جاهزة لتخصيب البويضة فى أى وقت تخرج فيه
وكمان ده يدى فرصة للحيوانات المنوية إنها تكون أكثر كثافة وده بيكون أفضل .. لأن الجماع يوميا بيخلى القذف قليل جدا عند الرجل
بصراحة لما قالتلى الكلام ده حسيت إن هم وإنزاح من على قلبى حتى لو إتأخر الحمل كمان .. لأن إللى كان بيزهقنى أنا وزوجى هو إنتظار أيام التبويض والإستعداد ليها وحتى بعد ما بتنتهى أيام التبويض مكونتش أسافر فى أى مكان أو أعمل أى مجهود لأنى بخاف إنى أكون حامل وكنت متلخبطة مش عارفة أعامل نفسى على أى أساس
ونصحيتنى إنى آخد فوليك أسيد قبل حدوث الحمل
وإدتلنا حبوب للإلتهابات إحتياطى فقط مش لأنها شافت حاجة حتى انى ملتزمتش بأخدها أوى
والحمد لله بدأنا الشهر ده براحة نفسية بدون قلق وإلتزمنا بكلامها بدون أى توتر حتى إن زوجى كان مسافر لمؤتمر وسافرت معاه وطلعت من دماغى إنى خايفة من السفر وزورت صديقاتى وكان شهر خفيف وظريف على قلوبنا إحنا الإتنين
واتأخرت الدورة تاااااااااانى
بس الحمد لله مجتش والحمد لله حملت فى الشهر ده
وحسيت إن ربنا جعلنا السبب هو عدم التوتر والقلق خلال الشهر
معلش أنا طولت عليكم بس عارفة إنكم محتاجين نصيحة الدكتورة دى زى ما كنت أنا محتاجاها وقتها لأنكم أكيد بتمروا بنفس القلق الشهرى فى انتظار أيام التبويض وانتظار الدورة
وحابة أقولكم حاجة
متزعلوش من تأخر الحمل فى أول سنة جواز واحمدوا الله ... ماهو أنا مثلا حملت على طول وفرحت بحملى وولدت ولد جميل والحمد الله راضية بقضاء الله وفرحانه بيه وتوفاه الله ...
وتخيلوا انا يوم زواجى كان 21 يوليو وكان وفاة ابنى يوم 22 يوليو فى السنة التالية ... يعنى مرت سنة كاملة
ورجعت أبدأ من جديد بعد تعب حمل وولادة قيصرية (يعنى ضاعت منى فرصة كمان لأن عدد الولادات القيصرية محدودة) وتجربة أليمة وخوف من تجربة جديدة .. وأحمد الله على كل شئ وأؤمن إن ده هو الخير ليا وأفضل من غيرى كتير جداااااا والحمد لله . بس انا بقولكم الكلام ده علشان تعرفوا إن تجربتكم إنتوا كمان أفضل بكتير من تجارب أخرى
يعنى ربنا ممكن يكون كاتبلكم الخير يعنى محدش عارف الخير فين فى الحمل البدرى ولا الحمل المتأخر المهم الثقة بالله إنه فى قضاءه كل الخير لينا ونرضى بيه مهما كان ونعيش اللحظة ومنخليش أى حاجة تفسد علينا حياتنا ونفترض الأسوأ مننا هتحسوا إنكم كويسين أوى وتتحسدوا كمان
ويكون همنا الأكبر هو أن يحسن الله خاتمتنا ولا يجعل مصيبتنا فى ديننا
والحمد لله الذى بنعمته تتم الصالحات
أتمنا إنكم متكونوش مليتوا من طول الكلام وتكونوا إستفدتوا منه
وأسأل الله العظيم رب العرش الكريم أن يرزقكم الذرية الصالحة عااااااااااااجلا وليس آجلا إنه كريم حليم قريب مجيب
آآآآآآآآآآآآآمين
وادعولى أن يتمم الله حملى ويرزقنى بالولد الصالح وأن يرزقه طول العمر وحسن العمل وسعة الرزق وسعادة الدارين
سبحانك اللهم وبحمدك. أشهد أن لا إله إلا أنت. أستغفرك وأتوب إليك
رد مع الاستدلال
الروابط المفضلة