السلام عليكم ورحمة الله وبركاته
شلونكم حريم
حبيت نفتح ملف للي مركبات لولب بجميع انواعه عشان نستفيد من تجارب بعض..
من النواحي السلبيه والايجابيه.. قبل وبعد التركيب
حتى الي مرت بالتجربه وشالت اللولب تشاركنا بعد عشان نستفيد
وانشالله تعجبكم الفكره
المهم
انا ببدأ بقولكم عن تجربتي وبنفس الوقت باخذ رايكم
انا ولدت قيصريه وقالت لي الدكتوره اذا حملتي بعد اربع سنوات في فرصه كبيره انج تولدين طبيعي مره ثانيه وانا طبعا ابغى اجرب طبيعي
وطبعا وقع الاختيار على ((اللولب الهرموني)) وزوجي شجعني
طبعا اول ماركبته الدوره تلخبطت لمده ثلاث شهور
بس بعدين انتظمت
وبعد ماكانت دورتي ثمان ايام وغزيرررررره ..
صارت 3 ايام ومجردافرازات بسيطة.. وبدات الفتره من الدوره للدوره الثانيه تتباعد قد تصل ل 4 شهور ماتجيني الدوره
طبعا هذا طبيعي مع اللولب الهرموني
ومرت الاربع سنين بسلام بس لاحظت بعض السلبيات في هذيك الفتره(تساقط الشعر<< الحمدلله باقي كم شعره للحين ماصلعت , وقلة الرغبة ) فقط
وبعد ماخلصت 4 سنين و 6 شهور قررنا ان نجيب اخ لولدي كوكو << صارت قصة الف ليله وليله
وشلت اللولب اخر يوم لي في الدوره الي هو 2 فبراير 2007..
وبعد ماشلته بدات بيومين التقلصات انواع واشكال.. فرحت انا ووجهي عبالي ايام التبويض
وبعدين بدت تنزل افرازات دم متقطعه
لحد اليوم 15 فبراير انفجرت قنبله الدماء والشظايا .. بدت عندي الدوره الشهريه الي ماشفتها من اربع سنين ونسيت شكلها
واليوم لي خامس وللحين تنزل دماء كثيفه وقطع دم متجلطه بكثرررررره ,, وسالت الدكتوره تقول هذا طبيعي بعد اللولب وراح تنتظم الدوره لفتره من 3 الي 6 شهور
وشكلي في هالفتره مارا اقدر احمل لان الدوره ملخبطه .. والله يعين
شكلي وجعت راسكم بقصتي بس حبيت افيدكم واشارككم بما اننا في الهوا سوا والله يعننا احنا الحريم
واللي كانت مركبه قديما او حديثا تشاركنا بقصتها وتعليقتها ولاتحرمونا ياحلوووين
وانا بانتظاركم
صديقتكم ومحبتكم
مسافرهـ
الروابط المفضلة