السلام عليكم ورحمة الله وبركاته
يسعد صباحكم ان كان صباح
يسعد مساءكم ان كان مساء
واخييييييييييييراً قدرت اتفرغ واكتب قصة ولادتي بحــلا
اييييييييييه فلم هندي والله بس تحذير ترى بالتفصيل الممل الي مالها خلق تقسمها على دفعات هههههههههه
بسم الله نبداء
زي مانتوا عارفين انا سعوديه لكن عايشه بمصر لظروف دراسة زوجي، جيت السعوديه علشان اولد
يوم السبت الساعه 12:30 الظهر كان موعدي مع طبيبي (د.علاء زين الدين، مستشفى المانع العام بالخبر) وعملي كشف داخلي وااااي بغيت اموت من الالم لكن الحمدلله فرح قلبي لمى قالي اني خلاص قربت وحدي الاقصى يوم الخميس، وكمان طلب مني اني اكلم زوجي واطلب منه يحجز على اقرب طياره
وبالفعل هذا الي حصل كلمت زوجي وقلت له يابو الشباب اقرب صاروخ تعال عليه زودت بهارات شوي قلت له بطني يعورني ومدري شنو هههههههههه خرعت المسكين علشان يستعجل الجيه وفعلا راح طيران على مكاتب الحجوزات لكن مع الأسف ماكان فيه حجوزات على يوم السبت مافي الا يوم الاحد الساعه 12:00 الصباح، وحجزها
يوم الأحد الساعه 7:30 الصباح صحيت من النوم مدري وش عندي شاده الهمه صاحيه هههههههههه لو دوام ماصحيت، تعرفون مع لخبطت الهرمونات والانتفاخ حق الشهر التاسع الوحده يله يله تنام علشان كذا قمت من صباح الله خير، وبما ان مافي احد غيري في بيت اهلي والشغاله ماكان عندي غير النت يسليني اذكر اني كنت اسولف مع الأخوات الغاليات رسال ونايس غيرل وفجأه نزل علي شئ زي الأفرزات لكن خفيفه زي المويه (كأني تبولت على نفسي وانتوا بكرامه) اخترعت ورحت ركض على الحمام كنت متمنيه اشوف حاجه حمراء ولا تزيد المويه لكن مافي شئ كانت حاجه كأنها افرزات بس خفيفه زي المويه غيرت ملابسي الداخليه ورجعت على النت اسولف مع رسال ونايس وقلت لهم وكمان نايس كانت باديتها نفس الحاله المهم قلنا نتصبر ونشوف
على الساعه10:00 الصباح بدت المويه تزيد وماهي موقفه كلمت ماما وقلت لها قالت ممكن افرزات عاديه لان لو موية البيبي راح تكب كب زي حنفية المويه وان لها حراره معينه قلت شورج وهداية الله وطنشت
انتظرت صلاة الظهر وصليت ورحت اريح وطبعا خلال هالفتره غيرت ملابسي الداخلي اكثر من مره ممكن ثلاث مرات اذا مو اربعه
بما ان ابو الشباب جاي وانا لي تقريبا شهر ونص بالسعوديه بعيده عنه، اول ماصحيت على الساعه 4:00 العصرحطيت الفوطه الصحيه علشان المويه وبديت مشوراي التجميلي من كوافير لكوافير اشقال شعر سشوار، حف جسم، حواجب، والمويه تنزل وتنزل وكلمى كلت امي قالت انتظري وانتظري
خلصت من حوستي التجميله متأخر على صلاة العشاء رجعت للبيت صليت ودعيت ان تكون هالمويه علامة ولاده وقلبي وجعني قلت خنجهز الشنطه حقتي وحقة البيبي احتياط وجهزتها وحطيتها جمب الباب، مع العلم اني ماكنت احس بأي ألم اللهم مجرد تقلصات زي الدوره خفيفه جداً جداً
حطيت راسي على المخده ونمت على الساعه 11:00 بالليل عقب ماتطمنت على زوجي موجود بالمطار ووصيته اول مايركب الطياره يكلمني
صحيت على الساعه 12:30 الصبح ليوم الأحد على جوال من زوجي يقولي ان الطياره تأخرت ومراح يطيرون الا على الساعه 4:00 الفجر، ضاق خلقي مره ورجعت نمت، ومسكين زوجي كان سهران اليوم الي قبله وتعبان لان كان الجو غبار وجات موجة غبار على مصر وتعب صدره
على الساعه 3:45 الفجر ليوم الأحد صحيت على رنة الجوال مره ثانيه من زوجي، وصوته كان مره مره مره تعبان لأنه مسكين جلس بالمطار طول الوقت وارتفعت حرارته لان صدره اللتهب ، كان داق علشان يقولي انهم ركبوا الطياره وبإذن الله يوصلوا الكويت على الساعه 6:00 الصباح، قلت له ماشي الله يوصلك بالسلامه
(أهل زوجي مقيمين في الكويت، زوجي نزل على الكويت علشان يجيب سيارته ويجي السعوديه)
الساعه 8:00 الصباح اتصلت علي اخت زوجي تطمني ان زوجي وصل وانه راح ينام لأنه مره تعبان واذا صحى راح يطمني، قمت من نومي وجلست على النت كلعاده اسولف مع اخواتي الي بالتجمع (أقدم جزيل الشكل لكل خواتي الي بتجمع الحوامل اللاتي سيلدن في شهر محرم وصفر وربيع الأول لعام 1430هـ)
وبهذاك اليوم فرحنا بخبر ولادة اختي الغاليه نايس ورسال كان متحدد لها يوم الأحد يولدونها فيه تحرقصت لانها راح تولد قبلي مع انها اصلن قبلي بأربع أيام بس كان ودي نولد سواء هههههههههه<<<وش تبين!
هذاك اليوم كملت بقية اغراضي الناقصه في الشنطه حقت المستشفى وجلست ادعي ان ربي يسهل علي ولادتي ويعجلها لي لأني خلاص وصلت حدي من الثقل والتعب
دقيت على بيت أهل زوجي وسئلت عنه ان كان مسك الخط ولا لسه قالوا لسه لأنه مره تعبان ونايم وحرارته مرتفعه، قلت خلاص خلوه ينام متى ماصحى خل يكلمني، ونمت
صحى زوجي متأخر في الليل وكلمني ومسك الخط على الساعه 11:00 بالليل من الكويت الى الدمام، مدري ليش كان صايبني تعب وارهاق فضيع ورغبه شديد للنوم، رجعت نمت عقب ماقفلت منه وصحني مره ثانيه على الساعه 4:30 الفجر ليوم الأثنين وقالي انا قريب جمب بيت أهلك وش رأئك اخذك للجبيل نغير جو هناك ومنها نتمشى ممكن تولدين هههههههههه<-- ذبه قلت له يله
على الساعه 5:00 الفجر يوم الأثنين طلعت زي الحراميه من بيت اهلي خخخخخ ورحنا للجبيل وصلنا الساعه 6:00 الصباح وفطرنا ونمنا وعينا من الله خير
الساعه 9:00 الصباح بدت عندي تقلصات خفيفه وصحاني من النوم المويه الي كانت وقت عن وقت تزيد وانا اغير بهالفوط الصحيه واغير ولا ادري وش السالفه، خفت قلت لا يكون هذي موية البيبي وانا مو داريه قلت خل اكلم الطبيب واسئله افضل انه يطمني
كلمته وقلت له دكتور صار معي كيت وكيت ونزلت علي مويه من يوم الأحد الساعه 7:00 الصباح وكيت وكيت وكانت الطامه الكبرى وخرعني قالي انتي مجنونه لازم تجين عندي فوراً
اخترعت قلت لا يادكتور مافيني شئ ماحس بشئ، قالي مش شرط تحسين بشئ علشان تكون ولاده، ممكن هذي موية الجنين وممكن وممكن لازم نتأكد، قلت له دكتور انا بالجبيل مايمديني اجيك، قالي: زوجك جاء، قلت: ايه، قالي: عندكم سياره، قلت: أيه، قالي: خلاص الحين الساعه 9 الصباح قولي يبغالك ساعة زمان تجهزي حالك، وساعة زمان طريق من الجبيل للخبر وساعة زمان زحمه يعني على الساعه 12 الظهر بالكثير انتي عندي، انا حعمل عمليه واستناك، قلت: لا يادكتور تتوقع ولاده، قالي: الله أعلم، بس انتي تعالي، قلت: اجيك يادكتور على العياده، قالي: لأ على طوارئ الولاده على طول، طبعاً انا <-- الوجه يعبر
خفت بصراحه ودقيت على ماما قلت لها ماما الوضع كيت وكيت وكلمت الدكتور والمويه زايده قالت ماعليك منه، ماعنده سالفه انا بصراحه ضعت بين امي والدكتور، قالت لي ماما روحي نامي واذا صحيتي تغدي وبعدين روحي له على العصر، طبعاً انا خايفه ماودي اروح اخاف اولد (راحت امنيات الولاده لمى جت الصجه) فمشيت على كلام امي
طلعت على غرفة النوم ودخلت شوي شوي علشان مايصحى زوجي ويسئلني وش فيني لأن كان لون وجهي بنفسجي من الخوف <-- زي الخط بالضبط خخخخخخخخ، وبس وجهي راح يفضحني واخاف يقولي يله نروح المستشفى
وفعلاً صادني زوجي وسئلني وقالي انتي مجنونه ( مدري وش قصة انتي مجنونه هذاك اليوم) وقمنا ومسكنا الخط على الساعه 11:00 من الجبيل للخبر وانا ميته خوف
خلال الخط، اقول لزوجي على راحتك ماورانا شئ وانا ابي اضيع الوقت قد مااقدر علشان مانوصل خخخخخ طبعاً لاني ماكنت احس بأي ألم، اشقال محطه ماوقفنا عندها هههههه، اشقال بقاله ماوقفنا عندها، احلى شئ اخر الطريق عقب ماخلصت الحجج قلت له مشتهيه شاي نعناع <<<<طبعاً لاني شفت قهوة دربي، وقلت له ابي قام وقف واشترى لي وسويت شاعريه بعد اقوله وش رائك نصفط ونشرب على الراحه مع هالجو الشاعري وحرارة الشمس وصلوخة الكرسي كان جلد ههههههههههه المهم صفطنا وشربنا
على الساعه 12:00 الظهر خلصت حججي ولسى ماوصلنا بس كنا نمشي شوي شوي علشان زوجي كان مريض وحرارته مرتفعه مسكين
المهم الزحمه ماقصرت واخرتنا زياده، وصلنا المستشفى على الساعه 2:00 الظهر ودخلت الطوارئ، وبدى قلبي يخفق من الخوف وقاموا الممرضات يتراكضن حولي وانا اقول لهم نو دلفيري نو دلفيري جست شكينغ، يعني مافي ولاده مافي ولاده بس تشيك وهم يقولون لي كلهم يقولون كذا انا خفت
يتبع
الروابط المفضلة