بسم الله الرحمن الرحيم
والصلاة والسلام على اشرف الانبياء المرسلين وعلى عباده الصالحين
الله يمسيكو بانوار النبي يارب
شلونكو يا بنات ويا ستات ويا حوامل ويا والدات؟
واخيرا وليس آخر
بعد 9 اشهر و14 يوم
شرف عريس الهنا
الحج عبد الله
والقصة والرواية بتبلش من طرف ها الحكاية
في يوم وليلة
اكتشفنا انه في بوبو جديد رح يشرف على العيلة الكريمة
وبوبو تالت لعيلة الماسة
حمدنا ربنا وشكرنا على نعمه الكتيرة ودعينا انه ما يحرم ها النعمة من اي حدى يارب
وبلش الحمل والوحام والنوم والتعب والحزااااااااااااااز
يا امي على الحزاز حرقة معدة الله لا يدوقها لحدى بتدبح وبتحرق الصدر حرق
ما علينا من ها الطويلة والقصيرة نفوت على الويم المشهود يوم التخطيط العالمي
يوم الاربعاء 21/4/2010 الساعة 10 بالليل
رحنا وخططنا والحمد لله كل اشي تمام وعال العال بس لازم تيجي الصبح عشان نولدك
ولي وليش يا دكتور افندي
فش معي طلء
قال حتى لو بنعطيكي طلء صناعي
وانا اسمع ها الكلمة من هون واعيط من هون
بديش يعني بقولكو بديش
قامت القابلة اخدتني على جنب وحكتلي
شغلتين بدك تعمليهم
زيت الخروع.................... والاتصال الاكاديمي التعليمي ..................اللي هو هداك
ولليييييييي بديش يا عمي بديش
قال ذنبك على جنبك............بس الوضع الاكاديمي هو نفس تأثير الطلء الصناعي
المهم روحنا وشربنا خروع خلطه مع عصير تانج وكروعت العلبة كلهااااااااااااا
واخخخخخخخخخخخخخخخ والاشي التاني
وتاني يوم رحت على المستشفى وكان عندي توسع 3 سانتي
هذا الحكي الساعة 12
وعلى 4 بلش الوجع يزيد زي ضرب النار
للامانة الطلء الصناعي بدبح ووجع من ثقاع الدست الاحمر
والله ما قدرت عليه ورجلي لهلاء بوجعوني وعظامي مش حاسة فيهم ابدااااااااااااا
وعلى الستة بالتكة شرف الافندي وما شاء الله ولا قوة الا بالله
طالع شب حليوة افندي ..........مو ناقصه غير قميص تفته هندي
والحمد لله عسلامتي وعسلامة كل اللي ولدو معي والله يقوم بالسلامة كل اللي رح يولدو
نهفات الميلاد:
وحدة بكرية خايفة كتير ههههههههه مش عاجبها تختها تاع الميلاد ههههههههه قال بدها ايني اقوم انا عشان هي تقعد محلي
يا حبيبي لولا العيب كان قمت حطيت في حلقها قرن فلفل احمر
ههههههههههه بس قلت بكرية ومش فاهمه وين الله حاططها والله يعينها
حكيتلها والله لولا انهم مربطيني بالتخطيط كان حياكي الله بعطيكي التخت ههههههههه (اي تحل عني)
معيطش على حالي
عيطت على غيري اسمع ها النسواين يولو ويصرخو وانا اعيط عليهم ياربي
وفاتت علي حماتي وتهدي فيني يقطع شرك مالك يا لموسة
بحكيلها مش قادرة استطيع صوتهم بقطع القلب يختي خليهم يسكتوووووووووو
شنطة البوبو هههههههههههه في الدار متروكة ولي شو ها العجئة وقعد ساعة البوبو بلا اواعي يستنى بالشنطة عبيل ما جابها معزوزي...........(طبعا تاركينة بالحضانة)
اسوء شي بكل ها الرحلة
انهم طعموني وجبة غدا
ما بعرف ليش مع انهم بحكولي احنا بقسم الولادة ما بنطعميهم الوالدات بس ابصر وين راح تفكيرهم يومها وانا كنت جوعانة ووقت الوجبة ماكنتش لسا معي طلء فاكلت
بس ساعة الميلاد استفرغت وكان موقف مزعج ومؤلم الي لانه صار كل اشي يوجعني
ولي بطني وويلي حلقي ولا ويلي طلءي
فاوعو يا حوامل تاكلو ساعة الطلء
بعد الميلاد
بنصحكو تنامو بالمستشفى على الاقل ليلة عشان ترتاحي خاصة اذا كان عندك اطفال بالبيت لا تخافي عليهم معزوزك بدير باله عليهم ويختي خليهي تعب اشوية ويقوم بشوية واجبات عنك
بنصح تاخدي شاور بعد الميلاد مية سخنة لانه جد بريح الاعصاب خاصة انه مية المستشفى سخنة وهههههههه ما بتخلص بضل تكر مية سخنة(وين يا ام محمد ووين حنفية المية اللي وعدتيني فيها)
في البيت
ديري بالك على حالك واهم شي تنامي منيح
وبدك اسبوع لتشدي عظمك واتغذي وكتر سوائل وخضرة وحركي رجليكي...........خوفا من تجلط الدم
وبس هذا
وان شاء الله تكملو اربعينكو على خير
وسلامة تسلمكو
وفوتكو بعافية
تحياتي واحتراماتي
الماسة
ام سوسو ولولو
والتالت اللي شرفنا
عبد الله
رد مع الاستدلال
الروابط المفضلة