السلام عليكم يا بنات
وحشتوني والله وشكرا لي كل اللي سال عليا
زوجي اخدني علي المستشفي من اربع ايام يوم 4 ابريل لان الضغط كان عالي 160/110 واخدوني علي خوانه ظبطولي الضغط وفضلت في المستشفي لحد ما ولدت امبارح 7 ابريل فضل الدكتور يديني تحاميل طلق صناعي وبعدين حبه سيتوتك بلع وبعدين 3 انصاص منها حطوها في المهبل علي مدار 3 ايام والله والرحم مكنش عايز يستجيب ابدا الا بعد ما اخدت الحبوب دي في المهبل وبدا الطلق امبارح 4 الفجر وللبنات البكريات الطلق ده عباره عن مغص بيجي متقطع كده وكان بيجي لي بمعدل كل 5 دقايق وبعدين بدا ينزل دم جم كشفوا لقو الرحم فاتح 1 سم نقلوني غرفه الولاده وسابوني حطولي الاكسوجين و نمت شويه بس كل ما تيجي الطلقه امسك في السرير بس كنت بحسها اخف بسبب الاكسوجين ده النيرس قالت لي ان فيه مهدأ كنت اخد نفس عميق لما تيجي محسش بيها جامده قوي وبعدين فتح الرحم 2 سم قاموا زودوا لي طلق في المحلول وبدا الطلق يزيد ويجي ورا بعضه بعدين فتح 5 سم وبعدين 8 وبعدبن بدات احس اني عايزه ادخل الحمام حاسه بضغط في الحوض وبقيت محرجه عايزه اقولهم عايزه ادخل الحمام الدكتور قالي حتحسي انك عايزه تتبرزي (اعزكم الله) قلت له اه قالي عشان الجنين نزل الحوض ادفعي اي حاجه ميهمكيش 10 دقايق وارفع لك رجلك طلع بره ورجع لقاني ولدت الجنين خرج معاه نصف المشيمه فاداني مخدر نمت 5 دقايق بالظبط صحيت لقيته طلع باقي المشيمه والموضوع كله خلص
بس بجد احساس رائع وقت نزول الجنين واكيد كان حيبقي اروع لو كنت سمعت صوتها بتعيط لكن الحمد لله علي كل شئ الواحد بيحس انه ارتاااااااح وحسيت اكني عايزه اقوم انط من علي السرير واني بقيت فرش قوي.
بعد كده زوجي استلمها وغسلها وصلي عليها ودفنها.
علي الرغم اني كنت في غرفه الولاده سامعه الستات بتصوت وبعدها صوت البيبي ودموعي كانت بتنزل قبل ما اولد وبعد ما ولدت واتنقلت غرفه كانت معايا في الغرفه واحده والده وبيجيبوا لها البيبي واسمع صوته قلبي يتخطف لكن والله والله يا بنات ربنا نزل عليا صبر وقوه والحمد لله رب العالمين اد ايه انا سعيده بالتجربه دي واني اتعلمت احساس الولاده واد ايه احساس رائع وقت نزول البيبي وكفايه ان بقي ليا بنوته في الجنه ويارب يارب تاخد بايدي انا وابوها بوم القيامه وتكون شفيعه لنا يارب العالمين
طمنوني حد ولد والا لسه؟؟؟ ربنا يارب يكملكم كلكم علي خير ويفرحكم بشوفه فلذات اكبادكم في احضانكم وتكون ذريه صالحه باذن الله
ولا تنسوني بدعائكم ان ربنا يعوضني عنها خيرا عاجلا غير اجلا باذن الله
الروابط المفضلة