السلام عليكم و رحمة الله و بركاته
كل عام و أنتم بألف خير
و عيد سعيد
شوفوا بقي النهاردة انا عملت لحمة مشوية بتتبيلة أخدتها من الغالية roina
مع شوية تعديلات بسيطة جدا لتناسب ذوقنا في البيت
يالللا نبدأ
التتبيلة
1/2 كوب زبادي
عصير ليمونة كبيرة
2 ملعقة خل
4 فصوص ثوم
بصلة مقطعة كبير
ملعقة كبيرة صلصة طماطم
ملح
فلفل
كسبرة جافة
بابريكا
زنجبيل جاف
و توابل لحمة
و أكيد اللحمة هههههههههههههههه
انا خلطت كل المكونات مع بعضها و حطيت اللحمة فيها
نقعت اللحمة في التتبيلة لمدة 3 ساعات
ثم وضعتها بالتتبيلة بتاعتها في طاجن و ضفت عليها 1/2 كوب مية صغير و حطيتها علي النار من فوق و ده عشان حاجتين
أولا أضمن ان اللحمة تستوي نص سوا عشان تكمل في الفرن
و كمان عشان الطاجن هياخد وقت كبير جدا عشان يسخن في الفرن فبأسخنه فوق الأول
أسيب الطاجن علي النار وهو مكشوف لغاية المية ما تتبخر
بعد كده أإطي الطاجن بفويل و أدخله الفرن
أسيبه لغاية ما يستوي و طبعا مش هياخد وقت طويل لأنه تقريبا أصبح نص سوا
و بعد ما يطلع أكون مجهزة فحمة مشتعلة و أطفيها جوة الطاجي فوق جزي من التتبيلة و أغطي الطاجن عليها و أسيب اللحمة تاخد ريحة الفحم
و ده بعد ما خرج
و هنا في طبق التقديم
ندخل علي الفتة
و دي فتة ماما ربنا يخليها ليا يا رب
و بصراحة عمري ما دوقت أطعم منها
نبدأ
رغيفين عيش مصري نقطعهم و نحطهم في صينية
بعد كده أجيب رز أبيض مطبوخ حوالي كوبين رز مطبوخ و نحطه فوق العيش
بعد كده أ،ا كنت مجهزة شوربة ضاني ساخنة
نسقي بيها الفتة
نحط في مقلاية تيفال
ملعقة زبدة كبيرة أو سمنة + قطعة لية اللي هي دهن الخروف و بعد كده نضيف الثوم و أول ما يبدأ يصفر أحط الخل و أسمع الصوت الجميل ثم شوية شوربة عليهم في المقلاية عشان الطعم يتشرب و يسهل التوزيع علي وش الفتة
بعد كده نحطها علي وش الفتة و نوزعها كويس
و بعد كده نغطي الصينية و نحطها علي النار من فوق شوية لغاية ما تتشرب الخل و الثوم و لاشوربة
انا بقي قلت بما ان الفرن شغال حطيتها في الفرن مع اللحمة
و ده شكلها النهائي
بس و بالهنا و الشفا
يا رب تكون عجبتكم
الروابط المفضلة