التليتلي
السلام عليكم ورحمه الله وبركاته
التيلتلي معروف عند الكل بالصح فيه اختلاف في التقديم او طريقه الطبخ
اليوم راني انقدملكم طريقتي في عمل التيلتلي والنتيجه مضمونه وتعجبكم
لعمل التليتلي انا درت نص كيلو
رشي على التليتلي الماء وشوي زيت وملح وحركيه مليح بين يديك حت يتشرب الماء
وعلى جنب حطي الماء يغلي
هنا راهي اتشرب الماء
اتحطيه في الكسكاس بفور شوفي الفرق من حطيته
وهنا راهو قرب يكمل والحبه بدات اتشد روحها واتغير لونها
انحطها في القصعه وانصب عليها الماء الطاااااااااااااااااااااابخ
السخووووون جدا
شوفي كيفاش
اتخليه في الماء السخوون مليح حت الحبه تبدى تهشاش
وينقص الماء مثل في الصوره
ومن بعد نحيه وحليه يزيد يشيح
ومن بعد اخواتي زيدي شوي الزيت او سمن حلحلي حبات التليتلي بين يديك وعاودي فوريه شوي
وتلقيه واجد انسيت ما صورتش الخطوه الاخيره
نرجعو لتجهيز المرق وهو كالتالي ;
والصور تتكلم
المكونات
هنا قليت قطع الدجاج مليح حت اتشد البنه
زيدي عليها البصل وخليه يتقلى معاها مليح وهالخطوه مهمه باش اتجيط البنه مليحه وطعم البصل ميخرجش في المرق
ومن بعد زيدي كل المكونات الباقيه
وعاود خليهم يتقو مع معض مليح مليح
امريقي بالماء السخون وزيدي اللحم المرحي من فوقه
واغلقى الطنجرة
وفي نفس الوقت حطيت الخضار اتفور بوحدها وهالفكره جاتني لان زوجي ميحبش المرق الي طايبه فيها الخضار
كي اتكون المرق نص طياب خرجي قطعه الدجاج وحطي معاها الخضره الي فورتيها وانا زدت معاها البطاطا
وحطيهم يتحمور في الفرن
وعاودي خلي المرق حت تخثار عندك وفي الاخر زدت الفلفل الاخضر وورق الرند
قبل ما اتقدمي لازم اتخلي التليتلي والمرق واتخليهم يتجانسو مع بعض ويشرب المرق مليح
وقدميــــــــــــــــــــــــــــــــــــــه بالصحه والهنا
ايهم ولدي قاللكم شوفوني راني كليت الصحن الكل ماااا ابنه
الروابط المفضلة