بسم الله الرحمن الرحيم



حبيباتي الغاليات




طبقنا اليوم : فاصولية بزيت , من أكلات جداتنا , و هالطبق جدآ جدآ جدآ لذيذ , و ما بيينشبع منه , هالحكي على ضمانتي :




كانوا جداتنا يطبخوه , و لسه نحن كمان منعمله لليوم , و الفرق : طريقة التقطيع , كانوا الجدات , يشقوا قرن الفاصولية بالطول من فوق لتحت , و بعدين يقطعوه شقف , و لكن نحن التقطيع عنا : عادي متل الصور




استخدمنا : كيلو و نصف فاصولية خضراء


غسلناها و قطعناها

حطيناها بالطنجرة عالنار مع كمية من زيت الزيتون ( زيت الزيتون أطيب بهالأكلة من أي نوع زيت تاني ) ,



مع كاسة كبيرة ماء , و رشة ملح ( بتقدري تحطي التوم بهالمرحلة ) ,



و غطينا الطنجرة , و تركناها على نار هادية حتى استوت الفاصولية تلت أرباع استوا

بهالأثناء , راح نحضر طنجرة تانية , و نحط فيها بندورة مقشرة ومقطعة , مع زيت زيتون و رشة ملح , و نتركهن يغلوا مع بعض ليعقدوا ( ييتسبكوا )



لمن بتستوي الفاصولية تلت ارباع استوا , راح نشيل نص الكمية , و نحطها فوق البندورة



الكمية المتبقية بالطنجرة : راح نحط فوقها كزبرة خضراء مغسولة و مفرومة , و توم مدقوق , و نحركهن شوي ,



و نغطي الطنجرة , و نتركهن على نار هاااااادية مع التحريك كل شوي و شوي , لفترة معينة , لييستوا مع بعضهن البعض





و هالفترة , راجعة إلك و لذوقك , في ناس بتتركهن نص ساعة , لييستووا كتير منيح مع بعض , و ييتشربوا طعمة بعض ,


( متل ما اعملنا هون ) , و في ناس بتحب الفاصولية عم تقرش , يعني غير ناضجة عالآخر , و بهالحالة , بتتركهن بس عشر دقايق .


و هي الطبخة بعد السكب








هلأ : خلصنا الجزء الأول , و راح نشوف كيف طبخنا النص التاني من الفاصولية مع البندورة بالرد القادم .

راح تلاقو آخر صورة : تحت , بس ما بعرف ليش
حطيت المؤشر فوق , و عم نزلها مكانه , نزلت تحت لحالها
راح ييجنني تنزيل الصور بهالمنتدى ( بس بدون زعل )

هلأ : يا طويلات العمر :

النص التاني من الفاصولية : قلنا مسبقآ : إننا حطيناه فوق البندورة المسبكة ,

و حطينا فوقهن كمان توم مدقوق , و زدنا شوية مي

و تركناهن يغلوا مع بعض كمان شي نص ساعة



على نار هاااااااااااااااااااااااااااادية جدآ لحتى استووا

و هي الطبخة بعد السكب



( وللللللللللللللللللللللللللللللللليش : الحمد لله نزلت محلها , ما نطت لتحت )

( هالطبخة طعهما مختلف عن الفاصولية الخضراءالمطبوخة مع لحمة , و ماء البندورة , وبالنسبة لإلي : هاي أطيب )

بتمنى : تعجبكن هالأكلة : بصراحة النوعين : أطيب من بعضهن البعض

ملاحظة : للأمانة : أنا ما كنت وقت الطبخ و التصوير , لإني طلعت من شغلي , و رحت عالسوق , لازمني شوية أغراض , و طولت شوي
( كنت بباب توما , و كانت أصوات القصف قريبة جدآ )

أنا جيت لقيت الغدا جاهز

ماما طبخت

و أخي صور

و أنا اتغديت

و تقبلوا مني أحلى تحية , و لا تنسولي الشعب السوري من الدعاء

و دمتم جميعآ بود

ممم
وصفة جديدة علي انا شخصيااا وشهيتيني الصراحة,,تسلم ادين ال طبخ وصور واكل
بجربها ان شاء الله
وربي يفرجها على اهلنا بسوريا,,يارب كون معهم وارحمهم وانصرهم,,

تسلميلي ياايثار طبخاتك بتجنن ويسلمو ايدين اللي طبخ وصور
وبالنسبه للوصفه بتجنن على زوقي تمام بس اولادي بيحبوها مع لحمه وبندوره وجنبهم رز
والطريقه الاولى بعملها مع الفول الاخضر وبيطلع بيشهي مع الزيت والكزبره
وبالاخير ربنا يفرج كربكم عاجل غير اجل وترجع سوريا زي ما بنحبها

تسلم ايدك حبيبتي
وربي يحفظ والدتك واخوك
اكلة مفيدة وصحية واكيد طيبة كثير
دائما اتفقد وصفاتك الجديدة
يعطيك الف عافية

ممممم

من اطيب الأطباق الفاصوليا بالزيت
انا راح اترك لكم طبق الفاصوليا بالبندورة
والطش اللي بيخصني



وربي يعجل الفرج لاهلنا بسوريا يااااااااااااااارب

كتبت بواسطة ~~زهرة المدائن~~

ممم
وصفة جديدة علي انا شخصيااا وشهيتيني الصراحة,,تسلم ادين ال طبخ وصور واكل
بجربها ان شاء الله
وربي يفرجها على اهلنا بسوريا,,يارب كون معهم وارحمهم وانصرهم,,

هلا و غلا فيكي حبيبة قلبي
شرفني وجودك و فرحني كتير
يمكن الأكلة جديدة عليكي و مع إنها بسيطة , و لكنها بالفعل طيبة كتير كتير
جربيها , بإذن الله راح تعجبك
و مشكورة عالدعاء , الله يسمع منك حبيبة قلبي
إنه على كل شيء قدير

كتبت بواسطة بيتي حياتي

تسلميلي ياايثار طبخاتك بتجنن ويسلمو ايدين اللي طبخ وصور
وبالنسبه للوصفه بتجنن على زوقي تمام بس اولادي بيحبوها مع لحمه وبندوره وجنبهم رز
والطريقه الاولى بعملها مع الفول الاخضر وبيطلع بيشهي مع الزيت والكزبره
وبالاخير ربنا يفرج كربكم عاجل غير اجل وترجع سوريا زي ما بنحبها

الله يسلمك , و يخليكي و يبارك فيكي
مشكورة على ردك الحلو متلك , فرحتي قلبي بكلامك
بالنسبة للطريقة الأولى : كمان منعملها نفسها تمام مع الفول و لكن منحمضها بليمون
و اسم هالأكلة : فول مقَلَّى ( بتسكين الميم و فتح القاف , و فتح و تشديد اللام )
و بالفعل : الفول المقلى طيب كتير , و بالعادة : إذا في قرون فول طرية منفرمها بقشورها

و بالنسبة للنص التاني من الفاصولية بالبندورة : مختلف عن الفاصولية بالبندورة مع اللحمة , و لكنها طيبة

و مشكورة على دعائك , الله يسمع منك حبيبة قلبي

إنه كريم سميع مجيب

كتبت بواسطة _-* أم زياد *-_

تسلم ايدك حبيبتي
وربي يحفظ والدتك واخوك
اكلة مفيدة وصحية واكيد طيبة كثير
دائما اتفقد وصفاتك الجديدة
يعطيك الف عافية

الله يسلمك يا أم زياد الغالية
و الله يخليلك كل حبايبك و يسلمهن و يباركلك فيهن
و هالأكلة بالفعل طيبة كتير , و بشهادة الست وعود بردها
و مشكووورة كتير على حلو كلامك و ذوقك و لطفك
و الله يعافيكي و يعافي قلبك و غواليكي
و بارك الله فيكي و بمجهوداتك الرائعة
دمتي بود

كتبت بواسطة وعود الخير

ممممم

من اطيب الأطباق الفاصوليا بالزيت
انا راح اترك لكم طبق الفاصوليا بالبندورة
والطش اللي بيخصني



وربي يعجل الفرج لاهلنا بسوريا يااااااااااااااارب

هلا بالست وعود
على حساااابك الطبق كله
تكرم عينك و بسلامة خيرك
و بالفعل الفاصولية بزيت طيبة كتير كتير , و خاصة اللي بالكزبرة
بزمانها : وحدة قريبتي : اتزوجت على سفر
و بعد كام شهر نزلت زيارة
فسألتها حماتها : قالتلها : في أكلة زوجك بيحبها كتير و إذا طبختيها كل يوم بياكل منها و ما بيقول لأ
جاوبتها قريبتي و قالتها : فاصولية بزيت
ضحكت حماتها و قالتها : مظبوط

مشكورة ستنا الكريمة على دعائك
الله يجبر بخاطرك , و يسمع منك

و مشكورة على نور المرور
ما إنحرم من هالتواجد الدافي
دمتي بود