* وصفة متميزة*الكرشات اكلة فلسطينية ولا اطيب من مطبخ الوالدة اتفضلو .......

[مجد الاقصى]

مسا الخير صبايا
كل سنة وانتو والامة الاسلامية بالف خير يارب
اليوم جايبتلكم اكلة كرشات معتبره
اكله بتنعمل بالسنة مرة بس المعظم بحبها
انا مني وعلي ما بعرف اطبخها ههههههه
بس الوالدة الله يطول بعمرها بتعملها وبتعزمني
طبعا بساعدها وبشوف كيف بتعملها

المقادير
كرشة خاروف منضفة طبعا
رز مصري
لحمة مفرومة
بهارات
وزيت
ملح
حمص حب منقوع
لبن رايب
وتومة
وجميد بودرة (اختياري )
نعنع ناشف
وبقدونس للزينة

نيجي للطريقة
بنكون منضفين الكرشة
وبنقسمها الى كرشات صغيرة
وبنعمل حشوة الكرشات

اللي هي عبارة عن
رز ولحمة مفرومة
بنحط الملح والبهارات
الفلفل الاسود والهال المطحون
والزيت والحمص الحب
بنصير نحشي الكرشة ونخيطها بالخيط والابره
امي بتستخدم خيطان ملاحف هههههه
بس تخلص من كل الكرشات
بتحطهم بطنجرة الضغط
وبتحط عليهم مي سخنة وشوية ملح وبهارات صحيحة
هال حب وعيدان قرفة

وبتخليهم ساعتين او ساعيتن ونص
وبعديها بنسلق الرز اللي بضل عادي

مية الكرشات بنصفيها
وبنحط معها لبن رايب مع نشا
واللي بده جميد بحط معلقة كبيرة بتكون منقوعة بالليل بمي دافيه
وبنحطهم بالخلاط مع سنين تومة
وبنديرهم بطنجرة وعلى النار طوالي
وبنضل نحرك اللبن لحتى يغلى
بنخليه يغلى 7 دقايق مش اقل من هيك
وبس نيجي نطفيه بنحط عليه معلقة نعنع ناشف
بنفت خبز عربي كماج
وبنحط على الخبز اللي فتيناه من اللبن المطبوخ
وبنحطه بطبق التقديم
وبنحط فوقه الرز اللي سلقناه
وفوقهم الكرشات المطبوخة

في ناس بتعمله على بندورة
وناس بتعملهم وبتشويهم بالفرن
بس هاي طريقة اهل نابلس
وامي بتعملها هاي الاكلة من 30 سنة والكل بحبها
انا ما صورتلكم الطبخة من الاول
بس جبتلكم صورة الطبق النهائي ويارب تعجبكم

هون لما حطينا الخبز وفوقه الرز المطبوخ

وهي الكرشات حطيناهم فوق الرز
امي بتفتحهم وبتحط الرز تبعهم فوق الرز اللي بالسدر
وبتقسمهم قطع صغيره وبتحط القطع فوق الرز

امي كانت عاملة معهم راس خاروف هههه
حطيناه معاهم

وهاي صورة الطبق النهائي بعد ما زيناه بالبقدونس المفروم

[CENTER][CENTER]

بتمنى الاكلة تعجبكم
دعواتكم لي يا غاليات

[RANDA 1959]

اه فروحه لطش الطبق ههههه اول رد ولطش يسلمواا وكل عام وانتي بخير للمطبخ عدلللللل

[مجد الاقصى]

اه فروحه لطش الطبق ههههه اول رد ولطش يسلمواا وكل عام وانتي بخير للمطبخ عدلللللل

صحة وهنا يارب يا ام موسى
الطبق وصاحبته على حسابك
شفتي غلطنا الكرشات مو اكله فلسطينينة اكله عالمية ههههههههه

[{ أم أنـــس }]

ما شاء الله مجود اكلة معتبرة ويكفي انها من ايد الوالدة الله يعطيها الصحة وبالهنا والشفا علي قلوبكم

[مجد الاقصى]

الله يسعدك يارب يا ام انس ويخليلك احبابك يارب

[**ام ريان **]

روعه روعه ياقلبي
يسلم ايديك
احنا بنسميها عصبان

[مجد الاقصى]

روعه روعه ياقلبي
يسلم ايديك
احنا بنسميها عصبان

وايديكي ميمي
كل بلد بسموها شكل
المصريين بعتقد كوارع بحكولها

[~~داليا~~]

يسلمو ايديك مجود
و يسلم ايدين الوالدة ويطول بعمرها يارب
*
*
*

[زوجي تاجي]

انا من ناحيتي هالاكلة ما باكلها ابداااااااااا
بس لانها من الوالدة تسلم دياتها وان شاء الله ينلفوا بالحرير

[أم فئ]

تسلم ايدينك عزيزتي .. والله يعطيك العافية ,,