كيفكم صبايا
اليوم جايبتلكم الجاج المحشي وان شاء الله تعجبكم
اول اشي لازم يكون الجاج منضف منيح
ومغسول بشوية طحين بلدي عشان تروح الزنخة تبعته
بعدين انا بتقعه بخلطة وهي عبارة عن
لبن رايب او زبادي
ملح ملعقة كبيرة
نص معلقة صغيرة سكر (منشان اللون )
زيت زيتون وبهارات مشكلة واهم اشي الزنجبيل والفلفل
سن تومة ونص قرن فلفل حار
وطبعا ليمون
وبنخلي الجاجة فيها ساعتين او طول الليل
اسفة ماصورت الجاجة وهي بالخلطة
بعدين بنيجي للحشوة اللي هي عبارة عن
رز منقوع وياريت تخلطي رز طويل مع رز مصري
لحمة مفرومة ناعم وكبدة الجاج انا كمان فرمتها وحطيتها
شوية بازيلا وشوية جزر
طبعا بس يستوو منيح بنحط الرز والبهارات
وعلى فكرة انا حطيت شوية فليفلة خضرا وربع قرن بحرق مع الخلطة
وبنسلق الرز عادي وما تنسي تحطي بهارات مشكلة وملح
وانا قليت صنوبر وبعد ما ستوى الرز حطيت عليه الصنوبر وحشيت الجاجة وسكرتها باعواد اسنان
وحطيتها بكيس الشوي وحطيت معاها بطاطا وفليفة خضرا وخرمت الكيس شوي من طرافه وحطيت شوية مي قاع الصينية
ونسيت احكي اني حطيت شوية زعتر ورق ودهنت الجاجة
بشوية كتش اب وزيت زيتون
طبعا بنحطها بفرن حراته وسط وبتاخد ساعة ونص لساعتين
انا اخدت معي ساعة وربع بس خليتها كمان ربع ساعة احسن
واتفضلو وان شاء الله بتعجبكم طبختي الصغيرة اللي على قدنا
وما تنسو تزينوها بالصنوبر واللوز والبقدونس
وانا على فكرة الرز اللي زاد من الجاجة سخنته كمان مرة
وحطيته بقاع الصحن وفوقيه الجاجة المحشية
وهاي صورة الطبق النهائي معلش مرتبتش السفرة لانه جوزي كان ضايله ربع ساعة ليوصل عشان هيك ما حطيت باقي السفرة الا لما اجى
وما تنسو تدعولي
*وصفة متميزة*دجاج محشي من مطبخي وعلى طريقتي اتفضلو ........
رد مع الاستدلال
الروابط المفضلة