قصة قصيرة بدون اطالة، انهيت دراستي في كلية الطب وتزوجت مباشرة وسافرت مع زوجي لبلاد بعيدة، حكمت الظروف ان لا نتمكن من زيارة ليبيا لمدة عامين حملت فيهما و وضعت طفلي الاول، والحقيقة انني صفر على الشمال في المطبخ وما أدراك ما مالمطبخ.
تعرفون ما يرافق الحمل من وحم ومرض، وانا يأخذني الحنين مرة الى المقروظ ومرة الى العصبان ومرة لحم راس ومرة ومرة.
الهاتف طريقة عقيمة لتعلم وصفات الوالدة، والنصائح النظرية لا تصمد امام التجربة العملية، لكنني لست مستسلمة كنت احاول واحاول(اكله ناكلوها واكلة تمشي للقمامة ،استغفر الله) .
وفي يوم من الايام كنت ابحث عن طريقة الغريبة الليبية وطلعتلي طريقة زينب محمد التي من خلالها اكتشفت عالم مطبخ لك وكل السيدات الليبيات والعربيات واخص بالذكر ماما الاء والعجلونية و امال والاخت نور الهدى والاخت سوسن وام مريم العراق والقائمة تطول.
تقبلوا مني جزيل الشكر وتحية خاصة الى الاخت زينب محمد، ومن قلبي (الله يفرج همك مثل ما فرجتي همي ويعطيك ما في عقلك، ويونسك في غربة القبر زي ما ونستيني في غربة الدنيا)
عرجون فل

الله يهون عليكي غربتك يا غاليه
والف شكر لجميع الاخوات الرائعات المتألقات
اللواتي لا يبخلن باي معلومه وان كانت صغيره
دمتي وعائلتك بكل ود

اهلا وسهلا بيك حبيبة
كلنا كنا ما نعرفو شئ
والحياة العملية تعلم خصوصا مع السؤال والتجربة
والله يبارك في الاخوات تعلمنا ومازلنا نتعلم منهم الكثير والكثير
الله يبارك فيهم جميعا
ويبارك فيك على هذه الفتة الطيبة والكريمة
الله يفرج عليك غربتك ويونسك بعويلتك
ان شاء الله نشوفوك منورة ليبيا في اقرب وقت

وانا مثلك كنت احبيبتى ما اعرف شى فى المطبخ ايضا جانا النصيب وبعد الزواج مباشرة سفر للغربه وما فيه من نتعلم منه وتطول بينا الايام الى دخلت المنتدى ولقيت الاهل والاخوة والحبايب مبدعات وشاطرات ستات بيوت والحق الكل ما يقصر ويعطى من قلب صادق
الله يسعدهم دنيا واخرة ودمتى حبيبتى بسلام

والله صدقتي كلنا هكي
حاجات واجدة تعلمناها في الغربة
ومن اوخياتنا المبدعات
اللي كانهن معانا نسالوهن يردن علينا طول
الله يبارك فيهن ويفرحهن
وانتي الغربة فرصتك لتعلم كل شي
وانا مثلك مغتربة وحاجات واجدة تعلمتها ودرتها بروحي
وربي يعينا عالغربة
ومايحرمنا من اخواتنا الليبيات والعربيات
كلهن خير وبركه

والله ياخيتى كلنا استفدنا انا كنت حاسبه روحى طباخه ماهره وماحد قدى نين دخلت لمنتدى لك واتارينى ولا شى جنب اخواتى الليبيات والعربيات
ربى يحفظهم جميعا

السلام عليكم
الله يبارك فيكم وكل عضوات المنتدى والله الغربة مرة وما في زي الوطن، صح انا خصيت بالذكر الاخت زينب محمد لانها اكثر واحدة اثرت فيا وسبحان الله ما في شي جي في خاطري وانا حامل الا ولقيتها منزلاته، وحتى ماما الاء كل شئ طبقته ليها كان رائع وهو ممكن ذكر الاسماء هكي غلط لكن من قلبي كل اخوات المنتدى ما شاء الله عليهن
على فكرة انا ليا سنة مكتشفة المنتدى وسجلت فيه لكن ما شاركتش للاسف والله كل ما انوض الصبح نغسل وجهي ونفتحه نشوف شن فيه، لكن كنت حامل وتعبانة خاصة نفسيا فاكتفيت بالمشاهدة من بعيد لكن انا حاسة كأني نتعلم من امي ومن اخواتي وتعالوا شوفوني لما اندير حاجة وتطلع مزبوطة اظن هذه تدخل في باب صدقة جارية كل ما نديرها ندعي لمولاتها
وتوا الاخت بريكة ربي يبارك فيك نبي نجرب الفتات وان شاء الله نزله ويكون اول موضوع (اكلي) ليا في النتدى

الله يبارك فيك غاليتي
وهذا شرف كبير لي اطبقي الفتات
واي خدمة ادللي امري امر
وكلنا اوخياتك في المنتدا ما تحكي راسك بكل
وفي اي موضوع مش غير الاكل ادللي والله نخدموك بعيونا

بالفعل زى ماقلتى الشكر الجزيل لكل الاخوات المنتدى عمل بصمة للجميع وخوصا انا شخصيا هوايتى الطبخ لكن كنت متابعة المنتدى بدون مشاركات بحكم النت كان عندى ضعيف لكن مشاركات الاخوات ورقى هذا المنتدى خلانى نشارك نفيد ونزيد نستفيد اثمن الرقى والنجاح لهذا المنتدى الرائع والاخوات الاروع

الله يبارك فيك يا أختي ذات الرمال ويعينك على الغربه وكل الي زيك بس عندي ملاحظه في عنوان موضوعك واكيد انتي مو منتبهه او ما عندك علم وهو انك قلتي الفضل في تعلم الاكلات او دخولك الطبخ يرجع لله وللاخت زينب وهذا اللفظ يعتبر شرك ولكن قولي الفضل لله ثم للاخت زينب.
اللهم انا نعوذ بك من ان نشرك بك شيأ نعلمه ونستغفرك لما لا نعلمه