بسم الله الرحمن الرحيم

السلام عليكم ورحمة الله وبكراته

وكل سنة وانتو سالمين
بمناسبة العيد الكبير
عيد الاضحى المبارك اللي خلص امبارح اللاثنين وكان رابع وآخر يوم
ويارب ينعاد علينا وعليكم السنة الجاي بالخير والبركة

حبيت اوريكم منسوفي الصغير بها العيد الكبير

ههههههههه
كله شقفتين وشقفة

بس ماهو على قد الاكيلة
يادوب راسي براس زوزي وبناتي الصغار يادوب ياكلو من الجمل دانه
ومين سمعني زوزي التاني نفس الاشي
ضليتني اعزم عليه
ولا رضي ياكل..........انا بحب الزلمة اللي هيك بسلخ اللحم عن العظم
ههههههه بحسس الوحدة انها فعلا طبخت وابدعت وانه مش قادر يستطيع من كتر زكاوة الاكل

ما علينا خلينا نبلش

بنركب اللحمة على النار وانا بحب طنجر البخار اسرع واريح

هاي لحمة مفرومة بحب احطها على الوجه بعد ما اقليها واملحها وابهرها

شوية لوز بنقلية كمان للوجه

نحضر اللبن هلاء
شوفو هذا لبن رايب احنا مروبينه اشترينا حليب طازة وروبناه انا بحب اخلط لبن رايب مع لبن جميد عشان تخف ملوحته لانه معزوزي بحبش المالح كتير

بنحط لكل لتر لبن رايب مثلا معلقة نشا كبيرة وبنضل نحرك فهي وهو على النار لحتى يغلي وبعدين بنضيفله المرقة
على الذوق كيف بتحبي الطعمة تاعت اللبن مركزة ولا عادي وخفيفة انا بحبه عادي وسط ومزبوط

وهاي اللبن الجميد اللي منقوع وممزوج على المولينكس

طلة سريعة على اللحمة المفرومة بلشت ميتها تنشف بلاش تنحرق برضه

ديري بالك اللبن مش لازم نوقف تحريكه لانه بفرط بعدين وبصير منظرة مش حلو

الحمد لله بلش يغلي ويبقبق

وهاي اللحمة استوت كمان
بس شو المرقة طلعت
رهييييييييييييييييبة دسمة وبتجننننننننن

ندير المرقة على اللبن

وبعدين لبن الجميد

ونحضر قدحة التومة بالسمنة البلدية
وعلى سيرة البلدية بحب اهديكو مقطع من
منسف عجاج لا لا لا لا ما ينفع
هذا المنسف بده لحمه بلديه
هيا هيا هااااااااااااااااااي

واول ما يغلي اللبن بنطش الطشة وبنقدح القدحة

شفتو ها المنظر اللي بجننن

وهلا نفلفل الرز
انا بحب اقلي ارز اشوية بقاع الطنجرة هيك بحس انه كل حبة رز لما تتقلى بالزيت بتاخد نكه وطعم اقوى

تكتروش ملح لانه اللبن طعمه مالح

مين تحب ادوق اللبن عبيل ما يتسوي الرز؟

بس اذا بتحبو اعملو متلي وعبو اللبن بالكاسة واشربو شرب
اخخخخخخخخخخخخخخخخخخ اشي فاخر على الاخر

نحضرالصحون والصواني والملاعق والكفاكييييييير

وهاي الرز

وهاي اللبن

وهيا الشقفتين

وهاي الشقفة

وهاي المرقة

وهاي الكفكيرة

وهاي اللحمة المفرومة واللوز

ايوا تستحوش مدو ايدكووووووو

وريته صحة وهنا
بس استنو ما خلصش العيد

لسا بدنا نكمل في بقية استوني

هاي شمعة



وهاي تاني شمعة



وهاي كاسة عصير هنااااااااك


وهاي التانية جنب اختها على قولة اسولة



عرفتو القصة ولا لسا؟






هلاء بينت
ضيافة صغيرة لمعزوزي بمناسبة العيد







صحن المعمول


عصير برتقال فريش



قهوة سادة


شوكولاته


مكسرات


وبس








وكل عيد وانتو سعداء واحباء مع عيلتكو واهاليكو واحبابكووووووووو


واذا فاقو بناتك الصبحيات وشافو الشمعة وباقي ها الاختراعات لاقيلك حجة مقنعة عشان رح يسألوكي
وليش ضويتو شمعة؟
وانا ليش بتضويلييييييييييش شمعة؟
ومن وين جبتو الشمعة
هههههههههه
خلص يا اسيل والله مخولتي مخاتي


لكم تحياتي واحتراماتي

الماسة

ام سهام واسيل

يسلموا ايديكي الضيافه بتجنن والمنسوف بشهي وخاصه المرقه بموت فيها
كل عام وانتي بخير ومعزوزك والبنات بخير وان شاء الله بقومتك بالسلامه وبحضنك الصبي يارب

بحياتك يارب يا احلى اماني نورتيني يا قمرة
وريتك سالمة غانمة انتي واولادك وكل عيلتك

تسلم ايدك حبيبتي
وكل سنه وانتي سالمه يارب
ويفضل جوزك وبناتك منورين حياتك يارب
وتضلي انتي الهم ست الستات يا قمر

ميسو الله يسلمك يا قمرة
ويخليلك عرسانك وتشوفيلهم احلى العرايس يارب
ويعملولك احلى المناسف

يسلمو هل الايدين دودي

صحتين يا رب

ماشاء الله تبارك الرحمن يالغاليه سلمت يداكِ على المنسف الشهي والرائع وكل عام وأنتِ بألف خير

سمعونا أحلى زغرودة يا صبايا

وريته صحة وهنا

أخيرا الماسة قالت تفضلوا .... لولولولوليييييييييييش
ايه شط ريقي على هالمنسوف وانت عم بتمطي بالقصة

بس ماستنا
عندي سؤال بريء

وليش ضويتو شمعة؟

على فكرة انا عجبتني فكرة مزج الجميد مع اللبن لتقليل الملوحة
علشان سي السيد ما بيحب الملح زيادة

ريته صحا وهنا ومطرح ما يسري يمري
وان شاء الله السنة الجاية تحتفلي بالعيد مع ابو الشبابو اسيل وسهام وعلى حضنك ولي العهد
وتضوي شموع ع طوووول

ما شاء الله لا قوة الابالله
صحة وعافية على المنسف الزاكي
وما شاء الله على هالضيافة اللي بتجنن انشاالله بضل بيتك عامر